लुका 16
16
गेल्लीङ् खुर्केङ्गी ॱयोक्पु ढङ्ज्ये मीप्प १-१५
1हुनी येशुगी खोङ् रोरङ्गी ॱलोप्टुक् दीबल हीन्दुक् ॱसुङ बेत्। मी छ्युक्पु च्यीक्ल ढोङ्बे गेल्लीङ् झ्यीक्केन् ॱयोक्पु च्यीक् यो़प्प बेत्। ॱनी हुगी ढीक्ल मी यरीगी ज्यीन्दक् दील नीज्यरङ्गी ॱयोक्पु हुगी झ्यीत् झ्यीक्की नीज्यरङ्गी नोर् घयेत् दी ये डोयेत् सीन्न पोला ज्यब बेत्। 2ॱनी ज्यीन्दक् दीगी हुगी ॱयोक्पु दी भो़न हुल रङ्गी ढीक्ल ङे केच्च्य च्यीक् ॱह घोज्युङ्। हुगो घन्ड बेक्क? रङ्गी लेगी चीस्यी ह ङल खुर्लेत्। ह रङ् ङे ढोङ्बे गेल्लीङ् झ्यीक्केल्ल मीत् स्योक् सीन्न झ्यीब बेत्। 3ॱनी ॱयोक्पु दीगी रोरङ्गी ॱसीम्ल ह ङ घन्दुक् झ्यीच्च्ये ब अक्? ह ज्यीन्दक्की ङ ले हीनी तो़न्ज्युङ्। ॱस ओक्की झ्यीबे, ङ ज्याज्ये मीप्प यो़त्। ॱनी ॱसो़ङो़न् लीन्न ॱनी, ङु छा। 4छ्ये, ङ हीगी ले हीनी थो़न्न डोये यङ्ल हीन्दुक् झ्यीबे झ्यी़ च्यीक् झ्यीन मी घयेक्की ङल ॱनेजङ् ॱयोको़र्ट्टो। हुन्दो क ॱनो़ज्युङ् सीन्न झ्यीब बेत्। 5हुनी ज्यीन्दक् दीगी भुलीन् लीन्ज्येमे मी घयेत् दी रीदङ् री रोरङ् च्याल भो़न हुनी ॱएन्स्युक्म युङ्गेन् दील खोक्की ङे ज्यीन्दक्ल घजो़त् च्यीक् जप् गोगो़प्प? सीन्न ढीब बेत्। 6ॱनी हुगी लेम्बुल ॱनुम् मान तोङ्डक् ज्येच्चो़त् च्यीक् जप् गोगो़त् झ्यीब बेत्। ॱनी गेल्लीङ ॱयोक्पु दीगी हुल रङ् दो़त्ल रङ्गी तमसुक् दील तोङ्डक् स्यील ढील स्योक् झ्यीब बेत्। 7हुनी हुगी तीङ्ल ॱयोङ्म च्यीक्ल खोक्की ङे ज्यीन्दक्ल घजो़त् च्यीक् जप् गोगो़प्प? सीन्न ढीब बेत्। ॱनी हुगी लेम्बुल ढ मुरी तोङ्डक् च्यीक् जप् गोगो़त् सीन्न झ्यीब बेत्। हुल गेल्लीङ ॱयोक्पु दीगी रङ्गी तमसुक् दील मुरी ज्य ज्येत्ल ढील स्योक् सीन्न झ्यीब बेत्। 8ढङ्ज्ये मीप्पे ॱयोक्पु हुगी हुन्दुक् झ्यीन खेसी झ्यीबल ज्यीन्दक् दीगी हुल तो़प्प झ्यीब बेत्। ॱनी हीगो डस्सी जम्बुलीङ्गी मी घयेत् हुब रोरङ्सो़ ले झ्यीप्पल मेङ्गे मी घयेत्ले खेबा यो़क्केन् बेत्। 9ङे खीत्रङ्ल ॱस्येत् योङ्। खीत्रङ्गी जम्बुलीङ्गी ढङ्ज्ये मीप्पे नोर्की लम्नी खीत्रङ्ल दगु घयेत् सो़ज्यीत्। हुनी नोर् घयेत् दी सेप्पे ॱङेस्स्यो खीत्रङ्ल हुबे धी़ ज्यी़न्दु दो़क्केङ्गी खीम्ल ॱनेजङ् ॱयोर्केन् बेत्।
10धो़न् च्युङेत्मु च्यीक्की लेल अक् मी ॱसी़ तेम्बोक्म झ्यीगुक्क हुगी धो़न् छ्यीयागी लेल अक् तेम्बोक्म झ्यीक्केन् बेत्। ॱनी यङ् मी ॱसी़ धो़न् च्युङेत्मु च्यीक्की लेल अक् ढङ्ज्ये मीत् झ्यीप्पेक्क हुगी धो़न् छ्यीयागी लेल अक् ढङ्बु मीत् झ्यीक्केन् बेत्। 11हुगो झ्यीनी ॱनी, जम्बुलीङ्गी नोर्ल अक् त रङ्गी तेन्ज्ये मत् झ्येन ॱनी, दीम्बरङ्गी नोर् दी खो़त्ल टेत्न ॱसुम्ब खोक्की घन्दुक् झ्यीन गेल्लीङ् झ्यीत् छुगेन्। 12ॱयोङ्गी नोर्ल रङ्गी तेन्ज्ये मत् झ्येन ॱनी, रङ्ल युङ्गेङ्गी नोर् दी ॱसुम्ब तीङ्ला खो़त्ल घन्दुक् झ्यीन टो़क्केन्। 13ॱयोक्पु ॱसी़ इक् ज्यीन्दक् ॱङील स्यप्च्यी़ ज्युक् ॱमीत् छुगेन् बेत्। हुगी च्यीक्ल मीत् गुव झ्यीक्केन् बेत्। च्यीक्ल धेस्सी झ्यीक्केन् बेत्। च्यीक्तङ् ज्यर्केन् बेत्। च्यीक्तङ् मीत् ज्यर्केन् बेत्। खीत्रङ्गी ज्यीन्दक् ॱङील, को़न्ज्योक् धङ् नोर्ल स्यप्च्यी़ ज्युक् ॱमीत् छुगेन् बेत् सीन्न ॱसुङ बेत्।
14पयीसक्की लोप्ल ॱस्योरे फरीसी घयेक्की हीगी केच्च्य घयेत् हीगो ॱह घोनी हुबे खोङ्ल छ्यस्सी़त् ज्यब बेत्। 15ॱनी खोङ्गी हुबल खीत्रङ्गी मी घयेक्की थोङ्सदु ढङ्बु हीन्दोक्पे छ्यलु ज्येन्न तो़ङ्गेन् बेत्। खीत्रङ्गी ॱसीम्ब दी को़न्ज्योक्की ॱह घोगेन् बेत्। मी घयेक्की थोङ् छ्यीस्स्योल ॱसम्गेन् दील को़न्ज्योक् स्यीलोक्प झ्यीक्केन् बेत्।
16छ्यो़डीम् धङ् कलुङ् ॱस्यो़क्केन् घयेत् युहन्नागी ङो थुक्लरङ् युङ बेत्। ॱनी हुनी को़न्ज्योक्की ज्यागक्की केच्च्य ॱनेम्बु ॱस्यो़क्केङ्गी धी़ युङ्गेन् बेत्। ॱनी मी घयेत् कुरीक् को़न्ज्योक्की ज्यागक्ल खेत् गेन्न स्युक् छुब झ्यीक्केन् बेत्। 17छ्यो़डीम्गी इक्तोक्की छक् च्यीक् इक् येन धो़म्मीत्ल मीत् डोगेन् बेत्। हीले त तेङ् यी़ धङ् ॱस जम्बुलीङ् हीगो ले ॱल्हा ये डोगेन् बेत्।
18मी रोरङ्गी छ्युङ्म ॱलो़ तङ्न ॱयोङ्म ठीक्न ॱनी, हुगो ॱयोङ्दङ् ङीब झ्यीबल डोगेन् बेत्। ॱनी यङ् ॱयोङ्गी ॱलो़ तङ् तङे भुमु छ्योगो ॱसी़ ॱनमल ठीक्को़दङ् हुगी ले हुगो ॱयोङ्गी ॱनम ठीक्प हीम्बे दीक्पल डोगेन् बेत्।
मी छ्युक्पु च्यीक् धङ् लाजरस् १९-३१
19मी छ्युक्पु च्यीक् यो़प्प बेत्। हुगी घो़ दील रीन् छ्यीम्मु च्येम्म घो़ ॱमुक्लोक्प घो़न्न ङीन् रीम फो़स्स्यी डो़न्से तङ्न नोर्की लोङ्ज्यो़त्ल हुगो ग ग झ्यीन दो़क्को़प्प बेत्। 20हुगी खीम्गी च्यारीगी गेक् दीदु मी टङ्बु स्युव लोप् थो़न्नर लाजरस् सीक्केन् च्यीक् युङ्न यो़प्प बेत्। 21हुगी छ्युक्पु दीगी समे ॱल्हक्टो़ पुर् तङ नोङ् योङ ॱनो़न रीगो झ्यीन हुगो दो़क्को़प्प बेत्। ॱनी हुगी स्युवे ॱम दी की घयेक्की इक् दक्को़प्प बेत्। 22ॱनी तीङ्ला हुगी टङ्बु दी ॱस्यीन खुर्नी, तेङ् यी़गी भङ्ज्येम्ब घयेक्की हुगो इगीदु अब्राहाम् झ्यीस्सल च्ये स्यक्प बेत्। ॱनी छ्युक्पु दी इक् ॱस्यीन खुर्नी, हुगो रो बेक्सल ॱलुक् स्यक्प बेत्। 23हुनी छ्युक्पु दी ॱस्यीवे यी़दु दुक्स्यीगी ॱनर्मी नोङ्गीन् यो़प्पे यङ्ल इगीन अब्राहाम्दङ् दल लाजरस् दी यो़प्प हुगी थोङ बेत्। 24हुनी हुगी अब्राहाम्ल ॱवे पब अब्राहाम् ङल ॱङीङ्ज्यी जेत्रो ॱनङ्। ङ हीन मी छीक्न, दुक्स्यीगी ॱनर्मी गुर्कीन् यो़त्। लाजरस् हुगी जुक्मु च्यीक् छ्युल ॱहोप्न हीदु ङे च्यीलाल ढङ् तीङ्ल युङ रेक्तु तोङ्रो झ्यी सीन्न केत् ज्यब बेत्। 25ॱनी हुगी लेल्ल अब्राहाम्गी ॱवे भु, रङ्गी मीजील गवे लेमु घयेत् एल्लादु झ्युङ् छर बेत्। ॱनी हीगी लाजरस् हील हुगी यङ्ल दुक्पे लेमु घयेत् झ्युङ बेत्। हीगो रङ्गी ढेङ्गी ॱसो़गो़ट्टो। ॱनी लाजरस्ल हुन्दो हीन ॱलो दीन्दीक्म झ्यीन कीप्पु यो़क्केन् बेत्। रङ्ल दुक्स्यीगी ॱनर्मी यो़क्केन् बेत्। 26हुगो छ्युवक् मेम्ब, रङ्दङ् ङीक्की ॱअर्तक्ल ढागो छ्यीम्मु स्यक्न यो़क्केन् बेत्। हीनी फल्ल खीत्रङ् च्येल्ल डोगेन् घयेत् डो छुस मीप्प धङ् हुनी हीदु ङीत् च्येल्ल युङ्गेन् ॱसु उक् युङ् छुस मीप्प सो़न स्यक्न यो़क्केन् बेत् झ्यीब बेत्। 27ॱनी हील मी छ्युक्पु दीगी हुन्दुक् हीन्न, ङ स्युव ज्यक्केन्। पब अब्राहाम् नीज्यरङ्गी लाजरस् हुगो ङे पबे खीम्ल तोङ्रो झ्यी। 28ङल उन पी़न् ॱङ यो़त्। ॱनी हुब अक् हीदु नुक्मे दुक्स्यी ॱनर्मी नोङ्सल युङ्ज्ये मीप्प, केच्च्य ॱस्यो़त्तु तोङ्रो झ्यी सीन्न झ्यीब बेत्। 29ॱनी हुल अब्राहाम्गी उन मोशा धङ् कलुङ् ॱस्यो़क्केन् घयेक्की ॱसुङ्रप् यो़क्केन् बेत्। हुबे हुल नेन् छुगेन् बेत्। 30ॱनी हील हुगी छ्युक्पु दीगी मेम्बेत्, पब अब्राहाम्। मी ॱस्यीनर च्यीक् ॱसोम्बुल लोङ्न हुदु फीन्न ॱस्येत्न क, हुब घयेक्की ॱसीम् दी ॱएङ्गी लम्नी ज्युर्न युङ्गेन् बेत् झ्यीब बेत्। 31ॱनी हीगी लेल्ल अब्राहाम्गी मोशा धङ् कलुङ् ॱस्यो़क्केन् घयेक्की केच्च्यल हुबे मीत् नेङ्गो़त्न ॱनी, मी ॱस्यीनरनी ॱसोम्बुल लोङ्न युङल अक् हुबे छ्य मीत् स्योक्केन् बेत् सीन्न झ्यीब बेत्।
ទើបបានជ្រើសរើសហើយ៖
लुका 16: LHM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 1995 Wycliffe Bible Translators, Inc. and Nepal Bible Society
