लुका 17
17
दीक्पल च्युव धङ् धक्तु ची़प्पे ढीक्ल १-४
1हुनी येशुगी खोङ् रोरङ्गी ॱलोप्टुक् दीबल हीन्दुक् ॱसुङ बेत्। ङे लम्नी दीक्पल च्युगेङ्गी ढङ् युङ त युङ् गोगेन् बेत्। ॱनी हुगो मी हीन्न, घन्डे दुक्प। 2हुन्दुक् झ्यीबे मी ङे लम्नी मी च्युङेत्मु च्यीक् दीक्पल छ्यी़दु ची़क्को़त्न, हुगी ओक्मल बोर लागोर् च्यीक् डान छ्यु ज्यम्जो छ्यीम्मुल पुर् तङ्न, हुगोल हुगो गा युङ्गो़ट्टो। 3हीगी ढीक्ल खीत्रङ् च्यङ्जो़त् झ्यीन दो़च्च्यीत्।
रङ्ल रङ्गी पी़न्ज्या नङ्गी पी़ङ्गी ङीबे दीक्प झ्यीज्युङ्न ॱनी, हुल हुगो गज्ये मेम्बेत् सीन्न लप्स्य तोङ्। ॱनी हुगी ॱसीम्ब दी ज्युर्न युङ्न ॱनी, हुगी ङीब दी रङ्गी धक्तु ची़च्च्यीत्। 4हुगी रङ्ल ङीन् च्यीक्की नङ्ल लेम्म दी़न् ङीबे दीक्प झ्यीज्युङ्न, हुनी यङ् ॱएन्दीङ् ॱस्यीक् ॱस्यीक् हुगी रङ्ल ङे ङीब धक्तु ची़त्रो झ्यी सीन्न लेम्म दी़र्रङ् युङ्न ॱनी, हुल धक्तु ची़च्च्यीत् सीन्न ॱसुङ बेत्।
छ्य स्यक्प तोरीगी ॱसो़न् चो़त्म च्यीक् ५-६
5ॱनी ठीक्नल दीबे चोव ज्यीन्दक्ल ङीक्की छ्य स्यक्प दी ज्यीक्तु डोज्ये यो़प्प जेत्रो ॱनङ् सीन्न स्यी़ब बेत्। 6हील खोङ्गी खीत्रङ्गी छ्य स्यक्प दी तोरीगी ॱसो़न्दोक् चो़त्म च्यीक् यो़त्न ॱनी, हीगी दोङ्बु हीगोल रङ् चा घोरोक् लोल छ्यु ज्यम्जो छ्यीम्मुदु छुलेत् सील्लोङ्दे हुगो नेङ्गेन् बेत्।
ॱस्यङ्ज्युङ् यक्च्युङ् सीरल ओ़ब मीप्पे ॱयोक्पु ७-१०
7खीत्रङ्गी ॱयोक्पु ॱमो़ ॱमो़न युङ्नी हीन्, लुक्चीनी हीन्न अक्, हुगो खीम्ल लोक्न युङ्नी, हुगोल ॱस्यर्च्यक् सम सो सीन्न खीत् ॱसु दीगी सीगो़प्प? 8हुगोल रङ्गी घो़ ॱयोङ् पो़ल ॱअल ङल एल्ला तोप्च्ये ज्यप्न खुर्लेत्। ॱनी ङे नम् से थुङ् झ्यीत् छको़र्दङ् हुगो थुक्ल रङ्गी ङल स्यप्च्यी़ ज्युलेत्। हुनी क रङ् सो थुङ् सीक्केन् हीन्डो न ॱनी। 9दक्पी़ ॱङाबे ले झ्यीबल हुगी ॱयोक्पु हुल दक्पु दीगी ॱस्यङ्ज्युङ् सीगो़प्प बेक्कक् ॱनी? 10ॱनी हुगो डस्सीरङ् खीत्रङ्ल ॱङाबे ले दी कुरीक् झ्यीन युङ्न अक्, खीत्रङ्गी हीगी ढीक्ल ङीत्ल ॱस्यङ्ज्युङ् यक्च्युङ् सीरल ओ़ब मीप्पे ॱयोक्पु हीन्। ङीक्की घन्ड झ्यीत् गोगेन् बेक्क हुगोरङ् क झ्यीबेन् सीर् गोगेन् बेत्।
जीस्सो़ मीरङ् च्यु ढक्प ११-१९
11हुनी येशुसो यरुशलेम्ल डोये यङ्ल लम् दी सामरीया धङ् गालीलागी ॱअर्तक्नी फल्ल झ्यीन फीम्ब बेत्। 12ॱनी खोङ्जोसो युगङ् च्यीक्ल स्युक्पे यङ्ल जीस्सो़ मीरङ् च्यु लम्ल युङ बेत्। ॱनी हुब फच्चो़त्तु देत्न 13खोङ्ल ॱवे चयेलम येशु ङीत्ल ॱङीङ्ज्यी जेत्रो ॱनङ् सीन्न केत् ज्यब बेत्। 14ॱनी हुब थोङ्नी खोङ्गी हुबल छ्यो़प्पो़न् च्याल ज्युक्ल खीत्रङ्गी नज दी ढक् मत् ढक् खीत्रङ्गी सी़ दी तो़ल्लेत् सीन्न तङ बेत्। हुनी हुब लम्ल डोगीन् डोगीर्रङ् हुबे जी दी ढक्न चङ्मल ॱसोङ बेत्। 15हुबे छीक्नी च्यीक्की रोरङ् ढक्प दी ॱह घोनी, छुल्ल लोक्न युङ्न केत् छ्यीम्मु तो़न्न को़न्ज्योक्ल तो़प्प पुन 16येशुगी स्यप् ढुङ्दु छ्यक् छेन खोङ्ल यस्सो कुट्टीन् पुब बेत्। ॱनी हुगो सामरीयागी मी हीङ्गो़प्प बेत्। 17हुनी येशुगी हुल खीत्रङ् ढक्न चङ्मल ॱसोङ दी मीरङ् च्यु मेम्बेक्क ॱनी? ॱनी मीरङ् गु घन ॱनी? 18हीगी छ्योबा हीगो मेन्द, ॱयोङ्म घयेत् दीब घन्डल को़न्ज्योक्ल तो़प्प पुदु मत् युङ बेक्क? सीन्न ॱसुङ बेत्। 19हुनी हुगी मी दील खोङ्गी ह रङ् लोङ्ल ज्युक्। रङ्गी छ्य स्यक्प दीगी रङ् ढक्नर बेत् सीन्न ॱसुङ बेत्।
को़न्ज्योक्की ज्यागक् युङे लेमु २०-२१
20हीनी तीङ्ला फरीसी घयेक्की येशुल को़न्ज्योक्की ज्यागक् नम्गी धी़ल युङ्गेन् बेक्क? सीन्न ढीबे लेल्ल खोङ्गी को़न्ज्योक्की ज्यागक् ॱमीक्की थोङ्गेङ्गी लेमुल मीत् युङ्गेन् बेत्। 21हुगो मी ॱसी़ इक् तो़दे। हीन दुक्। फान दुक् सीन्न सीर् ॱमीत् छुगेन् बेत्। घन्ड हीन् सीन्न को़न्ज्योक्की ज्यागक् खीत्रङ्गी नङ्न यो़क्केन् बेत् सीन्न ॱसुङ बेत्।
कोलीमीगी ॱरेबी़ ङीङ्गी धी़ २२-३७
22हुनी येशुगी खोङ् रोरङ्गी ॱलोप्टुक् दीबल हीन्दुक् ॱसुङ बेत्। तीङ्ला धी़ च्यीक् ॱलीक्केन् बेत्। हुगी यङ्ल खीत्रङ्गी कोलीमीगी ॱरेबी़ धी़गी ङीन् च्यीक् ढेन्न तगीन् थेस्सी युङ्गेन् बेत्। ॱनी हीन्न अक्, तज्ये ॱमीत् ॱनोङ्गेन् बेत्। 23हुगी धी़ल खीत्रङ्ल मी यरीगी तो़दे। खोङ् फान दुक्। तो़दे। खोङ् हीन दुक् सीरल नेन्न मत् डोज्यीत्। 24कोलीमीगी ॱरेबी़ ङीङ्गी यङ्ल खोङ् झ्यो़म्बे लेमु दी ॱनम्ल डुक्की च्यीला पीगीनी इगील थुक् टक्सी तो़म्ब डस्सी झ्यीन झ्यो़ङ्गेन् बेत्। 25ॱनी हीन्न अक्, ॱअल दङ् हरीङ्गी मी हीबे खोङ् ॱलोल मीप्पल खोङ्ल दुक्प गज्येन् तङ्न, गुर् गो़ ॱस्यर्केन् बेत्। 26कोलीमीगी ॱरेबी़ धी़ दी नुहे ङोल झ्युङे धी़ डस्सी युङ्गेन् बेत्। 27नुह ढु छ्यीम्मुल नम् स्युक् स्युक् थुक्ल मी घयेत् सय, थुङ, ॱनम ठीक्केन् धङ् ॱनमल जोङ्गीन् यो़प्प बेत्। ॱनी हुन्दुक् झ्यीप्पे कप्ल छ्युरोक् छ्यीम्मु युङ्न, हुब कुरीक् खरप्ल तङ् तङ बेत्। 28ॱनी लोत्की ङोल अक् नुक् दीरङ् मी घयेत् सगेन्, थुङ्गेन्, नोगेन्, चोङ्गेन्, ॱसो़न् तोप्केन् धङ् खीम् सोगेन् यो़प्प बेत्। 29ॱनी सदोम्नी लोत् थो़न्न डोये यङ्ल अक् इगी तेङ् यी़नी मल्ल मी बर धङ् मुसी बर छर्न युङ्न, हुब कुरीक् खरप्ल तङ् तङ बेत्।
30ॱनी कोलीमीगी ॱरेबु इगीनी मल्ल थो़न्न युङे ङीन् दी इक् नुक् दीरङ् युङ्गेन् बेत्। 31हुगी यङ्ल मी ॱसु खङ्दोक्ल जेन यो़दङ् हुगो मल्ल भप्न खीम्गी नङ्ल यप्च्य लीन्दु मत् स्युक्च्यीत्। ॱनी हीगो डस्सी यङ् मी ॱसु स्यीङ्गल लेल यो़दङ् हुगो रोरङ्गी खीम्ल मत् लोक्च्यीत्। 32लोत्की नङ्जङ्गी पील तेन ढेन्सो़ झ्यीज्यीत्। 33मी ॱसी़ रोरङ्गी छील फङ झ्यीक्को़दङ् हुगी छी दी तोर् डोगेन् बेत्। ॱनी यङ् ॱसी़ रोरङ्गी छील फङ मीत् झ्यीक्को़दङ् हुगी रोरङ्गी छी दी सुङ् छुगेन् बेत्। 34ङे खीत्रङ्ल ॱस्येत् योङ्। हुगी ङीङ्गी गोङ् दी नास च्यीक्ल मीरङ् ॱङी नान यो़प्प च्येम्मनी च्यीक् ठीक्केन् बेत्। च्यीक् स्यक् तोङ्गेन् बेत्। 35हुनी यङ् भुमु ॱङी लक्त ज्यक्कीन् यो़स्सनी च्यीक् ठीक्केन् बेत्। च्यीक् स्यक् तोङ्गेन् बेत्। 36[हुगी यङ्ल स्यीङ्गल मीरङ् ॱङी यो़स्सनी च्यीक् ठीक्केन् बेत्। च्यीक् स्यक् तोङ्गेन् बेत्।] 37ॱनी हीगी ढीक्ल ॱलोप्टुक् दीबे खोङ्ल चोव ज्यीन्दक् हीगो घनल युङ्गेन् बेक्क ॱनी? सीन्न ढीब बेत्। ॱनी हील खोङ्गी घन रो ॱस्यीगोरोक् यो़दङ् हुदु झ्यक्को़त् घयेत् जोम्गेन् बेत् सीन्न ॱसुङ बेत्।
ទើបបានជ្រើសរើសហើយ៖
लुका 17: LHM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 1995 Wycliffe Bible Translators, Inc. and Nepal Bible Society
