Maake 6
6
Yezu tete teo kom tiina ve‑o
Matiyu 13:53-58; Luka 4:16-30
1Yezu déem ma yage jei sem konto ye o jwoori o vo o tete teo. O kwaga tɔgena bam de tɔge‑o ba vo. 2Juu tiina siu dɛ na yi to, o ma vo o zo ba jeerim diga kam ye o bobo se o bere-ba Wɛ taane. Nɔɔna dedɛ maa wora ye ba cheigi o berem dem. Ba na nigi to, ko so-ba lanyerane. Ba ma ta ba we, “Nɔɔno wonto ke tɛ mo o lɔre wonnu tento dwoŋi? O jege swa ye o wae wo-kenkagela o ke. Ko nam ke tɛ mo? 3O ye debam teo kom nɔɔno, kapenta tu. O nu maa ye Mary. Jemsi, de Josef, de Judas,#6:3 Judas naa Judi Judi 1:1 de Simon ye o nyaana mo. O nakɔa de ta wora debam tei ne. Ko dae konto na?”
Konto mo ba boboŋa déem chɔge o ni taane baŋa ne. 4O laam ma ta de-ba o we, “Nɔɔno ná ye Wɛ ni-jwoŋinu, nɔɔna yeini ba pa‑o zula lanyerane, se o tete teo tiina de o sɔŋɔ tiina de o chorro nam maŋe ba ba nege‑o.”
5O déem ware o ke wo-kenkagela ba tei ne, ko ná dae o na kwei o jeŋa o daŋe jaweena fenfee yerane baŋa ne o pa ba na yazura to. 6Ko ma ke Yezu yaau de ba na wo ke ba wo-dedoa ded‑o to.
Yezu toŋe o nɔɔna fuga-balei bam
Matiyu 10:5-15; Luka 9:1-6
Yezu déem ma tole te-balwa bam o kare o bere nɔɔna Wɛ chega kam. 7O laam ma bwoŋi o nɔɔna fuga-balei bam se ba ba o tei.#Luka 10:1-12 O ma le-ba balei balei se o toŋe-ba, ye o pa-ba dam se ba wane ba zeili chichiri-lwanno nɔɔna tei ne. 8O ma pa-ba ni o we, “Á ná maa via, se á yé zaŋe á kwei kolokolo á woli da, ko ná dae nacheiga yerane. Á nam yé kwei wodiu, naa tampɔgɔ se á lwoori wodiu á ke da. Á yé kwei sabu á ke ganlɔgere ne á woli da. 9Zo-na natera, se á yé kwei gwaaro telei telei. 10Á ná vei á zo sɔŋɔ kolo á peini da, se á ta‑á wora se ko ba ko yi á viirim maŋa. 11Ko daare á ná yi teo kolo, ye ba ná wo sɛ se ba jeeri abam naa ba cheigi abam taane, se á yage jei sem konto. Á ná maa viira, se á kokɔge á nɛ fwogo kom á yage da, se ko pa nɔɔna bam lɔre we ba wo ke lanyerane.”#Kikia 13:51
12O na tage konto de ba o ti to, ba laam ma nwoŋi ba vo ba tɔɔle Wɛ kwora ba bere nɔɔna we ba jege se ba leiri ba wo de ba keim-balwaaro tem. 13Ba ma zeili setaana dedɛ nɔɔna tei ne. Ba ma kwori ba kwei nuga ba laŋe jaweena dedɛ yuni ne pa ba na yazura.#Jemsi 5:14
Pɛ Herodi na go Jɔn tei to
Matiyu 14:1-12; Luka 9:7-9
14Pɛ wodwoŋi déem mo wora, o yere mo Herodi. O ma ba o ni Yezu ŋwa, nɔɔna dedɛ na jege o taane ba ŋɔɔne to ŋwaane. Nɔɔna badwonna maa tɛ ba we, “Ko ye Jɔn wolo na ye sɛɛm tu to mo jwoori o bi toone wone. Mo kokuri o jege dam pa o wae wo-kenkagela dedɛ o ke.” 15Nɔɔna badaara maa we, “Ko ye Elija mo tua.” Badaara de ta maa we, “O ye Wɛ sampwora mo, nenɛɛne balo na tɔɔle Wɛ kwora faŋa faŋa to.” 16Ko daare Pɛ Herodi na nigi Yezu ŋwa to, o ma ta o we, “Ko wó taa ye Jɔn wolo amo na pɛ ba gwoni o yuu to mo jwoori o bi o na ŋwea.”
17O déem tage konto bɛŋwaane o ya wo ke Jɔn lanyerane ye o pa ba ja‑o ba vɔ ba ke peena diga ne. Ko déem ke tento dwoŋi mo: Herodi ya di kaane wodwoŋi, o yere mo Herodisa. Kaane wom déem ye o zembaaro Filipi nyem mo. 18Jɔn ma zaŋe o ta ded‑o we, ko chula se o di o zembaaro kaane. 19Konto ŋwaane mo Herodisa chuli Jɔn. O maa lage se ba go‑o. O nam wo nɛ chwoŋa, 20kolo ŋwaane Herodi kɔre Jɔn. O maa yei we o ye wo-pwoŋo tu na kɔre Wɛ to. Konto ŋwaane o jege‑o o choa se kolokolo yé ke‑o. O maa yeini o cheigi o taane de wopwolo, ye ko pa o boboŋa vugimi.
21Ko maa wora ko wora ye Herodisa laam na chwoŋa se o chɔge Jɔn ŋwea. Pɛ Herodi lora maŋa ma ba ka yi. O ma ke kuri ye o bwoŋi teo kom dedɛɛra bam, de soja yiga tiina, de naduna balo na zoore Galili ne to se ba tɔge ba di kuri dem. 22Herodisa bukɔ wom ma zo o sa veira bam tetare ne. Ko ma pa pɛ wom de o veira bam wo pwoli lanyerane. Pɛ wom ma ta de bukɔ wom o we, “Woŋo kolo maama nmo na lage to, amo wó pa‑m.” 23O ta ma ta o du o we, omo wó pa‑o woŋo kolo maama o na wó lwoori o tei ne to, ko ná maŋe ko ye o paare jejegero tem chichworo de. 24Bukɔ wom na nigi konto to, o ma nwoŋi o vo o nu tei o bwei‑o o we, “Bɛ ŋo mo amo wó lwoori se a jwoŋi?” O ma leiri o we, “Véi n ta we n lage Jɔn yuu mo se o gwoni o pa‑m.”
25Bukɔ wom ma ke lela o jwoori o zo pɛ tei, ye o ta ded‑o o we, “Amo na lage kolo to mo ye se n gwoni Jɔn yuu n ke-ko zon-tanlaŋa wone n ja n ba n pa-ne leile.” 26Pɛ Herodi na nigi konto to, o wo ma chɔge dedɛ. O nam na dugi ye o veira bam ni to, o maa ba lage se o ve‑o. 27O ma ke lela o toŋe o nɔn-babea dedoa se o vo o gwoni Jɔn yuu kom o ja ba. Nɔɔno wom ma seene o vo peena diga kam o gwoni Jɔn yuu kom. 28O ma kwei-ko o ke zon-tanlaŋa wone o ja ba o pa bukɔ wom. Wonto ma jwoŋi o ja nwoŋi o vo o pa o nu.
29Jɔn kwaga tɔgena bam na lɔre kolo na ke to, ba ma zaŋe ba vo ba kwei o yera yam ba ja vo ba ke yibeeli wone.
Yezu pɛ nɔɔna 5,000 wodiu se ba di
Matiyu 14:13-21; Luka 9:10-17; Jɔn 6:1-14
30Yezu totoŋa nakwa fuga-balei bam ma jwoori ba vo o tei. Ba ma ta ba bere‑o kolo maama ba na ke de ba na bere nɔɔna Wɛ chega kam tei to. 31Nɔɔna dedɛ maa yeini ba tui Yezu tei ye ba jwoori ba viira. Ba na daga konto to, Yezu de o nɔɔna bam daa ware ba na laŋa se ba di wodiu de. Konto ŋwaane o ma ta de-ba o we, “Abam nam ba á yerane se dé vo gaao wo se á wane á sii fenfee.”
32Ba ma pwɛ ba tete ba vo ba zo nabworo se ba vo jei selo na ye gaao wo to ba yerane. 33Ba na maa kɛ to, nɔɔna dedɛ ma na-ba. Ba ma lɔre-ba. Ba ma zaŋe ba nwoŋi ba teene dem maama ne, ye ba vo tega ne ba duri ba vo ba yi jei sem ye banto ta wo yi da. 34Yezu ma nwoŋi nabworo kom wone. O laam ma na nɔn-kɔgɔ kom na tu ko wora. O maa jege nɔɔna bam ŋwaŋa lanyerane, de ba na nye de pei selo na ba jege nayero se o taa nii se baŋa ne to. O laam ma bobo se o taa bere-ba wonnu dedɛ.
35Wɛ na wora de zoore to, o kwaga tɔgena bam ma vo ba ta ded‑o ba we, “Maŋa kam wora ka kɛa ye wodiu tera ywo-seeni se ba yeigi ba di. 36Konto ŋwaane, pa se nɔɔna bam vo sam wone ba yeigi wodiu ba di.” 37O ma leiri-ba o we, “Abam tete mo wó pa-ba wodiu se ba di.” Ba ma ta ba we, “Dé ná lage dé yeigi bworobworo dé pa ba maama se ba di, ko ya wó chɔge sabu dedɛ, nenɛɛne lu-nyenno sabu-dala#6:37 lu-nyenno sabu-dale dedoa ye nɔɔno dɛ wone ŋweero mo. bia yalei (200) mo. Dé vei dé yeigi konto mo na?”
38O ma bwei-ba o we, “Abam jege bworobworo ko mae tetɛ mo? Véi-na á nii.” Ba na vei ba na to, ba ma jwoori ye ba ta ba we, “Te ye tenu yerane mo, de ywona yalei.”
39Yezu laam ma pa-ba ni se ba pa nɔɔna bam pɔɔre kɔgɔ kɔgɔ ba jeini tega ne. 40Ba maama ma pɔɔre ye ba jeini, badaara kɔgɔ bi bi, badaara kɔgɔ finnu finnu. 41O ma kwei bworobwooru tenu tem de ywona yalei yam, ye o kwoni o yuu wɛɛne o ke Wɛ lei te ŋwaane. O ma fɔ fɔ bworobwooru tem o pa o kwaga tɔgena bam se ba laam jwoŋi-te ba ja vo ba maŋe ba pa nɔɔna bam. O ma daare o maŋe ywona yalei yam o pa ba maama se ba di. 42Nɔɔna bam maama ma di ba su ba daare. 43Ba na di ba daare konto to, Yezu kwaga tɔgena bam ma pɛ bworobworo de ywona chichwooru telo na daare to ba su kayɛ fuga-selei. 44Nɔɔna balo déem na di konto to ye baara morro tenu (5,000) mo, ko woli de kaana de bia de.
Yezu vei na baŋa ne
Matiyu 14:22-36; Jɔn 6:16-21
45Konto baŋa ne Yezu ma pa o kwaga tɔgena bam vo ba zo nabworo kom se ba da yiga ba bɛ naneo kom ba vo ba yi Bɛtasida. Ba na maa kɛ to, o ma pa kɔgɔ kom viiri. 46O na yage-ba konto to, o ma vo o di peero tem baŋa se o ware Wɛ.
47Tega ma ba ka yi. Nabworo kom maa wo naneo kom tetare ne, ye Yezu ta wo buburu kom ne o yerane. 48O ma tole o na o nɔɔna bam na tiini ba kwaane se ba yɛ ye ko chɛ ba yera ne, vo-fɔrɔ na zaŋe ko jeeri-ba to ŋwaane. Tega na wora ka poore to, Yezu ma zaŋe o nɔne na bam baŋa ne o maa vei ba tei. O maa via ye o lage o gaale-ba o kɛ. 49Ba nam na nɛ‑o o na vei na bam baŋa ne to, ba ya boŋe we ko wó taa ye chiru mo. Ba ma laare baŋa baŋa, 50ba maama na nɛ‑o ye foone zo-ba dedɛ to ŋwaane.
Yezu laam ma ŋɔɔne de-ba o we, “Pa-na á bochara ke dam, se ko ye amo mo. Á yé pa foone taa jege abam.”
51O laam ma vo o zo nabworo kom wo. O na yi ba tei konto to, vio kom ma kwori lela. Ko ma tiini ko ke-ba yaau, 52kolo ŋwaane Yezu na maŋe bworobworo kom o pa nɔn-kɔgɔ kom pa ba di to, ba wo nigi keim dem konto kuri. Ba boboŋa muri se Yezu chega kam zo ba wo lanyerane.
53Ba ma vo ba bɛ bubɛ dedem dem. Ba ma ja nabworo kom ba nwoŋi ba tiŋi da. Ba na yi jei selo to yere mo Gɛnesara. 54Ba na nwoŋi nabworo kom wone to, nɔɔna ma ba ba lɔre Yezu. 55Ba laam ma duri jei sem konto maama ne pa nɔɔna lɔre. Ba ma kwei balo na ba jege yazura to ba zeŋe ba ja vo o tei, mɛ maama ba na lɔre we o tu da to. 56O na yeini o vei jei selo maama to, ko ná ye teo balaŋa, naa teo kamunu, naa kara, nɔɔna yeini ba ja jaweena mo ba vo ba tiŋi yaga ni ne. Ba ma lwoori‑o se o pa-ba chwoŋa se ba dwei o gɔrɔ kom ni yerane. Balo maama na dwei o gɔrɔ kom konto to déem nɛ yazura.
ទើបបានជ្រើសរើសហើយ៖
Maake 6: KBG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2020, Ghana Institute of Linguistics, Literacy and Bible Translation (GILLBT)