Maake 5
5
Yezu zeili setaana nɔɔno tei ne
Matiyu 8:28-34; Luka 8:26-39
1Ba ma vo ba bɛ naneo kom#5:1 naneo kom = Galili naneo kom bubɛ dedwoŋi dem Gerasa tiina na zoore mɛ to. 2Yezu ma nwoŋi nabworo kom wone. Nɔɔno wodwoŋi maa wora chichira na jege‑o ka yaara. 3-4O déem tigi yibeela jei ne mo. Kuni dedɛ ba yeini ba kwei chaponno ba ma vɔ o jea de o nɛ, ye o damma o dwoi-te. O maa yeini o vaŋe chaponno telo na wo o jea ne to o kɔ. O ma daare o mage luuru telo ba na ke o nɛ sem ne to o chɔge. O na tiini o damma to, nɔɔna daa ware ba ja‑o ba vɔ, naa ba pa o wo zuri. 5Maŋa maama wea de tete o beeri yibeela jei sem ne de peero yuu ne ye o kaasa. O maa yeini o kwei kandwa o ma kaare o tete.
6O na zege yiga yiga o tole o na Yezu to, o ma duri o vo o jeeri‑o. O na yi o tei to, o ma kuni dwoona o yiga ne, 7ye o kaase de kwor-dɛa o we, “Yezu, Yuu-tu Baŋa Wɛ wom Bu, n tu amo tei se n ke bɛ mo? Nam du de Wɛ we n bá‑n waare-ne.” 8O tage konto kolo ŋwaane Yezu maŋe o wora o tɛ de chichira kam se ka yage o yera.
9Yezu laam ma bwei‑o o we, “N yere mo bɛ?” O ma leiri o we, “A yere mo Akɔgɔ, kokuri mo debam daga dedɛ.” 10Nɔɔno wom ma kwaane o lwoori Yezu kuni dedɛ we, o yé pa se chichiri sem nwoŋi jei sento ne se viiri.
11Teira dedɛ déem maa bwola. Ya kɔgɔ kom ye nenɛɛne morro telei (2,000) mo ye ya wora ya beeri ya wodiu peo kom teiŋa ne ya di. 12Konto ŋwaane setaana yam ma lwoori Yezu ya we, “Popo, pa dé vo teira yam wo dé taa tɔge-ya.” 13O ma pa setaana yam chwoŋa pa ya yage nɔɔno wom ye ya vo ya tɔge teira yam. Teira yam kɔgɔ kom maama laam ma duri ya siseiri ya tu buga kam wo ya nyɔ na ya te.
14Nɔɔna balo ya na nii teira yam baŋa ne to ma duri ba vo ba ta kolo na ke to ba bere teo kom nɔɔna bam de balo na wo ba kare ne ba toŋe to. Nɔɔna bam ma nwoŋi ba vo se ba nii ko na ke tei. 15Ba ma vo ba yi Yezu tei. Ba ma na nɔɔno wolo setaana kɔgɔ kom ya na daane‑o to. O maa jei da dedaane o boboŋa jwoori ya jeini ye o zo gwaaro. Ba na nɛ‑o konto to, foone ma zo-ba. 16Balo yi na nɛ ko maama to ma ta ba bere nɔɔna bam ko na ke nɔɔno wom tei to, de kolo na ke teira yam to de. 17Teo kom nɔɔna bam laam ma kwaane ba lwoori Yezu se o nwoŋi ba teo kom ne o viiri.
18Yezu ma vo se o jwoori o zo nabworo kom wo. Nɔɔno wolo setaana yam ya na jege‑o ya daane to ma lwoori‑o o we, “Popo, pa se a da a vo.” 19O maa wo sɛ ye o ta ded‑o o we, “Véi sɔŋɔ se n ta de n sɔŋɔ tiina Baŋa Wɛ na ke‑m lanyerane ye o duri nmo ŋwaŋa tei to.” 20Nɔɔno wom laam ma kɛ jei selo ba na bwoŋi we ‘Teene Fuga’ to ye o wora o tɛ nɔɔna bam Yezu na ke kolo o pa‑o to. Balo maama na nigi o taane dem to maa ye yaau.
Yezu yɔɔre nɔɔna badwonna
Matiyu 9:18-26; Luka 8:40-56
21Yezu déem ma jwoori o tɔge naneo kom wo o vo o bɛ bubɛ dedwoŋi dem. O na zege naneo kom ni ne to, nɔn-kɔgɔ ma ba o tei ba gilimi‑o. 22Nɔɔno wodwoŋi maa tɔge o wora, o yere mo Jarusi. Wonto ye Juu tiina jeerim diga kam yiga tu mo. O na tu o na Yezu to, o ma tiiri tega ne o yiga ne. 23O ma tiini o lwoori‑o o we, “Amo bukɔ-balaŋa mo lage o te. Popo, a lwoori‑m se n ba n zi n jea o baŋa ne, se konto wó pa o jaweo kom jei ye o jwoori o na ŋwea.” 24Yezu ma sɛ ye o tɔge ded‑o o vo. Kɔ-fɔrɔ de maa tɔge ba via ye ba jege‑o ba peene dedɛ.
25Kaane wodwoŋi maa tɔge o wora, o na tiini o wɔe wo taa, bena fuga-yalei. 26O déem yeini o vei dɔkta tiina dedɛ tei ye ba yaare‑o lanyerane. O ya chɔge o sabu maama ba baŋa ne ye ko ta ba gare ko pa‑o, ko fɔge ko jiri lɛɛro mo o yera ne. 27O laam na nigi Yezu ŋwa to, o ma tɔge kɔgɔ kom wo o kɛ o kwaga o vo o dwei o gɔrɔ kom. 28O maa boŋe we, “Amo ná maŋe a dwei o gɔrɔ yerane, amo wó na yazura.”
29O na dwei Yezu konto to, jana bam ma kɔ. O ma lɔre we o jaweo kom seene ko jei o yera ne. 30Bedwe baŋa ne mo Yezu maane we dam nwoŋi o yera ne. O ma zege kɔgɔ kom wone o pipiri o nii ye o bwei we, “Wɔ mo dwei a gɔrɔ?” 31O kwaga tɔgena bam ma ta ded‑o ba we, “N wo nɛ nɔɔna bam maama na yigi ba peene nmo tei to na? Bɛ mo ye n bwei we, wɔ mo dwei‑m?” 32O daa ta ma fɔge o nii kɔgɔ kom wone se o lɔre wolo na dwei‑o to. 33Kaane wom na lɔre kolo na ke‑o ye o na yazura to, foone maa jege‑o ye o yera sae. O ma vo Yezu tei o kuni dwoona o yiga ne ye o ta o chega maama o bere‑o. 34Yezu ma ta ded‑o o we, “A bukɔ, nmo na ke n wo-dedoa de amo tei to mo pɛ se n na yazura. Wɛ wó woli‑m se n sii de n jaweo kom.”
35Yezu ta na wora o ŋɔɔne konto to, nɔɔna badwonna ma ba ba yi o tei. Ba ya nwoŋi Jarusi sɔŋɔ mo ye ba ta ded‑o ba we, “N bukɔ wom tega. Daa‑n yé ta‑n jege berem tu wom n daana.” 36Yezu ma chem, ye o ta de Jarusi o we, “Yé ta‑n fona. Nam yɔɔre n ke n wo-dedoa de Wɛ.”
37Yezu maa wo sɛ se nɔɔna tɔge ded‑o ba vo Jarusi sɔŋɔ kom, ko ná dae Piita, de Jemsi, de o nyaane Jɔn yerane. 38Ba ma vo ba yi sɔŋɔ kom. Yezu ma maane we sɔɔ yerane mo wora bɔge-bɔge, ye nɔɔna keera ye ba chwoosa. 39O ma zo sɔŋɔ kom o ta de nɔɔna bam o we, “Bɛŋwaane mo á wora á ke sɔɔ ye á keera? Bu wom wo tege, o dɔ mo.” 40O na tage konto to, ba ma mɔne‑o.
O ma zeili ba maama pa ba nwoŋi. O ma daare o ja bu wom kwo, de o nu, de o tete kwaga tɔgena batɔ na wo o tei ne to o vo o zo diga kalo bu wom na tigi da to. 41O ma ja bu wom jeŋa ye o ta ded‑o o we, “Talita, koum.” Taane dento kuri mo ye “Busankana balaŋa, a tɛ nmo, zaŋe wɛɛne.” 42O na tage konto to, busankana kam ma zaŋe wɛɛne ka via. O bena déem ye fuga-yalei mo. Ko na ke‑o konto to, ko ma so-ba lanyerane. 43Yezu laam ma kaane-ba o we, ba yé zaŋe ba pa nɔɔn-nɔɔno lɔre kolo na ke to. O ma daare o ta o we, ba ke wodiu ba pa bu wom se o di.
ទើបបានជ្រើសរើសហើយ៖
Maake 5: KBG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2020, Ghana Institute of Linguistics, Literacy and Bible Translation (GILLBT)