Maake 11
11
Yezu zo Jerusalem teo wo
Matiyu 21:1-22; Luka 19:28-40, 45-48; Jɔn 12:12-19
1Yezu de o nɔɔna bam déem ma vo ba twɛ Jerusalem. Ba ma vo ba yi te-balwa balei, ba yera mo Bɛtefage de Bɛtania. Jei sem konto wo Olivi peo kom saŋa ne mo.#Jɔn 11:17-18 Yezu ma le nɔɔna balei o kwaga tɔgena bam wone, 2ye o ta de-ba o we, “Véi-na á zo teo kolo na wo abam yiga ne to. Á ná zo teo kom wo, á wó na bona-pɔla na leigi da ye nɔɔn-nɔɔno daa ta wo diini ka baŋa. Véi-na á bwoli-ka á ja ba á pa-ne. 3Nɔɔno ná bwei abam we, ‘Bɛ mo ye á wora á ke konto?’ se á ta ded‑o we, ‘Ko ye dé Teiru wom mo lage-ka. O bá dáane ye o pa ka jwoori ka ba.’ ”
4Ba ma zaŋe ba vo se ba nii. Ba na yi teo kom to, ba ma seene ba na bona-pɔla chwoŋa kam ni ne. Ka leigi mo diga kadwoŋi ni ne. Ba ma vo ba bwoli-ka. 5Nɔɔna badwonna maa zege da. Ba ma ta de Yezu nɔɔna bam ba we, “Bɛ mo ye á lage á bwoli bona-pɔla kam?” 6Ba ma leiri-ba ne Yezu na maŋe o ta tei to. Nɔɔna bam ma sɛ.
7Ba ma kwei bona-pɔla kam ba ja vo ba yi Yezu tei. Ba laam ma le ba gwaaro ba daŋe ka baŋa ne. Yezu ma di ka baŋa, ye ba vei ba maa kɛa. 8Ba na maa kɛ to, nɔɔna dedɛ ma le ba gwaaro ba lware chwoŋa kam ni ne se Yezu tɔge te baŋa o kɛ. Nɔɔna badaara ma vo ba gwoni teeni nɛ de vɔɔro ba de chwoŋa kam ni ne se o tɔge te baŋa o kɛ. 9Nɔɔna balo na wo o yiga ne de o kwaga ne ba vei to maa laare ba tɛ ba we:
“Hozaana! Zula taa wo Wɛ tei ne!
Baŋa Wɛ wó swɛ wolo na tu o yere ŋwaane to swolim.#Lei 118:25-26
10Wonto wó taa tei o nɔɔna,
nenɛɛne dé kwo David déem na jege paare tei to mo.
Wɛ wó swɛ o swolim.
Hozaana! Baŋa Wɛ maŋe de tia wɛyuu ne!”
11Yezu ma vo o zo Jerusalem teo kom wo. O ma vo o yi Wɛ diga kam o zo ka wo. O ma kare o nii woŋo maama na ye tei. Wɛ na lage de zo to, o ma jwoori o nwoŋi teo kom ne. O ma tɔge de o nɔɔna fuga-balei bam o vo Bɛtania.
12Tega na poore to, ba ma zaŋe Bɛtania ne se ba jwoori Jerusalem. Yezu kana maa wɔe. 13Ba na maa vei to, o ma tole o na kaporo na zege yiga yiga. Ko déem maŋe ko li de vɔɔro. O ma vo se o nii mɔɔro wora se o di na. O na yi to, o maa wo nɛ kolokolo se vɔɔro yerane, ko na wo yi ko leirim maŋa to ŋwaane. 14O laam ma ta de kaporo kom o we, “Wɛ wó pa se nɔɔn-nɔɔno daa yé na mɔɔro nmo yuu ne o di.” O kwaga tɔgena bam ma ni o na tage kolo to.
15Ba ma vo ba yi Jerusalem. Yezu ma vo o zo Wɛ diga kam wo. O ma na nɔɔna na wora ka konkɔlɔ kom ne ba ke pipiu. O ma bobo se o zeili-ba se ba nwoŋi. O ma ja sabu-leinna bam tabollo tem o pipiri o pu tega ne pa se ba sabia bam jage. O ma daare o yigi yitunnu telo nɔɔna badwonna na jei da ba yeigi kunkwon-puura to o de tega ne. 16O maa wo sɛ se pipim-piina taa zeŋe ba zela ba tɔge konkɔlɔ kom wo ba kɛa. 17O ma bere nɔɔna bam o we, “Ko popone Wɛ tɔnɔ kom ne we, ‘Ba wó taa bwoi amo sɔŋɔ kom we, wara-jei mo na zege dwi maama ŋwaane.’ Abam nam pɛ se ko ji ŋweena tigisim jei.”#Izaya 56:7; Jeremia 7:11
18Juu tiina kaanem yiga tiina bam de ba zamesem tiina bam ma ni Yezu na tage kolo to. Ba laam ma kare ba lage chwoŋa se ba wane ba go‑o. Ba ma kɔre foone ded‑o, nɔn-kɔgɔ kom maama na ye yaau de o berem dem to ŋwaane.
19Tega na lage ka yi to, Yezu de o nɔɔna bam ma nwoŋi teo kom ne.
20Tega na poore to, ba maa vei ba maa kɛa. Ba ma na kaporo kom na koga, de ko bonno maama. 21Piita ma guli Yezu ya na tage tei to. O ma ta de Yezu o we, “Berem tu, nii kaporo kom nmo diim na sɔɔle n chɔge-ko to. Ko laam koga.” 22Yezu ma ta de-ba o we, “Fɔge-na á ke á wo-dedoa de Wɛ. 23Chega ŋwaane to, nmo ná tage de peo-kamunu konto we, ko gɔ ko vo ko to naneo kom wone, Wɛ wó pa ko ke. Nmo ná jege boŋem-dɛɔ we nmo na tage kolo to wó seene ko ke, ye n ba jege bobwea, Wɛ wó ke o pa‑m. 24Mo kokuri, ta‑á yei-na we, woŋo kolo maama á na wó lwoori Wɛ tei ne to, se á ta‑á jege boŋem-dɛɔ we á wó seene á na-ko. Konto to, Wɛ wó pa á jwoŋi-ko. 25Maŋa maama abam ná zega á ware Wɛ, ye taane ná wora abam de nɔɔno wodwoŋi laŋa ne, se á kwei á ma chɛ‑o. Á Kwo Wɛ laam wó wane o yage á wɛleera o ma chɛ abam. [ 26Ko daare abam ná wo sɛ se á yage nɔɔna wɛleera á ma chɛ-ba, á Kwo Wɛ de bá ke abam konto.]”
Yezu dam dem nwoŋi yei ne mo?
Matiyu 21:23-27; Luka 20:1-8
27Ba daa ma vo ba yi Jerusalem. Yezu ma vo o zo Wɛ diga kam wo. O maa kare ka wone o beera. Juu tiina kaanem yiga tiina bam, de ba zamesem tiina bam, de ba nakwa bam ma vo o tei. 28Ba ma bwei‑o ba we, “Wɔ mo pɛ nmo chwoŋa se n ke wonnu telo maama n na ke to?” 29O ma leiri-ba o we, “Yage-na se a bwei abam taane dedwe se, á ná leiri-de á pa-ne, se a laam bere abam a na ke tei a jege chwoŋa to. 30A lage a bwei abam a nii, Jɔn na pɛ nɔɔna sɛɛm to, ko ye Wɛ mo pɛ‑o chwoŋa naa nabiina mo?”
31O na bwei-ba konto to, ba maa wora ba bane daane se ba nii ba na wó ta kolo to, ye ba we, “Debam ná leiri dé we, ko ye Wɛ mo, o laam wó bwei debam we, bɛ mo ye dé nam wo sɛ Jɔn taane dem? 32Ko daare, dé bá wane dé ta we ko ye nabiina mo pɛ‑o chwoŋa.” Ba tage konto kolo ŋwaane ba kɔre foone de nɔɔna bam, de ba maama na sɛ we Jɔn seene o ye Wɛ sampwora to. 33Konto ŋwaane ba ma leiri Yezu ba we, “Dé yeiri kotu.” Yezu laam ma ta de-ba o we, “Ko na ye konto to, amo de nam bá ta wolo na pɛ-ne chwoŋa se a taa toŋe to.”
ទើបបានជ្រើសរើសហើយ៖
Maake 11: KBG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2020, Ghana Institute of Linguistics, Literacy and Bible Translation (GILLBT)