Maake 10
10
Kaane yagem
Matiyu 19:1-12; Luka 16:18
1Yezu laam ma zaŋe o yage jei sem konto ye o vo o yi Judea laŋa kadwoŋi. O ma vo o bɛ Jɔdan buga kam bubɛ dedwoŋi dem. Nɔn-kɔgɔ dedɛ daa ma ba ba gilimi‑o. O daa ma bere-ba Wɛ chega kam, ne o na yeini o ke tei to.
2 Farisi tiina badaara déem ma zaŋe ba vo o tei se ba maŋe o boboŋa ba nii. Ba ma bwei‑o ba we, “Nɔɔno jege chwoŋa se o yage o kaane na?” 3O ma jwoori o bwei-ba o we, “Moses déem pɛ abam ni se á ke tɛ mo?” 4Ba ma leiri‑o ba we, “Moses pɛ ni we nɔɔno jege chwoŋa se o popone tɔnɔ o pa o kaane se ko bere we o yage‑o.”#Nia Gulim 24:1
5Yezu ma ta-ba o we, “Moses nam popone konto o pa abam, á boboŋa na lira de o berem dem to ŋwaane mo. 6Boboa ne Wɛ na naane woŋo maama to, o ke nabiina se ba taa ye baara de kaana mo. 7Wɛ na ke-ba se ba taa ye konto dwoŋi to, nɔɔno ná di kaane, o jege se o pwɛ o tete o kwo de o nu tei ne, se o daare o ba o pa se o de o kaane wom tane daane. 8Konto wó pa ba laam ji nɔɔno dedoa. Ba daa maa dae nɔɔna balei, se ba ye ŋo dedoa mo.#Pulim 2:24 9Wɛ na pɛ se ba kwaare daane to, nɔɔn-nɔɔno daa ba jege se o pɔɔre-ba daane.”#1 Korinti 7:10-11
10Yezu de o kwaga tɔgena bam laam ma jwoori ba zo sɔŋɔ. Ba na zo to, ba ma bwei‑o o taane dem bwia. 11O ma ta de-ba o we, “Nɔɔno ná yage o kaane ye o daare o di kaane wodwoŋi, konto tu chɔge o kaane mo ye o keim dem de kabwoŋa ye bedwe. 12Kaane de ná ve o baro ye o vo o zo baro wodwoŋi, o de keim dem de bwoŋa ye bedwe mo.”
Bu-balwa maŋe de Wɛ paare dem
Matiyu 19:13-15; Luka 18:15-17
13Nɔɔna badwonna maa jaane bia ba tui Yezu tei se o daŋe o jea ba baŋa ne. O kwaga tɔgena bam ma zaŋe ba bwɛ-ba se ba yé taa ke konto. 14Yezu ma na ba na ke tei to. O bane ma zaŋe ye o ta de-ba o we, “Yage-na se bia bam taa tui a tei, se á yé zaŋe á che-ba. Kokuri Wɛ paare dem ye banto dwi nyem mo. 15Chega ŋwaane to, nɔɔno ná wo sɛ se Wɛ taa tei‑o ne bu-balaŋa tei, o bá na chwoŋa se o zo Wɛ woro kom wone.”#Matiyu 18:3-5
16Yezu na tage konto to, o laam ma kwei bia bam o ke o ja-kukworo ne. O ma daŋe o jea ba baŋa ne ye o daare o swɛ ba swolim.
Naduna wó wane ba na ŋwea Wɛ tei ne na?
Matiyu 19:16-30; Luka 18:18-30
17Yezu ma zaŋe o maa kɛa. Nɔɔno wodwoŋi ma duri o vo o yi o tei. O ma kuni dwoona o yiga ne ye o we, “Berem tu, n ye nɔn-ŋom. Nam bere-ne kolo amo na wó ke se a wane a na ŋwea kalo na ba jege kweelim Wɛ tei ne to.” 18Yezu ma bwei‑o o we, “Bɛŋwaane mo n tage we, a ye nɔn-ŋom? Nɔɔn-nɔɔno tera o na ye nɔn-ŋom, ko ná dae Wɛ yerane. 19Nmo maŋe n yei Wɛ nia yam na bere kolo to. Yé go nɔɔn-nɔɔno. Yé zaŋe n ke bwoŋa. Yé zaŋe n ŋɔ. Yé fɔ vwa n pa n dwoŋi. Yé pini n dwoŋi. Ta‑n zuli n kwo de n nu.” 20Nɔɔno wom ma ta ded‑o o we, “Berem tu, ko zege amo biini ne mo amo maŋe a tɔge nia yanto maama.”
21Yezu ma nii‑o ye o jege o swono. O ma ta ded‑o o we, “Ko nam ta gɛ ŋo dedoa se n ke. Jwoori sɔŋɔ n kwei woŋo kolo maama n na jege to n yeigi, se n laam kwei sabu kom n ma n woli yiniga tiina. Konto wó pa se n jejegero tiini te puli Wɛ telaao ne. Nmo ná ke konto, se n laam ba n ta‑n tɔge-ne.” 22Nɔɔno wom na nigi konto to, o yiga ma nyɔne. O wo ma chɔge dedɛ, o jejegero tem na tiini te daga to ŋwaane. O ma yage Yezu tei ye o viiri.
23Yezu laam ma pipiri o nii o kwaga tɔgena bam seeni ye o ta de-ba o we, “Naduna ná lage ba zo Wɛ paare dem wone, ko wó taa tiini ko chana ko pa-ba.” 24O kwaga tɔgena bam na nigi konto to, ko ma so-ba. Yezu daa ta ma ta de-ba o we, “A bia bam, nɔɔno ná lage o zo Wɛ paare dem wone, ko wó taa tiini ko chana ko pa kotu. 25Nadum ná lage se o zo Wɛ woro kom wone, ko wó taa chana ko dwoi kone ná lage se de da gare-lwei bɔɔne de nwoŋi.”
26Yezu na tage konto to, ko ma tiini ko so o kwaga tɔgena bam dedɛ, ye ba tɛ daane ba we, “Ko ná ye konto, nɔɔn-nɔɔno bá wane o na ŋwea Wɛ tei ne.” 27Yezu ma nii-ba ye o we, “Nabiina tei ne mo ko bá wane ko ke. Wɛ nam wó pa ko ke. Wɛ wae ŋo maama o ke.”
28Piita laam ma ta ded‑o o we, “Nii. Debam yage dé woŋo maama mo ye dé daare dé tɔge nmo.” 29Yezu ma ta de ba maama o we, “A tɛ abam chega ŋwaane to, nɔɔno wolo maama ná tɔge amo ŋwaane de Wɛ kwor-ywoŋa kam ŋwaane o yage o sɔŋɔ, de o nu-bia, de o nu, de o kwo, de o bia, ko woli de o kare de, 30konto tu wó jwoori o jwoŋi kolo maama o na yage to se ko maŋe de kuni bi mo Wɛ tei ne. Zem da yam ne mo o wó jwoŋi sam, de nu-bia, de niina, de kare, ye o tɔge o na yaara o woli da. Ko daare maŋa kalo na wó ba to, konto tu wó na ŋwea kalo na ba jege kweelim Wɛ tei ne to. 31Ko daare balo na maŋe ba ye yiga tiina to dedɛ wó jwoori ba ji kwaga tiina. Balo de na maŋe ba ye kwaga tiina to wó ba ba ji yiga tiina Wɛ paare dem seeni.”
Yezu daa ŋɔɔne o toone taane
Matiyu 20:17-19; Luka 18:31-34
32Yezu de o nɔɔna bam maa wo chwoŋa ne ba maa vei Jerusalem. Yezu maa wo ba yiga ne o via. O kwaga tɔgena bam maa ye yaau. Nɔɔna balo de na tɔge ba kwaga to maa fomma. Yezu ma pɔɔre o nɔɔna fuga-balei bam kɔgɔ kom wone ye o ta o bere-ba kolo na lage ko ke‑o Jerusalem ne to. 33O maa we, “Ta‑á yei-na, dé na maa vei Jerusalem to, dáane mo ba laam wó ja amo Nabiin-bu wom ba ke Juu tiina kaanem yiga tiina bam de ba zamesem tiina bam jeŋa ne. Nɔɔna bam konto maa wó di a taane se ko bere we a maŋe se a te mo. Ba laam wó kwei-ne ba ke dwi-gɛ tiina jeŋa ne. 34Banto wó ke amo ba mɔne, ye ba twe lileeru ba yage a yera ne. Ba maa wó kwei kaasa ba ma fere-ne, ye ba laam daare ba go-ne. Da yatɔ dɛ ne a maa wó jwoori a bi toone wone.”
Yezu chwoŋa kam tɔge yaara ŋwaane
Matiyu 20:20-28
35Jemsi de Jɔn na ye Zebedi bia bam to déem ma vo Yezu tei. Ba ma ta ded‑o ba we, “Berem tu, dé tu nmo tei mo. Popo, ke woŋo kolo dé na lage to.” 36Yezu ma bwei-ba o we, “Á lage se a ke bɛ mo a pa abam?” 37Ba ma leiri‑o ba we, “Nmo ná tu n ba n di paare, se n pa debam balei jeini nmo tei ne, n jazem ne de n jagwia ne.”
38O ma ta de-ba o we, “Abam tete yeiri á na maŋe á lwoori kolo to. Abam wó wane á tɔge á zo yaara wo, ne amo na lage a ba a na yaara yalo to na? Á wó wane á te ne amo na lage a na toone delo to na?” 39Ba ma leiri‑o ba we, “Ɛɛ, dé wó wane.”
Yezu laam ma ta de-ba o we, “Abam nam wó seene á tɔge á yaare amo yaara yam dwoŋi.#Kikia 12:2 40Ko daare ko ná ye jeiŋa jei amo paare dem ne, amo ba jege chwoŋa se a kuri nɔɔna se ba jeini da. Wɛ nam maŋe o tiŋi jei sem konto se o pa balo na wó jeini da to.”
41O nɔɔna fuga bam na tu ba lɔre ba dwonna balei bam na lwoori kolo Yezu tei ne to, ba bane ma tiini de zaŋe de Jemsi de Jɔn. 42Yezu laam ma bwoŋi ba maama, ye o ta de-ba o we, “Abam maŋe á yei ko na ke tei de balo dwi-gɛ tiina na pae ba ye ba pwa to. Banto yeini ba jege ba nɔɔna ba bɛɛse mo, ye ba dedɛɛra di dam ba baŋa ne. 43Ko nam ná ye abam, ko ba jege se ko taa ye konto á tei ne. Kokuri abam wolo ná boŋe se o ji nɔn-kamunu á wone, konto tu mo jege se o ji tontoŋeno o pa abam. 44Wolo ná boŋe se o ji abam yiga tu, konto tu mo jege se o ji abam maama kabaa. 45Ko ná maŋe ko ye Nabiin-bu wom, amo wo tu se nɔɔna toŋe ba pa-ne. Amo nam tu se a toŋe a pa nabiina, se a daare a kwei a ŋwea a ma leini nɔɔna dedɛ ŋwea Wɛ tei ne.”
Yezu yɔɔre lilwei
Matiyu 20:29-34; Luka 18:35-43
46Yezu de o kwaga tɔgena bam ma vo ba yi teo kodwoŋi, ko yere mo Jeriko. Ba ma tɔge da ba nwoŋi ba maa kɛa. Ba na maa kɛ to, nɔn-kɔgɔ maa tɔge-ba. Nɔɔno wodwoŋi maa wora o na ye lilwei. O yere mo Batimayu, ko kuri mo Timayu bu. O maa jei chwoŋa kam ni ne o lwoora. 47O ma lɔre we ko ye Nazarete tu Yezu mo tɔge dáane o maa kɛa. O laam ma bobo se o laare baŋa baŋa o we, “Yezu, Pɛ David dwi tu, duri amo yiniga!” 48Nɔɔna dedɛ ma bwɛ‑o se o pu o ni. O laam ma tiini o laare dedɛ ye o we, “Pɛ David dwi tu, duri amo yiniga!”
49Yezu laam ma zege ye o ta we, ba bwoŋi‑o se o ba. Ba ma bwoŋi‑o ye ba ta ded‑o ba we, “Zuri n yera se n zaŋe wɛɛne. O bwoi‑m se n ba.”
50Lilwei wom ma le o gare-bwora o faŋe wɛɛne o vo o yi Yezu tei. 51Yezu ma bwei‑o o we, “Nmo lage se a ke bɛ mo a pa nmo?” O ma leiri o we, “Berem tu, amo lage se a jwoori a taa nae mo.” 52Yezu ma ta ded‑o o we, “Nmo na ke n wo-dedoa de amo tei to mo pɛ se n na yazura. Nam vei sɔŋɔ.”
Yezu na tage konto bedwe baŋa ne to mo lilwei wom yia jwoori ya nae. O maa tɔge Yezu kwaga chwoŋa kam ne.
ទើបបានជ្រើសរើសហើយ៖
Maake 10: KBG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2020, Ghana Institute of Linguistics, Literacy and Bible Translation (GILLBT)