Yohané 20
20
Mba Yésu lo num vù là
(Mat. 28.1-8; Mark. 16.1-8; Luk. 24.1-12)
1A be mbwe lé'njù ntùm ngabnjù, Maria ze Magdala nèn nkum ntshufi, ngelaṅ dù' ke nke' nsènte là. A yen ndù bo bù' loṅ ntshufi. 2Ndùlala a kù nde, nèn mbaṅ Simon Pétro mba mbaṅ mo' ngazi'te nu Yésu z'a ke nkô i là, ntshob bo ndù: Bo sô Tshùaben ntùm fi, bag ke' lèn dù' ze bo yab i bwe là.
3Ndùlala Pétro mba mo' ngazi'te nu Yésu tum, nèn ntshu fi. 4Bo kù nde ntu tshob bàa fa yoṅ ntshù', là mo' ngazi'te kù nde nkwé mbwe, nèn ndende ntshùa Pétro, mbwôg kum ntshufi. 5A ben wul i, njen ba nzwe nsi, là, a ke tsho ntùm fi. 6Ndùlala, Pétro z'a tam njam i là kum bwe, ntsho ntùm fi, njen ba nzwe nsi, 7là kam nzwe z'a na' mbe tu i là ke b'a boa tshen nzwe là, là ndù bo bot'é, njab mo' dù' tù' i. 8Mba mo' ngazi'te z'a bwôg kum ntshufi là tsho ntùm fi njene, mbèn mbame. 9Nummbe bo lo ke yoṅ ntshùa njam ṅwa'ni Nsi nju' ndù a bwô a lo num vù. 10Ndùlala, ghazi'te nu Yésu bèn njam la' bo.
11Là Maria tsin mbaṅ ntshufi, njù, nke ndàne. Mb'a ke ndàn nà, a ma' miag mi ntùm fi, 12njen Angél bàa, ndù bo ket nzwe fôgtab, ntswe nsi dù' bo yab fe Yésu bwe là, mo' num tu i, mo' num nku mi. 13Tshen ni tshob yi ndù: Mènnzwi, o làn à numke? A tshob bo ndù: Nummbe bo sô Tshùaben àm, me ke' lèn dù' ze bo yab i bwe là.
14A tshob ndùlala, nkaṅ wul i njam, njen Yésu ndù a tsin bwe, a ke lèn ndù a b'a Yésu. 15Yésu tshob yi ndù: Mènnzwi, o làn à numke? O ke ndiag à we? Maria kwate ndù a b'a ngalôte nà, ntshob yi ndù: Tshùaben, a be z'o bèn nsô i là o tshob dù' z'o yab i là me, me nsi nèn lo' i. 16Yésu tshob yi ndù: Maria! Maria kaṅ wul i, ntshob yi ntshob Héber ndù: Rabbuni (yen nà b'a ndù: Ngatswite). 17Yésu tshob yi ndù: Kà kwag àm, nummbe me ke' yoṅ nèn mbaṅ Tà. Là nèn mbaṅ fèt tshàm ntshob bo ndù me tshwèt ko' nèn mbaṅ Tàa mba Tà zin, mbaṅ Nsi àm, mba Nsi zin.
18Maria ze Magdala nèn nsoṅ ghazi'te nu Yésu ndù a yen Tshùaben, mba ndù a tshob tshen nà yi.
Mba Yésu ṅwag ghazi'te nu i là
(Mark. 16.14-18; Luk. 24.36-49)
19Ndùlala mfetnjù lé'njù mbile, mbwe lé'njù ntùm ngabnjù, mba nzendà dù' ghazi'te nu Yésu tse'te bwe tam tu, nummbe bo lo ke mbwôg ba Yuda là, Yésu se', ntsin netèt ntshob bo ndù: Fite be bin! 20Ngelaṅ a tshob yen nà là, a la'te mbu mi mba nsa i bo. Ndùlala ghazi'te nu i be yen Tshùaben ntsiaṅte. 21Ndùlala Yésu tshob bo ndù: Fite be bin! Mba Tà tum àm nà, mba tu wul àm, me tum zin yàm. 22Ngelaṅ a tshob yen nà là, a fùag Ywèt tse num bo, ntshob bo ndù: Bin kwé Ywèt Nelàne. 23Ben #Mat. 16.19; 18.18tse bin nsi lagte nukebwô tshob là, mba nukebwô tshob mi, ben tse bin nsi tshùb nukebwô tshob là, mba nukebwô tshob tàne.
24Là Tomas mo' mèn netèt tse ntshob bàa gham, ze bo ke ntsiaṅ i Didime nà, lo ke be bo à bo ngelaṅ Yésu se' là. 25Ndùlala tsemo' ghazi'te nu Yésu nke ntshob yi ndù: Bag yen Tshùaben. Là, a tshob bo ndù: A be ze me ke' yen ntshumfaṅ ntùm mbu mi, a be ze me ke' yab ntubu àm ntùm ntshumfaṅ ntùn nà, a be ze me ke' yab bu àm nsa i là, mba me ke nsi bame. 26Lé'njù fom lo be tshùa, ghazi'te nu i bèn ntse'te ntùm ndà, mba Tomas be bo à bo. Mba nzendà tam tu là, Yésu se' ntsin netèt, ntshob ndu: Fite be bin!
27Ntshob Tomas ndù: Se' ntubu o nsen ni, mbèn ndôte mbu màm! Se' mba bu o njab num nsa àm, kà bèn ntù' mèn z'a ke' bam nà, là tù' mèn z'a bam nà. 28Tomas bùnte ntshob yi ndù: Tshùaben àm mba Nsi àm! 29Yésu tshob yi ndù: Nummb'o yen àm nà, o bam! Ghafen b'a ben tse bo ke' yen mbam nà!
30Yésu lo bèn ngù tsemo' nsà yàm mbwe ghazi'te nu i, tshen nà tse bo ke' kite ntùm ṅwa'ni li là, 31là bo na' nkite tshen tshu li à ndù bin bam ndù Yésu b'a Kristô, Mén Nsi, mba ndù bin be bam i, ngù yôg num lén se.
ទើបបានជ្រើសរើសហើយ៖
Yohané 20: BMa
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
