Yohané 21
21
Mba Yésu tswite wul i kaṅ dibantse là
1Tshen tshu là lo be tshùa, Yésu bèn ntswite wul i ghazi'te nu i num kaṅ dibantse Tibériade, a tswite wul i ndù: 2Simon Pétro, Tomas ze bo ke ntsiaṅ i Didime nà, Natanaél ze Kana mà Galiléa, bon Zèbèdéo mba tsemo' ghazi'te nu Yésu bàa lo be à dù' ntshù'. 3Simon #Luk. 5.5Pétro tshob bo ndù: M'a' nèn ghom ngontse. Bo tshob yi ndù: Mba bag à nèn yag bag à wù. Bo tum, ntsho ntùm kenu. Yen tèttswe' là bo ke ghom sàm ju. 4Mba njù ké'te là, Yésu tsin kaṅ ntse, là ghazi'te nu i ke lèn ndù a b'a Yésu. 5Ndùlala Yésu tshob bo ndù: Bônke', bin ke' ghù ngontse ké? Bo bùnte yi ndù: Nga.
6A #Luk. 5.6tshob bo ndù: Bin ma' mbunjà num bag kenu ze zwim, bin nsi fone, ndùlala bo ma', ke bèn ngù neta nesô mbunjà num bwoṅ ngontse z'a be ntùm bwe là. 7Ngazi'te nu Yésu yen nà z'a ke nkô i là tshob Pétro ndù: A b'a Tshùaben. Simon Pétro be ju' ndù a b'a Tshùaben, ndo' nzwe i, ntaṅ tun i, nummbe a na' mb'a tunntôg; a vù ntùm dibantse. 8Là tsemo' ghazi'te nu Yésu se' boa kenu, (nummbe bo lo ke b'a ngùanesà num tsha'a, là nguan nkam mfi' nkù bàa), nsoṅ mbunjà boa ngontse. 9Ngelaṅ bo tum num tsha' là, bo yen mo' tse nge'mbwôg bwe, mba ngontse num bwe mba bàn.
10Yésu tshob bo ndù: Bin lo' ngontse num tse bin lo neghom ndonni là nse' yi. 11Simon Pétro ko' nsô mbunjà num tsha'a, ndù a dun ndô ngontse ndùbndùb ntshob tat bon tàn nkù. Mba mb'a na' njàm ntùm bwe là, mbunjà ke fagte. 12Là Yésu tshob bo ndù: Bin se' njù jujù. Là sàm mèn netèt ghazi'te nu i ke fèn ntù nebètt'é ndù: O b'a we? Nummbe bo lèn ndù a b'a Tshùaben. 13Yésu kù'te ndo' bàn mfà bo, mba ngontse be ndaṅndaṅ. 14Yen ni b'a mbatte yoṅ tat mba Yésu tswite wul i ghazi'te nu i, ngelaṅ a lo num vù là.
Mba Yésu tshobte bo Pétro là
15Ndùlala ngelaṅ bo jù jujù là, Yésu tshob Simon Pétro ndù: Simon mén Yohané, o num nkô àm ntshùa tshen ben ni ké? A tshob yi ndù: Ṅ, me Tshùaben, o lèn ndù me num nkô o. A tshob yi ndù: Béb bon njùmbwe tshàm. 16A tshob yi mbatte bàa ndù: Simon mén Yohané, o num nkô àm ké? A tshob yi ndù: Ṅ me Tshùaben, o lèn ndù me num nkô o. A tshob yi ndù: Béb njùmbwe tshàm. 17A tshob yi mbatte yoṅ tat ndù: Simon mén Yohané, o num nkô àm ké? Pétro nywin mb'a tshob yi num mbatte yoṅ tat ndù: O num nkô àm ké là, ntshob yi ndù: Tshùaben, o lèn njoṅ tshu fa, o lèn ndù me num nkô o. Yésu tshob yi ndù: Béb njùmbwe tshàm. 18Kua' nenùne, kua' nenùne, me tshob wù ndù: Ngelaṅ o na' mbe kua' ménnshum nà, o lo ke ntaṅ kob so tu wul o, nke nèn dù' z'o kô là. Là ngelaṅ z'o nsi tù' njwèn mèn nà, o nsi nyit mbu mu, mo' mèn taṅ kob so, lo' o nèn yi dù' z'o ke nsi kô là. 19A ke ntshob ndùlal'a nelo' nda'te lèn vù se Pétro nsi ghamte Nsi yi là. A tshob yen nà, ntshob yi ndù: Tam njam àm!
20Pétro #13.25kaṅ wul i njam, njen ngazi'te nu Yésu, yen nà z'a ke nkô i là, ndù a tam njam bo. A b'a yen nà z'a na' mben wul i num ndàntù Yésu, ngelaṅ bo be téblé, ntshob yi ndù: Tshùaben, ngaswèn o b'a we? 21Pétro be yen i, ntshob Yésu ndù: Tshùaben, yen mèn ni o? 22Yésu tshob yi ndù: A be ze me kô ndù a ghô tà nkum ngelaṅ me nsi se' là, mba yu be bwe à ndùke? Tu wul o, tam njam àm. 23Ndùlala men ntshob là sa netèt fètfèt, ndù yen ngazi'te nu Yésu là ke nsi kwù. Là ndù Yésu lo ke tshob ndù a ke nsi kwù, là ndù: A be ze me kô ndù a ghô tà nkum ngelaṅ ze me se' là, mba yu be bwe à ndùke?
24A yen ngazi'te nu Yésu là bèn nkwé nta tshen tshu là, a yi bèn nkite tshen nà; bag lèn ndù ze nekwénta b'a nenùne.
25Tsemo' tshu bèn mbe bwe yàm tse Yésu na' ngù là. A lo mbe ndù bo kite yub ntshù', ntshù' mba me kwate ndù ṅwa'ni tse be bo kite là ke' ku'ni netsho ntùm njù li.
ទើបបានជ្រើសរើសហើយ៖
Yohané 21: BMa
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
