Roka 4
4
Yeso‑ya Satanasi keyehe‑ya hirine
1Deoso‑ka Doni ati‑ya Yeso tokadabe, Yodaho Faha‑ya yanane, kabani‑ya tokematane.
2Kabani‑ya wai, hawi‑ya Deoso‑ka Doni yofikanematane. Diaboro Yeso‑ya hiyarematane, Deoso ati‑ya tokadabamarebonaha. Yeso tafare, amoni 40 kane fimi watihikanematane.
3“Deoso Bidi amatini, tiwati ihi yati baho tohahi, tikababonehe.” Diaboro ati nematane.
4“Deoso‑ka yama hani ati timitahi. Ai tefe ai‑ya kasomi nafirani.” Yeso ati nematane.
5Yama wai nemehe‑kaya Yeso‑ya Diaboro towake, mai tabori dami‑ya yofikanematane.
6“Mai nafi tiwa‑ya daa·onaboneni, mai tiyosewahabonehe. Yama amosa nafi daa·onaboneni. Hibati‑ya bofe‑ya yama nafi okayawa, owati daahina, daa·onaboneni.
7Owa hidi tiniya, yama nafi tiwa‑ya daa·onaboneni.” Diaboro ati nematane.
8“Deoso‑ka yama hani ati‑nima obisaboneni. Yama hani ati timitahi.
‘Deoso dai kahiyarahi. Mai one‑ya dai narifariyahi. Deoso dai narifabisahi.’ Deoso‑ka yama hani ati nineni.” Yeso ati nematane.
9Yerosare‑ya Yeso‑ya Diaboro towake, Deoso‑ka yobe tati mese‑ya Yeso‑ya hiyaramatase,
“Deoso Bidi amatini, yoratinisahi. Yama sibaraboneni.
10Fara Deoso‑ka yama hani ati timitahi.
‘Deoso‑ka yo‑yose mai hiyosebonane, tiwa‑ya mai kasomabonehe.
11Tiwa‑ya mai waratonaboneni, yati‑ya tiwa teme taratokarabonehe.’ Deoso‑ka yama hani ati nineni.” I‑di Satanasi ati nematane.
12“‘Deoso hini ati‑nima ene nebona, ati‑ya dai siwakariyahi.’ Yama hani ati neni.” Yeso ati nematane.
13Diaboro keyehe‑ya hirini hawa tohe, tokome,
“Yama one‑ya Yeso ohiyaramatasiya, owati‑ya nofeba awane.” Atibodi ati nematane.
Karireya‑ya Yeso mai‑ya hiyare
14Karireya‑ya Yeso winitoname, Deoso‑ka Doni ene Yeso ati kitematane. Karireya‑ka tabaro dami‑kaya Yeso tamine‑ya mai hiyara, Yeso tamine‑ya mai nafi mitawahameteni.
15Tabora dami‑ya Deoso‑ya mai hi‑hiyara‑ke yobe‑ya Yeso mai‑ya kanawatomatane.
“Yeso ati amosane.” Mai nafi ati nameteni.
16Nasare‑kaya Yeso ya‑yana toha‑mata‑kaya i‑di Yeso tokome, kobotonamatasematane. Sabado dami‑nima Deoso‑ya mai hi‑hiyara‑ke yobe‑ya Yeso tokiyome, yama hani‑ya kadike, fara sabado‑ya Deoso‑ya mai hi‑hiyara‑ke yobe‑ya Yeso waamisamematane, Deoso‑ka yama hani‑ya kadikebonaha.
17Isa·iya‑ka yama hani‑ya mai daanameteni, Yeso hikadikabonehe. Yeso warahikana, seehikana, hikadika,
18“Deoso‑ka Doni owa‑ya sawi, Deoso owa‑ya kadikemari, owa‑ya yosemarine. Yama‑ya mai kihara mai‑ya Deoso ati amosabote okaminawahaboneni. Hibati‑ya mai‑ya barikanemari, owati ihi mai seekawahaboneni. Hibati‑ya yama‑ya mai awatera, owati ihi yama‑ya mai awawahaboneni. Mai mai bisihinamaro, owati ihi mai mai bisihinami awiraboneni.
19Deoso ai‑ya kasomebona tamine ohiyaraboneni.” Isa·iya‑ka yama hani ati neni, Yeso hikadikaro.
20Yama hani‑ya kinikaname, hidi‑ka yo‑yose‑ya yama hani‑ya daatoname, itarimatane. Mai nafi hiwakatomematane.
21“Deoso ati okadike‑nima yama nawawahineni.” Yeso ati nematane.
22“Se! Yeso ati amosane.” Mai nafi ati nameteni.
“I‑di Yose bidi amanaraniha?” Mai one ati nameteni.
23Yeso ati yanane,
“‘Mai ihi oda awiya, mai ati oda nofaboneni.’ Dai ati teni.
‘Oda‑ka owa tiha, Kafanaho‑ya tiwa ene‑nima oda tikasomaharihi.’ Dai ati na awineni.” Yeso ati nematane.
24“Owati dai mitamakihi. Hini mai tabori‑ya Deoso ati‑ya mai mi‑mita mai ati‑ya mai nofaterani.
25Hibati‑ya i‑di Eriya hasinasa neya, Deoso ati ene abariko 42 kane‑ya faha kakimara, yamata yanami awirametemoneni. Isara·eo‑kaya ai‑ka fana mai honita wahawama mai dama,
26mai‑ya Eriya kasomare, yara fana honita wahawama ohare‑ya Eriya kasomematamonane. Yara‑ka wami oni Sidoho toha, tabori oni‑ta Sareta tohametemoneni.
27Hibati‑ya i‑di Eriseo hasinasa neya, Isara·eo‑kaya ai one dama mai mese towe mai‑ya i‑di Eriseo nakitamarematamonane. Siriya mai‑ka owa i‑di Naama mese towe tohe‑ya i‑di Eriseo nakitamabisematamonane.” Yeso ati nematane.
28Yeso ati‑ya mai mita, mai nafi yawi kita,
29mai nahomisa, tabora‑ka adami webote widi‑ya Yeso‑ya mai fatani toka, adami dori‑ya mai hiwakematane, mai korohiwitibonaha.
30Hiniya mai teberi‑ya Yeso tokomematane.
Yeso ene madi towe kanane
31Karireya‑ka tabora one Kafanaho‑ya Yeso toke, kobone, sabado‑ya mai‑ya kanawatomatane.
32Yeso ati‑ya mai mita,
“Se! Yeso yama hani ati‑ya wato nafine, yama hani hidi ati‑nima ati nane.” Mai atibodi ati nameteni.
33Deoso‑ya mai hi‑hiyara‑ke yobe‑ya maki madi towe foye‑ke sawi, Yeso‑ya haane, ati kite,
34“Ka! Yeso Nasare‑ke hini yamata‑nima tinaba? Oda‑ya bisitiriyahi. Tiwa owatoni. Deoso‑ka amosabote amatini.” Madi towe ati nematane.
35Yeso madi towe‑ya weene,
“Tiwati fawanahi. Maki‑ya tifoyamariyahi.” Ati nematane.
Madi towe ene mai bai‑ya maki sone, maki‑ya bisini awire, hiniya toke, maki amosawamematane.
36Yeso ene‑ya mai awa, mai atibodi yama‑ya kadika, mai ibi hiyara,
“Hini yamata ihi tohiti? Hidi ati‑nima Yeso ati ne, ati kite, ati ene madi towe mai kanateni.” Mai ati nameteni.
37Tabora dami‑ya Yeso tamine‑ya mai kaminameteni.
Mai dami‑ya nakitame
38Deoso‑ya mai hi‑hiyara‑ke yobe‑ya Yeso yanane, Simaho‑ka yobe‑ya tokiyomematane. Simaho‑ka koma hiwe nafe, kawinameteni. Yeso kobone, Simaho‑ka koma tamine‑ya mai kaminameteni.
39Simaho‑ka koma kawina, fowari‑ya Yeso wai,
“Yama kome tikahi.” Ati nematane.
Hiwe fawana, kitama, waamisa kanibote na, mai tafe‑bone‑ya awawahameteni.
40Mahi toke‑ya Yeso‑kaya mai kiyana mai mai hiwakake, mai tati‑ya Yeso yehe fori, mai kitamameteni.
41Mai‑ya madi towe mai fo‑foya Yeso ati ene madi towe mai kanana, mai ati kita,
“Deoso Bidi amatini.” Madi towe mai ati na,
“Dai ati fawanahi.” Yeso ati nematane.
“Deoso‑ka Ka‑kadika oha, owa‑ya mai wata, owa tamine‑ya mai hiyararaboneni.” Yeso atibodi ati nematane.
Deoso ati amosabote‑ya hiyarane
42Yama wahabisari‑ya Yeso kabani‑ya tokematane. Yeso‑ya mai sibana, mai hiwasi,
“Oda tabaro‑ya tiwinahi. Mai tabori‑ya tikariyahi.” Mai ati nameteni.
43“Mai tabori dami‑ya Deoso ai nafi‑ka hidi kitabote tohawahe‑bona tamine ohiyaraboneni. Mai dama mai‑ya ohiyarabisabone owa‑ya yosemarine.” Yeso ati nematane.
44Yodeya‑ka tabora dama‑ya tokawahe, Deoso‑ya mai hi‑hiyara‑ke yobe dami‑ya Deoso ati‑ya hiyarawarimatane.
ទើបបានជ្រើសរើសហើយ៖
Roka 4: jaaNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
