Roka 5
5
Bedoro mai‑ya Yeso himane
1 # 5:1 Kenesare‑ka faha toha, Karireya‑ka faha toha neni. Kenesare‑ka faha widi‑ya Yeso wai‑ya mai dama mai yorotokana, mai howatokarameteni, Deoso ati tamine‑ya mai mitabonehe.
2Kanawa honita fama demena‑ya Yeso awe, kanawa hidi faha widi‑ya hedi‑ya mai namosameteni.
3Simaho‑ya Yeso haane, kanawa dori‑ya foye, Simaho‑ya hiyare,
“Ai‑ya kanawa maanakihi.” Ati ne,
itari, mai dama mai‑ya kanawatomatane.
4Mai‑ya hiyari hawa tohe, Simaho‑ya hiyare,
“Faha kowe‑ya ai towakahi. Tika hedi dai kerokanaba, aba mai dai watabani.” Yeso ati nematane.
5“Ayo, yama soki nafi‑ya hedi oda kerokana, aba mai‑ya hedi wati nofarene. Sibaraba awineni. Tiwati ihi ai kerokanamataseya, ai awebane.” Simaho ati nematane.
6Hedi mai kerokana, hedi‑ya aba mai dama mai wasiwaha, hedi madone owa betetonematane.
7“Kanawa one dai kakamakihi.” Mai yahi ati nameteni.
Kanawa one‑ya mai kakamake, mai hinakibamake, kanawa fama kibikima, bokikimi yanatonameteni, aba mai dama mai ihi.
8Yeso ene‑ya Simaho Bedoro awe, yobati‑ya wai,
“Ayo, owa‑ya tisawimariyahi. Towe ama·oni. Amosabote amatini.” Bedoro ati nematane.
9Aba mai dama mai‑ya Bedoro awe, habo siitone, Bedoro‑ya mai daba mai habi siitonaharemeteni.
10Kanawa one‑kaya i‑di Sebedeo bidi mai fama, i‑di Tiyako, i‑di Yowaho mai na, mai habi siitonaharemeteni.
“Simaho, tiwa habo siitoriyahi. Hibati‑ya aba mai‑ya tinawasiteni. Hibayata Deoso ati tikaminaboneni, ati mai one hinofawahebonaha.” Yeso ati nematane.
11Faha widi‑ya mai kobokanama, mai‑ka yama towadakosa, Yeso‑ya mai dabawahameteni.
Mese towe‑ya kasome
12Tabora one‑ya Yeso toke, maki mese towe tohe ite‑ya Yeso tofodowiti, Yeso‑ya maki awe, yobati‑kaya itarise, moinisematane.
“Ayo, haa‑nima ai‑na ai kasomi tiwata, owa kasomi tinofakarini?” Ati nematane.
13Yeso maki‑ya boyone,
“Onofini. Tiwa mese amosawamahi.” Ati ne, ati ene mese amosawamematane.
14“Owa ene tamine mai‑ya tihiyarariyahi. Deoso‑ka yama‑bone‑ya mai da‑daa mai‑ya tikahi. Mose‑ka yama hani ati‑nima yama daatiniya, tikitama, tiwa‑ya mai watowahaboneni.” Yeso ati nematane.
15Yeso ati‑ya mai tokadabara, Yeso tamine‑ya mai kamina, mai ati tamine‑ya aka‑ya mai wi‑wina mai mita, mai dama mai yamanakemeteni, mai one Yeso ati‑ya mita, mai one Yeso hinakitama hinabonehe.
16Kabani‑kaya Yeso yobinematane, Deoso‑ya hiyarebonaha.
Ka‑kakone‑ya nakitame
17Mai dama mai yorotokana mai‑ya Yeso kanawatomatane. Fariseo mai toha, Mose‑ka yama hani ati‑ya mai ka‑kamina mai toha, mai na, mai sawi, mai one Karireya‑ka mai kaki, Yodeya‑ka mai one kaki, Yerosare‑ka mai one kaki nameteni. Mai kiyana, Deoso ene mai‑ya Yeso nakitamematane.
18Maki ka‑kakone awa‑ya bora dasikana‑ya mai damahikanematane. Yobe doro‑ya Yeso wai‑kaya mai hiwakamakibona mai ati na,
19yobe kibe, yobe tati mese‑kaya mai hiwakimise, yobe tati mese kote‑ya mai seekanameteni. Yobe tati mese hodone‑ya mai hikanakise, mai one teberi‑ya Yeso wai‑kaya, kaforirisematane.
20Mai ihi‑ya Yeso awe, “Owati‑ya mai nofineni.” Yeso atibodi ati ne, maki ka‑kakone‑ya hiyare,
“Tiwa ene towe manakone wadamarini.” Yeso ati nematane.
21Mose‑ka yama hani ati‑ya mai ka‑kamina mai toha, fariseo mai toha, mai na, Yeso ati‑ya mai mita, mai yawawahameteni.
“Bofe‑ka ai toha ai ati ene ai owa ene manakone fawaterene. Deoso hini ati ene ai ene manakone fawateni. Maki ene towe manakone wadamaremona Yeso ati ne,
‘Deoso‑nima ona ama·oni.’ Yeso ati ne awane,
hini ati ene abaho.” Mai atibodi ati nameteni.
22Mai atibodi ati‑ya Yeso wato, ati yanane,
“Hini yamata‑bone owa‑ya dai atibodi weeniti?
23Bofe‑ka mai ati ihi ai ene towe manakone fawarihi, bofe‑ka mai ati ihi ai owa kitamarihi tene.
24Owati ihi ai owa ene towe manakone wadamare, dai awaboneni.” Yeso ati nematane.
Maki kiyane‑ya hiyare,
“Owati timitahi. Tiwaamisahi. Tika fo‑fori‑ka yama diwatikaniya, tikamahi, tika yobe‑ya.” Yeso ati nematane.
25Mai noki‑ya waamise, hika fo‑fori‑ka yama‑ya damakane, tabaro‑kaya tokome, yakaneya, Deoso‑ya kahiyarematane.
26Kitame‑ya mai awa, mai nafi atibodi yama‑ya kadikameteni. Mai habi siitona,
“Deoso ene amose, hibayata yama bara oda awani.” Mai ati nameteni.
Refi‑ya himane
27Makobote Yeso toke, kofeno‑ka yinero‑bona‑ya ha‑haa‑ya awematane. Kofeno‑ka yobe bidi‑ya Refi itariya, Yeso himane,
“Owa‑ya tisawihi.” Ati nematane.
28Refi waamise, hika yama towadakosa, Yeso‑ya sawiwahematane.
29I‑di Refi‑ka yobe‑ya Yeso eyehe mai tokameteni, mai marinabonehe. Kofeno‑ka yinero‑bona‑ya mai ha‑haa mai dama, mai one dama, mai na, mai nafi marinameteni.
30Fariseo mai one Mose‑ka yama hani ati‑ya mai ka‑kamina mai toha Yeso‑ya mai da‑daba mai‑ya mai weena,
“Hini yamata‑bone towe mai eyehe dai tafiti? Kofeno‑ka yinero‑bona‑ya mai ha‑haa mai eyehe oda tafarihi, mai ihi amosara mai eyehe oda tafarihi, oda teni.” Mai ati nameteni.
31Mai ati‑ya Yeso mite, ati yanane,
“Mai kiyara mediko mai‑ya kasomaterene. Mai kiyana‑ta mediko mai‑ya kasomatene.
32Mai ihi amosamone mai ati na, mai hima·orani. Mai ihi amosara mai hima·obisateni, mai ihi amosawamabonehe. Fara ihi okemaroni.” Yeso ati nematane.
Ai tafarabone tamine‑ya hiyare
33Yeso‑ya mai hiyara,
“Yowaho‑ya mai da‑daba mahi owa‑ya mai tafa, mahi owa‑ya mai tafarihi na, Deoso‑ya mai hiyarabisateni. Fara mai ihi‑nima fariseo mai‑ya mai da‑daba mai ihi teni. Tiwa‑ta tiwa‑ya mai da‑daba mai tafi fawaterani.” Mai ati nameteni.
34“Mai‑ka owa fanebona sawi ene mai ya‑yaina, mai tafi fawaterani.
35 # 5:34-35 Yeso hini tamine‑ya hiyare, abebona makobote neme‑ya tokebonane. Yama one‑kaya maki mai hiwakebona, tabora bara‑ya tokeya, mai tonokosa, yawa ihi mai tafi fawarimanaboneni.” Yeso ati nematane.
36Mai‑ya kanawatobona, mai‑ya hiyare,
“Ai‑ka bora bote hodeya, bora yati ibe sibinare, bora bote hodi‑ya ai nawaanaterani. Bora bote ihi bora yati ai sibiniya, bora bote amosawamaterani.
37-38Bani ataro wamani yama wiye toha, wamani yati‑ya fino yati ai soronisiya, wiye taokiterani. Yama wiye bote‑ya fino yati ai soronisaterani. Yama wiye bote‑ya fino yati ai soronisiya, taokana, yama wiye aba, fino abateni. Fino yati yama wiye yati‑ya ai soronisateni.
39 # 5:36-39 Yama bote‑ya yama yati dabara‑nima ai ya‑yainiya, ai tafi fawaterani. Fino bote mai fawa, fino yati mai haanamakiterani. Fino bote fawi amosini. Mai ati teni.” Yeso ati nematane.
ទើបបានជ្រើសរើសហើយ៖
Roka 5: jaaNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
