Roka 21
21
Fana honita wahawama yinero‑ya daana
1Yeso noko toke, yinero dame‑ya mai kiha, Deoso‑ka yinero‑bona‑ya mai daanameteni.
2Makobote fana kamake, fana maki abemata, honita wahawama, yahi hone wadara, hika yinero bidi fame‑ya daanameteni. Ihi Yeso hiawa,
3“Owati amosa dai mitahi. Fana honita wahawama yama nafi‑ya daaneni. Mai one‑ta yama nafi‑ya mai daani awirani.
4Mai‑ka yinero dame, owa‑ya mai daana, mai‑ka yinero dame hasinane. Fana‑ta yahi honene wadara, hika yinero bidi fame‑ya daana, hika yinero owa hasini awire, tafe manakone‑bone‑ya daanibisineni.” Yeso ati nematane.
Okomatasiya, haa‑nima nabone
5Deoso‑ka yobe yati amosa‑ya wamanihi, yama amosa one siitonihi na tamine‑ya mai one hiyara, Yeso ati yanane,
6“Owati dai mitahi. Hibayata yama amosa‑ya dai awineni. Yama one‑ya yobe wadamarebona, yati fama demenarimaraboneni.” Ati ne,
7“Ayo, eme ai amoni niya, yobe ababonati? Yama koboni yanatoniya, hini yamata oda awibati, yama‑ya oda watowahi‑bone‑karo?” Mai ati nameteni.
8“Dai noko wadahi. Dai‑ya mai keyeheriyahi.
‘Deoso‑ka Ka‑kadika ama·oni. Yama yana kanibote naboneni.’ Mai dama mai ati naboneni.
Mai ati dai tokadabariyahi.
9Wami hidi mai ibi nofarabone, mai‑ka sodado mai ibi taonabone, mai tamine dai mitiya, dai habo siitoriyahi. Yama faina‑bone kobonabone, kobo kanibote raboneni.” Yeso ati nematane.
10Makobote Yeso ati yananamatase,
“Wami one‑kaya mai wi‑wina mai‑ka sodado ahini‑kaya mai kamakeboneni, mai dami‑ya mai nanahababonehe. Ahini‑kaya mai wi‑wina mai‑ka sodado maa kowani‑kaya mai tokaboneni, mai‑ya mai nanahababonehe.
11Wami wawawakani kita, mai dami fimi ihi mai aba, mai kiyana mai dama mai aba naboneni. Yama towe yanana ihi, ‘Ka!’ Mai ati naboneni. Neme‑ya yama yofina‑ya mai awawahaboneni.
12Fara haa‑nima yamana yanani awisari‑ya dai‑ya mai wataboneni, dai‑ya mai bisinabonehe. Owati dai no‑nofa dai‑ya mai nafoyaboneni, kadeya‑ya. Owati dai no‑nofa Deoso‑ya mai hi‑hiyara‑ke yobe hidi‑ya dai‑ya mai towakama, mai‑ka hidi webote‑ya dai‑ya mai towakama, mai‑ka kofenado‑ya dai‑ya mai towakama na, dai‑ya mai kako nafeboneni.
13Mai‑ka hidi dai ati‑ya mai mitabone owa tamine‑ya dai hiyaraboneni.
14Dai ati mai mitabone dai‑ya mai haana, dai atibodi yama‑ya kadikariyahi.
15Owa ene yama‑ya dai watowahaboneni. Dai ati yananiya, mai ati fawanaboneni.
16Dai‑ya mai kahabanaboneni. Dai‑ka abi, dai‑ka ami, dai‑ka ayo, dai‑ka soho, dai‑ka naki, dai‑ka no‑nofa, mai na, dai‑ya mai kahabanaboneni. Mai‑ka hidi dai one‑ya mai nanahababoneni.
17Owa dai nofa dai‑ya mai nafi kakaboneni.
18Dai abi ohari awiraboneni.
19 # 21:19 “Ai abaterabone‑kaya” Deoso tabaro tamine amane. Owa oni dai saatonakosi awiriya, ai abarabone‑kaya dai saweboneni.
20Yerosare‑ya sodado mai kakidikosa mai dai awa, Yerosare aba kanibote naboneni.
21Yodeya‑ya dai wi‑wina adami webote‑kaya dai kananiyahi. Yerosare‑ya dai wi‑wina dai kananaharihi. Sidadi yakari‑ya dai wi‑wina Yerosare‑ya dai tokariyahi.
22Mai ihi manakone kobonaboneni, yama hani ati‑nima yama nawahabonehe.
23Ka! Mai fanawi naba toha, mai‑ka madehe i‑isi na mai toha na, mai kananiya, yama ati kasiraboneni. Deoso yawe ene Yodeo mai‑ya sodado mai kakaboneni.
24Mai dama mai‑ya sodado mai nanahaba, mai one‑ya mai watiya, Bara mai tabori dami‑kaya mai‑ya mai towakama naboneni. Yodeo mai tohara Yerosare‑ya mai kayafaboneni. Yodeo mai tohara mai amoni‑ya Deoso kadikatene, mai‑ka kofeno kiti fawanebonane.
25Mahi, abariko, amowa, mai na, mai bara tohaboneni. Bofe‑ya mai wi‑wina mai habi siitonabone, maa rike webote‑ya mai awa, faha moni kita‑ya mai mita, mai na, mai habi siitonaboneni.
26Neme‑kaya yama nafi wawawakanaboneni. Yama towe yananabone ihi mai dama habi siitona, mai habi siitona ihi mai abakosaboneni.
‘Yama nafi ababonehe.’ Mai atibodi ati naboneni.
27Dai‑ka Ayo neme‑ke‑ya mai awabone, neme sabi‑ya kisameya, wehene nafibonane. Ene kitebonane.
28Haa‑nima yama na dai awiya, dai ya‑yainahi. Deoso dai‑ya kasoma kanibote nebonane.” Yeso ati nematane.
29Mai‑ya kanawatobona mai‑ya hiyaramatase,
“Fiko ade dai awiyahi. Awa haa‑nima teni.
30 # 21:30 Mai tabori‑ya yama siri‑ya awa afe aba, yama hiwe koboni yanatonamatasiya, awa afe yananamatasateni. Awa afe yanamatasaya, yama hiwe kakebone ai watoteni.
31Fara owati‑nima yama niya, Deoso ai nafi‑ka hidi kitabote tohawahebona koboni yanatonane.
32Owati amosa dai mitahi. Owati‑nima yama yanana‑ya mai awiya, mai one hasinasa niya, dai‑ka Ayo neme‑ke kobonebonane.
33Owati‑nima yama naboneni. Neme, bofe na, ababisabone, owati‑ta abateraboneni.” Yeso ati nematane.
34“Dai noko wadahi. Dai siwariyahi. Kawi dai fawariyahi. Yinero dai nokotoniriyahi. Yama dama dai nokoniya, yama yanani kanibote na ihi yama we‑wee‑kaya dai saweboneni.
35Bofe‑ya mai wi‑wina mai nafi‑ya bisi·onaboneni.
36Dai noko wadahi. Deoso‑ya dai hiyarahi, yama we‑wee‑ya dai sawirabonehe. Dai‑ka Ayo neme‑ke‑ya dai sawibisaboneni.” Yeso ati nematane.
37Yama tehe‑ya Deoso‑ka yobe‑ya Yeso mai‑ya kanawatonadi, yama soki‑ya Orifera adami‑kaya a‑amo nematane.
38Yama wahabisari‑ya Deoso‑ka yobe‑ya mai dama mai kamarimanameteni, Yeso ati‑ya mai mitabonehe.
ទើបបានជ្រើសរើសហើយ៖
Roka 21: jaaNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
