Roka 20
20
Hini yamata ihi mai kanatiniti? Mai ati na
1Deoso‑ka yobe‑ya Yeso mai‑ya kanawato, Deoso ati amosabote tamine‑ya Yeso hiyareya, Mose‑ka yama hani ati‑ya mai ka‑kamina mai toha, Deoso‑ka yama‑bone‑ya mai da‑daa mai‑ka hidi mai toha, Yodeo mai‑ka hidi mai bi‑bidi na mai toha, mai na, mai kamake, Yeso‑ya mai weenabone, Yeso‑ya mai hiyara,
2“Ebeni‑ke ati ene mai‑ya kanatiniti? Ebeni‑ke ati ene mesa‑ya fatatikawiti tiniti?” Mai ati nameteni.
3“Dai ati omiti bahaboneni.
4Yowaho Batita mai dama mai‑ya habanirise, ebeni‑ke ati ene tohati? Deoso ene toha, ai owa ene toha ne awane, hini yamata‑nima dai ati niti?” Yeso ati nematane.
5Mai ibi hiyara,
“‘Deoso ati ene amane.’ Ai ati niya,
‘Hini yamata ihi Yowaho Batita ati dai nofariti?’ Yeso ati nebonane.
6‘Ai owa ati ene amane.’ Ai ati niya,
yati‑ya ai‑ya mai nanahababa awini. Yowaho Batita Deoso ati‑ya mai mi‑mita mai‑ka owa amane, mai dama mai ati na.” Mai ibi hiyara, mai ati nameteni.
7Yeso‑ya mai hiyaramatasa,
“Yowaho Batita tamine oda wato awirini.” Mai ati nameteni.
8“Dai ati yanara, owati yananahariraboneni.” Yeso ati nematane.
Ofa‑ya mai na‑nawada
9Yeso mai‑ya kanawatobona mai‑ya hiyare,
“Ofa‑ya maki kame, yama yaki‑ya tokebona, wininama kanibote ni awirebona atibodi ati ne, mai one‑ya yose,
‘Oka awa bono dai nawadahi. Ofa hadiya, one dai kayafa, one okayaha onaboneni.’ Ofa hidi ati ne,
‘Hehe, sibarini.’ Mai ati namaroni.
Fa‑fai‑ya yama yaki‑ya hidi tokawahemarine.
10Ofa hadiya, ofa hidi‑ka yo‑yose owa‑ya yose,
‘Owa tabaro one‑ya tikamahi. Ofa one‑ya tiwa‑ya mai daaniya, ofa tiwakamiyahi.’ Hidi ati nene.
Hika yo‑yose tokome, mai‑ya haane, ofa‑ya mai daara, hiniya mai bisihine, honita kamene.
11Hika yo‑yose owa‑ya yosemakitase, ofa‑ya mai daarani. Hika yo‑yose‑ya mai wee, mai bisihine, honita kamatasene.
12Makobote hika yo‑yose owa‑ya yosemakine, awa bono‑ya tonakebonaha. Kobone, mai bisihine, awa widi‑ya mai korohiwitine.
13‘Hini yamata‑nima obati? Oka dao oyosebisaboneni. Oka dao onofi nafi. Oka dao ati‑ya mai nofabisaba awineni.’ Ofa hidi atibodi ati nene.
14Ofa hidi bidi kobone‑ya mai awa, mai ibi hiyara,
‘Bidi ai nanahabaho. Ai nanahabeya, badi abamakiya, mai‑ka yama nafi ai kayafawahaboneni.’ Mai ati nani, mai ibi hiyararo.
15 # 20:9-16 Ofa mai na‑nawada Yodeo mai‑ka hidi mai tamine toha, ofa hidi i‑di Deoso tamine toha, ofa hidi‑ya mai na‑narifa i‑di Deoso ati‑ya mai mi‑mita mai tamine toha, hidi bidi i‑di Yeso tamine toha ne, Yeso‑ya mai nanahababone ihi Deoso mai‑ya weeni kitebonane. Fara ano 70‑ya yananametemoneni. Deoso ati ene homano mai‑ka sodado Yerosare‑ya mai wi‑wina mai‑ya mai nanahabametemoneni. Bidi mai hinahabe, awa beheri‑kaya abo mai korohiwitine. Bidi abe tamine‑ya badi mite, hini yamata‑nima ene nabati?
16Kamakiya, hika ofa‑ya mai na‑nawada‑maro mai‑ya nanahabeya, ai one‑ya awa‑ya hidi daanawahebonane, mai hinawadawahabonehe.” Yeso ati nematane.
“Ka! Haa‑nima yama riyahi.” Mai ati nameteni.
17Yeso mai‑ya kakatome,
“Yama‑ya dai watora, Deoso‑ka yama hani ati dai mitahi.
‘Yobe‑ya mai wa‑wama awa mai werehiwite, yobe tati mese ewene tohawahemarine.’ Deoso‑ka yama hani ati nineni.
18 # 20:17-18 Yobe tati mese ewene i‑di Yeso tamine amane. Awa mai werehiwite, Yeso mai nofara tamine amane. Yobe tati mese ewene tohawahe Yeso ai nafi‑ka hidi tohewahebona tamine amane. Awa‑ya ai sonariya, Yeso ati mai nofara Deoso mai‑ya weenebona tamine amane. Awa ai‑ya koboniya, Deoso‑ka we‑wee tamine amani. Yobe tati mese‑bona home‑ya ai sonariya, ai bakatonaboneni. Yobe tati mese ewene soneya, ai‑ya koboneya, ai abi ohareboneni.” Yeso ati nematane.
19Mose‑ka yama hani ati‑ya mai ka‑kamina mai toha, Deoso‑ka yama‑bone‑ya mai da‑daa mai‑ka hidi mai toha, mai na, mai yawa,
“Ofa‑ya mai na‑nawada mai tamine‑ya Yeso hiyare, fara oda tamine amani. Yeso ati kasirone.” Mai atibodi ati nameteni.
Yeso‑ya mai watabone mai ati na, mai dama mai‑ya mai nayofina, mai maanamameteni.
“Yeso ati tosawariba awane.” Mai atibodi ati na
20Yeso‑ya mai kakatoma,
“Ai‑ka yo‑yose Yeso‑ya mai hiyariya, ai‑ka yo‑yose mai‑ya Yeso watoreya, mai ati ihi Yeso ati tosawariba awane. Ati towe ai miteya, kofeno‑ya ai daanebonane.” Mai atibodi ati nameteni.
Mai‑ka mai‑ya mai yosemeteni, Yeso‑ya mai hiyarabonehe. Owa kobone, ati yanane,
21“Ayo, keyehe‑ya hirititerani. Mai nafi tinofa, mai one tinofi bi‑bidi tini awirani. Deoso ati tikamine amose hinama tohe, fare ene tiwati oda mitaboneni.
22 # 20:22 Homano mai‑ka hidi webote i‑di Sesa tohematamonane. Ai‑ka yinero‑ya Sesa haaneya, yinero ai daanibaraniha?” Mai ati nameteni.
23Mai atibodi ati‑ya Yeso wato, ati yanane,
24“Yara‑ka yinero ohari dai namoho. Ebeni‑ke korimari toha, oni tohanati?” Yeso ati nematane.
“Sesa korimari, Sesa oni ne, yinero bako‑ya waanane.” Mai ati nameteni.
25“Sesa‑ka yama‑ya Sesa‑ya dai daatonama, Deoso‑ka yama‑ya Deoso‑ya dai daatonamahari, dai nahi.” Yeso ati nematane.
26Mai dama mai noki‑ya Yeso ati tosawariba awane mai ati namaro, Yeso ati‑ya mai mita,
“Ka! Yeso yama‑ya watone.” Mai atibodi ati na, mai ati fawanawahameteni.
27Sadoseo mai one kamakitasameteni, Yeso ati‑ya mai mitabonehe.
“Ai aba ai kitamaterani.” Sadoseo mai ati teni.
28Fara mai kobona, Yeso‑ya mai hiyara,
“Ayo, tiwati oda mitaboneni. Hibati‑ya i‑di Mose yama hikanahanamete tamine timitahi,
‘Ayo abeya, fadi hasina, bidi, bide, mai na, mai wadara, anidi fadi‑ya famawahiyaho. Bidi wadeya, anidi oni‑ya bidi weyenayaho.’ Mose‑ka yama hani ati nineni.
29Ai owa‑ka soho mai 6 kana fane, kahiware, abemarine.
30Fadi‑ya sohori famawahe, kahiwamakitasare, abamakitasemarine.
31Fara hinama mai toha, mai fana, mai kahiwara, mai nafi abamaroni.
32Mai nafi aba, mai‑ka yibote abamakemaroni.
33Yeso, oda ati timitahi. Mai nafi‑ka yibote tohamaro, mai kitamiya, ebeni‑ke fadi tohawahibati?” Sadoseo mai ati nameteni.
34Yeso mai‑ya hiyare,
“Bofe‑ka mai fanateni.
35Deoso ai nafi‑ka hidi kitabote tohawahebona‑ya mai sawiya, mai fanaterani.
36Deoso‑ka yo‑yose mai‑nima mai nawahabone, mai abamateraboneni. Mai aba, mai kitama, mai abamateraboneni. Deoso bidi mai tohawahaboneni.
37Ai aba, ai kitamaterabone dai ati na, Mose‑ka yama hani ati dai mitahi. Awa hirini‑ya i‑di Mose‑ya Deoso hiyare,
‘I‑di Abaraho, i‑di Isaki, i‑di Yako, mai na, mai‑ka Deoso ama·oni.’ Deoso ati nematamonane.
38 # 20:38 Ai aba, ai wadamara mai one ati na, fara mai‑ya Yeso kanawatone. Ai abi‑ya, ai korimari hasina, Deoso ai nofa, Deoso tabaro‑ya ai korimari tokateni. Hibati‑ya mai abamete, mai wadamara mai‑ka Deoso tohaterene. Mai korimari hasinibisa, fara mai‑ka Deoso amane. Ai hasina ai toha, mai abamete mai toha, ai na, Deoso ai‑ya awatene.” Yeso ati nematane.
39Mose‑ka yama hani ati‑ya mai ka‑kamina Yeso ati‑ya mai mita,
“Ayo, tiwati amosineni.” Mai ati nameteni.
40Yeso yama‑ya wato, Yeso‑ya mai nayofina, mai ati fawanawahameteni.
Deoso‑ka Ka‑kadika i‑di Dafi‑ka hidi amane
41Yeso mai‑ya hiyare,
“‘Deoso‑ka Ka‑kadika Dafi‑ka nodi amane.’ Mai ati teni.
42Hibati‑ya Deoso‑ka Ka‑kadika tamine‑ya i‑di Dafi kanahanomatamonane, Deoso‑ka wayoma hani‑ya.
‘Oka hidi webote‑ya Deoso hiyare,
—Owa mano kanika‑ya tiwitarihi.
43Owati ihi tiwa‑ya mai ka‑kako mai‑ka hidi tihawahaboneni.—’ Yama hani ati neni.
44Deoso‑ka Ka‑kadika i‑di Dafi‑ka hidi webote tohemona i‑di Dafi ati nematamonane. Fare i‑di Dafi‑ka nodi tohe, i‑di Dafi‑ka hidi webote tohahari ne.” Yeso ati nematane.
45Yeso hika mai da‑daba mai‑ya hiyare, ati mai dama mai himite,
46“Dai noko wadahi. Mose‑ka yama hani ati‑ya mai ka‑kamina dai‑ya mai nokotoniteni, mai dai kahiyarabonehe. Fara yama ai ka‑kanika‑ke yobe‑ya mai naha, bora yaba‑ya mai sakona; Deoso‑ya mai hi‑hiyara‑ke yobe‑ya mai sawe, kadera amosa‑ya mai nahore; dai yorotokana, dai tafabone, mai sawe, kadera amosabisa‑ya mai nahore,
47 # 20:47 Fariseo haa‑nima mai teni. Deoso ati mai tokadabara, hiniya mai dami noki‑ya Deoso‑ya mai hiyari yaboteni. Fara haa‑nima mai atibodi ati na, “Mai noki‑ya Deoso‑ya ai hiyari yaba, ‘Deoso‑ya oda nofi kitani.’ Mai one ati naboneni.” Fariseo mai atibodi ati teni. Deoso‑ya mai hiyara, mai hiyari yaboteni, mai dai kahiyarabonehe. Mai fanawi‑ka yibote mai aba mai‑ka yama‑ya mai kayafateni. Mai ihi towe mai manakone fotaboneni.” Yeso ati nematane.
ទើបបានជ្រើសរើសហើយ៖
Roka 20: jaaNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
