Roka 17
17
1Yeso hika mai da‑daba mai‑ya hiyare,
“Mai one ati ihi owati‑ya mai one tokadabaraboneni. Ka! Hini mai ihi tohiya, mai manakone wadaboneni.
2 # 17:2 Ai ene towe manakone fota tamine amane. Hini ene towe tohi awisareya, yati webote‑ya namidi mai yadihineya, faha webote‑ya mai korohifiya, komene bi‑bidi nibisebonane. Ati ene owati‑ya ewe nofamareya, hini ene komene nafibisebonane.
3Dai noko wadahi. Tika owa tiwa‑ya ene amosare, tihiyaraho, ati amosawamebonaha. Ati amosawameya, tiwati somawamaharihi.
4Tika owa tiwa‑ya ene amosare, mahi ohari‑ya ene towe 7 kaneya, makobote tiwa‑ya hiyareya,
‘Owa ene‑nima owa ene namaraboneni.’ Ati neya,
tiwati somawamaharihi.” Yeso ati nematane.
5Yeso‑ka yo‑yose Yeso‑ya mai hiyara,
“Oda tikasomahi, Deoso ati oda nofi nafiwahabonehe.” Mai ati nameteni.
6“Deoso ati‑ya dai nofi i‑isi niya, dai ene kitaboneni. Awa tiawahi.
‘Awa boretikaniya, faha bai‑ya tikamahi.’ Dai ati niya,
awa‑ya Deoso borekaneya, faha bai‑ya awa‑ya Deoso kamawahebonane.
7Dai‑ka yo‑yose fadara‑ya anine, kaneiro mai‑ya nawada ne, kameya,
‘Titafi bahi, owa tafi yotaboneni.’ Dai ati terani.
8‘Owa tefe‑ba hawatiniyahi. Owa tefe‑ba daatiniya, korima·oniya, titafamakeboneni.’ Dai ati nibisateni.
9Dai ati‑nima dai‑ka yo‑yose ene neya, dai kahiyaraterani.
10Dai‑ka yo‑yose ene‑nima dai ene nahi. Makobote haa‑nima dai ati nahi.
‘Deoso, oda‑ka hidi amatini. Oda‑ya tikahiyarariyahi. Hini tiwati‑nima oda ene na. Oda ene amosabote wadaterani.’ Dai ati nahi.” Yeso ati nematane.
Mai mese towe 10 kana
11Yerosare‑ya Yeso tokebona, yakanasa neya, Karireya yowi kowani‑kaya Samariya toha, fara yowi‑ya Yeso yakanematane.
12Mai tabori bide‑ya kobone, mai mese towe mai 10 kana yama yakari‑ya mai nahameteni.
13Yeso‑ya mai haana,
“Ayo Yeso, oda tikasomahi.” Mai ati nameteni.
14“Hehe, sibaraboneni. Deoso‑ka yama‑bone‑ya mai da‑daa mai‑ya dai tokomiya, dai kitama dai‑ya mai awawahabonehe.” Yeso ati nematane.
Mai tokoma, hawi‑ya mai mese amosawamameteni.
15Mai mese amosawami‑ya mai awa, ohari‑ta wininame, Deoso‑ya kahiyare, ati kitematane.
16Yeso‑ya kobone, Yeso yowi‑ya home, Yeso‑ya kahiyarematane. Yodeo mai‑ka owa tohare, Samaritano mai‑ka owa amane.
17“Mai 10 kana mai okasomamaro, mai 9 kana ebeni‑kaya mai tokimati?
18Ai‑ka mai kamara, Samariya‑ke kamabisane, Deoso‑ya kahiyarebonaha.” Yeso ati nematane.
19Mese towe tohemari‑ya hiyare,
“Sibarini, tiwaamisamahi. Tiwa tabaro‑ya tikamahi. Owati‑ya tinofa ihi tikitamineni.” Yeso ati nematane.
Deoso ai nafi‑ka hidi kitabote tohawahebona
20“Deoso ai nafi‑ka hidi kitabote tohawahe kobonebona, hini yamata ai awiboneti, ai watowahebonaha?” Fariseo mai ati nameteni.
“Deoso ai nafi‑ka hidi kitabote tohawahebona yananeya, neme‑ya yama bara dai awateraboneni.
21‘A‑ahi‑ya tohane.’ Mai ati rihi.
‘Aka‑ya tohane.’ Mai ati rihi naboneni.
Deoso ai nafi‑ka hidi kitabote tohawahebona dai‑ya sawi hawa tohane.” Yeso ati nematane.
22Hika mai da‑daba mai‑ya hiyare,
“Yama one‑ya dai‑ka Ayo neme‑ke dai‑ya sawimarebona dai ati hifoyebonane.
23Keyehe‑ya dai‑ya mai hirinabone,
‘Ahiyata‑ya waine.’ Mai ati nihi,
‘Aka‑kaya waine.’ Mai one ati nihi nabone,
mai ati‑ya dai nofariyahi. Mai ati ihi dai tokariyahi.
24Yama yaki‑ya bahi yebekani ai awateni. Fare‑nima dai‑ka Ayo neme‑ke bofe‑ka hidi tohawahe‑ya mai nafi awawahaboneni.
25Fara‑bone koboni awisariya, owa‑ya mai nofarabone, owa‑ya mai habanaboneni.
26Dai‑ka Ayo neme‑ke kiti yananeya, Nowe sawimata‑ka yama‑nima yama namataboneni.
27Nowe ati‑ya mai nofara hiniya mai tafa, kawi‑ya mai fawa, mai one fana na, mai habi siitoni awisariya, kanawa dori‑ya Nowe tokiyome, makobote faha fowe kobo kanibote na ihi mai nafi abawahametemoneni.
28Hibati‑ya i‑di Ro hasinasa ne‑ka yama‑nima yama namatasaboneni. Hiniya mai tafa, kawiya mai fawa, yama‑ya mai nika, yama‑ya mai daa, yamata‑ya mai kama, yobe‑ya mai wama nametemoneni.
29I‑di Ro Sodoma‑ya wi‑wina‑mata, toke‑ka mahi tohasa ne‑ya Deoso ati ene yifo hirini toha, yati hirini toha na neme‑ya sona, mai nafi‑ya nanahabametemoneni.
30Dai‑ka Ayo neme‑ke kitawaheya, haa‑nima yama namatasaboneni.” Yeso ati nematane.
31 # 17:31 Isara·eo mai‑ka yobe doro hiweya, mai‑ka yobe tati mese siri‑kaya mai tokomisametemoneni. “Okomatasiya, yama siwayo‑ya dai nahoya, dai yehe honene yobe doro‑ya wada, dai towamariyahi. Fadara‑ya yama dai aniniya, tabora‑ya dai tokomariyahi.
32I‑di Ro fadi tamine‑ya dai ati kadamowamariyahi.
33 # 17:33 Mai‑ka yama mai nokotonihe bofe‑ya yama we‑wee‑ya mai saweboneni. Mai‑ka yama‑ya mai nokotonihe, mai ababoneni. Mai‑ka yama‑ya mai nokotonira, mai abaraboneni.
34Owati dai mitahi. Okomatasiya, mai fama mai amokana, ohari owakameya, owa towinakosebonane.
35Okomatasiya, mai fanawi fama kimi‑ya tooniya, ohare owakamiya, one‑ta towitakosaboneni.
36Fadara‑ya mai fama mai aniniya, ohari owakamiya, owa towitakosebonane.” Yeso ati nematane.
37“Ebeni‑kaya kobotibati?” Hika mai da‑daba mai ati nameteni.
“Bani bate home‑ya boko mai toka, bani bate dai watoteni. Fara‑nima dai‑ka Ayo neme‑ke kamataseya, dai nafi watowahaboneni.” Yeso ati nematane.
ទើបបានជ្រើសរើសហើយ៖
Roka 17: jaaNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
