Roka 18
18
1Yeso mai‑ya kanawatomatane, mahi‑nima Deoso‑ya mai hiyarabonehe, mai atibodi kitiya, mai hiyari maakarabonehe.
2“Mai tabori‑ya kofeno‑ka yo‑yose wine, mai ihi‑ya ka‑kadika amane. Deoso‑ya nayofini awire, ai one‑ya nayofinahariterene.
3Mai tabori‑ya fana winahareni. Fana maki abemata, mai ihi‑ya ka‑kadika‑ya hiyara,
‘Maki owa yehe hone‑ya boti, owa‑ya kako ne, owa tikasomahi.’ Fana ati na, ati yanani damamoneni.
4Mai ihi‑ya ka‑kadika fana ati‑ya nofare, makobote fana kaki dama ihi hini‑ya hiyare,
‘Deoso onayofinara, ai owa ati onofaterani.
5Haa‑ta fana ati fawakasi watora, ati‑nima onaboneni, owa‑ya maa tonirabonehe.’ Ati nane.
6Mai ihi‑ya ka‑kadika ati kasiro, hiniya fana‑ya kasomane.
7Deoso hika mai haani hidameya, mai‑ya kasomebonane. Hibareya, Deoso ati ne, ati damarebonane.
8Owati dai mitahi. Deoso mai‑ya kasoma kanibote nebonane. Dai‑ka Ayo neme‑ke kamataseya, ati‑ya mai nofasa na mai damaraboneni.” Yeso ati nematane.
9Hini mai‑ya mai kahiyara, mai ihi towe wadaramone mai ati na, mai one‑ya mai nofara, mai‑ya Yeso kanawatobona, mai‑ya hiyarematane.
10“Deoso‑ka yobe‑ya mai fama mai towakamakineni, Deoso‑ya mai hiyarabonehe. Fariseo owa toha, kofeno‑ka yinero‑bona‑ya ha‑haa owa toha nane.
11Fariseo wai, hini tamine‑ya hiyare,
‘Deoso, owati amosabisa, ya‑yai·onineni. Mai one‑ta yama‑ya mai ka‑kahidina mai toha, mai ihi amosara mai toha, mai one‑ka yibote mai‑ya mai a‑aha mai toha, mai na, mai ihi‑nima owa ene terani. Ahiyata‑ya wai kofeno‑ka yinero‑bona‑ya ha‑haa toha, fare ene‑nima owa ene terani.
12Semana‑nima mahi fame‑ya otafaterani. Oka yama nafi okadikateni. Oka yama 10 kana okayafa, ohare Deoso‑ya daa·oteni.’ Fariseo ati nane.
13Kofeno‑ka yinero‑bona‑ya ha‑haa aka‑ya wai, atibodi yawe, tonokomisi awire, hini bako‑ya batanane. Deoso‑ya hiyare,
‘Deoso, owati kasiramaro, owa‑ya tiwati somahi.’ Ati nane.
14Ene manakone Deoso haahinamarebonane. Fariseo ene manakone wadanasa nane. Hini mai‑ya mai kahiyara, Deoso ati ene mai mai hinofaraboneni. Hini ai‑ya ai nokotoniriya, Deoso ati ene ai‑ya mai kahiyarawahaboneni.” Yeso ati nematane.
Mai‑ka madehe‑ya Yeso kasome
15Mai‑ka madehe damana‑ya mai kakamameteni, madehe tati‑ya Yeso boyonebonaha. Madehe‑ya mai kakama, Yeso‑ya mai da‑daba mai‑ya mai awa, mai‑ya mai ati barinameteni.
16Yeso ati yanane,
“Madehe dai ati baririyahi. Madehe owati‑ya nofa, madehe‑nima mai na Deoso ai nafi‑ka hidi kitabote tohawahe‑ya mai saweboneni.” Yeso ati nematane.
17Owati amosa dai mitahi. Madehe owati‑ya nofa, fara‑nima mai ni awiriya, Deoso ai nafi‑ka hidi kitabote tohawahe‑ya mai sawiraboneni.” Yeso ati nematane.
Mai‑ka hidi owa Yeso‑ya kamakine
18Mai‑ka hidi owa kamaki, Yeso‑ya hiyare,
“Ayo, amosabote amatini. Hini yamata‑nima obati, ai abaterabone‑kaya osawebonehe?” Ati nematane.
19“Amosabote owa‑mone tina, ai owa amosabote wadaterene. Deoso‑ta amosabotebisa amane.
20Deoso‑ka yama hani ati tiwata, fara ati timitahi,
‘Mai one‑ka yibote ti·aharihi. Ai owa tinahabarihi. Yama tibotiriyahi. Ai owa ene tamine‑ya keyehe‑ya hiritirihi. Abi, ami mai na, mai tinofabisahi.’ Yama hani ati nineni.” Yeso ati nematane.
21“Madehe ohi‑ya Deoso‑ka yama hani ati tikamina ati‑nima oteni.” Ati nematane.
22Ati‑ya Yeso mite, ati yanane,
“Tika yama ohare hasinineni. Tiwa yehe honene nafi daatinahi, manakone waratiniya, mai yahi hone wadara mai‑ya daatinahi. Deoso tabaro‑ya tika yama dama tohaboneni. Eya tiwa ene niya, makobote owa‑ya tisawiyahi.” Yeso ati nematane.
23Yeso ati‑ya mite, atibodi a‑arirematane. Yehe honene dame‑ya kayawematane.
24Maki‑ya Yeso kakatome, ati yanane,
“Mai yahi hone dama mai kiha Deoso ai nafi‑ka hidi kitabote tohawahebona‑ya mai dami sawiraboneni.
25Akoye hodone‑ya kamero tokiyomaterene. Fara‑nima mai yahi hone dama mai naboneni. Deoso ai nafi‑ka hidi kitabote tohawahe‑ya mai dami sawiraboneni.” Yeso ati nematane.
26Yeso ati‑ya mai mita,
“Ka! Ebeni‑ke sawibati?” Mai ati nameteni.
27“Ai ene kitara, Deoso ene kitabotebisa amane.” Yeso ati nematane.
28“Ayo, oda tabaro‑ya oda sawimara, tiwa‑ya oda dababisineni.” Bedoro ati nematane.
29Yeso ati yanane,
“Owati amosa dai mitahi. Deoso ai nafi‑ka hidi kitabote tohawahebona‑ya ai one sawebone ihi mai‑ka yama nafi‑ya mai tonawadakosa, mai ihi amosa manakone wadaboneni. Mai‑ka yobe, mai‑ka yibote, mai‑ka ayo, mai‑ka abi, mai‑ka ami, mai‑ka madehe, mai na, mai tonokosa, mai manakone wadaboneni.
30 # 18:30 “Mai abateraboneni.” Yama hani ati na, Deoso tabaro‑ya mai ya‑yaini fawaterabone tamine amani. Bofe‑ya mai winanasa ni‑ya mai ihi amosa manakone‑ya mai kayafaboneni. Mai manakone fiyakanaboneni. Makobote mai abateraboneni.” Yeso ati nematane.
Yeso abebona tamine‑ya hiyare
31Mai 12 kana mai‑ya Yeso haane, Ahiyata‑ya mai toki bide toha, mai‑ya hiyare,
“Yerosare‑ya ai tokawahaboneni. Yerosare‑ya dai‑ka Ayo neme‑ke tamine‑ya Deoso ati‑ya mai mi‑mita‑mete mai kanahanamete‑nima yama nawahaboneni.
32Kofeno‑ka mai‑ya owa‑ya mai daanabone, owa‑ya mai hahakana, owa‑ya mai fironaboneni.
33Dai‑ka Ayo neme‑ke‑ya mai bisiniya, mai hinahabebonane. Mahi 3 kani‑ya dai‑ka Ayo neme‑ke kitamebonane.” Yeso ati nematane.
34Yeso ati‑ya mai mita, yama‑ya mai watorameteni. Ati yokana‑ya kemo‑nima nane.
“Yama bara tamine‑ya Yeso hiyare awane.” Mai atibodi ati nameteni.
Batimeo tamine
35Yeriko yakari‑ya mai yakana, hawi fowari‑ya noko wadare itarimatane, hika yama‑bone‑ya haaneri.
36Mai dama mai yakana, mai moni‑ya mite, haane,
“Hini yamata tohiti?” Ati ne,
37“Yeso Nasare‑ke kamakine.” Mai ati nameteni.
38 # 18:38 Dafi‑ka nodi yama nafi‑ka hidi tohawahebona Deoso‑ka yama hani ati neni. Mai ati‑ya mite,
“Yeso, oda‑ka hidi amatini. I‑di Dafi‑ka nodi amatini. Owa tikasomahi.” Ati nematane.
39Mai dai toha maki ati‑ya mai mita,
“Tiwati fawanahi.” Mai ati na,
Hiniya Batimeo haani kitawahe,
“Oda‑ka hidi amatini. I‑di Dafi‑ka nodi amatini. Owa tikasomahi.” Batimeo ati nematane.
40Ati‑ya Yeso mite, maatowiti,
“Dai kakamakiho.” Ati nematane.
Mai hiwakamaki,
41“Hini yamata‑ya tiwati koboniti?” Yeso ati ne,
“Ayo, owa noko amosawamabone, onani.” Ati nematane.
42“Tikitamahi. Owati tinofa ihi tiwa noko amosawamawahineni.” Yeso ati nematane.
43Batimeo noko amosawame, yama‑ya awawahe, Yeso‑ya sawiwahe, Deoso‑ya kahiyarematane. Yeso ene‑ya mai dami awa, Deoso‑ya mai kahiyaraharemeteni.
ទើបបានជ្រើសរើសហើយ៖
Roka 18: jaaNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
