Roka 16
16
1Yeso hika mai da‑daba mai‑ya kanawatobona mai‑ya hiyare,
“Maki yinero dame‑ya kihe, ati ene hika yinero maki owa hinawadane. Makobote mai one kamake, fai‑ya mai hiyara,
‘Tika yinero‑ya na‑nawada tika yinero‑ya nawadi amosarene.’ Mai ati nineni.
2Fai‑ka yinero‑ya na‑nawada‑ya haane,
‘Oka yinero nawadi tina amosara, oka yinero tinawadamateraboneni. Yinero hano tiwawamiya, yinero hano owa‑ya daanama kanibote tinahi.’ Ati nane.
3Yinero‑ya na‑nawada hini‑ya hiyare,
‘Oka hidi‑ka yinero onawadamarabone ati ne, hini yamata‑nima onaba? Owa yehe kitara, yama anini kita‑ya owati nofarihi, yinero honita haani onofarihi oneni.’ Ati nane.
4‘Hehe, yama owatowahani. Mai‑ya okasomabone, hidi‑ka yinero onawadamariya, owa‑ya mai himanaboneni, mai tabori‑ya otafawahabonehe.’ Ati nane.
5Hika hidi‑ka yama‑ya mai kanikamaro, yama manakone kote‑ya mai nanahabara mai‑ya haane, daidi‑ya hiyare,
‘Yama tikanikamaro, hini yamata‑nima yama manakone na hasiniti?’ Hidi‑ka yinero‑ya na‑nawada ati nane.
6‘Owa defeni, oyo baodi kiba 100 tohani.’ Ati nane.
‘Baodi kiba 50 toha tikanahanobisahi.’ Hidi‑ka yinero‑ya na‑nawada ati nane.
7Owa‑ya hiyaramakitase,
‘Eme tika yama manakone na hasiniti?’ Ati nane.
‘Owa defeni, tiriko sako webote kiba 100 tohani.’ Ati nane.
‘Sako 80 kana tikanahanobisahi.’ Ati nane.
8Ene towe tamine‑ya hidi mite, ati yanane,
‘Oka yinero‑ya na‑nawada‑mari yama‑ya watone.’ Hidi ati nane.
Deoso ati‑ya mai tokadabara mai‑ka owa atibodi ati‑ya mai watoteni. Deoso ati‑ya mai tokadabamone Deoso atibodi ati‑ya mai wato bi‑bidi nineni.
9 # 16:9 “Deoso tabaro‑ya dai‑ya mai towakamaboneni.” Yama hani ati na, Deoso oda‑ya towakamebona tamine amane. Owati dai mitahi. Yinero dai kiha mai one‑ya dai kasomiyahi. Mai‑ya dai kasomiya, dai abiya, Deoso tabaro‑ya dai‑ya mai towakamaboneni.
10Ai‑ka yama ohare‑ya mai nawadi amosiya, yama dama‑ya mai nawadi amosahareboneni. Mai‑ka yama damara mai ihi amosariya, mai‑ka yama dodamiya, mai ihi amosi awisaraboneni.
11Dai‑ka yinero tohe, dai one mai‑ya dai kasomara, neme‑ka yama‑ya Deoso dai‑ya daaterebonane. Neme‑ka yama manakone nafibisani.
12‘Oda‑ka yama dai nawadahi.’ Mai ati na
mai‑ka yama dai nawadi amosariya, dai‑ka yama‑bone‑ya mai daateraboneni.
13Dai‑ka hidi mai fama, hidi owa ati dai tokadababisa, hidi owa ati dai tokadabaraboneni. Hidi owa dai nokotoniya, hidi owa dai kakaboneni. Deoso ati dai nofabisiya, yinero dai nokotoniraboneni.” Yeso ati nematane.
14Fariseo yinero‑ya mai nokotoniteni. Yeso ati‑ya mai mita,
“Yeso yama‑ya watorane.” Mai ati nameteni.
15Mai‑ya Yeso hiyare,
“Dai ene amosamone dai ati na, dai ati‑ya mai dami nofa, dai atibodi ati‑ya Deoso watobise, dai atibodi ati‑ya Deoso nofarene.
16 # 16:16 Deoso ai nafi‑ka hidi kitabote tohawahebona kobone yama hani ati na, Yeso tamine amane. Yeso kobone, fare Deoso tohe, ai nafi‑ka hidi kitabote tohawahebonane. Yowaho Batita koboni awisareya, i‑di Mose‑ka yama hani ati toha, Deoso ati‑ya mai mi‑mita‑mete mai‑ka yama hani ati toha na, yama hani ati‑ya mai mitameteni. Yowaho koboneya, Deoso ai nafi‑ka hidi kitabote tohawahebona kobone tamine‑ya mai mitawahani.
‘Oda kita, hini oda ene Deoso ai nafi‑ka hidi kitabote tohawahebona‑ya oda saweboneni.’ Mai ati nani.
17Neme ababone, bofe ababone, Mose‑ka yama hani ati kote abateraboneni.
18Maki hini ene honita wahawameya, fana one‑ya famawaheya, ene ati kasiro, hiniya siwanane. Fana maki‑ya famamara‑ya maki owa nofe, fana‑ya famawahe, maki owa ene ati kasirohari, hiniya siwanane.” Yeso ati nematane.
Yama‑ya kihe toha, yama‑ya kihare toha
19Yeso mai‑ya kanawatobona mai‑ya hiyare,
“Ai owa‑ka yinero dame, bora amosabote‑ya sakone, mahi‑nima marina‑ya hirinematane.
20Hika yobe nokobiri‑kaya ai owa kafori, oni Rasaro tohane. Rasaro‑ka yinero wadare, mese nafi towe tohe, ido‑ya siitonimatane.
21Rasaro tefe wadare,
‘Bofe‑ya mai tafe kote soniya, owa‑ya mai daanaba awineni.’ Rasaro atibodi ati nane.
Rasaro‑ka ido‑ya yomahi mai heronameteni.
22Makobote i‑di Rasaro abe, Deoso‑ka yo‑yose mai hiwakamane. Abaraho korimari sawi‑kaya Rasaro korimari sawiwahane. Maki yinero dame‑ya kihemata, abamaki, mai hikamane.
23Ai korimari weyene‑ya maki sawibisa, yama kome kita, yama‑ya kiine, yama yaki‑ya Abaraho‑ya awane, Abaraho‑ya Rasaro famarine.
24Abaraho‑ya haane,
‘Idi, owa tikasomahi. I‑di Rasaro tiyosehi. Rasaro yehe faha‑ya bokeya, owa ebene‑ya boyonebonane, yama kome bi‑bidi nabonehe. Yifo hirini kita, owa‑ya kome kawitineni.’ Ati nane.
25‘Ewe, i‑di Rasaro tokaterebonane. Tiwati kadamowamariyahi. Hibati‑ya ti·abi awisa tiriya, tika yama amosa damamaroni. Hibayata tiwa komene kitawahineni. I‑di Rasaro abi awisareya, hika yama wadara, hiniya komene‑ya awemari, hibayata owa‑ya sawi, hika yama amosawahineni.
26Oda tabaro, dai tabaro na teberi‑ya hodi nafe waineni. Hawi wadaterani. Oda owa tokarihi, dai owa kakirihi, teboneni.’ Abaraho ati nane.
27‘Idi, owati timitahi. Okobi tabaro‑ya Rasaro tiyosebisahi.
28Yama kome kita‑kaya osawineni. Oka soho mai 5 kana mai‑ya i‑di Rasaro hiyaraho, owa‑kaya mai kamakirabonehe.’ Ati nane.
29‘I‑di Rasaro tokarebonane. Mose‑ka yama hani‑ya mai kiha, Deoso ati‑ya mai mi‑mita‑mete mai‑ka yama hani‑ya mai kiha na, yama hani ati‑ya mai tokadabiya, tiwa‑kaya mai tokomakiteraboneni.’ Abaraho ati nane.
30‘Idi, yama hani ati‑ya oka soho mai tokadabarani. Ai owa abemari, kitameya, mai‑ya hiyareya, Deoso ati‑ya mai nofawahaboneni.’ Ati nane.
31‘Mose‑ka yama hani ati‑ya mai nofarihi, Deoso ati‑ya mai mi‑mita‑mete mai‑ka yama hani ati‑ya mai nofarihi na, ai owa abe, kitameya, ati‑ya mai nofahariraboneni.’ Abaraho ati nane.” Yeso ati nematane.
ទើបបានជ្រើសរើសហើយ៖
Roka 16: jaaNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
