Roka 15
15
Yama fawana tamine
1Kofeno‑ka yinero‑bona‑ya mai ha‑haa mai toha, mai ihi amosara mai toha, mai na, Yeso wai‑kaya mai yorotokanameteni, Yeso ati‑ya mai mitabonehe.
2Fariseo mai toha, Mose‑ka yama hani ati‑ya mai ka‑kamina mai toha, mai na, mai yawa,
“Mai ihi amosara mai toha na mai‑ya Yeso sawi, mai eyehe tafane. Yeso towe amane.” Mai ati nameteni.
3Mai ati‑ya Yeso mite, mai‑ya kanawatobona mai‑ya hiyare,
4“Dai‑ka kaneiro mai 100 kana ohari fawaneya, 99 mai kana mai tonokosa, ohari‑ya dai sibateni. Dai sibanadi, dai wasi awisareya, dai maakarani.
5Dai wasiya, dai ya‑yainiya, diwani dai kamatene.
6Tabora‑ya dai koboniya, mai‑ya dai haana,
‘Dai ya‑yainahi. Oka kaneiro fawane, owasiwamineni.’ Dai ati teni.
7Fara‑nima Deoso ati‑ya mai nofaramaro, Deoso ati‑ya mai nofawamiya, neme‑ya mai wi‑wina mai ya‑yaini nafiteni. 99 mai kana Deoso ati‑ya mai nofa, mai ihi‑maro‑nima mai ihi nasa na, neme‑ya mai wi‑wina mai ya‑yaini bi‑bidi nineni.” Yeso ati nematane.
8Mai‑ya kanawatomatasebona mai‑ya hiyaramatase,
“Fana‑ka yinero ai yehe kafama‑nima ne. Yinero barata wamani toha, yinero ohari fawaneya, nabarina wahi‑ya yinero‑ya sibana, yobe nafi‑ya yowinineni, yinero‑ya wasebonehe. Yinero‑ya wasi awisariya, sibahinane.
9Yinero‑ya wase, hika mai‑ya haana,
‘Dai ya‑yainahi. Oka yinero fawane, owasiwamineni.’ Ati nineni.
10Owati dai mitahi. Deoso ati‑ya ai owa nofaremari, Deoso ati‑ya nofawaheya, Deoso‑ka yo‑yose mai sawi‑kaya mai ya‑yaiteni.” Yeso ati nematane.
11Mai‑ya kanawatomatasebona mai‑ya hiyare,
“Ai owa bidi mai fama,
12bidi yoto‑ke badi‑ya haane,
‘Abi, hasinasa tiniya, oka yinero‑ba daa kanibote tinahi.’ Ati nane.
Yinero‑ya badi kadike, bidi yoto‑ke‑ka yinero‑bona‑ya daanane.
13Amoni fa‑famaraba ne‑ya yehe honene nafi‑ya yorotokanihi, yama yaki‑ka tabora bara‑kaya toke, kawi‑ya nokotonihi, mai fanawi‑ya nokotonihi ne, hika yinero tonasiyone.
14Yinero tosiyoya, faha kakimara, tefe tosiyo, fimi‑ya awane.
15Yama manakone‑ya waratonebona, maki owa‑ka yama‑ya aninawahane. Maki ati ene boroko mai‑ya natafawahane.
16Tefe‑ba mai daahire, boroko mai tafe‑ya ati kabane.
17Badi‑ya atibodi watinawamane.
‘Okobi‑ka yama anini‑ya mai anina mai tafi fotateni, owa‑ta fimi ihi owa abi yanatoneni.’ Atibodi ati nane.
18‘Okobi‑ya okomiya, Okobi ohiyaraboneni. —Abi, owa ene towe tohamaroni. Deoso ati okadabarihi, tiwati okadabarihi onamaroni.
19Abi, owa‑ya ewe tinamariyahi. Tika yo‑yose ohawahabisaboneni.— Onaboneni.’ Atibodi ati nane.
20Fai‑ya tokome, badi tabaro yakari‑ya badi hiawe, bidi‑ya nofe, kanani toke, bidi‑ya kobone, bidi‑ya wate, bidi noko‑ya tomanane.
21‘Abi, owa ene towe tohamaro, Deoso ati‑ya okadabarihi, tiwati okadabarihi onamaroni. Owa‑ya ewe tinamariyahi.’ Ati nane.
22Bidi ati‑ya nofare, hika yo‑yose mai‑ya hiyare,
‘Oka dao‑ka bora amosabote‑ba, hika sanidariya‑ba, hika aneho‑ba yama na dai kakama kanibote nahi, sakohinabonehe.
23Bowi bidi ime‑ta dai nanahabahi. Ai marinaboneni.
24Oka dao tokemari, abe amanakani, onamaro, kitame‑nima nane. Oka dao fawanemari, kamawahane.’ Ati nane.
Mai ya‑yaina, mai marina, mai wayomineni.
25Bidi daidi fadara‑ya anine, kame, yobe yakari‑ya wasime, mai ya‑yaina, mai wayomi‑ya mitane.
26Mai‑ka yo‑yose owa‑ya haane,
‘Hini yamata‑bone mai ya‑yaina, mai wayomineniti?’ Ati nane.
27‘Tika soho koboname, amose ene abi ya‑yaine, ati ene bowi bidi ime‑ya mai nanahabani.’ Mai‑ka yo‑yose ati nane.
28Badi tamine‑ya mite, yawe, ati tokiyomi nofarene. Badi kame, bidi‑ya himane.
29‘Owati tokiyomi nofarini. Tiwa tabaro‑ya yama ani·ona, tika yama anini‑ya fawa·oterani. Tiwati‑nima oteni. Oka no‑nofa mai onatafabone, oda wayoma nabone, oda‑ka bodi bidi‑ba daatiterani.
30Tika dao‑ya tika yinero daatinamaro, yinero‑ya tonasiyone, mai fanawi towe‑ya nokotonihimari, kame ene bowi bidi ime‑ya tiwati ihi mai nanahabawahineni.’ Ati nane.
31‘Owa‑ya tisawiteni. O·abiya, owa yehe honene nafi tikayafawahaboneni.
32 # 15:32 Tamine yokana amani, haro: Ai ene amosaramaro Deoso ati ai tokadabawaha, Deoso ya‑yainane. Tika soho tokemari, abe amanakani, onamaro, kitame‑nima nane. Tika soho fawanemari, kamawahane. Kame ene ai ya‑yainahi.’ Ati nene.” Yeso ati nematane.
ទើបបានជ្រើសរើសហើយ៖
Roka 15: jaaNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
