Yowaho 3
3
Nikodimo Yeso‑ya hiyare
1I‑di Nikodimo fariseo tohe, oda‑ka hidi tohemarine.
2Yama soki‑ya Yeso‑ya toke, Yeso‑ya hiyare,
“Ayo, Deoso tiwa‑ya yose‑mata ati tikamine, tiwa ene kitabote tohani. Deoso‑ka tihara‑mani, haa‑nima tiwa ene ra neni.” Nikodimo ati nemarine.
3“Owati amosabote timitahi. Mai wadamatasara Deoso ai nafi‑ka hidi kitabote tohawahebona‑ya mai sawiraboneni.” Yeso ati nemarine.
4“Bote ai toha ai‑ka ami dori‑ya ai foyamarani. Hini yamata‑nima ai nibati, ai wadamatasabonehe?” Nikodimo ati nemarine.
5“Owati amosabote timitahi. Ai‑ka ami‑ya ai wadi dai tohi bahiya, Deoso‑ka Doni ene ai wadamatasiya, Deoso ai nafi‑ka hidi kitabote tohawahebona‑ya ai sawiwahaboneni. Ai wadi fami awiriya, ai sawiraboneni.
6Ai‑ka ami dori‑ya ai yana, ai‑ka ami bidi ai tohani. Deoso‑ka Doni ene ai wadamatasiya, Deoso bidi ai tohawaha, ai atibodi tamine amani.
7Hini yamata ihi tiwatibodi yama‑ya kadika?
‘Tiwadamatasahi.’ Ona,
8fara ai wadamatasa ai awaterani. Yama hakikikani kake, moni ai mita, aboni ai awarihi, yama hakikikani tabori ai awarihi teni. Fara‑nima Deoso‑ka Doni ene Deoso bidi ai tohawaha, Deoso‑ka Doni ai aware, ene‑ta ai awabisane.” Yeso ati nemarine.
9“Hini yamata‑nima tiwati niti? Tiwati owato awirini.” Nikodimo ati nemarine.
10Yeso ati yananamatase,
“Isara·eo‑ka nodi mai‑ya tikanawatote, owati‑ya tiwatora awineni?
11Owati amosabote timitahi. Yama oda watobisa tamine oda hiyara, yama oda awamaro tamine oda kamina, oda ati dai nofarani.
12Bofe‑ka yama tamine okamina, owati dai nofara, neme‑ka yama tamine okaminamakiya, owati dai nofatasaraboneni.
13Deoso tabaro dai awara, dai‑ka Ayo neme‑ke ama·oni. Deoso tabaro‑ya owinamaroni.
14Hibati‑ya ai‑ka idi kabani‑ya mai wina, maka‑nima yama na‑ya i‑di Mose wamane, awa‑ya hinawaanametemoneni. Fara‑nima, awa‑ya owa‑ya mai nawaanaboneni,
15 # 3:15 “Dai abaterabonehe.” Yama hani ati na, Deoso tabaro‑ya dai ya‑yaini fawaterabone tamine amani. owati‑ya dai no‑nofa dai abaterabonehe.
16Bofe‑ka dai nafi‑ya Deoso nofi nafi, Bidi yokana ohari‑ya yose, Bidi ati dai no‑nofa yama kome fawaterabone‑kaya dai sawirabone, dai abaterabone‑kaya dai sawibisaboneni.
17Dai ene towe manakone Deoso dai‑ya haani nofaremarine, Bidi‑ya yose, dai ene manakone‑ya nanahababisebonaha.
18Bidi ati mai hinofeya, mai ihi towe manakone wadamarani. Deoso Bidi ati‑ya mai nofara mai ihi manakone hasinasa neni. Deoso Bidi yokana oharine.
19Yama wahi‑nima ne bofe‑ya kobone, bofe‑ya mai wi‑wina yama towe‑ya mai nokotonihe, yama wahi‑nima ne‑ya mai nofarani. Hini mai ihi mai manakone hasinasa neni.
20Yama wahi‑nima ne‑ya mai nofara, yama soki‑ya mai nofabisa, hini mai ihi towe watowami‑ya mai nofarani.
21 # 3:19-21 Yama wahi‑nima ne i‑di Yeso tamine amane. Mai ihi amosa yama wahi‑nima ne‑ya mai nofa, Deoso ati‑ya mai tokadaba mai‑ya mai watowaha, mai ya‑yainaboneni.” Yeso ati ne, Nikodimo‑ya hiyaremarine.
Yeso tamine‑ya Yowaho Batita hiyare
22Yama one‑ya Yeso oda da‑daba oda eyehe toke, Yodeya‑ya oda toka, Yeso oda‑ya hiyare, mai one oda habanirisamaroni.
23Sarini yakari‑ya Enomi toha, fara‑ya faha ba‑basi na‑ya Yowaho Batita sawi, mahi‑nima mai one kamakina, mai‑ya Yowaho habanirisematane.
24Kadeya‑ya Yowaho waanasa re‑ya
25Yowaho Batita‑ya mai da‑daba mai‑ya maki hiyare, faha‑ya ai yehe sorona tamine‑ya mai ibi weenameteni.
26Yowaho‑ya mai da‑daba Yowaho‑ya mai hiyara,
“Ayo, Yodaho Faha kowani‑kaya tiwa‑ya kobone, tamine tikamine, mai dama mai‑ya habanirisemonane. Fare‑ya mai dama mai tokomake, ai‑ka mai damamarani.” Mai ati nameteni.
27Yowaho mai‑ya hiyare,
“Deoso ene Yeso‑ya mai tokomakineni.
28Hibati‑ya dai ohiyara,
‘Deoso‑ka Ka‑kadika ohi awirini.’ Onaroni.
‘Hawine‑bona hawa·onihibona’ Onaroni.
Owati dai mitaroni.
29Ai‑ka no‑nofa fanebona, ya‑yaine, fadi‑bone‑ya famebonaha. Fane‑bona kobone ene ai ya‑yainahariteni. Yeso‑ka no‑nofa ama·oni. Yeso‑ya mai toka, oyawara, ya‑yai·oneni.
30Yeso‑ya mai sa‑sawi mai dodamawahabone, owa‑ya mai sa‑sawi mai fa‑famaraba nibisaboneni. Yama sibarini. Ya‑yai·oneni.
31Neme‑ke yama nafi‑ya watone. Bofe‑ya ai wi‑wina bofe‑ka yama bide ai wato, Neme‑ke yama nafi‑ya wato, neme‑ka yama‑ya wato, bofe‑ka yama‑ya wato nane.
32Yama himitamaro‑ya kamina, yama hiawamaro tamine‑ya kaminane, ati‑ya mai dama mai nofarani.
33Neme‑ke ati mai one hinofe,
‘Deoso ati amose, keyehe‑ya hirirene.’ Mai ati neni.
34Deoso hiyose, Deoso ati‑ya kaminatene. Deoso ati ene Bidi‑ya hika Doni sawi oharine.
35Deoso Bidi‑ya nofi nafi, yama nafi‑ya Bidi‑ya daanane.
36 # 3:36 “Ai abateraboneni.” Yama hani ati na, Deoso tabaro‑ya ai ya‑yaini fawaterabone tamine amani. Deoso Bidi ati ai nofa ai abateraboneni. Deoso Bidi ati‑ya mai nofara Deoso tabaro‑ya mai sawirabone, mai ihi manakone hasinasa nineni.” Yowaho ati nematane.
ទើបបានជ្រើសរើសហើយ៖
Yowaho 3: jaaNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
