Yowaho 4
4
1Mai dama Yeso‑ya mai daba, Yeso ati ene mai oda habanirisamaroni. Mai fa‑famaraba nibisa mai‑ya i‑di Yowaho Batita habanirise, mai tamine‑ya fariseo mai mitameteni.
2Yeso mai‑ya habanirisi awire, Yeso‑ya oda da‑daba mai‑ya oda habanirisabisamaroni.
3Fariseo mai ati tamine‑ya Yeso mite, Karireya‑ya oda tokomamaroni.
4Oda toka, Yeso ati ene Samaritano mai‑ka hawi‑ya oda tokawahamaroni.
5Samaritano mai tabori one oni Sika‑ya oda kobonamaroni. Fara hibati‑ya Yose‑ya i‑di Yako wami‑ya daanematamonane.
6Yako faha hodi wiihinamete wai‑ya oda maatowitemaroni, mahi nokorise‑ya. Faha hodi yowi‑ya Yeso itarimarine, maa toheri.
7-8Oda‑ka yamata‑bone oda kanikabone oda tokamaroni, mai tabori‑ya. Oda nowati‑ya Samaritano kakemeteni, faha‑ya kabikanabonehe.
“Oka faha‑ba daatinahi.” Yeso ati nematane.
9“Yodeo amatini. Samaritano ama·oni. Hini yamata‑bone faha‑ya haatina?
‘Samaritano towe mai amani.’ Yodeo mai ati teni.” Fana ati nameteni.
(Samaritano mai‑ya Yodeo mai haaterani.)
10“Owa tiwato awirini. Deoso owa‑ya yosemarine. Owa tiwata‑mani, tika faha‑ba haatina neni. Faha haatiniya, faha daa·ona neni. Oka faha‑ya mai fa‑fawa mai baki hokomarani.” Yeso ati nematane.
11“Tika yama wiye wadara, hodi koweni. Ebeni‑ya tika faha toha?
12Ai‑ka idi i‑di Yako hodi‑ya wiinematamonane. I‑di Yako toha, Yako bidi mai toha, hika bani mai toha, mai na, hodi‑ka faha‑ya mai fawametemoneni. Yako yama‑ya watomatamonane. Yama wato bi‑bidi tina awineni.” Fana ati nameteni.
13“Hodi‑ka faha‑ya mai fa‑fawa mai baki hokomarimateni.
14 # 4:14 “Mai abateraboneni.” Yama hani ati na, Deoso tabaro‑ya mai ya‑yaini fawaterabone tamine amani. Oka faha‑ya mai fawiya, mai baki hokomarani. Wami hodi‑ka faha kimisa‑nima oka faha kimisabone, tosiyoraboneni. Oka faha‑ya mai fawiya, mai abateraboneni.” Yeso ati nematane.
15“Oka faha‑ba daatinahi. Owa bako hokomariya, faha kabi·okanamaraboneni.” Fana ati nameteni.
16“Tika yibote haatinamiya, dai kakamiyahi.” Yeso ati ne,
17“Oka yibote awirane.” Fana ati na,
“Fara amani. Keyehe hiritini awirini.
18Tika yibote mai 5 tohamaro, hibayata maki owa tiwa‑ya famawahe, dai nafi yorotokanami awirani. Keyehe hiritini awirini.” Yeso ati nematane.
19“Se! Deoso ati‑ya mi‑mita amatini. Tiwa owatowahineni. Owati timitahi.
20Oda tabaro‑ka adami webote‑ya Deoso oda kahiyarateni, oda‑ka idi mai toha, oda toha, oda naro. Yodeo dai toha, Yerosare‑ya Deoso‑ya dai kahiyarateni. Tabora one‑ya Deoso ai kahiyararabone dai ati teni.” Fana ati nameteni.
21“Owati timitahi. Yama one‑ya ai‑ka Abi i‑di Deoso‑ya ai ati kahiyariya, Yerosare‑ya oda tokomarihi, dai tabaro‑ka adami webote‑ya dai tokomorosamarihi, hini ai sawi‑kaya Deoso ai kahiyara, ai nawahaboneni.
22Deoso dai kahiyara, yama dai kahiyara dai wato awirini. Yodeo oda toha, Deoso oda kahiyara, Deoso yokana oda watobisineni. Deoso ati somawama‑bona‑ka yama oda watoneni.
23Deoso ai nofiya, Deoso‑ya ai atibodi kahiyariya, Deoso ya‑yaitene. Fara dai watowahaboneni.
24Deoso abano wadare, ai atibodi‑ya nokotonihi. Deoso‑ya ai kahiyara, ai atibodi ati ene ai ati yanana, Deoso ya‑yaitene. Deoso‑ya ai ati kahiyara, ai atibodi ati yokana tohara, keyehe‑ya ai hirina, Deoso‑ya ai kahiyari awirani.” Yeso ati nematane.
25“Deoso‑ka Ka‑kadika kakibona, oni owa Kirisito tohe, koboneya, yama nafi tamine‑ya kaminebonane.” Fana ati na,
26“Fara owa amani.” Yeso ati nematane.
27Yeso‑ya oda da‑daba oda kama, samaritano‑ya Yeso hiyareno, oda wasima,
“Ka! Hini yamata‑ya fana nofiti? Hini yamata ihi fana‑ya Yeso hiyarati?” Oda atibodi ati na, oda ati yanaramaroni.
28Hika yama wiye towitakosa, hini mai tabori‑ya tokoma, hika mai‑ya hiyara,
29“Owa ene‑maro‑ya maki kamine, Deoso‑ka Ka‑kadika tohe awane. Dai kamakihi, dai aweba.” Ati nameteni.
30Yeso‑ya mai awabone mai kamameteni.
31Fana tokoma nowati‑ya Yeso‑ya oda haana,
“Ayo, titafahi.” Oda ati na,
32“Owa tefe‑bone tohani.” Yeso ati nemarine.
33“Ai nowati‑ya tefe‑ba mai daahine awane.” Oda ibi hiyara, oda ati namaroni.
34“Yama kaba tamine ohiyari awirani. Dai tafa dai ya‑yaiteni. Owa‑ya yose‑mari ati‑nima owa ene niya, ati‑nima yama hawa·oniya, ya‑yai·oteni.” Yeso ati nemarine.
35 # 4:35 Yamata marafakana Yeso ati ne, samaritano mai atibodi tamine amani. Deoso ati mai mitiya, ati mai hikadabebonane. Yeso oda‑ya kanawatobona oda‑ya hiyare,
“Abariko 4 kane‑ya yamata marafakanabone dai ati na, dai awahi. Marafakanani.
36Yamata‑ya mai kakama, mai ihi amosa manakone wadateni. Mai ihi ai one abateraboneni. Yamata noki‑ya mai werena, yamata‑ya mai kakama, mai na, mai nafi ya‑yainaboneni.
37‘Ai one yamata noki‑ya werena, ai one yamata marafakana‑ya kakamateni.’ Dai ati teni.
Dai ati‑nima yama nineni.
38Mai one yama anini‑ya nafe, mai nowati‑ya dai oyose, mai‑ka yama anini dai hawa tonihebonehe.” Yeso ati nemarine.
39Sidadi‑ka mai‑ya fana hiyara,
“Owa ene nafi‑ya maki kaminene.” Fana ati nameteni.
Yeso ene tamine‑ya mai mita,
“Kirisito tohe awane.” Mai atibodi ati namaroni.
40Yeso‑ya Samaritano mai kobona,
“Oda tabaro‑ya tiwinahi.” Mai ati namaroni.
Mai ati ihi mai tabori‑ya oda amoni famamaroni.
41Yeso ati‑ya mai mita, Yeso ati‑ya mai one dama nofawahamaroni.
42Fana‑ya mai hiyara,
“Yeso tamine tikamina, tiwati oda nofaroni. Hibayata‑ka Yeso ati oda mitawaha, Yeso ati oda nofa, ati oda tokadabawahane. Bofe‑ya mai wi‑wina mai nafi‑ya kasomebona oda watowahane.” Mai ati namaroni.
Mai‑ka hidi bidi‑ya Yeso nakitame
43Mai tabori‑ya oda amoni fama, oda yananamatasa, Karireya‑ya oda tokamaroni.
44“Deoso ati‑ya mai mi‑mita hini mai tabori‑ya mai ati mai hinofaterani.” Yeso ati nemarine.
45Hibati‑ya Yerosare‑ya oda mariniya, Karireya‑ka mai sawe, Yeso ene‑ya mai awamaroni. Karireya‑ya oda kobotonamake, Yeso‑ya mai awa, mai ya‑yainamaroni.
46Kana Karireya‑ya Yeso ati ene faha fino tohiyi‑maro‑kaya oda tokomatasamaroni. Kafanaho‑ya mai‑ka hidi‑ka yo‑yose winemari, bidi kiyani nafi, abi yanatonematane.
47Karireya‑ya Yeso koboni tamine‑ya mai‑ka hidi mite, kaki, Yeso‑ya himanemarine, bidi Yeso hinakitamebona, bidi abarebonaha.
48Yeso ati yanane,
“Owa ene kitabote dai awara, owati‑ya dai nofarani.” Yeso ati nemarine.
49“Ayo, ai towakamahi. Oka dao abarayaho.” Hidi ati ne,
50“Tiwa tabaro‑ya tikamahi. Tika dao kitamane.” Yeso ati nemarine.
Yeso ati‑ya nofe, tokomemarine.
51Hawi‑ya yakane‑ya hika mai one‑ya kobone,
“Ya‑yaitinahi. Tika dao kitamene.” Mai ati nameteni.
52“Ebeni‑ya mahi ite‑ya oka dao kitamati?” Ati ne,
“Amoni ohari, mahi nokorisi fiyakane‑ya, oma ora‑ya tika dao hewene fawanene.” Mai ati nameteni.
53“Oma ora‑ya Yeso ati yanane, fare oka dao‑ya kasoma kanibote nane.” Atibodi ati ne,
hini hika mai eyehe Yeso ati‑ya mai nofawahameteni.
54Hibati‑ya Yodeya‑ya Yeso tokemari, kamatase, Karireya‑ya ene kitabote famawahemarine.
ទើបបានជ្រើសរើសហើយ៖
Yowaho 4: jaaNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
