Yeso‑ka yo‑yose mai tamine 6
6
Yamata‑ya mai da‑daa‑bone mai 7 kana mai‑ya mai kadika
1Yeso ati‑ya mai no‑nofa mai dodamawaha, mai fanawi bote honita toha, mai tafe‑bone‑ya mai daateni. Kereko mai ati yawawaha,
“Oda‑ka fana bote mai honita waha‑ka yamata‑bone dai daana bi‑bidi, Yodeo dai‑ka fana bote mai honita waha‑ka yamata‑bone dai daana ba‑basi teni.” Mai ati namoneni.
2Yeso‑ka yo‑yose mai 12 kana, Yeso ati‑ya mai no‑nofa mai dami‑ya mai yorotokanihe, mai‑ya mai hiyara,
“Deoso ati kamini oda maakaniya, yamata oda daaniya, yama ati kasirani.
3Oda‑ka soho dai toha, maki mai 7 kana mai dai kadikahi. Yama‑ya mai wa‑wato mai toha, Deoso‑ka Doni mai‑ya sawi mai toha na, mai dai kadikiya, oda ati ene yamata‑ya mai daanaboneni.
4Deoso‑ya oda hiyara, Yeso tamine oda kamina, oda naboneni.” Yeso‑ka yo‑yose mai ati namoneni.
5Mai ati‑ya mai mita, mai ya‑yaina, mai 7 kana mai‑ya mai kadika, i‑di Tefaho‑ya mai kadiki dai toha, Tefaho Yeso ati‑ya nofi nafi, Deoso‑ka Doni ati‑nima ene ne, Firibi, Bokoro, Nikano, Timaho, Bamena, Nikorao mai na, mai‑ya mai kadikamoneni. Nikorao Bare tohe, tabaro oni Atioki tohemata, Yodeo mai‑ya sawimari, sawine.
6Yeso‑ka yo‑yose mai‑kaya mai mai hiwakama, Yeso‑ka yo‑yose Deoso‑ya mai hiyara, mai‑ya mai yahi foremoneni.
7Mai ihi Yeso tamine‑ya mai dami mita, Yerosare‑ya Yeso ati‑ya mai no‑nofa mai dodamamaki, Deoso‑ka yama‑bone‑ya mai da‑daa Yeso ati‑ya mai dami nofa, ati‑ya mai tokadabamoneni.
Tefaho‑ya mai waratona
8Yeso ati‑ya i‑di Tefaho nofi nafi, ene kite, ati ene Deoso ene kitabote‑ya mai awa, ati ene mai one kitama, mai teni.
9Sireni‑ka mai toha, Aresadiriya‑ka mai toha, Sirisiya‑ka mai toha, Asiya‑ka mai toha, mai na, hibati‑ya mai yaditonamaro mai seekawaha, Yerosare‑ya mai winawaha, Deoso‑ya mai hi‑hiyara‑ke yobe‑ya mai yorotokana, Tefaho ati‑ya mai mita, mai ati yawa, Tefaho‑ya mai weenawahani.
10Tefaho‑ya mai weena, Tefaho‑ya Deoso‑ka Doni sawi ene yama ba‑basi na‑ya wato, ati ene mai ati fawanani.
11Mai ati fawana, mai one‑ya mai toka, mai ati ihi Tefaho tamine‑ya keyehe‑ya mai hirina,
“Tefaho ati oda mite, ati amosarene. Mose‑ka yama hani tamine‑ya Tefaho keyehe‑ya hiri, Deoso tamine‑ya keyehe‑ya hiri ne, ati kasiro nafine.” Mai ati namoneni.
12Tefaho tamine‑ya mai ati dama, mai ati ihi bote mai toha, Mose‑ka yama hani ati‑ya mai ka‑kamina mai toha, mai one toha na, mai ati yawawaha, i‑di Tefaho‑ya mai tonaka, Tefaho‑ya mai waratona, mai‑ka hidi tabaro‑ya mai hiwakamane.
13Mai‑ka hidi tabaro‑ya mai kobona, mai ati ihi i‑di Tefaho tamine‑mona‑ya keyehe‑ya mai one hirina,
“I‑di Mose‑ka yama hani‑ya Tefaho keyehe‑ya hiri, Deoso‑ka yobe tamine‑ya keyehe‑ya hiri ne, ati dame, ati oda mitene.” Mai ati namoneni.
14“Yeso Nasare‑kaya kakimari tamine‑ya Tefaho hiyare, ati oda mite, Deoso‑ka yobe‑ya Yeso nanahabebona, ati ene Mose ati bare tohawahebona ati nene.” Mai ati namoneni.
15Mai‑ka hidi Tefaho‑ya mai kiina, Deoso‑ka yo‑yose noko‑nima Tefaho noko ne‑ya mai nafi awamoneni.
ទើបបានជ្រើសរើសហើយ៖
Yeso‑ka yo‑yose mai tamine 6: jaaNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
