Yeso‑ka yo‑yose mai tamine 5
5
Ananiya fadi‑ya fame keyehe‑ya mai hirina
1Makobote i‑di Ananiya, fadi i‑di Safira‑ya fame, mai‑ka fadara‑ya mai daanamake, yinero‑ya mai kanika,
2yinero owa‑ya fadi eyehe kemo, i‑di Yeso‑ka yo‑yose mai‑ya yinero owa‑ya i‑di Ananiya daatoname,
“Oda‑ka fadara oda daana, yinero nafi dai kayafahi.” Ananiya ati nane, keyehe‑ya hirineri.
3Ananiya‑ya Bedoro hiyare,
“Ananiya, hini yamata ihi keyehe‑ya hiritina? Satanasi ene Deoso‑ka Doni‑ya keyehe‑ya hiritikana, tika fadara manakone kote tikayaha, keyehe‑ya hiritineni.
4Fadara tiwatibodi daahiniya, daatina, sibarihi, tiwatibodi daahira, daatira, sibarihi nani. Daatiniya, yinero tikayaha, tika yinero tohatene. Yinero tiwatibodi daahineya, daatine, sibarihi, tiwatibodi daahire, daatire, sibarihi nane. Hini yamata ihi keyehe‑ya hiritina? Owa‑ya keyehe‑ya hiritikani awirineni. Deoso‑ya keyehe‑ya hiritineni.” Bedoro ati nemonane.
5Bedoro ati‑ya i‑di Ananiya mite, abo sone, tamine‑ya mai mita, mai kakomehemoneni.
6Yetene mai nahomisa, bora‑ya i‑di Ananiya abo‑ya mai katafa, mai hiwakame, mai hikamane.
7Mahi toki yanatone‑ya Ananiya abe, tamine‑ya fadi mitara, mai wini‑kaya tokiyamake.
8I‑di Safira‑ya i‑di Bedoro hiyare,
“Tiwati omitaboneni. Fadara i‑di Ananiya daahina, fara manakone nafi amaniraniha?” I‑di Bedoro ati ne.
“Fara manakone nafi amani.” Safira ati na,
9“Ka! Hini yamata ihi ai‑ka Hidi‑ka Doni‑ya keyehe‑ya dai hirikana? Tika yibote‑ya mai kama, hibayata nokobi‑kaya mai kobonama, tiwa‑ya mai kamamakeboneni.” Bedoro ati nemonane.
10Bedoro ati‑ya mita, aba, aboi sona, Safira maki‑ya mai kama, mai kiiyomama, Safira abamake‑ya mai awa, mai hiwakamineni, maki temene fowari‑kaya mai hikamamakebonehe.
11Ananiya abe tamine‑ya Yeso‑ka mai mita, mai habi siitona, Ananiya abe tamine‑ya mai one mita, mai habi siitonahari nineni.
Mai dama mai‑ya Yeso‑ka yo‑yose mai nakitama
12Mai kiyana, mai dami‑ya Yeso‑ka yo‑yose mai nakitama, mai ihi‑ya mai one awa, mai habi siitona,
“Haa‑nima ai ene na, ai awaterani.” Mai ati namoneni.
Deoso‑ka yobe kote oni Saromaho tohe‑ya Yeso ati‑ya mai no‑nofa mai yorotokateni.
13Yeso ati‑ya mai no‑nofa mai tamine‑ya mai one hiyara, mai ihi amosa tamine‑ya mai hiyara, mai‑ya mai ati dabi nofarani, mai habi siitonaro.
14Yeso ati‑ya mai no‑nofa mai dodamawaha, mai makidi toha, mai fanawi toha nineni.
15Bedoro mai ihi tamine‑ya mai mita, mai kiyana, mai‑ya mai kakama, hawi fowari‑ya mai‑ya mai nawiyineni, Bedoro mai‑ya fiyakaneya, korimari mai‑ya boyonebonaha.
16Yerosare yakari‑ya mai wi‑wina, mai kiyana mai toha, madi towe mai‑ya mai foya mai toha na, mai‑ya mai kakama, Yeso‑ka yo‑yose mai ihi madi towe mai kanana, mai kiyana mai nafi kitamamoneni.
Yeso‑ka yo‑yose mai‑ya mai wata
17Deoso‑ka yama‑bone‑ya mai da‑daa mai‑ka hidi toha, sadoseo mai toha na, Yeso‑ka yo‑yose mai ihi tamine‑ya mai mita, mai yawa,
18Yeso‑ka yo‑yose mai‑ya mai waratona, kadeya‑ya mai‑ya mai nafoya,
19Yama soki‑ya Deoso‑ka yo‑yose tokomaki, kadeya nokobiri‑ya seekane, Yeso‑ka yo‑yose mai fidotona,
20“Deoso‑ka yobe‑ya mai naha, mai dai hiyarabone, dai tokomahi. Yeso ati‑ya mai nofiya, mai manakone ababone, Deoso mai‑ya ati somawamebona tamine dai kaminiyahi.” Deoso‑ka yo‑yose ati nemonane.
21Deoso‑ka yo‑yose ati‑ya mai mita, Deoso‑ka yobe‑ya mai tokoma, yama wahabisari‑ya mai tokiyoma, mai‑ya mai kanawatoneni. Deoso‑ka yama‑bone‑ya mai da‑daa mai‑ka hidi toha, hidi‑ka mai one toha na, mai yorotokana, Isara·eo‑ka nodi mai‑ka webote mai dami‑ya mai haana, sodado mai‑ya mai yose,
“Kadeya‑ya Bedoro mai foya, mai dai towamakihi.” Mai ati namoneni.
22Kadeya‑ya sodado mai towakama, Bedoro mai awira, mai winikanama,
23Mai‑ka hidi mai‑ya mai hiyara,
“Bedoro mai awirani. Oda tokoma, kadeya barikani kita, nokobi‑ka sodado mai one naha, oda tokiyamake, kadeya dori honita tohani.” Mai ati na.
24Sodado mai ati‑ya mai mita, sodado mai‑ka hidi mai toha, Deoso‑ka yama‑bone‑ya mai da‑daa mai‑ka hidi mai toha na, mai ibi hiyara,
“Ka! Ebeni‑kaya mai tokiti? Hini yamata‑nima yama nibati?” Mai ati na.
25Mai hiyariya, bare kamaki, ati yanane,
“Kadeya‑ya mai dai nafoya, Deoso‑ka yobe‑ya mai‑ya mai kanawata, mai nahani.” Ati ne.
26Ati‑ya sodado mai‑ka hidi mite, hika sodado mai eyehe mai‑ya towamaki,
“Ai ati yawiya, mai dama yati‑ya ai‑ya mai nanahababa awineni.” Sodado mai atibodi ati namoneni.
Yeso‑ka yo‑yose mai‑ya mai kakama
27Yeso‑ka yo‑yose mai‑ya sodado mai kakama, mai‑ka hidi mai yorotokana, mai bai‑ya Yeso‑ka yo‑yose mai naha, Deoso‑ka yama‑bone‑ya mai da‑daa mai‑ka hidi mai‑ya weenawahe,
28“Dai hiyari fawanahi. Yeso tamine dai hiyaramarabone oda ati namaro, dai ati fawarani. Yeso oda nanahabamone dai ati na, dai ati‑ya Yerosare‑ya mai wi‑wina mai nafi mitani.” Deoso‑ka yama‑bone‑ya mai da‑daa mai‑ka hidi ati nemonane.
29Mai ati‑ya Bedoro mai mita, mai ati yanana,
“Dai ati ene oda hiyari maakaraboneni. Deoso ati‑nima oda nibisaboneni.
30Awa‑ya Yeso dai baakane, abe, ai‑ka idi mai‑ka Deoso hinakitamemarine.
31Deoso ene Deoso‑ka kanika‑ya hina·itari, itarine, ai nafi‑ka hidi toha, ai manakone‑ya nanahaba toha nane. Isara·eo‑ka hini mai tamine‑ya mai kamina, mai‑ya Deoso ati somawamebonane.
32Tamine oda hiyare, Deoso‑ka Doni tamine hikaminaharitene. Deoso ati‑ya mai tokadaba, Deoso‑ka Doni mai‑ya sawitene.” Yeso‑ka yo‑yose mai ati namoneni.
33Yeso‑ka yo‑yose mai ati‑ya mai‑ka hidi mai mita, mai yawi kita,
“Mai ai nanahabahi.” Mai ati namoneni.
34Mai‑ka hidi owa, i‑di Kamari·eo waamisane, mai‑ya hiyarebonaha. I‑di Kamari·eo fariseo tohe, Mose‑ka yama hani ati‑ya ka‑kanawato tohahari, ati‑ya mai dami nofateni.
“Ahi‑kaya mai tokahi, oda ati‑ya mai mitarabonehe. Mai naho bide tohiya, mai kamaboneni.
35Isara·eo‑ka nodi dai toha, dai noko wadahi. Mai‑ya dai ene toha, dai manakone tohahareba awineni.
36I‑di Ti·oda tamine dai mitatekarini.
‘Dai‑ka hidi amosabote ama·oni.’ Ati ne,
ati ene 400 mai kana Ti·oda‑ya mai dabamakitasamone, Ti·oda abe, hika mai hinama tohawama, hini mai tabori‑ya mai yama tonamameteni.
37Makobote ai dama, ai oni‑ya sodado mai kanahanoya, Karireya‑ke owa i‑di Yoda kaki,
‘Dai‑ka hidi‑bone ama·oni. Owa‑ya dai dabahi.’ Ati ne,
mai hidabawahe, i‑di Yoda abe, mai hinama tohawamatasameteni.
38Owati dai mitahi. Hibayata mai dai arabanahi. Ai one ene tohiya, mai ati fawanaboneni.
39Deoso‑ta ene toheya, mai ati fawaraboneni. Deoso‑ya dai weeniya, dai ati kasiraboneni.” Kamari·eo ati ne,
ati‑ya mai nofineni.
40Kamari·eo ati‑ya mai mita, Yeso‑ka yo‑yose mai‑ya mai haana, mai kama, mai‑ya mai bisina, mai‑ya mai saatokasa,
“Yeso tamine‑ya dai hiyaramariyahi. Dai tokahi.” Mai ati namoneni.
41Yeso‑ka yo‑yose mai toka, mai ya‑yaina,
“Yeso‑nima oda nawaha, oda‑ya mai bisinamakineni.” Mai atibodi ati na.
Mai ya‑yainamoneni.
42Mai ati fawara, mahi‑nima Deoso‑ka yobe‑ya Yeso tamine‑ya mai one‑ya mai kanawato, yobe owa‑ya mai toka, Yeso Kirisito tamine‑ya mai kamina namoneni.
ទើបបានជ្រើសរើសហើយ៖
Yeso‑ka yo‑yose mai tamine 5: jaaNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
