Yeso‑ka yo‑yose mai tamine 7
7
Tefaho mai‑ya hiyare
1“Tefaho, mai ati‑nima tiwati nineni?” Deoso‑ka yama‑bone‑ya mai da‑daa mai‑ka hidi ati ne,
2Tefaho mai‑ya hiyare,
“Okoyo dai toha, okobi dai toha na, owati dai mitahi. Hibati‑ya ai nafi‑ka idi i‑di Abaraho Mesobotamiya‑ya wine, Hara‑ya toki awisareya, Deoso amosabote ati‑ya mitematane.
3‘Abaraho, tiwa tabaro tiwini‑kaya tiwinamariyahi. Tika mai‑ta mai winahi, tiwa tabaro yati‑bone‑ya tiwa yofi·okanaboneni.’ Deoso ati nematane.
4Kaodeya‑ya wine, yanane, Hara‑ya toke, wine‑ya badi abe, yananamatase, Deoso ene ai wini‑kaya winawahane.
5Hibati‑ya ai tabaro‑bone‑ya Abaraho kobone, mai one tabori tohameteni. Abaraho‑ka tabora toharihi, bidi wadarihi neya, Deoso ati‑ya mite,
‘Abaraho, mai tabori nafi tikayahaboneni. Ti·abiya, tika dao mai hikayahamakeboneni.
6Tika nodi mai one tabori‑ya mai tokaboneni. Mai one‑ya mai narifi‑ya yama manakone‑ya mai kayafaraboneni. Hiniya mai mai kosihina, faha fowe 400 kana‑ya mai‑ya mai narifaboneni.
7Mai‑ya mai na‑narifa, makobote mai ihi okadikiya, mai manakone daa·onaboneni. Owa ene mai‑ya mai narifamarabone, ahi‑kaya mai kama, owa‑ya mai kahiyarawahaboneni.
8Abaraho, tika mai sowiri tati atori wisitinakosa, madehe wada amoni 8 kaniya, mai sowiri tati atori wisitinakosa tinahi.’ Deoso ati nematane.
Makobote i‑di Abaraho bidi i‑di Isaki wade, amoni 8 kane, sowiri tati ataro wisihinakose, i‑di Isaki bidi i‑di Yako wadamaki, I‑di Yako bidi mai 12 kana ai‑ka idi mai‑bone mai wadamaki na, mai sowiri tati atori‑ya mai wisinameteni.
9I‑di Yako bidi mai‑ka soho i‑di Yose‑ya mai kaka, yara mai‑ya sori‑ya mai daana, Eyito‑kaya i‑di Yose‑ya yara mai towakama, Deoso i‑di Yose‑ya kasomabisematane.
10Eyito‑ya kobone, makobote kadeya‑ya foye, Deoso hikasome, yama‑ya Yose wato ene Eyito mai‑ka hidi webote i‑di Yose‑ya nofe, ati ene Eyito mai‑ka hidi bidi i‑di Yose tohawahe, hidi webote‑ka yama‑ya nawadematane.
11Eyito, Kanaha na‑ya faha kakira, ai‑ka idi mai tabori‑kaya yamata yanara, ai‑ka idi mai fimemeteni.
12Eyito‑ya yamata toha, tamine‑ya i‑di Yako mite, ai‑ka idi mai‑ya yosene, mai tafe‑bone‑ya mai kanikabonehe.
13Mai tafe tosiyotasa, Eyito‑ya mai tokomatasa, Eyito mai‑ka hidi bi‑bidi ne mai‑ka soho i‑di Yose tohe‑ya mai watowahineni. Eyito mai‑ka hidi webote‑ya i‑di Yose anidi mai‑ya yofikanematane.
14I‑di Yose badi kamebona tamine‑ya anidi‑ya hiyare,
‘Okobi eyehe dai kamahi. Okobi‑ka mai toha na, dai kamiyahi.’ Yose ati ne,
ati ene 75 mai kana Eyito‑ya mai tokameteni.
15Eyito‑ya i‑di Yako toke, Eyito‑ya abe, makobote Eyito‑ya ai‑ka idi mai abamaki nameteni.
16Mai aba, Sikemi‑ya mai‑ya mai towakama, Abaraho temene‑ya mai‑ya mai kamamaki, Hamo bidi mai tabori i‑di Abaraho hikanikamete, fara‑ya ai‑ka idi mai kamameteni.
17‘Tabora bara‑ya mai wini nafiya, mai owakamatasaboneni.’ Abaraho‑ya Deoso hiyare ati nemata.
Eyito‑ya mai amoni tosiyo yanana, mai dodamawaha,
18Eyito‑ke mai‑ka hidi webote abe, hidi bare tohawahe, Yose tamine‑ya watore,
19Ai‑ka idi mai‑ya nofare, mai‑ya kosine, mai‑ka madehe wada yati‑ya hidi ati ene mai tonahomakosameteni, mai ababonehe.
20Fara‑ya i‑di Mose wade, Deoso noko‑ke amosi ba‑basi ne, abariko fama abariko owa ohari ne‑ya badi tabaro‑ya forine, mai hikahemori, Mose ati wadawahe, ke‑kemoma daani awire,
21Mose madi hiwake, homeya, Fara·o bide wase, hikayahamatane, hinayanebonaha.
22Yama‑ya Eyito‑ka mai wata, Mose‑ya mai kanawata, mai ati‑ya wato ba‑basi, ene kiti ba‑basi nematane.
23Mose‑ka faha fowe 40 kaniya, hika mai one Isara·eo‑ka nodi mai toha, mai‑ya awebona atibodi ati ne.
24I‑di Mose toke, Isara·eo‑ke owa‑ya Eyito‑ke owa kosine‑ya awe, Isara·eo‑ke owa‑ya kasomebona, Eyito‑ke owa manakone‑ya daane, hinahabane.
25‘Deoso ene mai nafi okasomiya, mai owakamabone, yama‑ya oka mai wata awini.’ I‑di Mose atibodi ati ne,
mai‑ya towakamebona‑ya mai wato awirameteni.
26Mahi owa‑ya i‑di Mose tokomatase, Isara·eo‑ka mai fama, mai ibi weena, mai‑ya i‑di Mose awe,
‘Isara·eo‑ka dai fama, hini yamata ihi dai ibi wee?’ I‑di Mose ati ne,
27hini owa‑ya weene, i‑di Mose‑ya fatatowiti, ati yanane,
‘Oda‑ka hidi tiwa‑mone tina awineni? Oda‑ka hidi amatira amatini. Oda ene tikadikariyahi.
28Mahi owa‑ya Eyito‑ke owa tinahaba, owa tinahabamakebone tina awineni.’ Isara·eo‑ke owa ati nematane, i‑di Mose‑ya weeneri.
29Ati ene Mose habo siitone, kanane, Midiya‑ka mai tabori‑ya tokawahe, mai tabori‑ya wineya, bidi mai fama mai wada,
30makobote ano 40 tohamakiya, Sinai adami yakari‑ya Mose toke, tabora awiri‑kaya awa bide hirina‑ya Deoso‑ka yo‑yose‑ya awematane.
31Yama‑ya awe, awatokane, ahiyata‑ya yama‑ya awebona, Deoso ati‑ya mitawahe,
32‘Tika idi i‑di Abaraho, i‑di Isaki, i‑di Yako, mai na, mai‑ka Deoso ama·oni.’ Ati ne.
Ati‑ya Mose mite, habo siitone, wawawakane, awa hirina‑kaya kiinawamarematane.
33‘Mose, oka wami‑ya tiwaa, tika sabata tanitikanisahi. Oka wami amani.
34‘Eyito‑ya oka mai wina, mai mai kosihina mai oawa, mai baki moni omita, mai see·okanabone, bofe‑ya okisama, Eyito‑ya tiwa oyoseboneni.’ Deoso ati nematane.
35Hibati‑ya Mose‑ya Isara·eo‑ka nodi mai nofara,
‘Oda‑ka hidi tihara, oda ene tikadikariyahi!’ Mai ati namete.
Fare Deoso ati ene mai‑ka hidi tohawahebonane. Deoso‑ka yo‑yose awa hirini‑kaya i‑di Mose awe, ati ene Isara·eo‑ka nodi mai‑ya i‑di Mose kasomebona mai‑ya seekanebonane.
36Eyito‑ya mai wi‑wina i‑di Mose ene‑ya mai awa, Mose‑ka mai‑ya Eyito‑ka mai saatokasa, Mose mai‑ya towakame, faha Mawa‑ya i‑di Mose ene kite‑ya mai awa, faha fowe 40 kana‑ya mai yakana, ene kite mai hiawa hinematane.
37Isara·eo‑ka nodi mai‑ya i‑di Mose hiyare,
‘Deoso ene dai‑ka soho owa Deoso ati‑ya mi‑mita‑bona, owa‑nima nebonane.’ Mose ati nematane.
38Tabora awiri‑ya i‑di Mose mai yorotokana, Deoso‑ka yo‑yose ati‑ya mai mitameteni. Sinai adami‑ya i‑di Mose tokomorose, Deoso‑ka yo‑yose ati himitemata, ati ai nofa, ai abarabone, ati hikanahanomata, ati ai fawaniterebonaha.
39Mose ati‑ya ai‑ka idi mai tokadabara, Eyito‑ya mai atibodi winitonamameteni.
40I‑di Mose Anidi i‑di Araho‑ya mai toka,
‘Araho, ai‑ka deoso‑ba wamatinahi, ai‑ya yofikanebonaha. I‑di Mose ai‑ka hawi‑ya yo‑yofikana fawane, abe awane.’ Mai ati na.
41Oro wamani bowi bidi‑nima na‑ya mai wamanineni, mai‑ka deoso bonaha. Hini mai ihi mai ya‑yaina,
‘Bowi bidi amosabote amane.’ Mai ati na,
Bani nawade‑ya mai nanahabineni, mai‑ka deoso oro wamani‑ka bani bonaha.
42Amowa mai‑ya mai kahiyara na, hini mai ihi Deoso mai‑ya kahabanematane. Deoso ati‑ya mi‑mita‑mata mai tamine‑ya kanahano,
‘Ano 40 kana‑ya tabora awiri‑kaya Isara·eo‑ka nodi mai yakana, bani mai dai nanahaba, Deoso‑ka bani‑ba dai daanini? Deoso‑ka bani‑ba dai daani awirameteni.
43Dai‑ka deoso bare mai dai wamana, owa oni Moroki toha, owa Hefa amowa‑nima ne toha ne, fara mai‑ya dai kahiyarabisateni. Dai ene amosara dai‑ya mai towakamaboneni, Babironi‑kaya mai‑ka yama anini dai aninabonehe.’ Deoso ati ne, Deoso ati‑ya mi‑mita mai kanahanameteni.
44Tabora awiri‑ya ai‑ka idi mai yakana, Deoso‑ka yobe‑ya mai towakameteni. Yobe‑bona‑ya Deoso yofikane,
‘Haa‑nima oka yobe neba wamatinahi.’ Deoso ati ne,
ati‑nima i‑di Mose ne yobe‑ya wamanematane.
45Ai‑ka idi mai‑ya i‑di Yosowe dabe, Deoso‑ka yobe‑ya mai kakama, Deoso ati ene Bara mai‑ya mai bisina, mai‑ka tabora‑ya mai kayafawaha, mai amoni dami‑ya Dafi mai‑ka hidi tohawaheya, Deoso‑ka yobe bote tohasa nematane.
46I‑di Dafi‑ya Deoso nofi nafi, Deoso‑ya Dafi haane,
‘Yako‑ka Deoso amatini. Tika yobe yati‑bona wamani onofineni.’ Dafi ati nematane.
47Dafi bidi i‑di Saromaho‑ta Deoso‑ka yobe‑ya wamanibisematane.
48Yobe ai wamane‑ya Deoso kitabote winaterene. Deoso ati‑ya mi‑mita‑mata ati ne,
49‘Neme‑ya oka i‑itari toha, bofe‑ya owa teme kawateni. Hini yamata‑bone oka yobe‑bona‑ya dai wamani boneti, hasi·obonekaro?
50Yama nafi wama·onamaroni.’ Deoso ati nematane.
51Dai eme kita, dai atibodi kita na, Deoso‑ka Doni ati dai nofateraba awineni. Dai‑ka idi mai‑nima dai nineni, dai narabo hawiraro.
52Deoso ati‑ya mai mi‑mita mai nafi‑ya dai‑ka idi mai bisinamete,
‘Deoso‑ka owa amosabote kamebonane.’ Mai ati na,
mai‑ya dai‑ka idi mai nanahabameteni. Fare kame, dai kahabane, dai ati ene mai hinahabene.
53Deoso‑ka yo‑yose Deoso ati‑ya mai kaminamete, Deoso ati‑ya dai tokadabarineni.” Tefaho ati nematane.
Tefaho abane
54Tefaho ati‑ya mai mita, mai yawi kita, mai nafi ini kawakosa,
55Tefaho Deoso‑ka Doni fai‑ya kibe, neme‑ya tonokomise, Deoso wehene‑ya awe, Deoso‑ka kanika‑ya Yeso waari‑ya awe,
56“Dai awahi. Neme hawi tohawaha, Deoso‑ka kanika‑ya okoyo i‑di Yeso waari‑ya oawawahineni.” Tefaho ati nemonane.
57Mai narabi‑ya mai barikaneni, Tefaho ati‑ya mai mitarabonehe. Mai yawa, mai ati kita, Tefaho‑ya mai wata kanibote na,
58tabora awiri‑kaya Tefaho‑ya mai horoni towaka, yati‑ya Tefaho‑ya mai baana, mai hinahabe, yati‑ya mai werenisa, i‑di Saoro yetene teme‑kaya mai‑ka bora‑ya mai nawiyineni.
59Tefaho yati‑ya mai hibaane, hiyare,
“Ayo Yeso, tiwa tabaro‑ya owa korimari tiwakamahi.” Ati nane.
60Yobati‑kaya ite,
“Ayo, owa‑ya mai nanahaba, mai‑ya tiwati somawamahi.” Ati ne, ati kite,
Ati fawane, abawahematane.
ទើបបានជ្រើសរើសហើយ៖
Yeso‑ka yo‑yose mai tamine 7: jaaNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
