Matalikilo 9
9
Leza mbwaakaleleka Nowa abana bakwe
1Lino Leza wakaleleka Nowa abana bakwe wakati, “Amuzyalane muvule, muzuzye nyika yoonse. 2Banyama boonse bamunyika, bayuni, azikalaba ansi, answi zyamumaanzi ziyoomuyoowa. Ndamupa bwami bwakweendelezya zintu zyoonse. 3Alimwi mulakonzya kulya zyoonse mbubonya mbundamupa zisyumani. 4Kuli buyo cintu comwe ncoteelede kulya, cintu eeci ninyama iijisi bulowa mulinjiyo, nkaambo mubulowa momuli buumi. 5Kufumbwa muntu uyoojaya muntunyina, awalo ndiyoomupa mulandu wakujaigwa. Ndiyoomunyonyoona munyama oonse uyoojaya muntu. 6Kufumbwa muntu uyoojaya muntu umwi, awalo uyoojaigwa. Nkaambo muntu wakalengwa mucikozyanyo ca Leza.
7“Lino nywebo amuzyalane, muvule, mube banji munyika.” 8Mpawo Leza wakaambila Nowa abana bakwe kuti, 9“Sunu ndacita cizuminano anduwe alunyungu lwako, 10alimwi azintu zyoonse zipona anduwe, nkokuti bayuni, banyama bavubwa abanyama bamusokwe, azintu zyoonse nzimwakazwa aazyo mubbwato. 11Ndapanga cizuminano anduwe mumajwi aangu aaya, ngindasyomezya kuti nsikooyoonyonyoona limbi zintu zipona amaanzi aazambangulwe. Zambangulwe talikooyooba limbi alimwi anyika eeyi pe.”
12Eelyo Leza wakaambila Nowa wati, “Lino nceeci citondezyo cacizuminano cangu citamani ncindacita anduwe alimwi azipona zyoonse zyamunyika. 13Ndabikka fulicoongo wangu mumakumbi. Uyooba ncecitondezyo cacizuminano cangu munyika. 14Lyoonse ndaakuleta makumbi kunyika, nkabela awalo fulicoongo aakuboneka mumakumbi, 15ndiyooyeeya cisyomezyo cangu anduwe abanyama boonse cakuti zambangulwe taliyoojayi limbi zipona zyoonse. 16Fulicoongo aakuboneka mumakumbi, ndaakumubona buyo, ndiyooyeeya cizuminano cangu citamani cili akati kangu azipona zyoonse munyika.” 17Lino Leza wakati kuli Nowa, “Eeci ncecitondezyo cacizuminano ncindacita azipona munyika.”
Nowa abana bakwe
18Bana ba Nowa bakazwa mubbwato bakali ba Syemu, Hamu, a Jafeti. Hamu wakali ngowisi Kenani. 19Kubana ba Nowa botatwe aaba nkokwakazwa misyobo yoonse yabantu bakkede munyika yoonse mbwiizulwa.
20Nowa lwakwe wakali mulimi, nkabela wakaba ngomuntu mutaanzi kulima muunda wamisaansa. 21Eelyo bumwi buzuba naakamana kunywa waini wakakolwa, mpawo wakasamununa zisani zyoonse, wakalala kalimantanda mutente lyakwe. 22Lino Hamu, wisi Kenani, naakabona kuti wisi wakalede kalimantanda, wakaya waakwaambila banabokwabo bobilo. 23Pele balo banabokwabo aabo, ba Syemu a Jafeti bakabweza jansi akuliyabika kusule lyabo, kabalijisi amakuko. Eelyo bakeenda cifutesule kuya kutente lyakwe akuyoomuvumba kumwi kabafutete kutegwa bataboni mantanda aawisi. 24Nowa naakabuka, waini niwakamuzwa alimwi naakamvwa ncaakacita mwanaakwe musyoonto
25wakati, “Kenani asinganyizigwe,
uyooba muzike wabazike mubantu bokwabo.”
26Alimwi wakati, “Alumbwe Mwami Leza, Leza wa Syemu.
Kenani uyooba muzike wakwe.
27Leza wangu asumpule Jafeti,
bana bakwe bakajane ceelelo,
bakkale mumatente aa Syemu.
Kenani akabe muzike wa Jafeti.”
28Kuzwa ciindi zambangulwe nilyakamana, Nowa wakapona aimbi myaka iili myaanda yotatwe amakumi osanwe. 29Wakafwa kali aamyaka iili myaanda iili fuka amakumi osanwe.
ទើបបានជ្រើសរើសហើយ៖
Matalikilo 9: Tonga96
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Tonga Bible © United Bible Societies, 1994.