Matalikilo 8
8
Kumana kwazambangulwe akuyuminina kwamaanzi
1Lino Leza taakamuluba Nowa abanyama bamusokwe abavubwa baya mbaakali aabo mubbwato. Mpawo Leza wakacitya guwo pati kuti libbubbule, eelyo maanzi akatalika kuyuminina. 2Maanzi aalwizi lwakunsi aanyika akaleka kupoomoka, aalo maanzi akali kuzwa kujulu akaimikwa. 3Nkaako maanzi akatalika kuya buyuminina kwamazuba aali mwaanda amakumi osanwe. 4Mubuzuba bwakkumi aciloba bwamwezi waciloba, bbwato lyakakkala acilundu cili mubusena bwa Alalati. 5Maanzi aakacili kuya buyuminina, eelyo mubuzuba bwakusaanguna bwamwezi wakkumi, nsonga yazilundu yakalibonya.
6Nikwakainda mazuba aali makumi one, Nowa wakajalula mpulungwido yabbwato njaakapangide, 7wakatuma cikwangala anze. Muyuni ooyo wakali kuuluka-uluka buyo koonse-koonse kusikila maanzi naakayuminina. 8Kumane Nowa wakatuma nziba kuyoolanga kuti naa maanzi ayuminina. 9Pele akaambo kakuti maanzi akacilivumbide nyika nziba taakwe niyakajana busena bwakukkala kuti ilyookezye nkaako yakabweeda kulinguwe. Eelyo Nowa wakatandabika janza mumpulungwido akwiibweedezya mubbwato. 10Wakalindila mazuba aali ciloba, eelyo wakiituma alimwi nziba kuzwa mubbwato. 11Niyakabweeda kulinguwe kumangolezya wakabona yaletelela atu tete lyamusamu wa Oliva mumulomo wayo. Aboobo Nowa wakaziba kuti maanzi atalika kuceya ansi. 12Alimwi Nowa wakalindila aambi mazuba aali ciloba, eelyo nziba wakiituma alimwi. Pele kuciindi eeci taakwe niyakabweeda alimwi kulinguwe pe.
13Nowa naakaba aamyaka iili myaanda iili cisambomwe aumwi mubuzuba bwakusaanguna bwamwezi wakusaanguna, maanzi akayuminina cakumaninina anyika. Naakajalula cijazyo campulungwido yabbwato, wakalanga anze wabona kuti nyika yayumina. 14Mubuzuba bwamakumi obilo aciloba bwamwezi wabili, nyika yakayumininide limwi.
15Lino Leza wakaambila Nowa kuti, 16“Kozwa mubbwato yebo amukaintu wako, bana bako abakaintu babo. 17Kozwa antoomwe abanyama boonse, abayuni abanyama bavubwa azikalaba, uzigwisizye anze kutegwa zikazyalane akuvuzyanya.” 18Aboobo Nowa wakazwa mubbwato amukaintu wakwe, bana bakwe antoomwe abakaintu babo. 19Banyama boonse bamusokwe, abanyama bavubwa abayuni, alimwi azikalaba, zyoonse zyakazwa mubbwato mutukamu-tukamu twamisyobo yazyo.
Nowa mbwaakapa cipaizyo ku Mwami Leza
20Mpawo Nowa wakayakila Mwami Leza cipaililo, wakabweza omwe-omwe kuzwa kumisyobo yabanyama abayuni beelede kupaizya, wakabatenta acipaililo. 21Nkabela Mwami Leza naakamvwa bweema bubotu, wakalyaambauzya lwakwe mwini wakati, “Nsikooyoosinganya limbi nyika akaambo kazintu nzyacita muntu. Nkaambo ndilizi kuti kuzwa kuciindi cabwana bwakwe, miyeeyo yakwe yoonse mmibi. Nsikooyoozinyonyoona limbi zintu zyoonse zipona munyika mbuli mbondacita lino.
22Kwaciindi coonse nyika eeyi niiciliwo, kunooli ciindi cakusyanga aciindi cakutebula.
Lyoonse kunoli ziindi zyamupeyo azyamusemuna, ziindi zyacilimo azyamainza, aziindi zyasikati azyamasiku. Ziindi eezi tazikooyoomana pe.”
ទើបបានជ្រើសរើសហើយ៖
Matalikilo 8: Tonga96
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Tonga Bible © United Bible Societies, 1994.