Mataayi 7
7
Ʉlʉpavɨlo vwɨmɨla kuhɨgha avange
(Malɨka 4:24; Lʉʉka 6:37-38, 41-42)
1“Namʉngavahɨghaghe avange kuuti na jʉmue mʉleke kuhɨghua nʉ Ngʉlʉve, 2ʉlwakʉva vʉle mʉkʉvahɨgha avange, na jʉmue mulihɨghua vʉle vʉle. Ɨkɨghelelo kɨno mughelela avange, kye kɨno ʉNgʉlʉve ilikʉvaghelela na jʉmue.
3“Kɨki ghughimba kulola akamengʼenyo aka mbavo kano kalɨ mʉ liiso ɨlya nʼjaako, neke naghulola ɨkɨpiki kɨno kɨlɨ mʉ liiso lyako? 4Kange, lwandaani ʉkʉmʼbʉʉla ʉnʼjaako kuuti, ‘Leka nɨkʉvʉsie akamengʼenyo aka mbavo kano kalɨ mʉ liiso lyako,’ pano mʉ liiso lyako jʉʉve mwekɨlɨ ɨkɨpiki? 5Ghwe nkedʉsi ʉve! Vʉsia taasi ɨkɨpiki kɨno kɨlɨ mʉ liiso lyako. Apuo pe ʉkʉkaagha vʉnofu na kuvʉsia akamengʼenyo aka mbavo kano kalɨ mʉ liiso lya nʼjaako!
6“Namʉngasipelaghe imbua ifiinu ifyɨmɨke, ʉlwakʉva ndepoonu sikʉvagalʉkɨla na kʉkʉvangʼenya; nambe kʉkʉsijughujila ingʉbe ifiinu ifya ndalama nyinga fino filengadɨka,#7:6 Namʉngasipelaghe imbua ifiinu ifyɨmɨke, … nambe kʉkʉsijughujila ingʉbe ifiinu ifya ndalama nyinga fino filengadɨka: Mʉ nyiiho isa Vayahudi, imbua ni ngʉbe fyale fikanu filamafu. ʉlwakʉva ndepoonu sikʉfikanyania mʉ matope.
Mʉsʉmaghe, mʉlondaghe, mʉhodesyaghe
(Lʉʉka 11:9-13)
7“Mʉsʉmaghe, ʉNgʉlʉve ɨkʉvapeela; mʉlondaghe, ʉNgʉlʉve ɨkʉvavonekesia; mʉhodesyaghe, ʉNgʉlʉve ɨkʉvadindulila. 8Ʉlwakʉva ʉmuunhu ghweni jʉno isʉʉma, ipelua; jʉno ilonda, ɨkʉfyagha; ghwope jʉno ihodesia, idindulilua.
9“Asi, ghwe veeni mʉlyʉmue, jʉno ʉmwanaake angansʉʉme ʉnkate, ɨkʉmpeela ɨlɨvue? 10Nambe angansʉʉme ɨsamaki ɨkʉmpeela ɨnjoka? 11Nave ʉmue, mwe vahosi mʉkagwile kʉkʉvapeela avaana viinu ifiinu ifinofu, lɨno ʉNhaata ghwinu ʉghwa kʉkyanya, nakyaivomba vʉnofu kukila, kʉkʉvapeela ifiinu ifinofu vano vikʉnsʉʉma?
12“Lɨno, sino mulonda avaanhu vavavombelaghe, se sino mʉvavombelaghe avange. Ʉlwakʉva isio se ndaghɨlo sa Moose ni mbʉlanɨsio sa vavɨli.
Ʉmʉlyango ʉmfinye nʉ mweleefu
(Lʉʉka 13:24)
13“Mwingilaghe kukilila ʉmʉlyango ʉmfinye, ʉlwakʉva ʉmʉlyango ʉghwa kwingilila kʉvʉtipulo mweleefu, najɨ sɨla ɨja kʉlʉtɨla ʉkuo nyeleefu. Kange, avaanhu vano vikilila ʉkuo, vinga. 14Looli ʉmʉlyango ʉghwa kwingilila kʉ vwʉmi mfinye, najɨ sɨla jɨno jilʉta kʉ vwʉmi finye, kange avaanhu vano vikʉjaagha, vadebe.
Ʉmpiki ghukagʉlɨka vwɨmɨla ifipeke fyake
(Lʉʉka 6:43-44)
15“Mʉvisaghe maaso na vavɨli ava vʉdesi, ʉlwakʉva aveene pano vikwisa kʉlyʉmue, pa maaso vivoneka hwene ngʼholo, neke nkate mʉ moojo ghaave, ngʼhekeeva ngʼhali. 16Avaanhu avuo, mʉkʉvakagʉla vwɨmɨla imbombo saave. Avaanhu navidonola isabibu mʉ matunguliisa, nambe kudonola amafyʉlɨsi mʉ mavajʉla. 17Kwekʉti, ʉmpiki ʉnnono ghukoma ifipeke ifinono, ʉmpiki ʉmʼbiivi ghukoma ifipeke ifiviivi. 18Nakweghʉle ʉmpiki ʉnnono ghʉno ghukoma ifipeke ifiviivi, nambe ʉmpiki ʉmʼbiivi ghʉno ghukoma ifipeke ifinono. 19Kange, ʉmpiki ghʉno naghukoma ifipeke ifinono, ghudumulua na kutaghua pa mwoto. 20Lɨno, avavɨli avuo ava vʉdesi, mʉkʉvakagʉla vwɨmɨla imbombo saave.
Ʉmʼbɨngɨlɨli ʉghwa kyangʼhaani
(Lʉʉka 13:25-27)
21“Nakwekʉti ʉmuunhu ghweni jʉno iiti, ‘Mʉtwa, Mʉtwa,’#7:21 Mʉtwa, Mʉtwa: Kʉ Vayahudi kutambʉla kavɨlɨ ɨlɨtavua kʉkavoniagha kuuti ʉmuunhu jʉno itambʉlua mwoghopua. Kwekʉti ghwope jʉno itambʉla, ɨkʉmwoghopa. ilikwingila mʉ Vʉtwa vwa kʉkyanya, looli jʉno ivomba ʉvughane vwa Nhaata ghwango jʉno alɨ kʉkyanya. 22Ɨkɨghono ɨkya vʉhɨghi kiliiva kɨfikile, vinga vilikʉmbʉʉla viiti, ‘Mʉtwa, Mʉtwa! Ongo twapʉlɨsyagha ɨmhola kuhʉma kʉlyʉve na kudaga amapepo amalamafu na kuvomba ifidegho finga mʉ lɨtavua lyako!’ 23Apuo nilikʉvavʉʉla kɨsila kʉfisa, niliiti, ‘Nanɨvamanyile ʉmue nambe padebe! Vʉʉka apa, ʉmue mwe vano muvomba ʉvʉhosi!’#Sabuli 6:8
Ʉnʼjengi ʉnya lʉhala nʉ nʼjasu
(Lʉʉka 6:47-49)
24“Lɨno, ʉmuunhu jʉno ipʉlɨka amasio ghango agha na kʉkʉghavɨngɨlɨla, iiva ndavʉle ʉmuunhu ʉnya lʉhala jʉno alyajengile ɨnyumba jaake pa lɨnhalavue. 25Ɨfula jɨkatoonya, nasi ndenga sikamema. Ɨmhepo ɨmbaha jɨkagugula na kusukania ɨnyumba jɨla. Neke ɨnyumba jɨla najɨkaghua, ʉlwakʉva ʉlwalo lwake lʉlyajengilue pa lɨnhalavue. 26Neke ʉmuunhu ghweni jʉno ipʉlɨka amasio ghango agha, neke naɨkʉghavɨngɨlɨla, ʉjuo iiva ndavʉle ʉmuunhu ʉnʼjasu jʉno alyajengile ɨnyumba jaake pa lʉhangalaaji. 27Ɨfula jɨkatoonya, nasi ndenga sikamema. Ɨmhepo ɨmbaha jɨkagugula na kusukania ɨnyumba jɨla, nakalɨngi jɨkaghua nʉ mʉghindi ʉmʼbaha!”
28ɄYesu ye amalile kujova amasio aghuo, ɨlɨpʉgha lɨla lɨkadegha kyongo vwɨmɨla imbʉlanɨsio saake, 29ʉlwakʉva alyale ivʉlanɨsia hwene muunhu nya vʉtavʉlɨlua, naakavʉlanɨsyagha ndavʉle avavʉlanɨsi vaave ava ndaghɨlo.
ទើបបានជ្រើសរើសហើយ៖
Mataayi 7: wbi
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© (Active), Wycliffe Bible Translators, Inc. All rights reserved.
