Mataayi 6
6
Imbʉlanɨsio vwɨmɨla kʉkʉvatanga avakotofu
1“Mʉlolaghe! Namʉngavombaghe inofu pamaaso gha vaanhu kuuti vavaghinie. Ʉlwakʉva mʉngavombe ʉluo, namʉngʉpɨle ʉlʉvonolo kuhʉma kwa Nhaata ghwinu ʉghwa kʉkyanya. 2Lɨno, pano mʉkʉvatanga avakotofu, namʉngakwɨsyaghe imhola isio kʉ vaanhu ndavʉle vivomba avakedʉsi mʉ masinagogi na mʉ sɨla, kuuti avaanhu vavaghinie. Kyangʼhaani nɨkʉvavʉʉla, viiva vamalile pikwʉpɨla ʉlʉhombo lwave. 3Neke ʉve pano ʉkʉvatanga avakotofu, ʉvatangaghe kɨsyefu kuuti nambe ʉmmanyaani ghwako alekaghe pikagʉla. 4Ʉlʉtango lwako lʉvombekaghe kɨsyefu, ʉlwakʉva ʉNhaata ghwako jʉno ilola sino sili kʉ vʉsyefu, ilikʉkʉhomba.
Imbʉlanɨsio vwɨmɨla kukufuunya
(Lʉʉka 11:2-4)
5“Pano mukufuunya kwa Ngʉlʉve, namʉngavisaghe ndavʉle avakedʉsi, ʉlwakʉva aveene pano vikufuunya vilonda kukwɨma mʉ masinagogi na mʉ sɨlamalekano kukuvonia kʉ vaanhu. Kyangʼhaani nɨkʉvavʉʉla, avuo vamalile pikwʉpɨla ʉlʉhombo lwave. 6Looli ʉve pano ghukufuunya kwa Ngʉlʉve, ghwingilaghe kʉkate na kudinda ʉmʉlyango. Pe ghufunyaghe kwa Nhaata ghwako jʉno naivoneka na maaso. ɄNhaata ghwako jʉno ilola sino sivombeka kʉ vʉsyefu, ilikʉkʉhomba.
7“Kange, pano mukufuunya kwa Ngʉlʉve, mʉlekaghe kukeela kʉjova amasio aminga amasila mʉlʉvo ndavʉle vivomba vano navikʉmwɨtɨka ʉNgʉlʉve. Ʉlwakʉva aveene visaagha kuuti, ʉngʉlʉve ghwave ɨkʉvapʉlɨka vwɨmɨla amasio ghaave aminga. 8Lɨno, namʉngifunyaghe ndavʉle vivomba aveene, ʉlwakʉva ʉNhaata ghwinu akagwile sino mulonda nambe ye mʉkyale kʉkʉnsʉʉma. 9Ʉmue pano mukufuunya kwa Ngʉlʉve, mʉtisaghe,
‘Ghwe Nhaata ʉve ʉlɨ kʉkyanya,
ɨlɨtavua lyako lyɨmɨkwaghe.
10ɄVʉtwa vwako vwisaghe.
Sino ʉkeliile sivombekaghe pa ɨɨsi apa,
ndavʉle sivombeka kʉkyanya ʉkuo.
11Ʉtʉpelaghe ʉmʉsyʉghʉ ifyakʉlia fiitu.
12Ʉtʉpyanɨlaghe ʉvʉhosi vwitu,
ndavʉle na jʉsue vʉle tʉkʉvapyanɨla vano vikʉtʉhoka.
13Nʉngatʉlekaghe kuuva mʉ ngelo,
looli ʉtʉpokaghe kwa Mhosi jʉla.
Ʉlwakʉva ʉVʉtwa vwako, ingʉfu saako
nʉ vʉvaha vwako vʉlɨ fighono fyoni!
Ameni!’#6:13 Ʉlwakʉva ʉVʉtwa vwako, ingʉfu saako nʉ vʉvaha vwako vʉlɨ fighono fyoni! Ameni! Amasio agha namweghale mʉ fitabu fimonga ifikʉʉlʉ.
14“Ʉlwakʉva nave mʉkʉvapyanɨla avange vano vavahokile, ghwope ʉNhaata ghwinu jʉno alɨ kʉkyanya, ɨkʉvapyanɨla ʉvʉhosi vwinu. 15Looli, nave namʉkʉvapyanɨla vano vavahokile, najʉ Nhaata ghwinu ʉghwa kʉkyanya naɨkʉvapyanɨla ʉvʉhosi vwinu.
Imbʉlanɨsio vwɨmɨla kuvʉhɨɨla kulia mʉlwa kufuunya
16“Pano muvʉhɨɨla kulia mʉlwa kufuunya, mʉlekaghe kusukunala ndavʉle vivomba avakedʉsi, ʉlwakʉva aveene visukunala kuvonia avaanhu kuuti vavʉhɨlile kulia mʉlwa kufuunya. Kyangʼhaani nɨkʉvavʉʉla, avuo vamalile pikwʉpɨla ʉlʉhombo lwave. 17Looli ʉve nave ʉvʉhɨlile kulia mʉlwa kufuunya, ghwoghaghe kʉ maaso na kupakala amafuta, 18kuuti ʉleke kuvoneka kʉ vaanhu, looli kwa Nhaata ghwako mwene jʉno naivoneka na maaso. Ghwope ʉNhaata jʉno ɨkʉsaagha sino sili kʉ vʉsyefu, ilikʉkʉhomba.
Imbʉlanɨsio vwɨmɨla ʉvʉmofu
(Lʉʉka 12:33-34; 11:34-36; 16:13)
19“Namʉngavutaghe ifiinu mʉ ɨɨsi ɨjɨ, muno ʉmhehe nɨ ngʼhusa finangania, kange voope avahɨɨji vimatʉla na kuhɨɨja. 20Looli mʉvʉtaghe ifiinu kʉkyanya kʉno ʉmhehe nɨ ngʼhusa nafinangania, kange avahɨɨji navimatʉla nambe kuhɨɨja. 21Ʉlwakʉva pano ʉvutile ifiinu fyako, pepano naghʉ mwojo ghwako ghuuva bahapuo.
22“Amaaso ghaako taala ja mʼbɨlɨ. Nave amaaso ghaako ghilola vʉnofu, ʉmʼbɨlɨ ghwako ghwoni ghuuva mʉ lʉmuli. 23Neke nave ɨliiso lyako lɨbofu, ʉmʼbɨlɨ ghwako ghwoni ghuuva mʉ ngʼhiisi. Lɨno, nave ɨkɨɨnu kɨno kɨveele kɨnoghiile kuuva lʉmuli, nakimulika, pe ɨngʼhiisi ɨjio jiiva mbaha kyongo!
24“Nakwale ʉmuunhu jʉno iiva mʼbanda ghwa vatwa vavɨlɨ. Ʉlwakʉva pano ɨkʉmʉghana na kʉkʉmʼbombela vʉnofu ʉntwa ʉjʉ, pepano ɨkʉnkalalɨla na kʉkʉmʼbeda ʉntwa ʉjʉnge. Ɨkyʉma kɨngakʉteme nʉngamʼbombele ʉNgʉlʉve!
Kʉkʉmhʉvɨɨla ʉNgʉlʉve
(Lʉʉka 12:22-31)
25“Lɨno nɨkʉvavʉʉla niiti, mʉlekaghe kuhangajɨka vwɨmɨla ʉvwʉmi vwinu kuuti kyande mulia kɨki, munyua kɨki, nambe mufwala kɨki. Asi, ʉvwʉmi navwe vʉvaha kukila ɨkyakʉlia? Naghʉ mʼbɨlɨ naghwe mʼbaha kukila amenda? 26Mʉlolaghe injuni! Nasivyala, nasipeta nambe kuvuta mʉ kɨhenge, neke ʉNhaata ghwinu ʉghwa kʉkyanya, ɨkʉsiswɨla. Asi, ʉmue namʉnoghiile kukila injuni isio? 27Ghwe veeni mʉlyʉmue jʉno ndepoonu ihangajɨka, kuuti ongelesie ʉvwʉmi vwake nambe akavalɨlo kamo?
28“Kɨki musaagha vwɨmɨla ifya kʉfwala? Lolagha, amalʉva ndavʉle ghikʉla, naghivomba ɨmbombo nambe kuhona amenda ghaake agha kʉfwala. 29Neke nɨkʉvavʉʉla kuuti, nambe ʉSolomoni mʉ vʉvaha vwake vwoni, naalyaghelile kufwalɨlɨla neke anoghele ndavʉle ɨlɨlʉva lɨmonga! 30Nave ʉNgʉlʉve ɨkʉghafwasia enendɨɨkɨ amamela agha mʉ lɨhaka ghano ghinofia ʉnsiki nʼdebe vʉvʉle, neke nakalɨngi ghijoghotoka na kutaghua pa mwoto, lɨno nakyaɨkʉvafwasia ʉmue na kukila, ʉmue mwe vanya lwɨtɨko lʉdebe?
31“Lɨno, mʉlekaghe kutʉngʉmala kuuti, ‘Tulia kɨki, tunyua kɨki, nambe tufwala kɨki,’ 32ʉlwakʉva ifio fyoni vihangajɨkɨla vano navammanyile ʉNgʉlʉve. ɄNhaata ghwinu jʉno alɨ kʉkyanya akagwile vʉnofu kuuti mulonda sooni isio. 33Looli mʉlondaghe taasi ʉVʉtwa vwa Ngʉlʉve na kuvomba sino ikeela ʉmwene, neke ifio fyoni ɨkʉvongelesia.
34“Lɨno, namʉngasaghaghe vwɨmɨla ifya pakɨlaavo, ʉlwakʉva ifya pakɨlaavo pwefili vwɨmɨla ɨkɨghono ɨkio. Kɨla kɨghono kɨlɨ na mahangajɨko ghaake.
ទើបបានជ្រើសរើសហើយ៖
Mataayi 6: wbi
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© (Active), Wycliffe Bible Translators, Inc. All rights reserved.
