ទំនុកតម្កើង 41
41
សេចក្ដីអធិស្ឋានក្នុងពេលមានជំងឺ
បទតម្កើងរបស់ដាវីឌ សម្រាប់អ្នកដឹកនាំចម្រៀង។
1មានពរហើយ អ្នកដែលយកចិត្តទុកដាក់នឹងអ្នកក្រខ្សត់!
ព្រះយេហូវ៉ានឹងរំដោះគេនៅថ្ងៃនៃមហន្តរាយ។
2ព្រះយេហូវ៉ានឹងការពារគេ ហើយរក្សាជីវិតគេ
ដូច្នេះគេត្រូវបានហៅថាមានព្រះពរនៅលើផែនដី។
សូមកុំប្រគល់គេតាមចំណង់ពួកសត្រូវរបស់គេឡើយ!
3ព្រះយេហូវ៉ានឹងទ្រទ្រង់គេនៅលើគ្រែអ្នកជំងឺ;
នៅគ្រាគេមានរោគា ព្រះអង្គនឹងប្រោសគេឲ្យជាទាំងស្រុងនៅលើគ្រែរបស់គេ#41:3 ព្រះអង្គនឹងប្រោសគេឲ្យជាទាំងស្រុងនៅលើគ្រែរបស់គេ―ឬ “ព្រះអង្គនឹងរៀបចំគ្រប់ទាំងគ្រែក្នុងពេលគេមានជំងឺ”។។
4ខ្ញុំបានទូលថា៖ “ព្រះយេហូវ៉ាអើយ សូមមេត្តាដល់ទូលបង្គំផង!
សូមប្រោសព្រលឹងរបស់ទូលបង្គំឲ្យជាផង
ដ្បិតទូលបង្គំបានប្រព្រឹត្តបាបទាស់នឹងព្រះអង្គ”។
5ពួកសត្រូវរបស់ខ្ញុំនិយាយអាក្រក់ទាស់នឹងខ្ញុំថា៖
“តើពេលណាទើបវាស្លាប់ ហើយឈ្មោះរបស់វាបានវិនាសបាត់ទៅ?”។
6សូម្បីតែនៅពេលពួកគេមកជួបខ្ញុំ ក៏ពួកគេនិយាយសេចក្ដីមិនពិតដែរ;
ចិត្តរបស់ពួកគេប្រមូលសេចក្ដីទុច្ចរិតសម្រាប់ខ្លួនឯង;
ពេលចេញទៅខាងក្រៅ ពួកគេក៏និយាយសេចក្ដីនោះ។
7អស់អ្នកដែលស្អប់ខ្ញុំ ខ្សឹបខ្សៀវគ្នាទាស់នឹងខ្ញុំ;
ពួកគេគិតគូរការអាក្រក់ទាស់នឹងខ្ញុំ ដោយពោលថា៖
8“សេចក្ដីចង្រៃ#41:8 សេចក្ដីចង្រៃ―ន័យត្រង់គឺ “បេលាល”។ត្រូវបានចាក់បង្ហូរលើវា
ដូច្នេះវានឹងមិនក្រោកឡើងពីកន្លែងដែលវាដេកទៀតឡើយ!”។
9សូម្បីតែមិត្តដ៏ស្និទ្ធស្នាល#41:9 មិត្តដ៏ស្និទ្ធស្នាល―ន័យត្រង់គឺ “មនុស្សនៃសន្តិភាពរបស់ខ្ញុំ”។ដែលខ្ញុំបានទុកចិត្តលើនោះ
ជាអ្នកដែលហូបនំប៉័ងរបស់ខ្ញុំ
ក៏បានលើកកែងជើងទាស់នឹងខ្ញុំដែរ។
10រីឯព្រះអង្គវិញ ព្រះយេហូវ៉ាអើយ
សូមមេត្តាដល់ទូលបង្គំ ហើយធ្វើឲ្យទូលបង្គំក្រោកឡើងផង
ដើម្បីឲ្យទូលបង្គំបានតបសងដល់ពួកគេ។
11ដោយសារតែការនេះ ទូលបង្គំដឹងថា
ព្រះអង្គសព្វព្រះហឫទ័យនឹងទូលបង្គំ
គឺសត្រូវរបស់ទូលបង្គំមិនស្រែកដោយមានជ័យជម្នះលើទូលបង្គំឡើយ។
12រីឯទូលបង្គំវិញ ព្រះអង្គបានទ្រទ្រង់ទូលបង្គំ ដោយសារតែសេចក្ដីគ្រប់លក្ខណ៍របស់ទូលបង្គំ
ហើយឲ្យទូលបង្គំឈរនៅចំពោះព្រះភក្ត្ររបស់ព្រះអង្គជារៀងរហូត។
13សូមឲ្យមានព្រះពរដល់ព្រះយេហូវ៉ាដ៏ជាព្រះនៃអ៊ីស្រាអែល
ចាប់ពីអស់កល្បរហូតដល់អស់កល្ប។
អាម៉ែន! អាម៉ែន!៕
ទើបបានជ្រើសរើសហើយ៖
ទំនុកតម្កើង 41: GKHB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
GLOBAL KHMER BIBLE©
Copyright © 2023 by Global Bible Initiative