ទំនុកតម្កើង 28

ព្រះជាកម្លាំងរបស់ខ្ញុំ

បទតម្កើង#28:0 បទតម្កើង―ជាពាក្យជំនួយ។របស់ដាវីឌ។

1ព្រះយេហូវ៉ាអើយ ទូលបង្គំស្រែកហៅព្រះអង្គ!

ថ្មដានៃទូលបង្គំអើយ សូមកុំនៅស្ងៀមនឹងទូលបង្គំឡើយ!

ប្រសិនបើព្រះអង្គនៅស្ងៀមនឹងទូលបង្គំ

ទូលបង្គំនឹងបានដូចជាពួកដែលចុះទៅរណ្ដៅមរណៈមិនខាន!

2សូមសណ្ដាប់សំឡេងនៃពាក្យអង្វរកររបស់ទូលបង្គំផង

ពេលទូលបង្គំស្រែករកជំនួយពីព្រះអង្គ

ពេលទូលបង្គំលើកដៃឡើងឆ្ពោះទៅទីវិសុទ្ធបំផុតរបស់ព្រះអង្គ។

3សូមកុំអូសទូលបង្គំទៅជាមួយពួកមនុស្សអាក្រក់

ឬជាមួយពួកប្រព្រឹត្តអំពើទុច្ចរិតឡើយ

គឺពួកដែលនិយាយសេចក្ដីសុខសាន្តជាមួយអ្នកជិតខាងរបស់ខ្លួន

ប៉ុន្តែមានគំនិតអាក្រក់ក្នុងចិត្តវិញ។

4សូមធ្វើដល់ពួកគេតាមការប្រព្រឹត្តរបស់ពួកគេ និងតាមសេចក្ដីអាក្រក់នៃទង្វើរបស់ពួកគេ

សូមធ្វើដល់ពួកគេតាមទង្វើនៃដៃរបស់ពួកគេ គឺតបសងដល់ពួកគេនូវអ្វីដែលពួកគេសមតែទទួល!

5ដោយព្រោះពួកគេមិនអើពើនឹងកិច្ចការរបស់ព្រះយេហូវ៉ា ឬស្នាព្រះហស្តរបស់ព្រះអង្គ

ដូច្នេះព្រះអង្គនឹងរំលំពួកគេ ហើយមិនសង់ពួកគេឡើងវិញឡើយ!

6សូមឲ្យមានព្រះពរដល់ព្រះយេហូវ៉ា

ដ្បិតព្រះអង្គបានសណ្ដាប់សំឡេងនៃពាក្យអង្វរកររបស់ខ្ញុំ។

7ព្រះយេហូវ៉ាជាកម្លាំងរបស់ខ្ញុំ និងជាខែលរបស់ខ្ញុំ;

ចិត្តរបស់ខ្ញុំជឿទុកចិត្តលើព្រះអង្គ ក៏បានទទួលជំនួយ

ដោយហេតុនេះ ចិត្តរបស់ខ្ញុំលោតកញ្ឆេង

ខ្ញុំនឹងអរព្រះគុណព្រះអង្គដោយចម្រៀងរបស់ខ្ញុំ។

8ព្រះយេហូវ៉ាជាកម្លាំងនៃប្រជារាស្ត្រ#28:8 ប្រជារាស្ត្រ―ន័យត្រង់គឺ “ពួកគេ”។របស់ព្រះអង្គ

និងជាបន្ទាយនៃសេចក្ដីសង្គ្រោះ

ដល់អ្នកដែលត្រូវបានចាក់ប្រេងអភិសេករបស់ព្រះអង្គ។

9សូមសង្គ្រោះប្រជារាស្ត្ររបស់ព្រះអង្គ ហើយប្រទានពរដល់មរតករបស់ព្រះអង្គផង

សូមឃ្វាលពួកគេ ហើយបីត្រកងពួកគេជារៀងរហូតតទៅ៕

ទើបបានជ្រើសរើសហើយ៖

ទំនុកតម្កើង 28: GKHB

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ខគម្ពីរពេញនិយមពី
ទំនុកតម្កើង 28