ទំនុកតម្កើង 12

ព្រះអម្ចាស់ថែរក្សាមនុស្សកម្សត់

បទតម្កើងរបស់ដាវីឌ សម្រាប់អ្នកដឹកនាំចម្រៀង ត្រូវលេងតាមទំនុកភ្លេងសេមីនីត#12:0 ទំនុកភ្លេងសេមីនីត―ន័យត្រង់គឺ “ទីប្រាំបី”។។

1ព្រះយេហូវ៉ាអើយ សូមសង្គ្រោះផង!

ដ្បិតលែងមានវិសុទ្ធជនហើយ

មនុស្សស្មោះត្រង់ក៏បាត់ពីចំណោមមនុស្សលោកដែរ។

2ម្នាក់ៗពោលសេចក្ដីមិនពិតនឹងអ្នកជិតខាងរបស់ខ្លួន

ពួកគេនិយាយដោយបបូរមាត់រលូន និងដោយមានចិត្តពីរ។

3សូមព្រះយេហូវ៉ាកាត់អស់ទាំងបបូរមាត់រលូន

និងអណ្ដាតដែលនិយាយព្រហើនចេញផង!

4ពួកគេនិយាយថា៖ “យើងនឹងឈ្នះដោយអណ្ដាតរបស់យើង

បបូរមាត់យើងគឺជារបស់យើងហើយ

តើនរណាជាចៅហ្វាយលើយើង?”។

5ព្រះយេហូវ៉ាមានបន្ទូលថា៖

“ដោយសារតែការសង្កត់សង្កិនលើមនុស្សទ័លក្រ

ដោយសារតែសម្រែកថ្ងូររបស់មនុស្សខ្វះខាត

យើងនឹងក្រោកឡើងឥឡូវនេះ។

យើងនឹងដាក់ពួកគេឲ្យនៅទីសុវត្ថិភាពដែលគេដង្ហក់រកនោះ”។

6ព្រះបន្ទូលរបស់ព្រះយេហូវ៉ាជាព្រះបន្ទូលបរិសុទ្ធ

គឺដូចជាប្រាក់ដែលត្រូវបានរំលាយក្នុងឡដី ហើយបន្សុទ្ធប្រាំពីរដង។

7ព្រះយេហូវ៉ាអើយ គឺព្រះអង្គហើយ ដែលនឹងថែរក្សាពួកគេ#12:7 ពួកគេ―ឯកសារបុរាណខ្លះថា “យើងខ្ញុំ”។

ព្រះអង្គនឹងការពារពួកគេ#12:7 ពួកគេ―ន័យត្រង់គឺ “យើងខ្ញុំ”; ឯកសារបុរាណខ្លះថា “គាត់”។ពីជំនាន់នេះជារៀងរហូត!

8មនុស្សអាក្រក់ដើរគ្រប់ទីកន្លែង

នៅពេលដែលអំពើថោកទាបត្រូវបានលើកតម្កើងនៅក្នុងចំណោមមនុស្សលោក៕

ទើបបានជ្រើសរើសហើយ៖

ទំនុកតម្កើង 12: GKHB

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ខគម្ពីរពេញនិយមពី
ទំនុកតម្កើង 12