JENESIS 3
3
Ziemmena Hekuâpheumakbe
1Chunage Tingwang Hera ne tewgaibe hekaubena ramme leine ruage henêu ne pa ningching sia lang de lei. Pa ne ’mpuimi je, “Hera ne ningnai je, ‘Merie gu herachi leine ningnai teu mak ra lei,’ ze rang gai mei?” acheu ze ka’nneu de lei.
2Zai ’mpuimi ne henêu je, “Merie ge ’nchikeube rachî leine anai teu dui kam lei; 3kane Hera ne rang ze, ‘Merie sumzui ge bambe bang rachî ze â ningnai teu mak ra lei, deî de deîtau mak ra lei, ningnai chai mak ra hangge zeu’ kacheu de lei,” ze acheu bei de lei.
4Kane henêu ne ’mpuimi je, “Ningnai chai ra mak lei. 5Chipau rachî ningnai teu gai dezai ningnai mik latpat kai gu da zai ningnai du Hera gum ze keyi-kesia chî du de lei be Hera â chilube ziegene de lei,” kacheu de lei.
6Chidadege ’mpuimi ze chipau bang rachî ze teuyi-desang zai peluiyi-desang de lei be ngaupat ti zai kaningchingbe ngau le ra teu ra yibe rachî de lei ze ’nning gai lu dege â, chipau rachî rai lu teu gai ’ndi de lei; zai pe napeu je du gêsa â pei bei pa du teu gai de lei. 7Chidadege â penai mik letpat kai bei de lei, zai penai pumlâng bambe chî di de lei; zai penai paîni hangge ’mbeuchîneu ne herui lu kai de lei.
8Zai chipau mai hegî ge merie ge Tingwang Hera tatpatbe ’ncheu penai seu de lei, chidadege merie gu ’nrêukang ge penai ’mbai di de lei. 9Kane Tingwang Hera ne ’mpeumi je kû ze, “Nang ’ndaige la lau?” ze kacheu de lei.
10Chidadege pa ne, “Merie ge ning kuâ seu lu, a pumrua bambe ziegene I hing ze ’mbai di de lei,” ze kak te lei.
11Hera ne, “Ning pumrua lei be châu ne ningchu rang lau? Teu mak ra ningchu I samdiegaibeibe bang rachî nang teu gai ’ndi de mei?” ze kacheu de lei.
12’Mpeumi ne, “’Mpuimi a dage nguabam ra nang ne peigaipui zene chipau rachî ze achu pei bei ze I teu gai ’ndi de lei,” ze acheu bei de lei.
13Chidadege Tingwang Hera ne, ’mpuimi je, “’Ndaitew ze nang aigumbe tâ tew gai lau,” ze acheu bei de lei. ’Mpuimi ne, “Henêu ne achu duaibeibe ziegene I teu gai ’ndi de lei,” ze kacheu de lei.
Hera ne Samramgaibe
14Tingwang Hera ne henêu je,
“Nang ne aipau tâ tewgai’ndibe ziegene kaurui leine peireige,
zai hekaubena leine peireige sua â ning peireige deset’ngkeu’ngkia gai de lei;
nang keringbe ting tâluî ning bungpui ne liarua ze kedeiniamoîne nang teu ra de lei.
15Nang benai ’mpuimi kakge,
zai ning dagene reheipiakeume,
zai pe dagene reheipiakeume kakge heteu-herei chang ra I ne tew gai gu lei;
pe na ’mpeumi ne ning peî ze chaîkeniak ku,
zai nang ne pe pî ’nsâu gu lei,” ze rang gai bei de lei.
16’Mpuimi je pa ne,
“Nang henalungbe ge keteubeted I ne tewpung gai gu lei;
keteubeted lie ze ning name je nang lungkeu gu lei,
sede ning napeu je ’nchâ ze nang bam ra lei,
zai pa ne ning peireige rezietei gu lei,”
ze rang gai bei de lei.
17Zai Adambe je pa ne,
“Ning nâu kuâ nang ’ngkinggai’ndibe ziegene zai ‘Nang teu mak ra lei,’
ze I samdiegaibeibe rachî nang teube ziegene,
ning ziegene kedei je deset kai ’nde lei;
nang kering ting tâluî hereu ze tâtewbe gene nang hetak hang ngau gu lei;
18hetu ramme benai heturie ramme ning hangge puakpat ku lei,
zai hênam ge puakpatbe ramme ze nang teu ra de lei.
19Kedei lam nang helattat dai mak tâne ning ju ge tebeudui luabe gene nang teu ra ngau gu lei,
chigene ningchu I lupat daseu;
nang â kedeinia de lei,
zai kedei lam nang helettat dai gu lei,”
ze rang gai bei de lei.
20’Mpeumi ne pe nâu ji hang Ebile ze ’ntak kai bei de lei, pa â keringbe zat leine pui hang changbe ziegeneu. 21Zai Tingwang Hera ne Adambe benai pe nâu paîni hangge hemeigei ne tew lu bâ gai bei de lei.
Adambe benai Ebile je Eden merie gene Kelituâbe
22Chidadege Tingwang Hera ne, “Pie le lau, ziemmena du anui gum ze keyi kesia-chibe chang de lei; pechu â keringbe peibe chingbang rachî rai lu teu ra zai betun mak ze ring ze bam ra pei mak ra de lei,” ze kacheu de lei— 23chipauziegene Tingwang Hera ne pechu Eden merie gene hela ’mbe langtuâ ’ndi de lei, zai pechu ’ndamgaibe dei gezene helu tâ tew-teu ze bam ra tew gai bei de lei, pechu lupatbe bâm kedei gene tâtew-teu ra hangge zeu. 24Pa ne ziemmena je kelituâ ’ndi de lei; zai Eden merie gene naimik pat ’mbia ge keringbe chingbang bâm ’mbe gutbe ’mpuî reî ra hangge kerubme benai hemitaube hiazutkie ne ’mpuî leine reîduibe kau hekie ze kai bei de lei.
ទើបបានជ្រើសរើសហើយ៖
JENESIS 3: ZEMEBSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.