Luc 21
21
Njèkei-kinge ke njèndoo ade nyan dum bawge
(An-in Marc 12.41-44 tɔ)
1Jésu an bawge sêw-sêw loo ke reei se nyan-nojege le de umi kêm sandu-nar’t se gonan-gonan. 2Go’t gugu è an njèkei-kinge ke njèndoo karé ree se sisi joo um kêm sandu-nar’t nè tɔ. 3Jésu ede de ede nè:
– Man m’ede sei ndàt, njèkei-kinge ke njèndoo nè ade nyan dum dè le njé ke rang malang. 4Tede njé ke rang malang nga, è tà-nyange ke al dè ji de á d’unn d’ade. Nè njèkei-kinge ke njèndoo nè nga, è nyan ke ɔje dè ngonm ra’n kuwe á è unn bere mbak ade non.
Jésu ede de tà le kei le Nube ke à tuju
(An-in Matt 24.1-2; Marc 13.3-13 tɔ)
5Loo ke njé ke nange tami tà ɔji dè kei le Nube ke d’unde se herge ke mbirin-mbin a, se nyange ke d’unde se ninn’n d’ade Nube nga ɓaa, Jésu ede de ede nè:
6– E ke nè á è nyange ke sei oréi kum si dè’t ɗarinè. Nè ndɔ karé ke rang herge ke mbirin-mbin ke se an-in nè nga, d’ade jɔrè de nang bɔrɔr-bɔrɔr. Karé bè ke à nain dè made’t goto.
Nyange ke à teei kété ɓita dè nang nè à tuju ɓai
(An-in Matt 24.3-14; Marc 13.3-13 tɔ)
7Dé tel dé deje’n d’ede nè:
– Njèndó dooge nyan, ké nyange nè nga à teei ndɔ ke ra’t wa? Ké ri á à tɔje jè ndɔ tee le nyange nè nga wa?
8Nè Jésu ede de ede nè:
– Undei kumkunju dè ra si’t le kade dé sú kum si lé. Tede dooge bule à unni ri’m tam’n kedi nè: «E man nga kuwe á m’ee Krist.» «Ndɔ nain ngɔr.» I ndolèi go de lé. 9Loo ke sei a kooi tà rɔ ke dooge à rɔi nan a, kin ke dooge à in-in se nan a tɔ nga, adi ndil si tee an-in soin-soin lé. Gar-gar nyange nè nga à teei kété ɓita, nè ke loon’t nè kuwe à è ngei ndɔ kade dè nang nè tuju’n bere mbak lé ɓai.
10Go’t gugu, Jésu tel ede de ede nè:
– Girkoje dooge ke karé à in-in se girkoje dooge ke rang a, ngar ke kêm ɓeekon ke karé à in se ngar made’n ke kêm ɓeekon ke rang’t a tɔ. 11Nang à yei ɓuk-ɓuk se looge ke nange gai-gai a, ɓo-bò se yo-kos à osoi se loo-loo a, nyange ke tooi ɓel ngain ke doo an ndɔ karé lé à undei loo teei kàde danran’t a tɔ. 12Nè kété ɓita kade nyange nè teei ɓai nga, d’a tuwe sei a, d’a ra kum si ndoo a, d’a d’ule sei ji ngar dè kei kebe nan a, d’ade ɓuku sei dangai’t a, d’ade kali sei kaw se si non ngar-ɓeege’t se non njékonɓeege’t a tɔ. D’a ra se si nyange nè nga titeke bè tede’m man. 13Loo ke ndɔn’t nyange nè malang à teei dè si’t titeke bè ɓaa, è ndɔ ke kanm kade ɔri go tà le’m man. Loo ke d’a kali sei kaw se si non ngar-ɓeege’t, se non njékonɓeege’t ɓaa, 14adi kêm si tò kekek dè tà ke sei uwei dè nja kété dè ɓengre si’t le taa’n dè si nga lé. 15Tede tà kumkunju ke m’a m’ule tà si’t nga, doo karé bè géa dann njébange’t le si asekum naje sei tà’t éké kile sei dè tà’t ndan lé. 16Njékoje sige se ngakon sige se njénojege le si se madesige géa à ulei sei ji njékonɓeege’t. D’a d’ade d’a tɔl njé ke nange dann si’t a tɔ. 17Dooge malang à ɔri sei njêt tede ri’m man ke m’ee Ngonn doo nga. 18Nè ke nè á Nube ndige lé ɓaa, bin dè si karé luk-luk géa à ɔr koso kɔke lé. 19Takul korè tà njak le si á d’a kaje’n nganrankum ra si.
Jésu ede de tà ke ɔje dè tuju le ɓee-bò ke Jérusalem
(An-in Matt 24.15-21; Marc 13.14-19 tɔ)
20Loo ke sei à kan-in njérɔge ke ɓeekon ke rang à gan-in dè ɓee-bò ke Jérusalem wàk ɓaa, è tà le kade i geri maje titeke nain ngɔr ɓaa, ɓee-bò nè nga à tel k’ee ndube kerɔte. 21Kêm ndɔn’t nè nga, maje kade dooge ke ndii kêm ɓeekon ke Judée an-in awi dè mbalge’t sangi loo ɓɔyɔ ra lé. Maje kade dooge ke ndii kêm ɓee ke Jérusalem undei loo teei awi kɔke a, njé ke ndii kêm ndɔrge walé nga, maje kade teli reei kêm ɓee’t lé a tɔ. 22Kêm ndɔn’t nè nga, Nube à gangtà dè kosdooge’t le’n tede kade tà ke dé ndang kêm magtub’t kété mari aw’n loon’t deĵ. 23Habi! à è kumndoo ngain tede le dinye ke njéndann ngannge se njé ke ngannge à ili mba kàde de’t ɓai kêm ndɔnge’t nè nga. Tede nyankêmkon ke bò à ra dooge ke kêm ɓee’t nè a, Nube à gangtà dè kosdooge ke kêm ɓeekon’t nè a tɔ. 24D’a tɔl njé ke nange se kuye kaskar a, d’ade tuwe njé karége kaw se de ɓer se looge gai-gai dann girkoje dooge’t malang. Girkoje dooge gai-gai à tubei ɓee-bò ke Jérusalem nang mbajer-mbajer sár kade ndɔ konɓee le de ase’n deĵ.
Ndɔ tel ree le Ngonn doo
25Nyange ke tooi ɓel ngain ke doo an ndɔ karé lé ɓai à undei loo teei kum kàde’t a, kum nan’t a tɔ. Dooge malang ke dè nang nè ɓel à unde de ndàt gang de kade tà ige de sêl. D’a d’an nyan karé ke kum ra lé tede mann ba-bò ke ule ade kɔr’n tal bungus-bungus a, tede ká’n ke ɓar ngain a tɔ. 26Loo ke dooge à giri dè nyange ke à reei dè nang nè bere mbak ɓaa, ɓel à tɔl de singling tede tɔgmong le nyange ke danrán à yei ɓuk-ɓuk. 27D’a d’an’m man Ngonn doo loo tel ree’t le’m dann bum’t se tɔgmong a, se ndubra a tɔ. 28Loo ke nyange nè à undei loo teei ɓaa, i ndii dè nja si’t a, ɔri dè si dɔ a tɔ, tede Nube à taa dè si ngɔr ta.
Jésu unn tà le kage koté ɔje’n dè Konɓee le Nube ke nain ngɔr
(An-in Matt 24.32-35; Marc 13.28-31 tɔ)
29Go’t gugu Jésu unn tà karé tam ede nè:
– An-in! kage koté se gute kagege ke rang malang. 30Loo ke sei an-in mbi de unn gir kite lurr ɓaa, sei geri kêm si’t mbak titeke nganunge nain ngɔr. 31Loo ke sei a an-in nyange nè à undei loo teei kété titeke bè ɓaa, gar-gar sei a geri titeke Konɓee le Nube nain ngɔr ta. 32Man m’ede sei ndàt, nyange nè malang à undei loo teei kété ɓita girkoje le dooge ke ndii dè nang nè ɗarinè à gang ɗás ɓai. 33Danran se nang à udi se nel’n karè, nè tàge le’m à udi ndan lé.
Jésu ndeje dooge kade ndii kum ɔje dè ndɔ tel le’n
34Undei kumkunju dè ra si’t nè bainléa nyankuse éké nyankain ke ate se nyange gai-gai ke adi kêm dooge olé bɔt-bɔt à kadi ɓengre si wɔi darr, le kade ndɔ tel ree le’m man ke m’ee Ngonn doo nga ube sei nang bus lé. 35Ndɔ nè nga à tò tite gum ke an-in dè dooge malang ke ndii dè nang nè bere mbak king-king. 36I ndii dè nja si’t kekek. Ɔji tà se Nube dɔ-dɔ titeke bè á a ingei tɔg si le dum’n dè nyange ke à teei a, le kade i ndai garang non’m man ke m’ee Ngonn doo nga a tɔ.
Jésu ndó dooge nyan ke kété-kété kêm kei le Nube
37Jésu ndó dooge nyan se ndɔge malang kêm kei le Nube. Nè loo ke ndɔ il ɓá ɓaa, è unde loo tee aw tò dè mbal ke kage olivierge ndai tutu. 38Loo ke loo ar yerer ɓá ɓaa, kosdooge malang reei som-som rann’t le koo tà le’n.
Currently Selected:
Luc 21: GUL04
Highlight
Share
Copy
Want to have your highlights saved across all your devices? Sign up or sign in
Magtub Mann-ra ke Kige ©Alliance Biblique du Tchad, 2004