Apostelit Piniarningit 10
10
Kornêliusib sâgiarninganik.
1Angutekalaukporle Zesarêame Kornêliusemik atilingmik, sorsuktuksat ingmigolingajut Itâliamiunik taimajut zenturiunganik, (imaipok: angajoᴋâmik sorsuktuksanut 100 inut).
2Isumagidlarlune opigosulaukpok Gûdemik iglomioᴋatine ilagilugit aitûsianiglo tunijeᴋattarpok inungnut, tuksiatsainartorlo Gûdemut.
3Tâmna takotineᴋarpok uvlub stundingita 9 ingane; tagva Gûdib Engelinga itertok ômunga takovâ, tâpsoma oᴋautivâ: Kornêliuse!
4Takosarpâle ᴋoaksârlarmelo oᴋarpok: Nâlegak, sunâ? Tâpsomale oᴋautivâ: Tuksiarnitit pikungardlutik Gûdib tusarpait, aitûtitillo isumagivait.
5Mânalo angutinik tiliklerit Joppemut, Simonelo Pêtrusemik atipsâlik ᴋaiᴋojauᴋolugo;
6Simonemik atilik ᴋetumaksaijok, najorpâ, imab kiglingane iglulik; taipsoma oᴋautiniarpâtit piniaraksarnik.
7Engelelo Kornêliusemut oᴋartok aularmat, kivgaminit magguk, sorsuktuksallo najortigivaktame ilangat, Gûdemik nâlektok, ᴋaiᴋovait,
8Unipkautivlugillo tamakkoninga tamainik, Joppemullo tilivait.
9Uvlub aipangane, tâpkoa apᴋomêtilugit, iglugasaksuillo ᴋaglilermatigik, Pêtruse iglut ᴋolerpânganut majorarpok tuksiaromavlune, uvlub standingita 6 ingane.
10Kâleramelo, sumik nerrijomavok; nerᴋiksaliormatsugle, ingminik ikpigijungnairpok.
11Kilaglo angmajok takovâ, ilitjiviglo akᴋarvigijine, sorlo tingegautaksoatut, terreᴋongitigut ᴋelaksorsimajok, nunamullo ningititaujok;
12Iluanêtoᴋalaukpok sunatuinarnik nunab nergjutinginik, nujuartuniglo pâmgortuniglo, tingmitjaniglo ᴋilaub atânêtunik.
13Nipelo tâpsomunga imailivok: Pêtruse, makitit, toᴋotsilutit nerrigit.
14Pêtrusele oᴋarpok: Aukagle, Nâlegak; nerrilaunginama sule nachonartomik maᴋojungnartomiglônêt.
15Nipiblo aipânik pivâ: Gudib ivsornarungnaititangit nachonartitaksaringilatit.
16Taimaglo pingasuertorpok; ilitjiviglo ama ᴋilangmut amuartaugivok.
17Pêtrusele ilumine siaklilermat, takotitjut takolauktane ᴋanok tukeᴋarmangât, ahâk, angutit, Kornêliusib tilijangita, Simonib iglunga aperᴋotigivât, upkuablo silatâne nangerdlutik,
18Nipliavut aperivlutiglo: Simone, Pêtrusemik atipsâlik, tagvanêngmangât.
19Pêtrusible takotitaunine isumagilermago, Anernerub oᴋautivâ: Ahâk, angutit pingasut ᴋenerpâtit.
20Makitille atersârlutit ilagigikit, ᴋolarnaglo; uvanga tâpkoa tiligapkit.
21Tagva Pêtrusib angutit Kornêliusemit pijut atersârvigivait, oᴋarlunelo: Ahâk, ᴋenertase uvangauvunga; suna pivlugo tamanêkisê?
22Oᴋarpullo, Kornêliuse Zenturiôjoᴋ, angut isumagiktok Gûdemik nâlektok, Jûdit ilûnatik idluarnerartangat, Gûdemut ᴋaujititauvok Engelikut ivsornaitokut, ilingnik ᴋaikojerᴋovlugo iglominut, oᴋautsinik tusartuksauvlune ilingnit.
23Iterᴋolerpait tagva, siniktartilaitalo. Kaungmalle Pêtrusib aulaᴋatigivait, Joppemiullo ᴋatangutigêt ilangita ilagivât.
24Uvlublo aipangane Zesarêamut pivut, Kornêliusiblo utaᴋivait; ilanelo ilanârijanelo ᴋaiᴋovait.
25Pêtruselo iteriartormat, Kornêliusib pagrearpâ, pâmaklunelo itiganginut, tuksiarvigivâlo.
26Pêtrusible makitipâ oᴋarlunelo: Makitit, inutuinauvungatauk.
27Oᴋaᴋatigilauramiuglo, iterpok, unuktullo katimajut naipipait.
28Oᴋarvigivaillo: Nalungilase, idluangimat Jûdit ilangata takorngartat ilagikpagit, pulâriartorpagillônêt: Gûdible ᴋaujitilaukpânga, inuit naliallônêt taijaksaungimat nachonartomik maᴋojungnartomiglônêt.
29Tamanna pivlugo ᴋununanga tikipunga, ᴋaiᴋojaugama. Tagva mâna aperivapse, suna pitjutigilugo tamaunga ᴋaiᴋolaungmangâpsinga.
30Korneliuselo oᴋalerpok: Uvlut sitamat nâvlugit stunde tamanna tikilugo nerrilaungitunga, stundillo 9 ingane tuksialaukpunga iglumne. Ahâglo, tagva sâmne sakᴋertoᴋalaukpok angutemik ᴋeblertamik annorâlingmik.
31Oᴋarporlo: Kornêliuse, tuksiarnitit tusartauvut, aitûtitillo isumagijauvut Gûdib sângane.
32Tagva mâna Joppemut tiliklerit, Simonelo Pêtrusemik atipsâlik ᴋaiᴋojauᴋoleruk, tujormiojok Simonib ᴋetumaksaijub iglungane, imab kiglingane; taipsoma tikikune oᴋautilârpâtit.
33Tagva erinesulerdlunga tiliklerpunga ilingnut, nâmaktomiglo pivotit, tikinavit. Mâna Gûdib sângane tamapta katimavogut, tusaromavlugit Gûdib oᴋautigijauᴋojangit tamaita ilingnut.
34Pêtrusible ᴋanine angmalerpâ oᴋarlunelo: Mâna kiglilingmik tukisivunga, Gûdib inuit nalîllônêt nachogingimagit;
35Inuille sunatuinait, tâpsominga sivôrajut idluartulijullo ilaliorpait.
36Oᴋautsit taipkoa Gûdib tilikliutigilauktangit Israêlib ᴋitornganginut ᴋaujimavase, oᴋautjauᴋongmagit ulapirsaumik Jêsuse Kristusekut, ilûnatik Nâlegangatigut.
37(Kaujimavoselo) tamakkonunga Jûdêamêtut ilûnatik tikitaulaungmatta, sivorlerpâmiglo Galilêamêtut, baptijutib Johannesib oᴋautigijangata kingorngane,
38Jêsuse Nazaremiok pivlugo, Gûdib mingoalaungmago Anernermik ajunginermik pitsartunermiglo; tâmna arvertalaungmat ajungituliartorlune, inûlilaitalo ilûnaita Sâtanasemut sâlaulauktut, Gûdib najormago.
39Uvagullo kigligiutsijôvogut tâpsoma piniarnerilauktanginik Jûdit nunangane Jerusalemelo; tâmna toᴋolaukpât, nivingatipâllo ᴋejungmut.
40Gûdib tâmna tupaktilaukpâ uvluk pingajuangne, sakᴋertilâllo,
41Inungnut ilûnainu-ungitok, uvaptingnulle kigligiutsijuksanut, Gûdemut sivorngagut anerimajunut, nerreᴋatigivlugolo imeᴋatigilaukpavut, toᴋungajunit makisimaningata kingorngane.
42Oᴋâlaᴋolaukpâtigullo inungnut, kigligiutserᴋolutalo, Gûdib tâmna erᴋartuijuksangortingmago inôjuniglo toᴋungajuniglo.
43Tâmna nalautaijut ilûnatik kigligiutigivât, okpertut tâpsomunga ilûnatik tâpsoma atinganut isumangnarungnaitomik ajorninginit pilârmatta.
44Pêtruse oᴋautsinik makoninga oᴋâlatilugo sule, Anernek ajunginek ilûnainut oᴋautsinik nâlektunut pivok.
45Okpertullo kipimajut, Pêtruse ilagilugo tikilauktut, tataminiarput, Anernerub ajunginerub tunergutâ nalojunuttaukᴋ kovijaungmat.
46Tusaramigit takorngartat oᴋausinginut oᴋâlajut, Gûdelo nakoridlarlugo. Tagva Pêtruse kiovok:
47Imermik inerteriuteᴋarungnartoᴋarᴋâ, baptitauᴋonagit ukua, Anernermik ajunginermik ilangiutititaujut uvaptitût?
48Nâlekablo atinganut baptitauᴋovait. Kenuvigivât tagva uvliviojomavlutik uvlut ilanginik.
Currently Selected:
Apostelit Piniarningit 10: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.