Apostelit Piniarningit 11
11
Pêtrusib akkiniarninganik passijaunine iteriarnine Kornêliusemut pivlugo. Ilagêt Antiochiame katersortauninginik.
1Apostelille ᴋatangutigêllo Jûdêamêtut tusaumalerput, nalojuttauk Gûdib oᴋausingit ilaliulermagit.
2Pêtruselo takpaunga Jerusalemut pingmat, kipimajut (Jûdit okpertut) akkerartulerpât,
3Oᴋarlutiglo: Angutinut kipimangitunut iterpotit, nerreᴋatigivlugillo.
4Pêtrusible tamakkoninga unipkautilerpait nalakârdlugit:
5Iglugasaksoarne Joppeme-itunga, tuksiartilunga, uvamnik ikpigijungnairpunga, takovlungalo takotitjumik, ilitjivingmik akᴋartomik tingegautaksoatun-itomik, sitamanik terreᴋolingmik, ᴋilangmit ningititamik, uvamnut pivlune.
6Iluanut takosarpunga, tukisivlungalo takovunga nunab nergjutinginik, nujuartuniglo, pâmgortuniglo, ᴋilaublo tingmianginik.
7Nipemiglo tusarpunga uvamnut oᴋartomik: Pêtruse, makitit toᴋotsilutit nerrigit!
8Oᴋarpungale: Aukagle, Nâlegak; nerrilaunginama sulle nachonartunik maᴋojungnartuniglônêt.
9Nipible aipânik ᴋilangmit kiovânga: Gûdib ivsornarungnaititangit igvit nachonartitaksaringilatit.
10Taimagle pingasuertorpok; ᴋilangmullo ilûnatik ama amuartaugivut.
11Ahâglo, tagvainak angutit pingasut iglub najortama silatânêlaukput, Zesarêamit tilijaulauktut uvamnut.
12Anerneruble oᴋautivânga, ᴋolarnanga ilagijaksarigapkit. Katangutille pingasûjortut ilagivânga, angutiblo taipsoma iglunganut iterpogut.
13Taipsomalo unipkautivâtigut takolauktaminik Engelemik, iglomine nangertomik, oᴋautjiminik: Angutinik tiliklerit Joppemut, Simonelo Pêtrusemik atipsâlik ᴋaiᴋojauᴋolugo;
14Tâpsoma oᴋautiniarpâtit oᴋautsinik, ilingnut iglomioᴋatingnullo ilûnainut piloriutiksaujunik.
15Oᴋâlalertilungale Anernerub ajunginerub akᴋarvigivait, sorlo uvaptingnut perᴋârame.
16Tagva Nâlekab oᴋausingit erᴋarpakka, oᴋarmat: Johannese baptisilaukpok imermut, ilipsele baptitaujomârpose Anernermut ajunginermut.
17Gûdible ipkoa uvaptitut tunergutinik tunitjivigingmagit, okpermatta Nâlekamut Jêsuse Kristusemut, uvanga kinauvêk, Gûde inerterungnarapkô?
18Tamanna tusaramitsuk nipangerput, Gûdelo nertorpât, oᴋarlutiglo: Tagva Gûdib nalojuttauk tunitgivigilaukpait isumatârnermik inôtsemut.
19Siamartersimajulle kappiaktoanermingnut Stefanuse pivlugo arvertarput Fenîziamut, Ziprusemullo, Antiochiamullo, oᴋautsiniglo asianut oᴋangilat, Jûdinut kisênut.
20Akornganele anguteᴋalaukpok ilanginik Ziprusemit Zirênemillo pijunik. Tâpkoa Antiochiamut pigamik, Grîkittauᴋ oᴋarvigivait, oᴋautsiniglo tusarnertunik Nâlegak Jêsuse pivlugo oᴋâlavlutik.
21Nâlekablo aggangita ilagivait, unuktoksuillo okpilerput sâgiarlutiglo Nâlekamut.
22Ilagêktut Jerusalemêtut tamanna tusaumaleramitsuk, Barnabase tilivât Antiochiamut.
23Tâmna tagvunga pigame, Gûdiblo saimanersoanga misigileramiuk, ᴋuviasulerpok kaiblarlugillo tamaita pivait, ômamut ilûnânut nipingatsainarᴋovlugit Nâlekamut.
24Angut tâmna isumagiktoksôngmat, Anernermiglo ajunginermik okpernermiglo angijomik ilumertaujok. Inuillo unuktoksuit Nâlekamut pititaulerput.
25Barnabasele aularpok Tarsusemut ailune, Sauluse ᴋeneriartormilugo.
26Naipinamiuglo, Antiochiamut pitipâ. Jâremiglo iluitomik nâjivuk ilagêktune tagvane, inuillo unuktoksuit ajoᴋertorlugit; tamanna pivlugo ilinniartut Antiochiame taijauᴋâlerput Kristusemiunik.
27Uvlune taipkonane nalautaijut Jerusalemit atersârput Antiochiamut.
28Tâpkoa ilangat, Agabusemik atilik, nikovipok, nunane ilûnaine kângnartoksoaᴋaromârtomik Anernikut nalautaivlune; tamannalo nalautsivok atanivik Klaudiuse ataniotilugo.
29Iliniartulle ilûnatik kajusivut, pimingnit tujoromavlugit ajungitamingnik ᴋatangutigêt Jûdêamêtut.
30Taimailiorpullo, angajoᴋaunerojunullo tilikliutivlugit, Barnabasib Saulusiblo aggangitigut.
Currently Selected:
Apostelit Piniarningit 11: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.