Salmos 76
76
1Hi̱ˉ tä̱ä̱hˊ hwaˈ Judá kyu̱u̱ꜙ bihꜗ Dio.
Peerꜙ hiiꜘ juuˈ kiyhꜗ jeeˊ kihˈ dsaˉ Israel.
2Gwahꜙ kiyhꜗ chihꜗ jeeˊ jwɨɨˉ Jerusalén.
Sión ja̱ˉ laꜗ hø̱ø̱yˈ jeeˊ gyayˈ tä̱ä̱ꜘ.
3Jeeˊ ja̱ˉ chiˉjøøy˜ läꜙjëꜙ flecha, ñeˈ heˉ hɨɨˉ dsaˉ jeeˊ lä̱ä̱˜ hñiiꜘ, ñeˈtuuhꜚ, läꜙjëꜙ heˉ kooyh˜ jeeˊ hniiˉ.
4Peerꜙ jø̱hˈga̱a̱ˉ hneˉ Dio, hi̱ˉ chaˉ chaˉmiihˉ beꜘ kihꜗ.
Hi̱i̱ˉ tä̱ä̱ꜙ jëëꜗ jmëëꜗ kyahꜗ.
Kya̱a̱hˊ hneˉ, niꜙ miihˉ saꜙ je̱hꜙ mohꜘ kahˊga̱a̱ˉ heˉ jmeeꜙ dsa̱a̱˜ dsëꜗ dsaˉ.
5Dio gaꜙjmeeꜘ gaꜙhwë̱ë̱ˉ läꜙjë̱ë̱ꜙ hi̱ˉ chaˉ beꜘ kihꜗ,
läꜙko̱o̱ˉ heˉ naˉgwɨ̱ɨ̱yˉ baˊ gaꜙlaꜗ kiyhꜗ.
Gaꜙhwa̱a̱ꜘ gaꜙjle̱e̱hꜘ goˉte˜ kyooˉ läꜙjë̱ë̱ꜙ hi̱ˉ be̱e̱ꜘ.
6Hneˉ Dio kya̱a̱ꜗ jnäähˈ dsaˉ kya̱a̱ꜗ Jacob,
läꜙko̱o̱ˉ maˊ gaꜙjʉʉhˊ kiyhˈ,
gaꜙsa̱a̱ꜗ gaꜙja̱a̱ꜗ kyaˊjɨɨhˊ, gaꜙsa̱a̱ꜗ gaꜙja̱a̱ꜗ carro kiyhꜗ,
ja̱ˉ ji̱i̱hˈ moꜙsoꜙ gaꜙnaahꜗ gyihꜗ.
7Haˉ ko̱hꜘ saꜙ dsa̱a̱˜ dsëˉ jnäähˈ kyahꜗ,
hi̱i̱ˉ baˊ tä̱ä̱ꜙ dsaˉta̱a̱hˋ chaˊnëhˊ waˊraˉ jaꜗ lle̱e̱hꜘ.
8Läꜙ gaꜙtëꜘ gyʉʉhˈ jmɨˉgyʉʉꜙ
gaꜙmiꜙjnäähˈ haˉ läꜙ llahˈ taˊ kihꜗ dsaꜙ.
Peerꜙ gohꜙ dsaˉ hi̱ˉ tä̱ä̱hˊ hwaˈ laˉ,
heˉja̱ˉ jä̱yꜙ tiˊsɨ̱hꜘ goˉte˜.
9Läꜙja̱ˉ gaꜙlaꜗ maˊ gaꜙnoohˉ jeeˊ ñehꜘ
mahꜗ gaꜙllahˊ taˊ kihˈ hi̱ˉ hñaaˉ dsëꜗ.
Läꜙja̱ˉ gaꜙlä̱ä̱hˋ hi̱ˉ hwa̱a̱ˊ hi̱ˉ cha̱a̱ˉ hwaꜗ laˉ.
10Maꜙkeꜙ chaˉmiihˉ dsaˉläˉlle̱e̱ꜘ dsaˉ jmɨˉgyʉʉꜙ,
maꜙraꜙ heˉ nøhꜗ baˊ dsëyˈ mahꜗ häyꜗ kyahꜗ.
Maꜙkeꜙ yaˉjë̱ë̱ˈ dsëyꜗ chaˉmiihˉ,
hneˉ jmeehˈ raˉkë̱hˈ heˉ ja̱ˉ mahꜗ yaˉhɨɨˈ lluꜗ kyahꜗ.
11Miˉteehˋ hnähꜘ heˉ maˉbä̱ä̱hˋ hnähꜘ hñaahꜗ kihꜗ Dio hi̱ˉ la̱a̱ꜗ DSAˉJØ̱Ø̱Hˈ jnänˋ.
Läꜙjë̱ë̱ꜙ hnähꜘ hi̱ˉ tä̱ä̱hˊ läꜙkuˊ läꜙji̱i̱ꜗ kiyhꜗ,
yaˉka̱ˋ hnähꜘ heˉ lleˋ kihˈ hyoyhꜙ läꜙlluꜗ heˉ ga̱hꜙ jnihꜘ.
12Jëëhꜘ Dio jmeeꜙ jä̱ꜙ taꜙ hwaꜗ läꜙjë̱ë̱ꜙ hi̱ˉ jmeeꜙ hihꜙ.
Hiꜙ jø̱ø̱yh˜ läꜙjë̱ë̱ꜙ dsaˉtaˊ ka̱a̱hˊ hi̱ˉ tä̱ä̱hˊ jmɨˉgyʉʉꜙ laˉ.
Currently Selected:
Salmos 76: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.