Salmos 75
75
1Kwaˊ jnäähˈ tiˊhmaahˊ kyahˈ Dio kya̱a̱nꜙ.
Kwaˊ jnäähˈ tiˊhmaahˊ kyahˈ,
jëëhꜘ hiiꜘ juuˈ kyahꜗ gaꜙläꜙka̱a̱ˉ jeeˊ laˉ.
Läꜙjë̱ë̱ꜙ baˊ dsaˉ hlëëhꜙ kihꜗ heˉ jʉhˉga̱a̱ˉ heˉ jmeehˉ.
2Hneˉ jwahꜘ: “Waˊraˉ gaꜙtëꜘ hor˜ heˉ llaꜙ dsënꜙ,
llanˋ taˊ kya̱a̱hˊ juꜗdsooꜘ jmahꜗ baˊ.
3Maꜙkeꜙ jeh˜ hwaꜗ, maꜙkeꜙ ngaˉ lleˊ läꜙjë̱ë̱ꜙ hi̱ˉ tä̱ä̱hˊ nëˊ kihˈ,
jnäꜘ heꜘ jmeenꜙ heˉ chihꜗ ko̱o̱ˉ hwehˉ hʉʉˊ tɨɨˊ hwaˈ.
4Jwɨɨn˜ hi̱ˉ jmää˜ hñiiꜘ ka̱a̱hˊ, maˉle̱e̱ꜙ baˊ ko̱o̱ˉ naˉ.
Läꜙja̱ˉ jwɨɨn˜ hi̱ˉ hñaaˉ dsëꜗ, taꜙ jmääꜙ hnähꜘ hñaahꜗ ka̱a̱hˊ.
5Taꜙ waˊ la̱a̱hꜘ hnähꜘ heˉ chaˉ chaˉmiihˉ beꜘ kyahꜗ hnähꜘ heˉ hlëëhˊ hnähꜘ juuˈ ta̱a̱hꜗ.”
6Jëëhꜘ heˉ jmää˜ dsaˉ ka̱a̱hˊ saꜙ gwaꜘ taꜙ jeeˊ hyaˉ hyooˉ,
niꜙ taꜙ jeeˊ dsaˉhmääˋ hiꜙ niꜙ taꜙ hwaꜗ ki̱i̱ꜙ.
Dio baˊ heꜘ hi̱ˉ jmää˜ dsaˉ ka̱a̱hˊ.
7Dio baˊ heꜘ hi̱ˉ la̱a̱ꜗ jwëëꜚ, hi̱ˉ heꜘ lihꜙ jmeeꜗ jä̱ꜗ ja̱a̱ˉ jø̱ø̱hˈ
hiꜙ hi̱ˉ jñahꜘ jmeeyꜗ jä̱ꜗ kya̱a̱hˊ oˉhihꜙ.
8DSAˉJØ̱Ø̱Hˈ jnänˋ, läꜙko̱o̱ˉ heˉ naˉcho̱o̱yhˉ waˊkyaahˊ
heˉ naˉka̱hˈ jmɨhꜗ mɨˈjëhꜗ maˉä̱ä̱ˉ.
Heˉ ja̱ˉ laꜗ heˉ lliꜘwɨɨꜘ heˉ che̱e̱yꜗ nëˊ kihꜗ dsaꜙ.
Laꜗ läꜙko̱o̱ˉ heˉ hɨ̱hꜗ dsaˉ waˊraˉ jaꜗ nëˊ kiyhˈ jëëyꜗ wɨɨꜘ läꜙji̱i̱hˈ jeeˊ kwaꜙ.
Läꜙja̱ˉ leꜘ kihꜗ läꜙjë̱ë̱ꜙ hi̱ˉ hñaaˉ dsëꜗ hi̱ˉ cha̱a̱ˉ hwaꜗ laˉ.
9Pero jnäꜘ, läꜙjëꜙ jmɨɨˊ baˊ hlëëhnˊ kihˈ läꜙjëꜙ heˉ gaꜙjmeeꜘ Dio kya̱a̱ꜗ Jacob,
läꜙja̱ˉ hänˋ kiyhˈ kaˉlähꜘ.
10Dio jähꜘ: “He̱e̱nꜚ goˉte˜ beꜘ kihꜗ hi̱ˉ hñaaˉ dsëꜗ,
pero kihꜗ hi̱i̱ˉ llu̱u̱ꜗ, kwanˋ chaˉgaˊmiihˉ beꜘ.”
Currently Selected:
Salmos 75: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.