Salmos 77
77
1Ki̱ˉga̱a̱ˉ chu̱u̱nꜘ kya̱a̱hˊ Dio,
hñiiꜘ bihꜗ nuuyˉ kinꜙ.
2Jmɨɨˊ maˊ tiˉmeehˉ dsënꜙ hnaahnꜙ Dsaˉjø̱ø̱hˈ kya̱a̱nꜙ.
Taꜙlaꜙ hwëˈ saꜙ tʉn˜ choonꜙ goonꜙ kiyhꜗ.
Jmɨˉlleꜘ kinꜙ saꜙ hii˜ nøhꜗ dsëꜗ.
3Dsooh˜ dsënꜙ Dio, mahꜗ gwaꜘ kɨˊhoohnˊ.
Gwaꜘ dsaˉhwa̱a̱nꜘ maˊ jmeenꜙ hʉʉˊdsëˉ.
4Hneˉ Dsaˉjø̱ø̱hˈ kya̱a̱nꜙ, saꜙ kwahˉ jwëˈ gwɨ̱ɨ̱nꜚ.
Kihꜗ heˉ kuˈji̱i̱ꜙ kinꜙ saꜙ kwaꜗ jwëˈ hlëëhnˊ.
5Jeeˊ kya̱a̱nꜗ gwaꜘ jmeenꜙ hʉʉˊdsëˉ
haˉ läꜙ gaꜙlaꜗ jä̱ä̱ꜗ.
6Dsaˉläˉdsooh˜ dsënꜙ läꜙko̱hꜘ maˊ hänꜙ taꜙlaꜙ hwëˈ.
Heˉja̱ˉ jmeenꜙ hʉʉˊdsëˉ:
7“¿Cheˊ maˉbe̱e̱ꜗ Dio jneˊ goˉte˜?
¿Cheˊ ji̱hˊko̱hꜘ saꜙ läꜙ lluꜗ dsëyꜗ kya̱a̱hˊ jneˊ?
8¿Cheˊ maˉdsa̱a̱ꜗ heˉ läˉñihꜘ dsëyꜗ jneˊ?
¿Cheˊ maˉhe̱e̱yꜗ juuˈ kiyhꜗ heˉ gaꜙbä̱ä̱yhˉ hñiiyꜘ?
9¿Cheˊ maˉgaaꜘ dsëꜗ Dio heˉ läˉñihꜘ dsëyꜗ jneˊ?
¿Cheˊ kya̱a̱hˊ heˉ yaˉjë̱ë̱ˈ dsëyꜗ maˉjnëꜗ jwëˈ heˉ lluꜗ dsëyꜗ?”
10Peerꜙ kuˈji̱i̱ꜙ kinꜙ heˉ jmeenꜙ hʉʉˊdsëˉ,
moꜙsoꜙ jmeeꜙ Dio läꜙko̱hꜘ maˊ jmeeyꜙ jä̱ä̱ꜗ.
11Dsooh˜ baˊ dsënꜙ läꜙjëꜙ heˉ jʉhˉga̱a̱ˉ heˉ gaꜙjmeeꜘ DSAˉJØ̱Ø̱Hˈ jnänˋ jä̱ä̱ˈ.
12Jmeenꜙ hʉʉˊdsëˉ kihꜗ läꜙjëꜙ taˊ kyahˈ,
hiꜙ läꜙja̱ˉ hlëëhnˊ kihˈ läꜙjëꜙ heˉ maˉjmeehˊ.
13Hneˉ Dio, naˉjngɨɨˈ baˊ laˈ läꜙjëꜙ taˊ kyahˈ.
Haˉ gaˊ taꜙ cha̱a̱ˉ jñahꜘ dio hi̱ˉ chaˉ beꜘ kihꜗ läꜙko̱hꜘ Dio jnänˋ.
14Hneˉ la̱a̱hꜗ Dio hi̱ˉ jmeeꜙ heˉ jʉhˉga̱a̱ˉ.
Hneˉ gaꜙmiꜙjnäähˈ beꜘ kyahꜗ kihꜗ läꜙjë̱ë̱ꜙ dsaˉ.
15Kya̱a̱hˊ beꜘ kyahꜗ gaꜙlä̱ä̱hˋ dsaˉ kya̱a̱hꜗ.
Gaꜙlä̱ä̱hˋ läꜙjë̱ë̱ꜙ jo̱o̱ꜘsɨɨhˊ Jacob hiꜙ läꜙjë̱ë̱ꜙ jo̱o̱ꜘsɨɨhˊ José.
16Dio kya̱a̱nꜙ, maˊ gaꜙjë̱ë̱ꜗ jmɨˉñeehꜚ hneˉ, peerꜙ gaꜙläꜙgoyhꜙ.
Läꜙ gaꜙtëꜘ jeeˊ juuhˉ nehꜙ jmɨˉñeehꜚ gaꜙchaˊ gaꜙhlu̱hꜗ.
17Gaꜙsooˉ jniiꜘ mahꜗ gaꜙjmeeꜘ jmaꜗ.
Gaꜙhɨ̱ɨ̱ꜗ ñihꜗ hiꜙ läꜙka̱a̱ˉ baˊ gaꜙjmeeꜘ jeꜚñihꜗ.
18Gaꜙjmeehˊ gaꜙläꜙnʉʉhꜘ hɨ̱ɨ̱˜ ñihꜗ jeeˊ lleꜘ.
Gaꜙläꜙka̱a̱ˉ jmɨˉgyʉʉꜙ gaꜙläꜙjnäꜘ jeꜚñihꜗ.
Gaꜙchaˊ gaꜙhlu̱hꜗ hwaꜗ maˊ gaꜙjehꜗ.
19Gaꜙngëhˊ jwëꜘ nëˊ jmɨɨˉ.
Huꜘ jwërte jmɨɨˉ jeeˊ gaꜙkwa̱a̱hˊ.
Niꜙ ja̱a̱ˉ saꜙ gaꜙjnøhꜗ jeeˊ gaꜙheehˊ.
20Taꜙlaꜙ kihꜗ Moisé hiꜙ kya̱a̱hˊ Aarón, gaꜙjä̱ä̱hꜙ dsaˉ kya̱a̱hꜗ läꜙko̱hꜘ jä̱ä̱ꜙ dsaˉ ko̱o̱ˉ nääꜗ borrego.
Currently Selected:
Salmos 77: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.