Salmos 74
74
1¿Hneˉ Dio kya̱a̱nꜙ, heˉlaˈ maˉbe̱e̱hꜙ jnäähˈ goˉte˜?
¿Heˉlaˈ yaˉjë̱ë̱ˈ hohꜘ chaˉmiihˉ kya̱a̱hˊ jnäähˈ hi̱ˉ la̱a̱ꜗ läꜙko̱o̱ˉ borrego kya̱a̱hꜗ hi̱ˉ tä̱ä̱hˊ jeeˊ chaˉ nuuˉ?
2Miˉdsoohꜚ hohꜘ kihꜗ dsaˉ kya̱a̱hꜗ,
hi̱ˉ gaꜙlle̱e̱hˋ läꜙ maˊ toˉnëˊ.
Miˉdsoohꜚ hohꜘ dsaˉ hi̱ˉ gaꜙlä̱ä̱hˋ mahꜗ gaꜙla̱a̱yꜗ dsaˉ kya̱a̱hꜗ.
Miˉdsoohꜚ hohꜘ jeeˊ jwɨɨˉ Sión jeeˊ gaꜙnahꜘ.
3Ñaˉ daˊ mahꜗ yaˉjëëˋ haˉ jeeˊ maˉhe̱e̱ꜙ goˉte˜.
Läꜙjë̱ë̱ꜙ hi̱ˉ naˉhøøhˊ,
maˉhe̱e̱yꜗ läꜙjëꜙ heˉ chaˉ nehꜙ gwahꜙ naˉjngɨɨˈ kyahꜗ.
4Hi̱ˉ naˉhøøhˊ kyahˈ tooyh˜ mɨɨhˊ nehꜙ gwahꜙ kyahꜗ.
Gaꜙhɨɨyꜘ ko̱o̱ˉ hmɨɨhˉ jeeˊ ja̱ˉ heˉ jmeeꜙ lii˜ heˉ laꜗ kiyhꜗ.
5Gaꜙjmeeyꜘ kihꜗ gwahꜙ ja̱ˉ,
läꜙko̱hꜘ heˉ hnä˜ dsaˉ kwɨɨˋ jeeˊ chaˉ chaˉmiihˉ hmaˉ.
6Gaꜙtuꜗ gaꜙjäyꜗ heˉ jnäꜘ naˊhñaahꜗ kihꜗ gwahꜙ ja̱ˉ kya̱a̱hˊ ñeˈlähˉ.
7Gaꜙmiꜙkwa̱yhꜗ hø̱ø̱hˈ jeeˊ maˊ ñehꜘ.
Gaꜙjë̱yꜘ goˉte˜ jeeˊ maˊ laˈ gwahꜙ naˉjngɨɨˈ kyahꜗ.
8Jäyhꜘ: “Waˊ he̱e̱nˊ ko̱o̱ˉ häˊ baˊ läꜙjë̱ë̱ꜙ dsaˉ kya̱a̱ꜗ Dio.”
Heˉja̱ˉ gaꜙjë̱yꜘ läꜙjëꜙ gwahꜙ mähˉ heˉ tø̱ø̱ꜘ läꜙka̱a̱ˉ hwaꜗ kya̱a̱ꜗ jnäähˈ.
9Moꜙsoꜙ chaˉ gaˊ heˉ miˉjnääꜙ heˉ hnäähꜙ jnäähˈ Dio.
Saꜙ cha̱a̱ˉ niꜙ ja̱a̱ˉ hi̱ˉ ngëëꜗ juuˈ kya̱a̱ꜗ jnäähˈ.
Hi̱i̱ˉ gaˊ sɨɨhꜙ jnäähˈ lɨhꜘ baˊ lla̱a̱ꜙ heˉ lliꜘwɨɨꜘ laˉ.
10Dio kya̱a̱nꜙ,
¿lɨhꜘ baˊ tʉˈ hi̱ˉ naˉhøøhˊ heˉ heeyh˜ jnäähˈ wɨɨꜘ?
¿Lɨhꜘ baˊ lla̱a̱ꜙ heˉ miˉkwa̱yhꜗ hneˉ?
11¿Heˉlaˈ hiiꜘ tiiˊ goohˉ,
heˉlaˈ naˉi̱i̱hˉ kyoohˉ?
12Dio kya̱a̱nꜙ,
hneˉ la̱a̱hꜗ dsaˉtaˊ jø̱ø̱hꜗ kya̱a̱nꜙ lloꜘjooꜗ goˉte˜.
Johꜘ heˉ jʉhˉga̱a̱ˉ saꜙ maˉjmeehˊ nëˊ hwaˈ laˉ.
13Kya̱a̱hˊ beꜘ kyahꜗ gaꜙnähꜗ ko̱o̱ˉ jwëˈ nëˊ jmɨˉñeehꜚ.
Gaꜙjøøhˊ lleˊ jahꜘ hi̱ˉ la̱a̱ꜗ naˉhøøꜘ hi̱ˉ tä̱ä̱hˊ nehꜙ jmɨɨꜙ.
14Gaꜙjle̱e̱hˊ lleˊ jahꜘ la̱a̱ꜗ naˉhøøꜘ hi̱ˉ che̱e̱ˉ Leviatán.
Mahꜗ ngoꜗ kiyhꜗ gaꜙä̱ä̱hˉ jahꜘ hi̱ˉ cha̱a̱ˉ nehꜙ nuuꜙ.
15Kya̱a̱hˊ madaꜚ kyahꜗ gaꜙjmeehˊ gaꜙhyaˉ jmɨˉgwaˉ, gaꜙhyaˉ jmɨˉjʉʉhˉ.
Hiꜙ gaꜙjmeehˊ gaꜙnaꜘ ko̱o̱ˉ jwëˈ nëˊ jmɨˉjʉʉhˉ heˉ be̱e̱ꜘ.
16Kyahꜗ baˊ hneˉ laꜗ jmɨɨˈ hiꜙ läꜙja̱ˉ hwëˈ kaˉlähꜘ.
Läꜙja̱ˉ gaꜙjmeehˊ hyooˉ kya̱a̱hˊ sɨhˉ kaˉlähꜘ.
17Hneˉ gaꜙjmeehˊ hihꜙ läꜙko̱o̱ˉ kyeˉ hwaꜗ laˉ.
Gaꜙjmeehˊ ji̱i̱ˉ gyʉʉꜘ, hiꜙ gaꜙjmeehˊ ji̱i̱ˉ jmaꜗ.
18Taꜙ waˊ gaaꜘ hohꜘ kihꜗ heˉ gaꜙmiꜙkwa̱hꜗ hi̱ˉ naˉhøøhˊ heꜘ kyahꜗ hneˉ DSAˉJØ̱Ø̱Hˈ kya̱a̱nꜙ.
Ko̱o̱ˉ nääꜗ dsaˉ tooˉ gaꜙhlëëhꜘ wɨɨꜘ kyahꜗ.
19Taꜙ kwaˉ jwëˈ kihꜗ hi̱ˉ hä̱ä̱ˈ heꜘ jmeehꜙ dsaˉ kya̱a̱hꜗ hi̱ˉ la̱a̱ꜗ läꜙko̱o̱ˉ ja̱a̱ˉ bëˉ.
Taꜙ waˊ gaaꜘ hohꜘ goˉte˜ kya̱a̱ꜗ jnäähˈ hi̱ˉ jëë˜ wɨɨꜘ.
20Miˉdsoohꜚ hohꜘ heˉ gaꜙbä̱ä̱hˋ hñaahꜗ kya̱a̱ꜗ jnäähˈ.
Peerꜙ läꜙhøøꜘ laꜗ läꜙka̱a̱ˉ hwaꜗ laˉ kwa̱a̱t˜ kihꜗ hi̱ˉ hä̱ä̱ˈ heꜘ.
21Taꜙ kwaˉ jwëˈ jä̱ꜗ kya̱a̱hˊ oˉhihꜙ hi̱ˉ jëë˜ wɨɨꜘ.
Kwaˊ jwëꜗ kihꜗ hi̱ˉ täˉñeeꜘ waˊ häyꜘ kyahꜗ
hiꜙ läꜙja̱ˉ waˊ häꜘ hi̱ˉ llaˉkya̱a̱ꜗ.
22Ñaˉ Dio kya̱a̱nꜙ, nooˉ nëˊ kyahˈ,
taꜙ kwaˉ jwëˈ kihꜗ hi̱ˉ hñaaˉ dsëꜗ heꜘ llaˉdsëëyˋ hneˉ.
¿Cheˊ saꜙ jëëhꜘ läꜙjë̱ë̱ꜙ dsaˉ tooˉ,
miˉkwa̱yhꜗ hneˉ läꜙta̱a̱ˈ jmɨɨˊ?
23Taꜙ waˊ gaaꜘ hohꜘ kihꜗ hi̱ˉ naˉhøøhˊ
heˉ tooyh˜ mɨɨhˊ kya̱a̱hˊ hneˉ.
Ko̱o̱ˉ jmɨɨˊ ko̱o̱ˉ jmɨɨˊ
chaˉgaˊmiihˉ mɨɨhˊ tooh˜ hi̱ˉ cha̱a̱hˉ heꜘ.
Currently Selected:
Salmos 74: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.