Salmos 69
69
1Hneˉ Dio kya̱a̱nꜙ, lä̱ä̱ˋ jnäꜘ,
jëëhꜘ maˉchehnꜗ jeeˊ jngaanꜘ jmɨɨˉ.
2Maˉngooꜗ dsaˉhmäänˋ chaˊjmɨˉñʉʉˉ heˉ juuhˉ.
Saꜙ chaˉ jeeˊ chihnˋ tɨɨnꜙ.
Maˉtë̱ë̱nꜘ jeeˊ juuhˉ jeeˊ täꜘ hiꜙ maˉløøꜗ dsaˉä̱ä̱nꜙ.
3Peerꜙ maˉhwa̱a̱nꜘ heˉ kɨˊhoohnˊ,
läꜙji̱i̱hˈ maˉche̱e̱ꜘ tʉˊluunˋ.
Läꜙja̱ˉ maˉgyo̱o̱ˉ mɨˈnënꜙ heˉ hoohnˊ,
heˉ jø̱ø̱nˊ miˉjnääꜙ Dio hñiiꜘ.
4Jwë̱ë̱ꜘ gaˊ hi̱ˉ naˉhøøhˊ kinꜙ läꜙko̱hꜘ gaˊ jñuˉ llenꜙ,
niꜙ saꜙ chaˉ heˉ kihꜗ heˉ naˉhøøyhˊ.
Jmääy˜ hñiiyꜘ hä̱ä̱ˈ,
mahꜗ hnooyhˉ haˉ läꜙ jeeˊ jngëëyhꜗ jnäꜘ
hiꜙ niꜙ saꜙ chaˉ heˉ maˉjmeenꜗ kiyhꜗ.
Jmeeyꜙ biiꜗ miˊhmaahnˋ heˉ saꜙ maˉhɨ̱ɨ̱nꜗ.
5Hneˉ Dio kya̱a̱nꜙ,
kyu̱u̱hꜙ jnäꜘ heˉ jmeenꜙ läꜙko̱o̱ˉ ja̱a̱ˉ hi̱ˉ saꜙ kyʉʉh˜.
Saꜙ leꜘ hmänˋ dsoˊkyeˉ kinꜙ.
6Hneˉ DSAˉJØ̱Ø̱Hˈ kya̱a̱nꜙ hi̱ˉ chaˉ gaꜙläꜙjëꜙ beꜘ kihꜗ,
taꜙ waˊ jäˉ naˉhiihˊ läꜙjë̱ë̱ꜙ hi̱ˉ kye̱ˉ oˉjø̱hꜙ dsëˉ kyahꜗ kwa̱a̱t˜ kiꜙ jnäꜘ.
Hneˉ Dio kya̱a̱ꜗ jnäähꜗ dsaˉ Israel, kihꜗ hi̱ˉ hnaahˉ hneˉ,
taꜙ waˊ ka̱hˈ waˊ gwë̱hˈ hʉʉˊdsëˉ kiyhꜗ, kwa̱a̱t˜ kiꜙ jnäꜘ.
7Kihꜗ heˉ hnaanꜙ hneˉ, hlëëhꜙ dsaˉ chaˉmiihˉ wɨɨꜘ kinꜙ.
Heˉja̱ˉ naˉløøˉ baˊ moˊnënꜙ kya̱a̱hˊ oˉhihꜙ.
8Dsaˉ cha̱a̱ˉ ʉ̱ʉ̱ꜘ baˊ la̱a̱ˈ jnäꜘ kihꜗ chihˉø̱ø̱hnꜗ,
läꜙko̱o̱ˉ heˉ saꜙ kyu̱u̱yꜙ baˊ jmeeyꜙ kinꜙ.
9Ngooꜗ dsaˉlla̱a̱nꜙ
kihꜗ heˉ kye̱nˊ chaˉmiihˉ hʉʉˊdsëˉ kihꜗ hneꜗ kyahꜗ.
Heˉ hlɨɨhˈ heˉ hlëëhꜙ dsaˉ kyahꜗ maˉja˜ nëˊ kinꜙ.
10Maˊ hoohnˊ hiꜙ maˊ jngëëhnꜙ hñiinꜙ hooˊ,
miˉkwa̱hꜗ dsaˉ jnäꜘ.
11Cherˊmahꜗ gaꜙkë̱hnꜙ hmɨɨhˉ heˉ tiˉmeehˉ dsëꜗ,
läꜙjë̱ë̱ꜙ baˊ chaˉ lëëˋ kihˈ.
12Dsaˉta̱a̱yhˋ chaˊjwëꜗ jʉʉhˉ hlëëyhꜙ wɨɨꜘ kinꜙ,
läꜙji̱i̱hˈ häyꜗ kinꜙ jeeˊ tä̱ä̱yhˊ he̱e̱yꜘ.
13Pero naꜗ, chu̱u̱nꜘ kya̱a̱hˊ hneˉ DSAˉJØ̱Ø̱Hˈ kya̱a̱nꜙ,
nʉʉˉ kinꜙ läꜙlluꜗ heˉ hnaahꜙ jnäꜘ chaˉmiihˉ.
Nʉʉˉ kinꜙ jëëhꜘ hneˉ baˊ maꜙraꜙ heˉ lä̱ä̱hˊ jnäꜘ.
14Taꜙ kwaˉ jwëˈ hmähnꜗ jeeˊ tʉˊji̱i̱ꜗ,
lä̱ä̱ˋ jnäꜘ kihꜗ hi̱ˉ naˉhøøhˊ kinꜙ.
Jëëhꜘ laꜗ kinꜙ läꜙko̱hꜘ heˉ hä̱ä̱nˊ jeeˊ juuhˉ jmɨɨˉ.
15Taꜙ kwaˉ jwëˈ së̱ë̱hꜙ nëˊlaahˊ jnäꜘ.
Taꜙ kwaˉ jwëˈ kihꜗ jmɨɨˉ dsaˉji̱i̱ꜗ e̱e̱hꜙ jnäꜘ,
niꜙ heˉ tä̱hnꜙ nehꜙ jmɨˉtooˉ mahꜗ jlë̱ë̱nꜗ.
16DSAˉJØ̱Ø̱Hˈ kya̱a̱nꜙ, nʉʉˉ kinꜙ,
jëëhꜘ hneˉ la̱a̱hꜗ llu̱u̱ꜗ goˉte˜
hiꜙ chaˉmiihˉ läˉñihꜘ hohꜘ jnäꜘ.
Kwaˊ beꜘ kinꜙ läꜙlluꜗ heˉ hnaahꜙ jnäꜘ.
17Taꜙ hmäähˋ kihˈ hi̱ˉ jmeeꜙ taˊheꜗ kyahꜗ.
Nʉʉˉ kinꜙ naꜗko̱hꜘ, jëëhꜘ maˉcha̱a̱nˉ chaˉmiihˉ wɨɨꜘ.
18Ñaˉ mahꜗ yaˉlä̱ä̱ˋ jnäꜘ.
Yaˉlä̱ä̱ˋ jnäꜘ kihꜗ hi̱ˉ naˉhøøhˊ kinꜙ.
19Ñehˊ baˊ hneˉ haˉ ko̱hꜘ saꜙ miˉkwa̱hꜗ dsaˉ jnäꜘ,
hiꜙ haˉ ko̱hꜘ wɨɨꜘ saꜙ jëën˜ heˉ lleˉ dsaˉ oˉhihꜙ kinꜙ.
Ñehˊ baˊ hneˉ haˉ tä̱ä̱hˊ läꜙjë̱ë̱ꜙ hi̱ˉ naˉhøøhˊ kinꜙ.
20Maˉhwa̱a̱nꜘ kya̱a̱hˊ chaˉmiihˉ juuˈ heˉ tohˉ wɨɨꜘ.
Moꜙsoꜙ jë̱ë̱ˉ dsënꜙ hiꜙ moꜙsoꜙ chaˉ beꜘ kinꜙ.
Maˊ jä̱ä̱ˊ gaˊ jnäꜘ hi̱i̱ˉ maˊ läˉñihꜘ dsëꜗ kinꜙ,
pero saꜙ gaꜙläꜙcha̱a̱ꜙ niꜙ ja̱a̱ˉ.
Maˊ jä̱ä̱ˊ gaˊ jnäꜘ hi̱i̱ˉ maˊ jmeeˈ maˉnøhꜗ dsënꜙ,
niꜙ läꜙja̱ˉ saꜙ gaꜙläꜙcha̱a̱ꜙ.
21Nehꜙ maꜗ kinꜙ gaꜙtooyhˉ heˉ llihꜗchahꜙ.
Läꜙko̱o̱ˉ maˊ jaˈ läˉki̱i̱ˉ dsënꜙ,
jmɨˉji̱i̱hˉ baˊ gaꜙkwëëyhꜗ jnäꜘ gaꜙhuhnꜗ.
22Läꜙjëꜙ heˉ täähˊ nëˊ mes˜ kiyhꜗ,
waˊ liiꜙ heˉ ja̱ˉ läꜙko̱hꜘ cheꜘ kiyhꜗ.
Läꜙjëꜙ heˉ laꜗ lluꜗ kiyhꜗ, waˊ liiꜙ heˉ ja̱ˉ läꜙko̱hꜘ läꜘ.
23Jmeeˊ waˊ jä̱yꜘ tʉʉˊ mahꜗ saꜙ jëëyꜗ.
Jmeeˊ waˊ jlu̱u̱ˈ chaˊkaayhˊ.
24Waˊ yaˉjë̱ë̱ˈ hohꜘ kya̱a̱yhˊ.
Jmeeˊ jäꜙ nëˊ kiyhˈ heˉ lle̱e̱hꜘ kya̱a̱yhˊ.
25Waˊ liiꜙ hwaꜗ ki̱i̱ꜙ jeeˊ tä̱ä̱yhˊ.
Niꜙ ja̱a̱ˉ saꜙ waˊ dsaˉta̱a̱hˋ chaˊnehꜙ kiyhꜗ.
26Jëëhꜘ gaꜙnääꜗ bihꜗ cha̱a̱yˈ kaahˋ kihˈ hi̱ˉ maˉheehˋ wɨɨꜘ.
Läꜙja̱ˉ gaꜙnääꜗ bihꜗ jmeeyꜙ ji̱i̱ꜙ chaˉgaˊmiihˉ kihꜗ hi̱ˉ maˉjmäähˋ dsooˊ.
27Jmeeˊ waˊ dsaˉji̱i̱h˜ kiyhꜗ chaˉgaˊmiihˉ heˉ hlɨɨhˈ.
Niꜙ moꜙtoꜙ ko̱o̱hꜘ hohꜘ kiyhꜗ.
28Cheꜗ jmɨɨˉ kiyhꜗ jeeˊ naˉsɨɨˉ jmɨɨˉ kihꜗ hi̱ˉ naˊji̱i̱hꜙ.
Hiꜙ nëˊ moˊjeˉ jeeˊ naˉsɨɨˉ jmɨɨˉ kihꜗ hi̱ˉ llu̱u̱ꜗ,
moꜙtoꜙ llaˉlleꜚ jmɨɨˉ kiyhꜗ.
29Pero jnäꜘ hi̱ˉ dsaahˊ hi̱ˉ jëë˜ wɨɨꜘ,
cha̱a̱hˋ jnäꜘ mahꜗ lä̱ä̱ˋ jnäꜘ, hneˉ Dio kya̱a̱nꜙ.
30Kya̱a̱hˊ su̱ꜚ hänˋ kihˈ Dio,
jmeenˋ jʉʉhˉ kiyhꜗ jeeˊ hänˋ kiyhˈ.
31Tɨhꜗ gaˊ dsëˈ Dio heˉ hänˋ,
läꜙko̱hꜘ gaˊ heˉ kwa̱a̱nꜚ ja̱a̱ˉ kyaˊtehˈ.
Tɨhꜗ gaˊ dsëyˈ heˉ hänˋ kiyhˈ,
läꜙko̱hꜘ gaˊ heˉ kwa̱a̱nꜚ ja̱a̱ˉ gyʉ̱ʉ̱ˉ kyaˊ hi̱ˉ maˉä̱ä̱ˉ.
32Peerꜙ jë̱ë̱ꜘ dsëꜗ hi̱ˉ täˉñeeꜘ
waˊraˉ gaꜙjëëyꜗ läꜙjëꜙ heˉ jmeeꜙ Dio.
Läꜙja̱ˉ nøhꜗ dsëꜗ läꜙjë̱ë̱ꜙ hi̱ˉ hnaahˉ Dio.
33Jëëhꜘ nuuˉ baˊ DSAˉJØ̱Ø̱Hˈ jnänˋ kihꜗ läꜙjë̱ë̱ꜙ hi̱ˉ täˉñeeꜘ,
hiꜙ saꜙ jmääy˜ taꜙ kooꜘ hi̱ˉ tä̱ä̱hˊ nehꜙñeˈ.
34Häˊ hnähꜘ kiyhꜗ, hnähꜘ hi̱ˉ tä̱ä̱hˊ gyʉʉhˈ hwaꜗ.
Hiꜙ läꜙja̱ˉ waˊ häꜘ hi̱ˉ gaˊ tä̱ä̱hˊ kihꜗ jmɨˉñeehꜚ.
35Jëëhꜘ Dio lä̱ä̱ꜗ hi̱ˉ tä̱ä̱hˊ jwɨɨˉ Sión, mahꜗ jmeeyhꜗ kaˉlähꜘ läꜙhmëëꜘ läꜙjëꜙ jeeˊ jwɨɨˉ kihꜗ Judá.
Dsaˉta̱a̱yhˋ jeeˊ ja̱ˉ hiꜙ leꜘ he̱e̱yꜚ kaˉlähꜘ.
36Jo̱o̱ꜘ hi̱ˉ heꜘ të̱ë̱ꜗ dsaˉta̱a̱hˋ jeeˊ jwɨɨˉ ja̱ˉ.
Läꜙjë̱ë̱ꜙ hi̱ˉ hnaahˉ Dio dsaˉta̱a̱hˋ jeeˊ ja̱ˉ.
Currently Selected:
Salmos 69: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.