Salmos 68
68
1Hneˉ Dio kya̱a̱nꜙ, nooˉ mahꜗ waˊ llaˉnääyꜘ taꜙ laꜙ taꜙ jnøꜙ läꜙjë̱ë̱ꜙ hi̱ˉ naˉhøøhˊ kyahꜗ.
Waˊ kyʉ̱ʉ̱yˈ ʉ̱ʉ̱ꜘ kyahꜗ läꜙjë̱ë̱ꜙ hi̱ˉ saꜙ hnääꜗ hneˉ.
2Läꜙko̱hꜘ dsaˉä̱ä̱hꜗ ñeˊ jeeˊ lleꜘ, läꜙja̱ˉ waˊ lla̱a̱ˉ hi̱ˉ heꜘ.
Läꜙko̱hꜘ sër˜ heˉ dsaˉjo̱o̱ꜗ kya̱a̱hˊ jeˉ,
läꜙja̱ˉ waˊ leꜘ kihꜗ hi̱ˉ hñaaˉ dsëꜗ heꜘ.
3Pero hi̱ˉ llu̱u̱ꜗ läˉcha̱a̱ˉ lluꜗ, hiꜙ jë̱ë̱ˉ dsëyꜗ chaˊnëˊ Dio.
Hë̱ë̱ꜙdsa̱yꜙ kihꜗ heˉ jë̱ë̱ˉ dsëyꜗ.
4Häˊ hnähꜘ kihꜗ Dio, häˊ hnähꜘ kiyhꜗ kya̱a̱hˊ su̱ꜚ.
Häˊ hnähꜘ kihꜗ hi̱ˉ ngëꜙ nëˊ jniiꜘ.
Hi̱ˉ heꜘ heꜘ DSAˉJØ̱Ø̱Hˈ jnänˋ, waˊ jë̱ë̱ˉ hohꜘ hnähꜘ.
5Dio hi̱ˉ gyaꜗ nehꜙ gwahꜙ naˉjngɨɨˈ kihꜗ,
hi̱ˉ heꜘ la̱a̱ꜗ dsaˉ jʉʉˊ hi̱ˉ hnɨɨꜘ,
läꜙja̱ˉ cheyhꜗ nëˊ kihˈ dsaˉmëꜘ hnɨɨꜘ.
6Hi̱ˉ tä̱ä̱hˊ hñiiꜘ, Dio kwëëyh˜ jeeˊ dsaˉta̱a̱yhˋ
hiꜙ lä̱ä̱y˜ hi̱ˉ tä̱ä̱hˊ nehꜙñeˈ mahꜗ kwëëyh˜ oˉjø̱hꜙ dsëˉ.
Pero hi̱ˉ cha̱a̱hˉ gaꜙnääꜗ bihꜗ hwaꜗ ki̱i̱ꜙ
jeeˊ lliiꜘ jwërte hyooˉ.
7Hneˉ Dio kya̱a̱nꜙ,
maˊ gaꜙjä̱ä̱hꜙ dsaˉ kya̱a̱hꜗ taꜙ hwaꜗ ki̱i̱ꜙ,
8gaꜙjehꜗ hwaꜗ, gaꜙhɨɨꜘ jmaꜗ, gaꜙhi̱i̱ˊ gooˉ mohꜘ Sinaí jeeˊ maˊ chehˈ hneˉ, Dio kya̱a̱ꜗ dsaˉ Israel.
9Hneˉ Dio kya̱a̱nꜙ, gaꜙjmeehˊ gwaꜘ jmaꜗ,
mahꜗ dsaˉtɨhꜗ beꜘ kihꜗ hwaꜗ.
10Jeeˊ ja̱ˉ gaꜙta̱a̱hˋ dsaˉ kya̱a̱hꜗ, hneˉ Dio kya̱a̱nꜙ.
Kihꜗ heˉ lluꜗ hohꜘ,
gaꜙkwëëhˋ hi̱ˉ täˉñeeꜘ heˉ jmeeꜙ biiꜗ kiyhꜗ.
11Dsaˉjø̱ø̱hˈ jnänˋ maˊ kwaꜙ juuˈ.
Maˊ cha̱a̱ˉ jwë̱ꜘhlä̱ä̱ꜘ dsaˉmëꜘ hi̱ˉ maˊ kwaꜙ juˈhmëëꜘ.
12Gaꜙkyʉ̱ʉ̱ꜗ läꜙjë̱ë̱ꜙ dsaˉtaˊ ka̱a̱hˊ hi̱ˉ maˊ jmeeꜙ hihꜙ,
läꜙkye̱ˉ hløøꜘ kya̱a̱yꜗ gaꜙkyʉ̱ʉ̱ꜗ
Dsaˉmëꜘ hi̱ˉ tä̱ä̱hˊ chaˊnehꜙ, gaꜙtiꜗ gaꜙllooyhꜗ
läꜙjëꜙ heˉ gaꜙhwëëyꜗ kihꜗ hi̱ˉ naˉhøøhˊ kiyhˈ.
13Dsaˉmëꜘ heꜘ gaꜙjmääyhˉ hñiiyꜘ kya̱a̱hˊ ñeˈtøøˉ ñeˈnøøꜚ,
heˉja̱ˉ maˊ jnä̱ä̱yꜘ läꜙko̱o̱ˉ kyooꜘ juuˉ heˉ naˉchʉh˜ ñeˈtøøˉ ñeˈnøøꜚ.
14Hi̱ˉ chaˉ gaꜙläꜙjëꜙ beꜘ kihꜗ, gaꜙjmeeyꜘ gaꜙkyʉ̱ʉ̱ꜗ
taꜙ laꜙ taꜙ jnøꜙ hi̱ˉ maˊ jmeeꜙ hihꜙ hwaꜗ laˉ.
Gaꜙsa̱a̱ꜘ gaꜙjñeeꜘ hi̱ˉ heꜘ
läꜙko̱hꜘ dsaˉsaaꜘ dsaˉjñeeꜘ jwɨˊhmooˉ mohꜘ Salmón.
15Mohꜘ Basán baˊ laˈ mohꜘ kihꜗ Dio.
¡Heˉ baˊ cheˉ ñiiꜘ mohꜘ heˉ chihꜗ Basán!
16¿Heˉlaˈ wɨɨꜘ hohꜘ mohꜘ ñiiꜘ kihꜗ mohꜘ Sión jeeˊ gaꜙtɨhꜗ dsëꜗ Dio gyaꜙ?
Dsooꜘ baˊ gyaꜙ DSAˉJØ̱Ø̱Hˈ jnänˋ tä̱ä̱ꜘ jeeˊ ja̱ˉ.
17Kihꜗ Dio chaˉ carro heˉ saꜙ të̱ˊdsë̱ë̱ꜗ jneˊ henˊ.
Läꜙ gaꜙtëꜘ Sinaí ja̱hꜗ Dsaˉjø̱ø̱hˈ jnänˋ taꜙ gwahꜙ kihꜗ kya̱a̱hˊ carro kihꜗ hniiˉ.
18Hneˉ Dio kya̱a̱nꜙ, gaꜙwɨɨhꜘ mohꜘ ñiiꜘ ja̱ˉ
teehˊ hi̱ˉ maˉlë̱ë̱hꜙ jeeˊ hniiˉ,
gaꜙki̱i̱hˈ läꜙjëꜙ heˉ gaꜙkwaꜘ dsaˉ
hiꜙ läꜙjëꜙ heˉ gaꜙkwaꜘ hi̱ˉ cha̱a̱hˉ.
19¡Heˉ baˊ cheˉ jø̱hˈga̱a̱ˉ Dio hi̱ˉ kwaꜙ beꜘ jnänˋ!
Ko̱o̱ˉ jmɨɨˊ ko̱o̱ˉ jmɨɨˊ kwayꜙ beꜘ läꜙ maˊ hiiˉ løøˈ jnänˋ mahꜗ lä̱ä̱y˜ jneˊ.
20Dio jnänˋ, la̱a̱ꜗ Dio hi̱ˉ lä̱ä̱˜ jneˊ.
DSAˉJØ̱Ø̱Hˈ jnänˋ baˊ lihꜙ lä̱ä̱ꜗ jneˊ mahꜗ saꜙ ju̱u̱ꜘ jneˊ.
21Dio jle̱e̱yhꜗ lleˊ hi̱ˉ naˉhøøhˊ kiyhˈ,
läꜙja̱ˉ jle̱e̱yhꜗ lleˊ hi̱ˉ gaꜙnääˊ jmeeꜙ dsoˊkyeˉ.
22Dsaˉjø̱ø̱hˈ jnänˋ gaꜙjähꜘ:
“Hwë̱ë̱nˊ hnähꜘ Basán,
läꜙja̱ˉ hwë̱ë̱nˊ hnähꜘ läꜙ gaꜙtëꜘ jeeˊ juuhˉ jmɨˉñeehꜚ
mahꜗ yaˉnäähˊ hnähꜘ,
23mahꜗ ngëëhꜘ hnähꜘ jwëꜘ nëˊ jmaˉ kihꜗ hi̱ˉ naˉhøøhˊ kyahˈ,
läꜙji̱i̱hˈ dsɨɨˉ kya̱a̱hꜗ hɨ̱hꜗ jmaˉ kiyhꜗ.”
24Hneˉ Dio kya̱a̱nꜙ, hneˉ hi̱ˉ la̱a̱ꜗ Dsaˉtaˊ jø̱ø̱hˈ kya̱a̱nꜙ.
Maˉjëënꜗ gaꜙnääꜗ dsaˉ lleˉ jwëꜗ taꜙ jeeˊ chihˈ gwahꜙ kyahꜗ.
25Taꜙ chaˊnëˊ gaꜙnääꜗ hi̱ˉ häꜙ, hiꜙ kaahˋ cha̱a̱ˈ tëꜙ.
To̱ꜗdsaahˋ jeeˊ ja̱ˉ maˊ tä̱ä̱hˊ chihˉmëꜘ hi̱ˉ kooh˜ pandero.
26Jeeˊ dsaˉñeehꜙ hnähꜘ, jmeeˊ hnähꜘ jʉʉhˉ kihꜗ Dio.
Läꜙjë̱ë̱ꜙ hnähꜘ dsaˉ Israel,
jmeeˊ hnähꜘ jʉʉhˉ kihꜗ DSAˉJØ̱Ø̱Hˈ jnänˋ.
27Toˉnëˊ gaꜙnääꜘ saˊju̱ˉ kihꜗ Benjamín hi̱ˉ mähꜗ gaˊ,
kaahˋ kiyhˈ gaꜙnääꜘ dsaˉtaˊ ka̱a̱hˊ kya̱a̱ˈ Judá,
läꜙja̱ˉ hi̱ˉ kya̱a̱ꜗ Zabulón, hiꜙ hi̱ˉ kya̱a̱ꜗ Neftalí.
28Hneˉ Dio kya̱a̱nꜙ, miˉjnääˈ beꜘ kyahꜗ.
Miˉjnääˈ kaˉlähꜘ beꜘ kyahꜗ läꜙko̱hꜘ gaꜙjmeehˊ jä̱ä̱ˈ.
29Taꜙ Jerusalén jeeˊ chihˈ gwahꜙ kyahꜗ,
dsaˉnääꜗ dsaˉtaˊ ka̱a̱hˊ dsaˉka̱yꜙ heˉ chaˉ kiyhꜗ
mahꜗ kwëëyhꜗ hneˉ.
30Jʉʉhˊ kihˈ hi̱ˉ la̱a̱ꜗ läꜙko̱hꜘ jahꜘ hi̱ˉ la̱a̱ꜗ naˉhøøꜘ.
Jʉʉhˊ kihˈ hi̱ˉ la̱a̱ꜗ läꜙko̱hꜘ kyaˊ dsooˈ läꜙji̱i̱hˈ ju̱yhꜗ jnëyˊ chaˊnëhˊ.
Mahꜗ kwëëyhꜗ hneˉ miihˉ heˉ chaˉ kiyhꜗ.
Hëëꜙ taꜙ laꜙ taꜙ jnøꜙ kihꜗ hi̱ˉ hnoohˉ hniiˉ kya̱a̱hˊ dsaˉ.
31Ja̱ˉgaˊ naꜙ yaˉnääꜘ dsaˉka̱a̱hˊ hi̱ˉ cha̱a̱ˉ Egipto.
Hiꜙ hi̱ˉ cha̱a̱ˉ Etiopía chooꜗ gooˉ kihꜗ Dio.
32Hnähꜘ hi̱ˉ jmeeꜙ hihꜙ nëˊ hwaˈ laˉ, häˊ hnähꜘ kihꜗ Dio,
häˊ hnähꜘ kihꜗ Dsaˉjø̱ø̱hˈ jnänˋ.
33Häˊ hnähꜘ kihꜗ hi̱ˉ gyaꜗ gyʉʉhˈ jmɨˉgyʉʉꜙ,
heˉ nøøꜘ kihꜗ lloꜘjooꜗ.
Nʉʉˉ hnähꜘ haˉ läꜙ nʉʉhꜘ lleyꜚ, lleyꜚ heˉ be̱e̱ꜘ chaˉmiihˉ.
34Waˊ läꜙkyu̱u̱h˜ hnähꜘ haˉ läꜙ laꜗ beꜘ kihꜗ Dio.
Haˉ ko̱hꜘ saꜙ jnaahˈ heˉ maˉjmeeyꜘ jnänˋ dsaˉ Israel.
Beꜘ kiyhꜗ jʉʉhˉ läꜙko̱hꜘ gyʉʉhˈ jmɨˉgyʉʉꜙ.
35Peerꜙ dsa̱a̱˜ dsëˉ jnäähˈ kyahꜗ hneˉ Dio
hi̱ˉ gyaꜗ gwahꜙ naˉjngɨɨˈ.
Dio kya̱a̱ꜗ dsaˉ Israel, hi̱ˉ heꜘ kwaꜙ beꜘ kihꜗ dsaˉ kya̱a̱ꜗ.
¡Peerꜙ jø̱hˈga̱a̱ˉ Dio!
Currently Selected:
Salmos 68: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.