Salmos 46
46
1Ja̱a̱ˉ Dio baˊ hi̱ˉ chehꜗ nëˊ hi̱ˉ kwaꜙ beꜘ jnänˋ.
Cha̱hꜘ baˊ jë̱ë̱y˜ jneˊ maˊ jëëˉ jneˊ wɨɨꜘ.
2Heˉja̱ˉ saꜙ chaˉ heˉ kihꜗ läꜙga̱hꜗ jneˊ maꜙkeꜙ jeh˜ hwaꜗ,
maꜙkeꜙ gaꜙhmäähꜗ mohꜘ taꜙ nehꜙ jmɨɨꜙ,
3maꜙkeꜙ hi̱i̱ˊ ja̱a̱ꜙ ki̱i̱ˉ jmɨˉñeehꜚ maˊ chaˉhlu̱hꜙ,
hiꜙ läꜙkye̱ˉ mohꜘ jeh˜ kihꜗ heˉ hä̱ä̱ˈ jwërte.
4Chaˉ ko̱o̱ˉ jmɨˉjʉʉhˉ
heˉ jmeeꜙ jë̱ë̱ˉ dsëꜗ jeeˊ jwɨɨˉ kihꜗ Dio,
ja̱ˉbaˊ jeeˊ jwɨɨˉ heˉ naˉjngɨɨˈ
jeeˊ gyaˈ hi̱ˉ jø̱ø̱hˈ kihꜗ jeeˊ läꜙjë̱ë̱ꜙ.
5Dio gyaꜗ jeeˊ jwɨɨˉ ja̱ˉ, niꜙ miihˉ saꜙ chaˉ heˉ leꜘ kihꜗ.
Dio løø˜ kwaꜙ beꜘ kihꜗ taꜙlaꜙ tiih˜,
läꜙja̱ˉ jmeeyꜗ läꜙjëꜙ jmɨɨˊ baˊ.
6Jeeˊ chaˉ hniiˉ kihꜗ läꜙjë̱ë̱ꜙ nääꜗ dsaˉ,
maˊ gaꜙläꜙnʉʉhꜘ lleꜚ Dio,
gaꜙläꜙjë̱ë̱ꜙ baˊ gaꜙsa̱a̱ꜗ gaꜙja̱a̱ꜗ hwaꜗ.
7DSAˉJØ̱Ø̱Hˈ jnänˋ hi̱ˉ chaˉ gaꜙläꜙjëꜙ beꜘ kihꜗ
chehꜗ kya̱a̱hˊ jneˊ.
Dio kya̱a̱ꜗ Jacob hi̱ˉ kwaꜙ jeeˊ dsaˊtoohnˊ.
8Yaˉnääꜘ hnähꜘ yaˉjëëˋ haˉ läꜙ laꜗ heˉ jmeeꜙ DSAˉJØ̱Ø̱Hˈ jnänˋ.
Jëëˋ daˊ haˉ läꜙ che̱e̱yꜙ heˉ wɨɨꜘ nëˊ kihˈ dsaˉ jmɨˉgyʉʉꜙ.
9Miˉlla̱a̱yꜙ hniiˉ läꜙka̱a̱ˉ jmɨˉgyʉʉꜙ.
Chʉˉjøøy˜ flecha kihꜗ dsaꜙ, jmeeyꜙ jwɨˊdsuhꜗ ñeˈchʉ̱ʉ̱hˉ
hiꜙ jë̱yˉ goˉte˜ carro kihꜗ hniiˉ.
10Tiiˊ goˉta̱a̱hˊ hnähꜘ
mahꜗ läˉñehˊ hnähꜘ jnäꜘ heꜘ la̱a̱nꜗ Dio.
Jnäꜘ heꜘ la̱a̱nꜗ jø̱ø̱hˈ kihꜗ läꜙka̱a̱ˉ läꜙjʉhꜗ jmɨˉgyʉʉꜙ.
11Dio jʉʉˊ hløøꜘ chehꜗ kya̱a̱hˊ jneˊ,
Dio kya̱a̱ꜗ Jacob hi̱ˉ kwaꜙ jeeˊ dsaˊtoohnˊ.
Currently Selected:
Salmos 46: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.