Salmos 45
45
1Naˉka̱hˈ baˊ juuˈ lluꜗ tuhˉdsënꜙ.
Hänˋ kihꜗ dsaˉtaˊ jø̱ø̱hˈ kya̱a̱nꜙ ko̱o̱ˉ su̱ꜚ.
Johꜘ juuˈ heˉ saꜙ hwëëˉ hoonꜙ,
laꜗ läꜙko̱o̱ˉ hi̱ˉ kyʉʉh˜ sɨɨꜗ chaˉmiihˉ.
2Hneˉ la̱a̱hꜗ naˊhñaahꜗ kihꜗ jeeˊ läꜙjë̱ë̱ꜙ dsaˉñʉʉhˉ.
Juuˈ lluꜗ jmahꜗ baˊ hwëëˉ hoohˊ,
heˉja̱ˉ Dio miˉjä̱ä̱ꜗ hneˉ tä̱ä̱ꜘ baˊ.
3Hneˉ hi̱ˉ be̱e̱ꜘ, llaˉnaahꜚ hñaahˈ ñeˈ kyahꜗ.
Miˉjnääˈ haˉ ko̱hꜘ jø̱ø̱hˈ saꜙ la̱a̱hꜗ
hiꜙ haˉ ko̱hꜘ saꜙ la̱a̱hꜗ naˊhñaahꜗ.
4Läꜙ maˉla̱a̱hꜗ naˉ jø̱ø̱hˈ, gwaꜘ goˉllaˊdsëëhˋ kihˈ läꜙjë̱ë̱ꜙ.
Nooˉ nëˊ kihˈ juˈdsooꜘ,
nooˉ nëˊ kihˈ hi̱ˉ hwa̱a̱ˊ hiꜙ kihꜗ juuˈ lluꜗ jmahꜗ.
Miˉjnääˈ chaˉmiihˉ heˉ jʉhˉga̱a̱ˉ.
5Flecha chʉ̱ʉ̱hˉ kyahꜗ,
dsaˉhiihˋ nehꜙ tuhˉdsëꜗ läꜙjë̱ë̱ꜙ hi̱ˉ naˉhøøhˊ kyahˈ.
Hiꜙ gaꜙläꜙjë̱ë̱ꜙ baˊ sa̱ˊja̱a̱ꜗ hʉʉˊ tɨɨhˊ.
6Dio kya̱a̱nꜙ, läꜙjëꜙ johꜘ jmɨɨˊ chaˉ baˊ jmeehˉ hihꜙ.
Hiꜙ jmeehˉ hihꜙ kya̱a̱hˊ juꜗdsooꜘ jmahꜗ.
7Heˉ lluꜗ jmahꜗ baˊ hnoohꜘ,
hneˉ saꜙ hnoohꜘ goˉte˜ heˉ hlɨɨhˈ.
Heˉja̱ˉ hñiiꜘ Dio, hi̱ˉ la̱a̱ꜗ Dio kya̱a̱hꜗ,
hi̱ˉ heꜘ gaꜙhñaaꜗ hneˉ.
Läꜙja̱ˉ gaꜙjmeeyꜘ jë̱ë̱ˉ hohꜘ chaˉgaˊmiihˉ
läꜙko̱hꜘ gaˊ läꜙjë̱ë̱ꜙ dsaˉkya̱a̱hˊ.
8Läꜙka̱a̱ˉ hmɨɨhˉ kyahꜗ hɨɨˉ miˉjwɨɨˉ mirra, áloe,
hiꜙ hɨɨˉ miˉjwɨɨˉ kyahˈhmaˉ.
Jmeeyꜗ läꜙcha̱a̱hˉ lluꜗ, jmeeyꜗ jmɨɨˊ kyahˈ kya̱a̱hˊ tu̱ˉ
jeeˊ chihˈ hneꜗ jʉʉhˉ heˉ naˉlɨɨˊ kya̱a̱hˊ ja̱ˊ chʉ̱ʉ̱hˉ jahꜘ.
9Jeeˊ kihˈ dsaˉmëꜘ hi̱ˉ tä̱ä̱hˊ kyahˈ
cha̱a̱ˉ hi̱ˉ la̱a̱ꜗ jo̱o̱ꜘmɨɨꜚ dsaˉtaˊ ka̱a̱hˊ.
Jwooˈ raˉllu̱u̱ꜗ kyahꜗ gyaꜗ ja̱a̱ˉ dsaˉmëꜘ hi̱ˉ jø̱ø̱hˈ kihꜗ jeeˊ läꜙjë̱ë̱ꜙ hi̱ˉ naˉlë̱ë̱ˊ kya̱a̱hˊ kuˊnøøꜚ heˉ hmoohˈ.
10Nʉʉˉ kweeˉ gyʉ̱ʉ̱ˉ mëꜘ kya̱a̱nꜙ, läꜙjëꜙ heˉ jwë̱ë̱hn˜ hneˉ.
Miˉgaaꜘ hohꜘ jeeˊ jwɨɨˉ kyahꜗ
hiꜙ kihꜗ läꜙjë̱ë̱ꜙ hi̱ˉ cha̱a̱ˉ kyahꜗ.
11Jëëhꜘ dsaˉtaˊ jø̱ø̱hˈ tɨhꜗ dsëꜗ heˉ jnä̱ä̱hꜘ naˊhñaahꜗ.
Nʉʉˉ kiyhꜗ, jëëhꜘ hi̱ˉ heꜘ baˊ la̱a̱ˈ dsaˉjø̱ø̱hˈ kya̱a̱hꜗ.
12Jäꜙ dsaˉmëꜘ hi̱ˉ cha̱a̱ˉ Tiro, kye̱yˉ heˉ kwëëyhꜗ hneˉ.
Hiꜙ läꜙjë̱ë̱ꜙ hi̱ˉ chaˉ chaˉmiihˉ kuuˊ kihˈ jeeˊ jwɨɨˉ ja̱ˉ
hnooyhˉ haˉ läꜙ jeeˊ tɨhˈ hohꜘ hneˉ.
13Dsaˉmëꜘ hi̱ˉ la̱a̱ꜗ kya̱a̱ꜗ dsaˉtaˊ jø̱ø̱hꜗ,
peerꜙ naˊhñaahꜗ jnä̱ä̱yꜘ.
Chaˊhooˊ saˊjuuyꜗ naˉbeh˜ ñeˈnøøꜚ jmahꜗ.
14Naˉkye̱yhˉ hmɨɨhˉ naˉlaꜚ leˈ
dsaˉjä̱ä̱yꜙ chaˊnëˊ dsaˉtaˊ jø̱ø̱hꜗ.
Chihˉmëꜘ dsaˉkya̱a̱yhˊ cha̱a̱ˈ kaahˋ kiyhˈ
läꜙ gaꜙtëꜘ jeeˊ gyaˈ rey.
15Gaꜙnääyꜗ jë̱ë̱ˉ dsëyꜗ chaˉmiihˉ,
cha̱a̱yˉ lluꜗ dsaˉta̱a̱yhˋ nëˊtaˊ kihˈ dsaˉtaˊ jø̱ø̱hꜗ.
16Lloo˜ ko̱o̱ˉ jmɨɨˊ,
chihˉ kya̱a̱hꜗ ko̱o̱ꜙ nëˊ kihˈ dsaˉ maˉgyu̱hˉ kya̱a̱hꜗ,
le̱e̱yꜘ dsaˉtaˊ hi̱ˉ jmeeꜗ hihꜙ kihꜗ läꜙka̱a̱ˉ jmɨˉgyʉʉꜙ.
17Jnäꜘ jmeenˋ läꜙdsooh˜ dsëꜗ dsaˉ kyahꜗ,
dsaˉ hi̱ˉ ja̱ˉgaˊ läˉcha̱a̱ˉ.
Hiꜙ läꜙja̱ˉ häꜗ dsaˉ kyahꜗ gaꜙläꜙjëꜙ johꜘ jmɨɨˊ chaˉ.
Currently Selected:
Salmos 45: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.