Mateo 25
25
Utsi chiacbimbuen chido 10ted icquid chiaid
1Adshumbic Esusën utsi chiacbimbuen chuiquin Nuquin Papan namiacnouësh abi chote uëshë tantienquio icte chuipondash: Tantia. Mibitedi chuinu. Chidon dadan bedabicquido 10tedshun: Aton chido bedtanec choquid bëquedtannu, queshun aton tabote bëchin taboadquid icbo icbuen buannuen sanambededposh.#25.1 Nuquin Papan cun matses caidon isadaidbon nacpadombuen chido bednuequid aton chido bedtanec inchëshëmbi chosho aton matsesën bëquedtanquid. Bëquedtanec choash shubun puduedash cuishonquec aidbëd pec tabadquid, quequin tantiaquin Esusën nëid chuipanëdash. 2Aid chidobo 5ted tantienquio icquido icnubi 5tedbidi bëdambuen tantiaquido icposh. 3Tantienquio icquidon tabote bëchi naimëdsho cushtonon buanambobi bëchi uesadbudtsaidi sananquin caimposh. 4Padnuen bëdambuen tantiaquidon: Naimëdsho cushtono, queshun tabotebëta sedunten bëchi cushtoaid sananquin caimposh. 5Aden cainaqui: Chido bedtannu, quianec nidbued choenquio icsho isash abitedi ushcastoash ushtocuededposh.
6Adshumbic inchësh poctsenquio cuëntuidsho tantiashun: Choeque. Baded bëquednu nid, caquien isucunshun bëdambuen tantiaquidon ambi bëbued bëchi cushtonobien 7isucunshun chido utsibon tabonoen tabote nacnembededposh. 8Icsambuen tantiaquidotedishun: Bëchi bec cho. Cuna naimëdeque, caquien 9bëchi bëbuedën: Padi. Mibi meniac cuna uesadtsiashe. Aid uesadan shubun puduedabi nuquitedi inchëshquiocnoc nidenquio ictsiaque. Piucquid menequin bëchi cushtoquid yano nidshun baded cushtometan, caposh. 10Adoac bëchi bedec nidambien chido bedtanec dada choposh. Chosho isash bëdambuen tantiaquido aton tabote taboshon chido bedtanec choquid bëquedash aidobëd nidposh. Adash puduedshun puduedtiapimbo icnuc shëcuë bëtashte shëcnandoposh. 11Adnubien bëdambuen tantienquio icbuedo bëchi bedtanec chochoposh. Chochoshon shëcuë shëcnandoacsho istuidshun: Shëcuë shëcne, buchi. Ubitedi puduednu, 12caquien chido bedquidën: Padi. Umbi isacmaidombo mibitedi nec, caposh.
13Umbi chuibued tantiashun chido icsambuen tantiaquido tanenda. Ubi chote uëshë tantiadenquio icnuc: ¿Nëbida cun Icbo chopeba? quequin ubi bëdambuen tantiec umbi chiacpadec bëdambuec tabadta, quepondash Esus abëd icquido chiec.
Utsi chiacbimbuen aton icbon piucquid daëd uate chiaid
(Duc. 19.11-27)
14Adshumbic Nuquin Papan namiacnoshon bëdambuen nate tantiamenuen Esusën utsi chiacbimbuen chuiuapondash. Nidaid utsi yacno nidnun aton piucquid dadpen dayun uaquidën aton iuabo chochomeshun: Ubi piucquid daëd uashunta, quequin chuiposh. 15Nëidën bëdambuen tantiaquid icquin cun piucquid ubi daëd uashuntsiash, queshun aton iua piucquid 5 midted meneposh. Adshumbic utsitsen 2 midted meneposh. Adshumbic utsi un midtedi meneposh. Aden menianec icbo uanno nidposh. 16Adnubien piucquid 5midted bedbuedën aton matsesën nacpadombuen piucquid daëd uanuen utsibo menequin iuecshun ambi meniondaid daëd uaid beduaposh. 5midted iccondaidi 5midtedbidi beduaposh 10midted icnuc. 17Adembidi piucquid 2midted meniondaidën 2midbidi daëd uaposh 4midted icnuc. 18Padnuen un midted menebuedën chieshquin aid daëd uainquio icquin ambi uëdëshcaid shëcuën nauedquin piucquid un midtedtsëqui ompoposh.
19Iuecquio ictanniash choshombien icbon ambi piucquid meniondaido aton iuabo chuituidposh. ¿Atotsi nao? caquien 20ambi 5midted meniondaidën: Is icbo. Mimbi ubi meniondaidtedbidi daëd uaombique. Nëbi mitsana 10midted iquec, caquien 21icbon: Ai, cun iua bëdambocquid mibi nec. Umbi daëdpactsëc meniondaidi daëd uaquin umbi chiacpadombuen mimbi bëdambuen nac. Nëbi dadpen namequid icta. Ubëd cuishonquec tabadec cho, caposh. 22Adnubien aton iua ambi piucquid 2midted meniondaid choshon: Is, icbo. Mimbi 2midted meniondaid daëd uaombi. Nëbi mitsana 4midted iquec, caquien 23icbon: Ai, cun iua bëdambocquid mibi nec. Umbi chiacpadombuen naquin mimbi cuna daëduaque. Nëbi mibitsen dadpen namequid icta. Mibitsen ubëd cuishonquec tabadec cho, caposh.
24Adnubien piucquid un midted meniondaidtsen choshon: Icbo, utsinabëta mimbi nitsinacmaid utsina bedbanquid mibi icsho isash: Chushcanushe, quiash dacuëdec tsadtenniobi. 25Adec dacuëdampambo icquid icsho mibi dacuëdënquin mimbi meniondaidted piucquid ompoquin chococaondambi. Në mimbi meniondaidtedtsëqui bëombi, caquien 26icbon: Cun iua icsambocquid yec chieshquidquio mibi nec. Umbi chiacpadombuen nambo mimbi iquec. Ubi caic: Ancanquidquio icquin ubi chushcanushe, queshun 27nuquin matsesën nacpadombuen umbi meniondaid piucquid sauedte yacno nidshun ¿atotsi queshun nauedtanenquio icco? Adoacsho choshon aid daëd uaquin sanaid bedtsenombi, caposh. 28Adshumbic aton iua utsi chuiquin: Chieshquidëna bedshuntanquin piucquid 10midted dayun uaquid mene, cac meneposh. 29Naden naimbi. Umbi chiacpaden naquin daëd uacsho issun atona daëd uaquin menendambi, queposh aton icbo. Adoshombic umbi chiaid tantiesa icquin chieshquin daëd uambocsho issun umbi menebued bedshunendambi, queposh aton icbo. 30Aid iua tantiesa yec chieshquid icsho cuidquin inchëshquio yacno netan cac netanac natiaquiec shëta chëquëdëshquequiec shubiquiendac, quepondash Esus.#25.30 Aden ambi matses mëyadtequid yacno nësecac natiambo iquendac, quepanëdash Esus abëd icquido chiec.
Matses abitedishun naid cuidnun chuite chiaid
31Adshumbic Esusën padpiden abi chote chuiuapondash: Matsesën Tishaid yec abi yacnouësh abëd icquidobëd choec: Abitedishun Icbombueni nec, quiash bëchamauampambuec choequi cun tsadte dapa bëdamboshëcquidën tsadtoquin abitedimbo ismendambi. 32Adshumbic matses abitedimbo chochomequin datsidadmendambi. Aton icbon nëish iua obecabëta cabada tsinacacbimbuen naindambi: 33Matsesën aton nëish iua obeca abiuc tsaduntanquimbi copioc cabada tsadunendac. Adombuen naindambi.#25.32-33 Ese. 34.17-20 tantiaquin nëid daëd dada uapanëdash. Chotaquën Onqueten dada uaid Esequied ista. Isadaidbon aton nëish iua obeca caid: Bëdambo iquec, capanëdash. Aton nëish iua utsi cabada caic: Bëdapactsëc iquec, quequin abi ushmiacno daquënë uaidën obecauidquio tabadmequin daquënë uaid utsin cabada dayun uapanëdash.
34Adshumbic Abitedishun Icbombo icquin abiuc icquido ubi tantiaquido naden chiendambi: Cun Pan mibi bëdambo icmiaido neque. Ubëdi tabadec cho. Matses uabi yec ëndenquimboshë mibitedi caic: Aido ubi tantiaquido icmeshun ubëdi bëdamboshë yacno tabadmendambi, quequin Cun Pan tantiamiaido yec ambi namiacno ubëdi bëdambuec tabadec cho, caindambi, quepondash Esus. 35Adshumbic naden chiendambi: Mimbi ubi bundoacsho pemedennec. Acte bundoacsho adembidi mimbi ubi acmedennec. Mimbi isacmaidquio icshobi mimbi min shubun ubi iuedtednec. 36Cun dashcute nibëdsho mimbi ubi dashcute menedennec. Nëncuenash uënëstiadtsëcquio icsho ubi tantiec mibi datsadtennec. Quënën tsadunac tsadsho mimbi ubi istandennec, caindambi.#25.35-36 Isa. 58.6-10bëta Ese. 18.7 tantiaquin nëid daëd chuipanëdash Esusën. Chotaquën onqueten dada uaid Isa. 58.6-10bëta Ese. 18.17 isbanta. 37Adoaquien ubi tantiec bëdambuec tabadquidon: Tantiadenquio icnuc mimbi chuipec, icbo. ¿Bundoacshodambi mibi pemedionda? Mambi mibi pemiambo iqueyoc. Mambi mibi acte bundoacsho acmiambo iqueyoc. 38¿Umbi isacmaidquio icshodambi mibi iuedtionda? Mambi padambo iqueyoc. ¿Dashcute nibëdshodambi mibi menedionda? Mambi padambo iqueyoc. 39¿Mibi nënec uënëstiadtsëcquio icsho isashtabi mibi datsadtionda? ¿Quënën tsadunac tsadshodambi mibi istanionda? Mimbi tantiadenquio icnuc chuipec, quequin ubi chiendac. 40Adoac naden abitedishun Icbombo icquin chiendambi: Tantia. Mibitedi chuinu. Umbi chiacpadombuen atona nibëdquido utsibon bëdambuen istiapimbocquido mimbi nashundednec. Aden ubi nashunacbimbuembi mimbi aido nashundedneque. Ubëdi tabadec cho, caindambi.
41Adoshombic Abitedishun Icbombo icquin ubi tantiesabo yec cun copioc tabadquidotsen naden chiendambi: Nuquin Papan cuidtequido icquin mibi icsaid ënte bunenquio icbuedo mibitedi neque. Nuquin Papan Mayan Icsa Satanasbëta podobitsi icsabo cuidacno ënëdenquio yec chian annëdënquiacno nid, caindambi. 42Bundoacsho mimbi ubi pemenquio ictennec. Acte bundoacsho mimbi ubi acmenquio ictennec. 43Mimbi isacmaid icshobi mimbi ubi iuedenquio icquin cacunmedennec. Dashcute nibëdsho issun mimbi ubi menenquio ictennec. Nënsho isash mibi ubi datsadenquio ictennec. Quënën tsadunac tsadsho mimbi ubi istannenquio ictennec, caindambi. 44Aden chiaquien: Tantiadenquiocnoc mimbi chiec. Pete bundopash, quequin tantienquio iccondambi. Acte bundopash, quequin tantienquio iccondambi. Umbi isacmaid icshobi mibi isambo iquembi. Min dashcute nibëdsho mibi isambo iquembi. Mibi nënsho isambo iquembi. Mibi quënën tsadunaid tantiambo iquembi. Tantiadenquio icnuc mimbi chuipec, quequin ubi tantiesabon chiendac. 45Adoac naden chiendambi: Atona nibëdquido nashunenquio icquin ubibi nashunenquio yacbimbuen umbi chiacpadombuen naisabo mibitedi neque. Nuquin Papan icsaido cuidacno nid, caindambi. 46Adoac aido icsambuec tabadquido ënenquio icquin cuidacnombo nidnubi bëdambuec tabadquido Nuquin Papa yacno ënëdenquio yec tabadendac, quequin Esusën chuipondash.
Currently Selected:
Mateo 25: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.