LUKA 17
17
Na tasi
(Mt 18.6-7, 21-22; Mk 9.42)
1O Jesu ki vi tangara na kariana, ki vi: “Ga arâ me tare na marâ, ga hagavotarira na enoni igê na tasi. Ma ki era ngavê tanga na enoni, i hagavotarira na enoni igê na tasi! 2I era ngavê tanga na enoni, i hagavotaria na ani gi tage ma na enoni purua ngegê igê na tasi. Ma ki koro tanga hete, ga baroa na apena bagahê raha igê na riona ma ka kunia i asi. 3Mu hinaru!
“Manga na goamu, ma ki tasi, gu ramonia. Ma manga vi ngaia, ma ki urusi parongana, gu bonotenia. 4Manga ngaia, ma ki erasigo hagarako igê na tangiana gi tage, ma ki arâ me tare i pasimu, ki vivi, ‘Be hagakorokoro tangago,’ ngekana ki tuguhigo, go bonotenia na bagatauhana tangago.”
Na tongesuriha
5Na aposotolo ka vi tanga na Araha, ka vi: “Gu hagarahagi na tongesuriha iamami.” 6Na Araha ki arami, ki vi: “Manga vi na tongesuriha iami, ma ki raha manga na kere maana sisite era na apinige, igamu kamu girara ma mu bonasia na apinige raha ikê, kamu vivi, ‘Gu ahapiri râ ma ku ura kere ataha i avoa ma ku mauri i ngekana!’ Ma na apinige ngekana ki têtê viteami.
Na ta ki tuguhia na enoni tagara
7“E vora re na hitangimi, ma ke nahunia na enoni tagara, i hikiru, se i bâbâsurira na sipi. Matena ngaia ki atata me tenia na mu, ki hega, igo vari ko vi tanga, ko vivi, ‘Râ nga me ku ngê?’ 8I asa vê. Igo ko vivi ma hete, ‘Gu hagamako me noga na ngêra, ma hemuri ko kahu hagesuru bâkoro, ma ko migirâ me na ngêra, matena gê ngêngê ma kê totono. Ma hemuri ko kahu ngêngê nogamu.’ 9Na araha ki visia koro vari na enoni tagara iana, suria i katogi ma na marâ, i visigi tanga? Mareha. 10Ki tagenana ma manga igamu. Matena mu tanugi na marâ hato, ga bani visigi tangagamu, igamu kamu vivi, ‘Igia ki na enoni tagara, na enoni purua ma; igia ka bani tagarahigi ma na marâ, i tuguhigia.’”
O Jesu ki hagamavora na mane asiahu tangahuru gi tage
11Igê na râha iana o Jesu tanga i Jerusaleme, ngaia ki râ i guputerua i Samaria ma i Galilea. 12Ngaia ki banu noga i ta na hinua ma ki merahetarahu na mane asiahu tangahuru gi tage. Ngaira ka ura hagatê. 13Ngaira ka ngere, ka vi: “Jesu, Araha, gu takigami!” 14O Jesu ki bâsira ma ki vi tangara, ki vi: “Mu râ i pasita na mane ni vogasiha ke bâsigamu!”
Matena ngaira ka râ, na apeta ka mavo i tara. 15Na veretage na hitangita ki aporo me tanga o Jesu, matena ngaia i rigia so i mavo na apena, ma ki tamasi raha, ki visia raha God. 16Ngaia ki aba so i maana o Jesu ma ki visia koro. Na mane ngekê ki na Ai ni Samaria. 17O Jesu ki tamasi, ki vi: “Na mane tangahuru gi tage ka mavo. Ma i he nga na veresiva? 18Tanu hega, ngaia getea ma na mahuara ikê kani aporo me, ma ki visia koro God?” 19Ma o Jesu ki vi tanga, ki vi: “Gu aharaga ma ku râ. Na tongesuriha iamu ki hagamavogo.”
Na râha me iana God na Araha
(Mt 24.23-28, 37-41)
20Tani na Pariseo ka hagatea o Jesu, ka vi: “I na keta kani page arâ me igê God, hanana i marungira na enoni?” Ma ngaia ki arami, ki vi: “Na Arahanga iana God ki pe arâ me igê na tarani, mu bâsigi. 21I asa ta na enoni, vi ge vi, ‘Bâ ngaia ikê,’ se, ‘Ngaia ikana!’ Renia na Arahanga iana God ki bani oga i pasimi.”
22Ma ngaia ki vi tangara na kariana, ki vi: “I page arâ me na matena, bevoana mu page obania igê, vi gamu bâsia na tangiana gi tage ma i na tangiani iana o Karena Enoni, ma ki mareha. 23Tani ka page vi tangagamu, ka vivi, ‘Bâ ikana!’ Se ‘Bâ ikê!’ Ma siana kamu arâ kamu geria. 24O Karena Enoni ki page voravora me igê na matena ngekana manga na marangea, i mave i vaveraro ma ki hêni takiria na vavearo ma na ano. 25Ma hagenago ki tuguhira na enoni, ga goga i na matena i ngekê, viga hagamamasiaga apena bâraha ma ka kikitenia. 26Na tarani, ga bani oga i na matena iana o Noa, ka page gâga nikâ igê na tangiani iana o Karena Enoni. 27Ngaira hato na enoni ka ama ni ngêngê nga ma ka ama ni totono nga, ma na mane ma na gete ka ama ni auragi atana mavê, mataro me igê nga na tangiana o Noa ki banu igê na haka, ma na Maganuha Raha ki râ me, ma na enoni hato ka tono ka me. 28I page manga na matena iana o Loti. Ngaira hato na enoni ka ama ni ngêngê nga, ma ka ama ni totono nga, ma ka ama ni vurivuri nga, ma ka ama ni hagavuri nga, ma ka ama ni hasihasi nga, ma ka ama ni totora ruma nga. 29Igê na tangiana, o Loti i pania i Sotomo, na gi ma na hê karekare ni sivi ka agorata me tenia na vavearo manga na rangi, ma ka nahuira hato ka me. 30Na tangiana, i page voravora me igê o Karena Enoni ki page manga ngekana nikâ.
31“Na mane, i gâga igê na agua ni hagabobonga i ruma iana igê na tangiana ngekana, siana ki bêbanu igê na kiboru iana, hanana vi toregi na marâ iana, ga tâ igê. I tagenana ma na mane, i tagara i mu; siana ki aporo tanga na ruma iana. 32Mu takusia na gete iana o Loti! 33Manga na enoni, ma ki uhungia, vi hagatahia na mêrihana marena, ngaia page hagatasia. Ma ki manga na enoni ma ki hagatasia na mêrihana, ngaia ki page hagatahia. 34Be vi tangagamu: Igê na bungiana ngekana na mane gi rua karu page tâ karu mauru igê na bea gi tage. God ki page torea râ na mane gi tage, ma ki page pania so na ruata na mane. 35Na gete gi rua karu page taketake na ngêra. God ki page torea râ na gete gi tage, ma ki page pania so na ruata na gete. [36Na mane gi rua karu page tagara i mu. God ki page torea râ na mane gi tage, ma ki page pania so na ruata na mane.]” 37Na kariana ka hagatea, ka vi: “I he, Araha?” O Jesu ki arami, ki vi: “Na ahetaronga ka page hakuhaku me igê na agua, i tâ igê na gahuana na marâ, i meme.”
Currently Selected:
LUKA 17: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific