LUKA 16
16
Na mane i gari tamana
1O Jesu ki vi tangara na kariana, ki vi: “Ta na mane ruruguha ki hagêguria ta na mane, ki bâsurigi na haga iana, ma na enoni ka rangania, vi ngaia ki erasigi na haga iana na araha iana. 2Ngaia ki unia banu, ma ki vi, ‘Na ta kanigê rongoa renigo? Inê kê obania, go segegi so na ara ni haga, i hura ma na ani, ga banu me, igê na matena go bâsurigi na haga iaku, renia inê kê hatungigo tenia na tagaraha iamu!’ 3Na mane ki tako i obana, ki vi, ‘Na araha iaku ki sugi hatungiê tenia na tagaraha iaku. Na ta be katoa? Inê kê pe ramoramo maninga, hanana vi ve hikiru, ma kê maki, vi ve baganunungi. 4Hoi, inê kê girara na tarana, gê page katoa! Ma hemuri, matena gê hatohato tenia na tagaraha iaku, inê kê page nahunira na tamaku, ga page uniê i pasita.’
5“Tahema ngaia ki unira tatage banu me na enoni hato, ga kaone i pasina na araha iana. Ngaia ki vi tanga na ani, i hagenago banu me, ki vi, ‘Gi hita ka na kaone iamu tenia na araha iaku?’ 6Ngaia ki arami, ki vi, ‘Na tangarê gi tage na taramu na oile ni olive.’ Na mane, i bâsurigi na haga, ki vi tanga, ki vi, ‘Na pepa na kaone iamu kani ikê. Gu oga so ma ko segea so na taramu tangahuru gi rima.’ 7Ma ki banu me nikâ tani. Ma ngaia ki hagatea, ki vi, ‘Ma igo, gi hita na kaone kani iamu?’ Ngaia ki arami, ki vi, ‘Na rehagaro na paike na raisi.’ Na mane, i bâsurigi na haga, ki vi, ‘Na pepa na kaone iamu kani ikê. Gu segea so na paike tangarê ge varu.’ 8Na mane, i bâsurigi na haga, ki hagahagaparu, ma na araha iana ki vi, vi ngaia ki kare kato teha ngavê. Renia na enoni, ga vanasigi na marâ ni maveta, ka kare kato teharira na kariana God.”
9Ma o Jesu ki tamasi nikâ, ki vi: “Hoi, be vi tangagamu: mu garigari tamami renigi na ruruguha ni maveta, hanana God ki unigamu banu i pasina, matena ga hatohato na ruruguha. 10Na anima na enoni, ga hagêguritogo renia igê na kere tarani sisite, ngaira ka page hagêguritogo renia nikâ igê na tarani raha. Ma na anima na enoni, ga pe hagêguritogo renia igê na kere tarani sisite, ngaira ka page pe hagêguritogo renia nikâ igê na tarani raha. 11Hoi, manga ga pe hagêguritogo renigamu igê na ruruguha ni maveta, tanu hega kaniga girara, vi ga hagêguritogo renigamu igê na morana na ruruguha? 12Ma ki manga ga pe hagêguritogo renigamu igê na nahuninga iana ta na enoni, o ti kaniga page vategamu na nahuninga iami maremi?
13“I asa ta na enoni, vi ge tagara tangarerua na araha gi rua. Ngaia ki ruhia tani ma ki takuia tani; ngaia ki tari suria tani ma ki kikitenia tani. I asa iami, vi gamu tagara tangarerua God ma na haga.”
Tani na tamasinga iana o Jesu
(Mt 11.12-13; 5.31-32; Mk 10.11-12)
14Na Pariseo ka rongogi na tarani hato ngegana, ma ka rurusia o Jesu, renia ngaira ka vanasigi na haga. 15O Jesu ki vi tangara, ki vi: “Igamu nga na enoni mu vi, vi igamu kamu râ surigi na ramata i maata na enoni, ma God ki giraragi na parongami. Renia na marâ, na enoni ka hanetasia, God ki ruhia.
16“Na Ramata iana o Moise ma na segesegeha iata na poropete ka bani oga mataro me na matena iana o Joane Batisita. Ma ki haganega tenia i na matena ngekana, ikê ke ateate renia na Taroha Koro renia na Arahanga iana God, ma na enoni hato ka uhungia nga, vi God ke marungira. 17I mataku tangarerua na vavearo ma na ano vi garu magahuru, ma ki pe mataku, vi ge hagamagahurua na kere marâ sisite era igê na Ramata i na Buka Apuna.
18“Na anima na mane, i kasia na gete iana ma ki auragia na gete getea, ngaia ki gamogamo; ma na mane, i auragia na gete, i kasia o vaniana, ngaia ki gamogamo.
Na mane ruruguha mo Lasaro
19“Hoi, ta na mane i rurugua. Ngaia ki tuguni renigi na gahu i bâkoro era, i raha na meni, ma ki magoto tare i na ara ni tangiani. 20Ma ki oga nikâ i ngekana ta na mane i matareha, o Lasaro ka na atana. Ngaia ki babasu na apena. Na tamana ka torea tare ma ka hagâgasia hagarangia na maa ni ruma i ruma iana na mane ruruguha. 21Ngaia ki nanasi, vi ge vatea na anunugani na ngêra, ga anunu so, matena i magoto na mane ruruguha. Ma na o ka arâ me ma ka naminamigi na babasu iana.
22“Na mane i matareha ki me, ma na angelo ka merâ i pasina o Abarahamo igê na magotoha i pasina God. Na mane ruruguha ki me, ma ka naka. 23Ngaia ki hatamigi bâraha na mamasiaganiha i na agua ni hagaitangiha. Ngaia ki atakê ma ki bâsia râ hagatê o Abarahamo ma o Lasaro ki oga henia. 24Ngekana ngaia ki ngere, ki vi, ‘Vaemaku, Abarahamo! Gu takiê, ma ku hagatora o Lasaro, ke anumia na kakêna i ve, ma ke hagamagarisia me na meaku, suria inê kê hatamia bâraha na mamasiaganiha renia na gi ikê.’
25“Ma o Abaramo ki vi, ‘Kareku, gu takusia aporo na matena go gâga mênga igê na maveta. Suria na matena ngekana ka tarahugo na ara ni marâ koro hato, ma ka tarahua o Lasaro na ara ni marâ era. Ma i ngekê ngaia ki vagevage ikê, matena igo ko hatamia na mamasiaganiha. 26Ma ta na marâ nikâ: na tarihu ki voasigia heri, ma ki hagabarasigami, vi gami tarê vê i pasimu, ma nikâ i hagabarasigo, vi gu tarê me i pasimami.’ 27Na mane ruruguha ki vi, ‘Manga ngekê, vaemaku, inê kê nungigo, gu hagatorangenia o Lasaro ke râ i pasina o mama iaku. 28O vesiku gi rima kaniga goga i ngekana. Go hagatorangenia ki arâ ma ki haganunura, hanana siana ka arâ me nogata ikê i na agua ni mamasiaganiha!
29“O Abarahamo ki vi, ‘Ngaira ka bani nahunigi na segesegeha iata o Moise ma na poropete. Ngaira ka girara ga haganunura. Na vesimu ki ararira viga têtê viteata.’ 30Na mane ruruguha ki arami, ki vi, ‘Mareha, vaemaku Abarahamo, i bara. Manga vi ta na enoni, i mauri aporo tenira na enoni, ga me, ma ki arâ i pasita, hoi, ngaira ka girara ga page urusi parongata era.’ 31Mo Abarahamo ki vi, ‘Manga vi ngaira, ma ka usi, vi ge tê viteata o Moise ma na poropete, ngekana ki asa iata nikâ, vi ge tê viteana na enoni getea, henaka vi ngaia ki mêri aporo tenira na enoni, ga me.’”
Currently Selected:
LUKA 16: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific