Geenesis 26
26
Isaac quishacari Guerar tiacajinia
1Jiyacaritij, majaari miasano quiniu quiquiaari cuno jiyajinia Isaac tii quiriquiaani. Naa quiquiaarijaariuhuaj Abraham quishacarijia. Naacuatej, Isaacri Guerar tiacajinia pacuquiaari tii na quiniuria. Cuno tiacajinia quijiaari Abimeelec. Nojuajaari Filisteocuaca camarnu quijia. 2Isaac quishacari cuno tiacajinia, Pueyasoori nocua muetaquiaari. Naa na sequereeri:
—Maja Egipto jiyajinia pacunu. Quiocua jiyojeseequia cutara tee cua sequenutaniya quiajaniyacuajani. 3Quiarijiani, nio jiyajiniaja quia quiri janiya cuaara quia sequerohuajaatijia. Majaari puerenu. Janiyacuajaari quiata quiyani. Janiyari maninia quia miiniutianiyani. Nio jiya quiaa tii quiyani, janiyari puetunu nio jiyajanaa niquitionutaniya quiajaniyani, quiocuajinio caneno pueyajaajanio. Janiyari naa tohuatenutaniya seetanujuanaa cua sequesano quia que Abrahamni. 4Quiocuajinio caneno pueyapue canijiariquiano jiyanohuanijia juhua jiya cajiniocua quijia riyaja. Nojori jiyaranoori puetunu nio jiyajanaa, nojoriiria cua niquitiosano. Naajuhuaj, puetunu mijiria quijia pueyapuejanaari maninia miishaariquiano quiocuajinio caneno pueya seera. 5Quia shipininio Abraham tojiniuucuacuaa nera cua sequesano, janiyari naa maninia miiniutianiyani. Nojuajaari puetunu cua sequesanojuanaa miijia quijiajuhuaj. Naajuhuaj, Abrahamri nerano cua niishitiojosano tojijia quijiajuhuaj. Maja sesa na miiniuria, cua rootasano tojijia quijiajaariuhuaj.
6Isaacri naacua jiyojequiaari Guerar tiacajiniatej. 7Saniniuujia cuno Guerar tiacajinijinio pueyani, nojoriiri niishiniu panijia casaate Rebeca Isaacrani. Cunora naa Isaac nequesotatuquiaariiri:
—¿Casaate Rebeca quiarani?
Isaacri puerequiaari cuno pueya na sequenura Rebecaari necocua. Rebecaari maaji maniniu quijia. Naacuatej, Isaacri tama niishiriojoquiaarijaaja, “Janiya jaara nio pueya sequereni, Rebecaari cua niquio, nojoriiri cua niquioocuaji cua motunutaniya.” Cunora cuno pueya sequereeri Rebecaari na rimiatu.
8Isaacri jiyacari tiijia jiyojequiaari quiniu. Tamonu juuca Abimeelecri na tia tacuhuajiniji shootiariquiaa. Jiyacaritij saaja Isaac niquirii necocua Rebeca cacanuujiyanoori. 9Naa Abimeelec niquiniuucuatej, Isaac jiiquiootereeri nocua na niniuuria. Isaac jaara nocua niquiaari, naa na sequereeri:
—Cuno maajiquiiri quia niquiocuacuaja. ¿Naatejaaratej? ¿Casaara quia sequecanucuaraarani “cuno maajiiri cua rimiatu?”
Isaacri naa riucuaree Abimeelectej:
—Tama janiyajaarijia coojiajinia sequecanuni, “Janiya jaara sequereni nio maajiiri cua niquio, pueyari nocua cua monutaniyacujua.”
10Abimeelecri naa Isaac riucuareequij:
—¿Casaara naa quia sapojorucuaari? Quiaatucua taa sequereni quia niquiocua jaara jiuriasaare quia niquiaraja. Quiaa maara naa miitiriucuaa sesa canaa pueyajataj.
11Naacuatej, Abimeelecri puetunu na tiacajinia na jiitiasano pueyajanaa piriyojoquiaari naatej:
—Niquiriyatu niajaniyajinijinio jaara taajetere nio pueyano necocuajaajanio, cuno pueyano cuaara mosaaria.
12Isaacri cuno marijiara natoojoquiaari. Pueyaso naacunuucua nojuaja, nera moriquiaari maniniaari. Naacuatej queraatia paatijioquiaari na natoojosanojinijiiri. 13Isaacri jiyanohua casamiriaca pueyanora quiquiaari. 14Jiyanohua queraatia borrecohua jiitiajaari, queraatia juyacajuhuaj, queraatia nera poonijionaa pueyajaajanio. Naacuatej puetunu cuno tiacajinijinio Filisteocuacaari Isaac jiitiasanoocua jiaatiajaca. 15Na que Abraham rishishacarijia tariucuacaanu, Abrahamra poonijionaa pueyari pueyamaanu mohuaca pacaretacojua riuriataquetuquiaari nojori jiuurioosacari cariiquia jiyajinia mohuaca nojori pajesacari. Nojoriiri nojori cuariria na jeenucuaquiaari. Abraham shaajenu nuhuaji, cuniquijinio Filisteocuacaari cuno cuari mishiquiojoquiaari. Nojoriiri jiya jiyarequetaquiaari mii, maja socua cuno cuari quiniuria. Cuno taucuacaari naa miitiuquiaaritij jiyanohua casamiriaca, jiyanohua seyaraca Isaac quiniuucua.
16Tamonu juuca Abimeelecri socua naa sequequiaari Isaactej:
—Niiquiji quia quiaare. Quia quijiara quia pajare tamaqui. Quiaari taquiya jiyanohua casamiriacacua socua canaajiniji.
Currently Selected:
Geenesis 26: arl
Highlight
Share
Copy
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.