Geenesis 25
25
Secaja pohuatasano
(Geen 25.1-6)
[Necocua Sara shaajenu nuhuaji, Abrahamri socua camiquiaari Queturaa jiyanishano. Nojuajaari Abrahamra muetuquiaari socua. Cuno pojoriicuajinio caneno pueyapueeri socua jiyaca camarucuara quiquiaari tama na jiitiasano pueyatajaaja.]
Abraham shaajesacari
7Abraham saniniuujia, nojuajaari ciento setenta y cinco marijia shocotejoquiaari. 8Na nuhuaji, tojetaarucuajanaa jiyanohua saaquianoori socua shaajequiaari. Naa coqueseequiaari tariucuacaanu na supuetanaari. 9Necohuari na niaquiaari, Isaac, Ismaelnio. Nio pojoriiri na shipininio niatuquiaari Macpelaa raajinia. Cunoori Mamre jiya jamatu tamaji pananu muetasamaji. Cuno cuhuariquiaari tariucuacaanu tahue Soohar niyanu Efroon cuhuariquia quijia. Cuno pojoriiri Hitita taucuaca quijia. 10Abrahamjanaacuajaari cuno jiya nee masequiaari Hitita jiyanishano taucuacajiniji. Naacuatej, Abrahamri tama na masesano cuhuariquiajiniajaaja niasaaquiaari necocua Sara shuriucua. 11Na shaajenu nuhuaji, Pueyasoori neyanu Isaac miiquiaari maninia. Na que Abraham shaajenu nuhuaji, Isaacri “quijiajuhuanaja cua niquijia” cuari shuriucua jateequiaari quiniu.
19Nioori Abraham niyanu Isaacjiniji pohuatasano. 20Isaacri tariucua cuarenta marijia shocotejonu quiquiaari na camishacari Rebeca. Rebecaari Betuel niyatu quijia. Na nanuuri Labaan. Nojoriiri Padaan-aram jiya jamatujiniji Arameocuaca jiyanishano pueya quijia. 21Rebecaari maja na naata muetunu quijia neyacara. Naacuatej neyaca Isaacri Pueyaso masequiaari neco Rebecaacuara. Pueyasoori Isaac masesano tojiquiaari. Naacuatej, Rebecaari manajeree. 22Caapueya manajequiaariiri. Na manajesano caapueyari na nucua jiniacuma miriyojotaja. Naacuatej, Rebecaari naacua sequereequij: “Janiya jaara naa pueyaracaanu naquiya miiriquianoni, shaajetashuyareeraquij.” Nojuajaari naacua Pueyaso masequiaari nojuaja na tonura casaara naa naquiya na miyani. 23Pueyasoori saaja naa riucuaquiaari Rebecatej:
—Quiaari querajaa queraatia pueyapue camarucuarano manajeya. Naacuatej, nojoriiri juhuacarijia quia jiniacuma miaquetoojiya nojori quia royaquishacarijia. Niquiriyatu nojorijinijinioori na cumaaca tojitiriquiano tarajanu. Naacuatej, jiyapueranuuri na nuhuajishana tojijia quiriquiano.
24Jiyacaritij, jaara tari quiquiaari Rebeca noosacari, caapueya rooreeri. 25Coteeno muetanoori noshanaja quiquiaari. Tojetaarucuajanaa noshanaca cajacaracajuhuaj. Na que na nucuajaajanio, nojoriiri na jiyaniquirii Esauu. 26Na nuhuajijia muetamaajaariuhua tarajanu. Niquiquiojuata quiariquiaa tarajanu Esauu nojuaari. Nojuajaari cunora jiyaniquishaaree Jacob. Rebeca roosacari caapueyani, neyaca Isaacri jiyacari tariucua sesenta marijia shocotejonu quiriquiaa.
27Caapueyari maashiquiitiaquiaari. Esauu quishacari tariucua mashaja, nojuajaari cuanitianu maniniu quijia. Tarajanu Jacob saniniuujia, nojuajaari juhuajaniya suhuortujinia maniniucuaja quiniu. 28Isaacri neyanu Esauu panijia jiyanohua, na miaquejonuucua neyanu cuanitiananujiniji. Rebecaari saniniuunia neyanu Jacob panijiaaja.
29Tamonu juuca, Jacobri sumaturiquiaa. Tarajanu Esauuri jiyacari shaa tiuquiriohua cuanitianujiniji, jiyareta puequeenajajuhuaj. 30Jiyacari naa sequeree tarajanu Jacobri:
—Sanajanaa, cucua quia jiyanoori. Quera cusoya cua miaajaanijia. Cuno naatuu quia sumatuujiniji quiria quia taquiri.
Esauuri naacua jiyaniquishiya Edomtajuhuaj. Edomri sequeya naatuuca.
31Tarajanu Jacobri saaja naa na riucuaree:
—Sanajanaa, quiaa jaara paniri, coteenu quiarijiaja cua jiyaterecuarajaj juhua pa que jiyapueranu cua quiniuria quia niti.
Secaja pohuatasano
(Geen 25.31)
[Tariucuacaanu pueyari jiitiquiaari, na que jaara shaajequee, neyanu jiyapueranuuri queraatia socua na que casami camarura quiquiaari na nuhuajishanaajiniji.] 32Esauuri tarajanu sequeree:
—Quiaacuajaari cua niquiya, janiyari quera cua miaajaa cusoyani. Naacuatej, cuno pa que jiyapueranu quiniu paniniuni, cunoori najuhuana quiria.
33Jacob tojishacari naa tarajanu Esauu sequesanotej, naa tarajanu sequereeri:
—Sanajanaa, seetanujuanaa cua sequere. Quiarijiaja cua jiyatere juhua pa que jiyapueranu cua quiniuria quia niti.
Jiyacaritij, tarajanu Jacob sequeree seetanujuanaari:
—Quiarijiani, janiyari maja pa que jiyapueranuni. Quiaacuajaari quiarijia juhua pa que jiyapueranujua.
34Naa nojori pocoojonu nuhuajitij, Jacobri tarajanu Esauu niquitioree pan, porootujiniji naatuu na sumatuujaajanio. Esauuri juhuajaniya miaqueree; raturohuari. Sanerohuari. Juhuajaniya canujiyarohuari. Naa na miiniuucuatej, nojuajaari tama samiritiaquiaarijaaja na que jiyapueranu na quiniu. Majaari quenaaja na tacaaniu quiquiaari tarajanu na jiyatenuucua juhua na puerana na quiniuria.
Currently Selected:
Geenesis 25: arl
Highlight
Share
Copy
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.