Ta Kəla gír yá̰a̰ gə̄ 15
15
Nə́ɓā əhɔ madə̄ naā kə Abəram
1Gō yá̰a̰ gə̄ ń noō tə́ anī, Kɔ́ɔ̄ɓē ndɔ̄bə̄ Abəram ɔr̄ najə̄ seneé ədan na:
Abəram, ī-lōō ɓōĺ na mā i der yāí. Yá̰a̰ kəndā nja i ngá̰ý jīḿ tə́ kadə̄ m-ā m-ə̄ndań njaí. 2-3Abəram tél ədan na:
Kɔ́ɔ̄ɓē Nə́ɓā yāḿ, ā ādə̄m̄ yá̰a̰ i yā rāań rí? Ngōnə̄ḿ gətóo, adə̄ nge kənge yá̰a̰ ndəbāḿ i nge kəla yāḿ Eliejer kə́ Damas. 4Anī Kɔ́ɔ̄ɓē ədan na:
I ni n a tél nge kənge yá̰á̰ kə́ ndəbāí tə́ ní alé, ba i ngōn̄ ń ā ójən ní. 5Kɔ́ɔ̄ɓē teē kə Abəram ndágá ba ədan na:
Á̰a̰ loo kə̄ dɔɔ́. Ré ásə́ tə́da tə́yō̰ gə̄ ń noō anī, ī-tə́dádə́. Kɔ́ɔ̄ɓē əda Abəram ɓáý to̰ na:
Deē a asə tə́dá ngán kaaí gə̄ alé, tītə̄ ń deē asəń tə́da tə́yō̰ gə̄ alé ní ō.
6Abəram taā kem Kɔ́ɔ̄ɓē, adə̄ i tām̄ ń noō tə́ n Kɔ́ɔ̄ɓē rāānəń de kə́ súmūú tə́ ní. 7Kɔ́ɔ̄ɓē ədan na:
Mā i Kɔ́ɔ̄ɓē, nge teē seí kɔ̄ɔ́ Ur, dɔ nang kə́ Kalde tə́ yā kadī dɔ nang ń toō. 8Abəram tél ədan na:
Kɔ́ɔ̄ɓē Nə́ɓā, i yá̰á̰ rí n a ɔjəm̄ kadə̄ m-ā m-ə́nge dɔ nang ń toō ní? 9Kɔ́ɔ̄ɓē ədan na:
Əhɔ mandə man̄g kə́ ɓāl̄ mətá ō, kó̰o̰ bə̄yā̰ kə́ ɓāl̄ mətá ō, bal batə̄ kə́ ɓāl̄ mətá ō, dér ndaa ō, ngōn̄ dér dum ō, ī-reēń ādə̄m̄. 10Abəram əhɔ dā̰ gə̄ ń noō malang, njár̄də́ danaá ba ɔy tə́ndādə́ ta naā tə́. Ba yel̄ gə̄ tá ni njár̄də́ alé. 11Māl̄ gə̄ jə̄ngān̄ dɔ nīń dā̰ gə̄ ní tə́, banī Abəram tə̄ɓādə́ kɔ̄ɔ́.
12Ta mbang kudə tə́ anī, ɓīī rāā Abəram, adə̄ ɓīī ɓīī kə́ gōn əsō. Anī ɓōĺ kə́ ngá̰ý rāān. 13Kɔ́ɔ̄ɓē ədan na:
Majə kadə̄ ī-ger̄ yá̰á̰ ń toō kə gōó: Ngán kaaí gə̄ a ndin̄ dɔ nang kə́ i dɔ nang yādə́ aĺ tə́. A rāān̄də́ ɓəlo tə́ ō, a rāān̄ kumdə́ ndoō tə́ ō, ɓāl̄ ɓú sɔ́. 14Ba m-ā m̄-gān̄g sarya dɔ gír de gə̄ ń a rāān̄də́ ɓəlo tə́ ní, adə̄ a teēn̄ kem ɓəlo tə́ kə yá̰a̰ kənge kə́ ngá̰ý. 15Banī ḭ̄, ā ī-tɔgə ɓə́ga ō, ā ī-ndi kə rɔ̄nelēé bátə́ kadə̄ óy āwń ɓádá gō kaaí gə̄ tə́ ō. 16Ngán kaaí gə̄ kə́ nge ko̰ sɔ́ a télən̄ yā reē loo ń toō tə́ laā, tām̄ majaĺ yā *Amor gə̄ asə kadə̄ m̄-tə̄ɓańdə́ kɔ̄ɔ́ aĺ ɓáý, tɔdɔ̄ mān̄ dɔ loon alé.
17Dan ń mbang udə kɔ̄ɔ́ á loo risə til nding ní anī, yá̰á̰ kə́ to tītə̄ hor miī kə́ əɓa sa guy guy ō, ta ndo̰ hor kə́ unjə̄ bəlim bəlim ō, mānə̄n̄ mbo̰ō̰ dā̰ gə̄ ń njárə̄n̄də́ naā tə́ ní tə́. 18Ndɔ̄ ń noō tə́ Kɔ́ɔ̄ɓē əhɔ *madə̄ naā kə Abəram. Ni-ədan na:
M-ādə̄ ngán kaaí gə̄ dɔ nang ń toō ń əla gír bā kə́ Ejiptə tə́ bátə́ ugə̄ń Opəratə ń i bā kə́ bo ní tə́ ní. 19Dɔ nang yā Keni gə̄ yā Keniji gə̄ yā Kadəmon gə̄ 20yā Het gə̄ yā Periji gə̄ yā Repay gə̄ 21yā *Amor gə̄ yā Kanaan gə̄ yā Girgas gə̄ yā Yebus gə̄ ní, m-ādə̄ ngán kaaí gə̄.
Currently Selected:
Ta Kəla gír yá̰a̰ gə̄ 15: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad