Ta Kəla gír yá̰a̰ gə̄ 14
14
Abəram ō, mban̄g gə̄ ō, Melkisedek ō
1Dan ngeé ń noō tə́ ní Amrapel mban̄g kə́ Sinear ō, Ariok mban̄g kə́ Elasar ō, Kedor Laomer mban̄g kə́ Elam ō, Tidal mban̄g kə́ Goim ō, 2rɔ̄ɔ̄n̄ Bera mban̄g kə́ Sodom ō, Birsa mban̄g kə́ Gomor ō, Sineab mban̄g kə́ Adəma ō, Semeber mban̄g kə́ Seboim ō, mban̄g kə́ Bela ń i ɓē kə́ Soar ní ō. 3Mban̄g gə̄ ngeé ń toō əngen̄ naā i wól loo kə́ Sidim tə́ ń bā katə̄ i tū tə́ ngɔlaā ní. 4Kedor Laomer ndi dɔdə́ tə́ ɓāl̄ kutə gidə i jōó. Ba kem ɓāl̄ kə́ nge ko̰ kutə gidə i mətá tə́ anī nin̄ mbātə́nən̄ kɔ̄ɔ́. 5Kem ɓāl̄ kə́ nge ko̰ kutə gidə i sɔ́ tə́ anī, Kedor Laomer nin̄ kə mban̄g gə̄ ń seneé ní aw̄ rɔ̄ɔ̄n̄ Repay gə̄ Asətarot Karnaim ō, rɔ̄ɔ̄n̄ Susi gə̄ Ham ō, Emi gə̄ Sabe Kiryataim ō, 6rɔ̄ɔ̄n̄ Hori gə̄ dɔ mbal̄ yādə́ kə́ Seir tə́ bátə́ ugə̄nəń El Paran ń i kadə dəla loo tə́ ngɔr ní ō. 7Gō tə́ anī nin̄ tél reēn̄ En Misəpat ń i Kades ní, ba rɔ̄ɔ̄n̄ Amalek gə̄ dɔ nang yādə́ tə́ malang ō, *Amor gə̄ ń ndin̄ Hasason Tamar ní ō. 8Anī mban̄g kə́ Sodom ō, mban̄g kə́ Gomor ō, mban̄g kə́ Adəma ō, mban̄g kə́ Seboim ō, mban̄g kə́ Bela ń i ɓē kə́ Soar ní ō, aw̄ ran̄ nodə́ tə́ wól loo kə́ Sidim tə́, 9kadə̄ rɔ̄ɔ̄n̄ Kedor Laomer mban̄g kə́ Elam ō, Tidal mban̄g kə́ Goim ō, Amrapel mban̄g kə́ Sinear ō, Ariok mban̄g kə́ Elasar ō. Mban̄g gə̄ sɔ́ ndigən̄ rɔ̄ɔ̄ mban̄g gə̄ mí. 10Bəlo bitum#14.10 Bitum: Á̰a̰ī Tkg 11,3. i ngá̰ý wól loo kə́ Sidim tə́. Mban̄g kə́ Sodom ō, mban̄g kə́ Gomor ō, a̰ȳn̄ naā adə̄ teē tə́sōn̄ tū tə́. Gotə gə̄ a̰ȳn̄ naā ɓɔ̄ɔ̄n̄ rɔ̄də́ dɔ mbalá. 11Ngé tetə rɔ̄ɔ̄ gə̄ ɔyn̄ yá̰a̰ kənge kə́ Sodom ō, kə́ Gomor ō, kōō kə́ tū tə́ gə̄ ō malang, ba aw̄n̄. 12Lot ngōn̄ ngōkó̰o̰ Abəram ń ndi Sodom ní aw̄n̄ seneé ō, ɔyn̄ yá̰a̰ kənge yān gə̄ malang ō.
13Deē kógə̄ḿ dan ngé gə̄ ń a̰ȳn̄ naā tə́ ní aw̄ əda Abəram ń i Hebəro ní najə̄ ní. Abəram ndi i kem kāgə̄ sén gə̄ yā Mamre tə́. Mamre tá i *Amor. Ni i ngōkó̰o̰ Esəkol ō, Aner ō. Nin̄ mətá mbak əhɔn̄ *madə̄ naā kə Abəram. 14Loo ń Abəram oō kadə̄ əhɔn̄ ngōn̄ ngōkó̰o̰n ɓəlo tə́ anī, ɔy de kə́ ɓēé looneé gə̄ ɓú mətá kə kutə kógə̄ḿ kə kalən kə́ sɔ́sɔ́, adə̄də́ yá̰a̰ rɔ̄ɔ̄, ba sōn̄g gō mban̄g gə̄ ní bátə́ ugə̄ Dan. 15Ni-kēgə̄ ɓūtə̄ de gə̄ yān gə̄ naā tə́ yā rɔ̄ɔńdə́ ndɔ̄ɔ́. Ni-tetədə́ rɔ̄ɔ̄ ba ngɔ̄də̄də́ bátə́ ugə̄ sedə́ Hoba ń ra i dām̄ Damas kə́ ko̰ó̰ tə́ ní. 16Ni-taā yá̰a̰ kənge gə̄ ń ɔyn̄ ní malang, téləń. Ni-tél kə Lot ń i ngōn̄ ngōkó̰o̰n ní kə yá̰a̰ kəngen gēé ō, kə dəyá̰ gēé ō, kə kósə de gēé ō.
17Dan ń Abəram tetə Kedor Laomer nin̄ kə mban̄g madə̄n gə̄ rɔ̄ɔ̄ ba a tél kum kə̄ ɓēé ní a, mban̄g kə́ Sodom teē tə́nī tan wól loo kə́ Sabe tə́ ń a ɓārə́n̄ na i wól loo yā mban̄g ní.
18Mban̄g kə́ Salem ń rīn na i *Melkisedek ní adə̄ reēn̄ kə mápa ō, kasə *nduú ō. Ni i *nge tun̄ yá̰a̰ yā Nə́ɓā kə́ dɔɔ́. 19Ni-tɔ́r̄ tan dɔ Abəram tə́, əda na:
Ādə̄ Nə́ɓā kə́ dɔɔ́ sa̰y ngá̰ý ń i nge kəndā dɔ rā̰ ō, dɔ nang ō, ní rāā majə kə Abəram. 20Ādə̄ de gə̄ tɔ̄ȳn̄ Nə́ɓā kə́ dɔɔ́ ń əla madə̄ ba̰ā̰í gə̄ kem jīí tə́ ní. Ba Abəram ɔr̄ dɔ yá̰a̰ malang kə́ nge ko̰ kutə adə̄n. 21Mban̄g kə́ Sodom əda Abəram na kə adə̄n de gə̄ ba kə ngɔ̄m̄ yá̰a̰ kənge gə̄. 22Abəram tél əda mban̄g kə́ Sodom na:
M-ə́la jīḿ kə̄ dɔɔ́ ta kum Kɔ́ɔ̄ɓē Nə́ɓā kə́ dɔɔ́ sa̰y ngá̰ý tə́, ni ń i nge kəndā dɔ rā̰ ō, dɔ nang ō ní. 23M-ā m-úń yá̰a̰ yāí kógə̄ḿ alé. Ngōn̄ kəlā aĺ ō, kəlā sākə̄rā aĺ ō, na sōgə́ ə́da na ādə̄ Abəram yá̰a̰ kənge. 24M-ā m̄-ngɔ̄m̄ yá̰á̰ kógə̄ḿ tām̄ yāḿ tə́ alé. Ba i yá̰á̰ ń balsáa gə̄ əsan̄ ní ō, núsə yá̰á̰ kə́ tām̄ yā Aner ō, Esəkol ō, Mamre ō ń aw̄n̄ seḿ tə́ ní tá ngóy. Nin̄ kɔ́ gə̄ a ɔyn̄ kum yādə́.
Currently Selected:
Ta Kəla gír yá̰a̰ gə̄ 14: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad