Matiu 7
7
Jẹ́apụ Sịbị Ḅẹ́rẹ́kọ Dienyẹ
(Luk 6.37,38,41,42)
1<<Jẹ́apụ sịbị ḅẹ́rẹ́kọ ma, Tamuno sọ ị sịbị ḅẹ́rẹ́kọbịgha ḅara. 2Ḅẹẹ Tamuno ị sịbị ḅẹ́rẹ́kọbẹm i jẹ́apụ sịbị ḅẹ́rẹ́kọ ḅara, i pa tọ́ọ jẹ́apụ pịrị ḅara anị ḅara ma anịị nnị pa tọ́ọ ị pịrị bẹnyẹ.
3<<I tegó i numboru owitụ́wọ tọ́rụ́ ḅụ fịnị ẹ́pẹ ma dighi kụ́ma ị tọ́rụ fịnị sị ikiḅa ma ị sáá nyáná anị pịrịgha? 4Ị tọ́rọ́pa dugho ị numboru pịrịbẹ ḅẹẹ, <Ḅoo sị a ẹ́pẹ ma si ị tọ́rụ,> anịsáa ịrị sị ikiḅa nyánam i tọ́rụ. 5Ọmịnị mmẹẹ́ a tọ́rụ kingiapụ, parị sị ikiḅa ma sii ị tọ́rụ́ anịsáa ị ibima nyẹ árịbẹm sị i numboru tọ́rụ́ ḅụ fịnị fu ma si.
6<<Tọ́ntọ́ nyẹ pa obiri pịrịma, ịḅụ nyẹ́la nyẹ pa gbi kóróma oporopo pịrịma. Ị́ ọkọ mịẹmịẹ nnị ḅụọ pa anị nangabẹm sị pịghị sị ị kákọ́sima.
Gbíla, Dọghụ Pịghị Gboloo
7<<Gbíla n pịghị anị pa ị pịrịbẹm; dọghụ ị pịghị dọghụḅobẹm; gbolo ḅụ́pọ́ ma sọ findi ị pịrịbẹm. 8Gbíla ḅo gonyẹ́ gonyẹ́ nyánáḅobẹm dọghụ ḅo dọghụḅobẹm, gbolo ḅo ḅụ́pọ́ ma findi n ḅọ pịrịbẹm.
9<<Ọmịna bie tụọ amịna tụ́wọ fịtúrú bii bẹ, n ḅo warị dapịrị pa n ḅọ pịrị? 10Anịgha ḅọ́rọ́ tụwọ ma nji bim, n ḅọ ododó pa tụ́wọ ma pịrịbẹ? 11Ḅọ́rọ́ ọmịnị anịsáa siiapụ n ḅẹ́sọ, nimim ọmịnị ibi dienyẹ pa die ọmịna awọ pịrị pịrị ḅara, ọmịna sobie Daḅọ anịị ibi dienyẹ pa ọ ḅara biiapụ pịrịbịghaḅọ! 12Anịgosi, nyẹ gonyẹ́ gonyẹ́ ḅụ, mịẹ jẹ́apụ pịrị i dọghụ ḅara sị nnị mịẹ ị pịrị, mịma anịị ólóghó ma na ikiakoroapụ ma dughoarị nyẹ.
Kpápụ́ Na Gbẹ́rẹ́rẹ́ Opu Ḅụ́pọ́
(Luk 6.37,38,41,42)
13<<Kpápụ́ opu ḅụ́pọ́ ma ḅụ ḅọ́rọ́ sọọ, tegó túminị́ daa gúlúgúlúmaarị opu ḅụ́pọ́ ma finjim asọ ma sọ pịghị sárásárám, tọghaapụ anị pịghị anị bie ḅọ́rọ́arịapụ. 14Kụ́ma túminị́ daa muu duma ḅụ súúarị opu ḅụ́pọ́ ma ịrụm asọ ma sọ kpápụ́m, boghaapụ anịị anị dọghụ pághámaḅoapụ.
Sị Lighilighi Ḅoo Anị Suaarị Sịmgbọlụ Ḅụ
(Luk 6.43,44)
15<<Ọmịnị ọ ḅụ ẹbị epele ikiakoroapụ ma gosi, nnị ọ dámáḅobẹm ánáná oju apara sua kụ́ma sughubie nnị piri obiri. 16Nnị suarị sịmgbọ́lụ ḅụ ḅọ́rọ́ ị́ nnị lighilighiḅobẹm. Ị ine grepụ kịẹ ḅobịgha nangi nangi nangi sị ḅụ anịgha fịgị kịẹ ḅoo nangi ngóngó ḅụ. 17Anị gbẹ́rẹ́ ḅara ma, ibi sị gonyẹ́ gonyẹ́ ibi sịmgbọlụ suam, kụ́ma sii sị sii sịmgbọ́lụ suam. 18Ibi sị ine sii sịmgbọ́lụ suabịgha, sii sị ine ibi sịmgbọlụ suabịgha. 19Ibi sịmgbọ́lụ suagha sị gonyẹ́ gonyẹ́ n pẹ́lẹ́gbibẹm sị pa fịnịbie gbi sua. 20Mịị ḅara ma, nnị sua sịmgbọ́lụ ḅụ ḅọ́rọ́ ọmịnị n lighilighiḅobẹm.
A Ị Nimi Sọ Nimigha
(Luk 13.25-27)
21<< <Inyanaḅọ, Inyanaḅọ> pa i sịapụ mamgbagha ásẹ́mẹ́kiri ma sọbẹm, kụ́ma ị́yẹ́ Daá sobie fịnịḅọ ma binyẹ mịẹḅọ gonyẹ́ gonyẹ́. 22Tọghaapụ i ḅẹbẹm anị éné ma ḅụ, <Kị́nị́nyánáḅọ, Kị́nị́nyánáḅọ! Wamịnị ị́yẹ́ ẹ́rẹ́ ḅụ ikiakorogha, pịghị ị́yẹ́ ẹ́rẹ́ ḅụ sitẹ́mẹ́ deesi pịghị ḅụ́gbérépuma fịrị nwángị?> 23Anịsáa a dughofindi n pịrịbẹm, <A ị nimi so nimigha. A fịnị angaá sọọ, ọmịnị siiamịẹnyẹapụ!>
Nyẹ́nimi Na Oḅorịsọọ Wárịnámáḅọ
(Luk 6.47-49)
24<<Iyẹ ẹ́gẹ́rẹ́ ma naaḅọ gonyẹ́ gonyẹ́ sị anị mịẹ, a n ḅọ pa nyẹ́nimi wárịnámáḅọ na tọ́mabẹm amịna wárị namaḅọ okpo dapịrị ọgọnọ. 25Iti ma kóróm, mingi warị ḅo dụḅa, kụrọ fọ́rụ́ warị wárị ma ofuro; anị pa bịghịgha, tegó anị anị sughuisé nyánam okpo dapịrị ọgọnọ. 26Kụ́ma mịị ị́yẹ́ ẹ́gẹ́rẹ́ ma náa ḅo gonyẹ́ gonyẹ́ sị anị pa fịrị ḅụ suagha, a n ḅọ pa oḅori wárị namaḅọ na kịkamabẹm, amịna warị namaḅọ onwo ọ́gọ́nọ. 27Iti ma kóróm, mingi ma warị dụḅa, kụrọ fọ́rụ́ warị wárị ma ofuro, anị warị opu ḅara pa bịghị.>>
28Jizọs mịnanyẹ mamgba dugho fama sáá túminị́ kpo ma ori dienyẹ ma nna ḅụ́gbérépumam, 29tegó ọ nyẹ diem kụrọ nyáná ḅo ḅara, nna ólóghó nyẹ́dieapụ ḅaragha.
Currently Selected:
Matiu 7: IBY
Highlight
Share
Copy
Want to have your highlights saved across all your devices? Sign up or sign in
©2024 Luke Initiative for Scripture Translation