Matiu 24
24
Sáá Ma Kunema Pághá Bẹnyẹ
N Tamunowarị ma suma gbibẹm
(Mak 13.1,2; Luk 21.5,6)
1Jizọs Tamunoopuwarị ma wáriso sị nwángị soarị sáá anịị ori ọḅụduaapụ ọ damaḅo nyẹ sị Tamunoopuwarị mamgba tụ́ghụ́ma ọ die. 2Ọ warị n gbíla, <<Ọ mịnga sẹ warị mamgba arịị? A karakárányẹ ma dugho ọ pịrịm, ọmịnị arịbịgha gbẹ́rẹ́ dapịrị jẹ́ ọ́gọ́nọ gbánā ngaa, n nyẹ gonyẹ́ gonyẹ́ suma gbibẹm.>>
Tọ́rụ́siarị
(Mak 13.3-13; Luk 21.7-19)
3Jizọs Olivu Tụ́ndụ́ ọ́gọ́nọ kpọrọfịnịarị sáá, ori ọḅụduaapụ ḅọghu ḅara pa ọ damaḅom. Nnị warị ọ ḅẹẹ, <<Dugho wa pịrị, mịma tẹ́ sa kiriakị bẹ tẹ́ pịghị ị́yẹ́ ḅo bẹ sáá ilíghíma na pịghị sáá ma kunema?>> 4Jizọs pagharam: <<Tọ́rụ́ kịsịma sị árị ḅẹẹ gbẹ́rẹ́ḅọ sọ oḅori pa ị sịgha. 5Ḅẹẹ tọghaapụ ḅobẹm ị́yẹ́ ẹ́rẹ́ ḅụ, dughoarị ḅẹẹ, <Irị anị Krais ma,> sị pịghị oḅori pa tọghaapụ sịịbẹm. 6Ọmịnị ọ́mụ́ gboloma ḅẹ́rẹ́ naábẹm pịghị ọ́mụ́gbi ọwụ náa, kụ́ma omini ma si anị ḅáláfa dighi ọ pịrị ọkọfịnị nyẹ kiriakị nyánam, kụ́ma kunema ma na laagha. 7Sẹ sághị anị jẹ́ sẹ na ọmụ́gbibẹm, amadakiri saghị anị jẹ́ amadakiri na ọmụ́gbibẹm. Ḅuruḅa ḅobẹm na pịghị tuminikiri jighe tọgha ngá ḅụ. 8Mịnanyẹ mamgba anịị tọ́rụ́siarị saghị, yii ọlọ ọ́rụ́ḅọ ḅara.
9<<Anịsáa nnị ọ saghị pịrịbẹm sị nnị ọ pa tọ́rụ́siarịma sị pịghị ọ ḅáa, sẹ gonyẹ́ gonyẹ́ pịghị ọ tarịgháapụ sọbẹm i sịbị gosi. 10Anịsáa ma ḅụ tọghaapụ minini ma wárịsóbẹm si jụghọ jụghọ dẹrịfị sị pịghị jụghọ jụghọ tarịbịgha.
Iruo Ikiakoroapụ
11<<Tọgha epele ikiakoroapụ págháḅobẹm sị pịghị oḅori pa tọghaapụ sịbẹm. 12Ḅẹ́ siiamịẹnyẹ dụḅa wásámabẹm go, tọghaapụ ḅẹlẹma mịnị kụrọbịgha. 13Kụ́ma sẹ kụrọ muu kunema láa ḅo dụaḅọ́rọ́ma nyánábẹm. 14Ḅẹẹ mị ásẹ́mẹ́kiri ma ibi oku ma nnị anị dugho wásámabẹm tuminikiri gonyẹ́ gonyẹ́ ḅụ sị anị onyẹ́sẹ sẹ gonyẹ́ gonyẹ́ pịrị, anịsáa kunema ma ḅobẹm.
Opuma Ḅáláfáma Nyẹ
(Mak 13.14-23; Luk 21.20-24)
15<<Anịgosi ọmịnị árị sị anị sẹ́fịnịarị sáá tọ́ntọ́ yọ ma ḅụ, <Tumḅọ tọ́rụ́ pa árị na ibighaa siinyẹ pilemaarị nyẹ,> nnị ikiakoro Danịẹlị pa dughonyẹ (goo ḅo ḅụ́kọ́rọ́ma akanyaḅo), 16Anịsáa Judiya ḅụ fịnịapụ mangị tụ́ndụ ma ọgọnọ tándị. 17Amịna wárị osu ḅụ fịnịḅọ kóróḅo ma ḅẹẹ n ḅo ḅẹnyẹ ḅẹnyẹ akị dọ́ghụm n ḅo wárịbie. 18Dua ḅụ fịnịḅọ pịghịma sọ ḅo ma ḅẹẹ n ḅọ amịna sua opu bịtẹ akị dọ́ghụm. 19Anị tọ́rọ́fịnị ḅáláfama nyẹ dighi bẹ fúraapụ na ndo pịrịarị ẹ́rẹ́ámáapụ ḅụ ánị éné ma ḅụ. 20Ọ tẹ́ghẹ̄ ḅẹẹ ọmịna mangị kiriakịbịgha oḅuu sáá anịgha Juu Ịnyọ́sárá Éné ma ḅụ. 21Anịsáa ma anịị opu tọ́rụ́siarị sáá, jẹ́ éné jẹ́ éné túminị́ na arịgha nyẹ tuminikiri saghị sáá éné éné ḅo mị́sa ma láa pịghị anị na gbasi bẹnyẹ ofori. 22Nnị ḅọ́rọ́ tọ́rụ́siarị sáá ma gbulumagha gbẹ́rẹ́ḅọ sọ dumabịgha, kụ́ma Tamuno anị gbulumabẹm ọ sẹlẹakịapụ ma gosi.
23<<Anịsáa ma ḅụ dugho ị́ pịrịḅọ fịnịfịnị ḅẹẹ, <Dighi mịị Krais ma!> anịgha ḅẹẹ, <Ori anị ngaa imii!> anị mini akịma. 24Ḅẹẹ epele Krais na epele ikiakoroapụ págháḅobẹm sị opu ilíghíma na ḅụ́gbérépuma fịrịnwangị pa oḅori pa n sẹlẹakịapụ ma sị, ḅọ́rọ́ nnị ine bẹ. 25Dighi, a dugho ọ pịrịmam sáá ma na laagha sáá.
26<<Anịgosi, tumḅọ dugho ọ pịrị pịrị ḅẹẹ, <Ori aningáa imii elesiri ma bie,> pághá muu ma, anịgha ḅẹẹ, <Mịnga ori imii, biebẹ wárị ma bie,> nnị mini akịma! 27Túminị́ ịrụa saghị saghị ngaa ḅoarị so kọrịfịnị ma arịarị ḅara na ịrụa ma tughu tughu ngaa, anịị Tumḅọ yii Tụwọ ḅoo ma fịnị bẹ ḅara. 28Duá fịnị ngaa gonyẹ́ gonyẹ́ anịị ẹ́dẹlẹ kobiri ḅẹ́ ngaa.
Tumḅọ Yii Tụwọ Ma Ḅoo
(Mak 13.24-27; Luk 21.25-28)
29<<Anịsáa tọ́rụ́siarị ma ḅọ́rọ́fáma gbẹ́rẹ́kiri
<< <Ịrụa ma ḅo kánákánábẹm,
akalụ́ sọ mịnị biabịgha;
ḅálōló ma sobie saghị sóghóróbẹm,
baá pa sotọ́rụ ma pịrịarịnyẹ jighebẹm.>
30<<Anịsáa ma ḅụ Tumḅọ yii Tụwọ ilíghíma págháḅobẹm sobie, tuminikiri sẹ ma kúrúkúrúbẹm. Nnị tumḅọ yii Tụwọ ma árịbẹm ọ ḅoarị sáá kụ́rọ na opu ipine ḅụ sobie oḅuto ḅụ. 31Ori opuma fiearị ọdụ pa ori sookumuapụ na fịrịmabẹm, sị nnị ori n sẹlẹakịapụ ma kubiri tuminikiri ínia ọkọlọbị ḅụ, so ma kunema gbẹ́rẹ́ ngaa akị mú jẹ́ láa.
Dawọ Bẹnyẹ Fịgị Sị Ḅụ
(Mak 13.28-31; Luk 21.29-33)
32<<Mị́sa o fịgị sị ma pa nyẹ dawọ: sị bịpị ma lọghụmaẹrẹ sị áyá ányị́nyá ḅẹ́lẹ̄ ma saghị págháḅo, o nimim ḅẹẹ ẹ́rẹ́kụra kikiamam. 33Anị gbẹ́rẹ́ ḅara ma, ọmịna nyẹ mamgba árị sáá, o nimim ḅẹẹ Tumḅọ yii Tụwọ ma ḅoo kikiamam, kikia ḅụ́pọ́ kundu lámam. 34A karakárányẹ ma dugho ọ pịrịm, mị ḅụ́ọ́apụ ma n gbarịgha ḅara ḅụ ḅọ́rọ́sobịgha akị mú mịnanyẹ mamgba kiriakị sáá, láa. 35So na kiri ḅọ́rọ́sobẹm, kụ́ma ị́yẹ́ ẹ́gẹ́rẹ jẹ́ éné ḅọ́rọ́sobịgha.
Gbẹ́rẹ́ḅọ Sọ Krais Ma Ḅo Bẹ Éné Anịgha Énékịẹnyẹ Ma Nimim
36<<Gbẹ́rẹ́ḅọ sọ éné ma anịgha énékịẹnyẹ ma nimigha, sobie fịnị sookumuapụ ma sọ nimigha, Tụwọ ma sọ nimigha, kụ́ma Daḅọ ma ngéré. 37Nuwa éné anị fịnị ḅara anịị anị pịghị fịnị bẹ ḅara Tumḅọ yii Tụwọ ma ḅo ḅẹ́ sáá. 38Opu mingi ma na ḅogha éné biri ma ḅụ túminị́ fị́ na ḅu ḅụ imi, túminị́ ẹ́rẹ́ yaarị pịghị ẹ́rẹ́ pa dee pịrịarị, akị muu Nuwa árụ́ ma ḅụlọ sáá láa; 39Nnị pịghị pághá bẹnyẹ nimigha akị muu opu mingi ma nnị kị́nị́mamgba kpọọrọ so. Anịị anị fịnị bẹ ḅara Tumḅọ yii Tụwọ ma ḅoo bẹ sáá. 40Mmẹẹ́ owiapụ duakiri ḅụ imibẹm fịrịnwangịarị n gbẹ́rẹ́ḅọ ákịbẹm sị isi ngaaḅọ wáriso. 41Mmẹẹ́ ẹ́rẹ́ámáapụ nyẹ́gbẹ́dápịrị pa nyẹ́gbẹ́arị sáá; n gbẹ́rẹ́ḅọ ákịbẹm sị isi ngaaḅọ wáriso.
42<<Anịgosi ọ tọ́rụ́ kiima, tegó o nimigha ọmịna nyánáḅọ ḅoo ḅẹ́ éné. 43Kụ́ma mịma akanyaḅo: ḅọ́rọ́ wárị nyánáḅọ ma nimim fúrúḅọ ma ḅo ḅẹ́ sáá dii ma bie, nwọfịnị ọ dii kurubẹm sị minibịgha sị nnị ọ wárị ḅaufindi. 44Anịgo ịrịsọ tẹ́lẹ́ma nyána tegó Tumḅọ yii Tụwọ ma ḅobẹm ọ tọ́rụ́ pa ọ dighigha sáá.
45<<Tụọ mị́sa nyẹ́nimi pịghị sẹ́kụrọ fịrịnwangịḅọ, amịna nyánáḅọ pa sịbịdáḅọ mịẹḅọ amịna wárị bie sị n ḅọ fị́nyẹ pa ori fịrịnwangịapụ ma pịrị anị karakárá sáá? 46Anị ibi anị fịrịnwangịḅọ ma pịrịbẹm ḅẹẹ ori nyánáḅọ sọḅo sa ori, ori árịbẹm ori fịrịkiri ḅụ. 47A karakárányẹ ma dugho ọ pịrịm ori ọrẹ nyánányẹ mamgba pa ọ ḅara suabẹm. 48Kụ́ma ḅọ́rọ́ ḅẹẹ anị fịrịnwangiaḅọ ma ọ́ siiamịẹnyẹ ḅo, sị warị ọ ḅụ ḅẹẹ, <Iyẹ Nyánáḅọ álála ḅobịgha,> 49sị warị saghị ọ jẹa fịrịnwangịapụ fom sị iru ḅuu tọ́rụ́ḅámaapụ ma na fị pịghị ḅuu. 50Anị fịrịnwangịḅọ ma nyánáḅọ ḅobẹm ori ọ tọ́rụ́ dighigha sáá na pịghị ọ nimigha énékịẹnyẹ ḅụ. 51Ori ọ pa opuma tọ́rụ́siarịmabẹm sị o deepágháma gbeere ngaa ma muu ori na mmẹẹ́ a tọ́rụ kingiapụ, túminị́ owu sị pịghị aka túrú bẹ angaá.
Currently Selected:
Matiu 24: IBY
Highlight
Share
Copy
Want to have your highlights saved across all your devices? Sign up or sign in
©2024 Luke Initiative for Scripture Translation