Matiu 18
18
Dụḅaḅá Ḅọ So ama Ásẹ́mẹ́kiri Ma Ḅụ
(Mak 9.33-37; Luk 9.46-48)
1Anịsáa ma ḅụ ọḅụduaapụ ma Jizọs damaḅom sị gbíla, ḅẹẹ, <<Tụọ dụḅaḅá so ama ásẹ́mẹ́kiri ma ḅụ?>>
2Ọ gbẹ́rẹ́ kálátụwọ sịm ḅẹẹ ọ sẹ nna tórúku. 3Ọ warị ḅẹẹ, <<A karakárányẹ ma dugho ọ pịrịarị ọ dimagha sị dọghụdọghụ awọ fịnị ḅara fịnị ọ jẹ́ éné jẹ́ éné ine so ama ásẹ́mẹ́kiri ma sọbịgha. 4Anịgosi, n ḅo ḅụ siterema ḅo mị tụwọ ma fịnị ḅara fịnị, n ḅo anịị dụḅaḅá ḅo so ama ásẹ́mẹ́kiri ma ḅụ.
5<<Pịghị nwọfịnị kálátụwọ dakóróma ḅọ gonyẹ́ gonyẹ́ ị́yẹ́ ẹ́rẹ́ ḅụ, i dakórómam.
Mịẹsị Tumḅọ Bịghị Bẹ Daádighi
(Mak 9.42-48; Luk 17.1,2)
6<<Kụ́ma ḅọ́rọ́ kị́nị́ i ḅụ minini dọghụdọghụ awọ ma ḅụ gbẹ́rẹ́ḅọ mịẹsị n siiamịẹnyẹ mịẹ, anị ibiḅaabẹm ḅẹẹ nnị opu nyẹ́gbẹ́ dapịrị pa n ḅo kọngọ kpọ sị n ḅọ bilema tọ́rụ́ ogbo.
7<<Anị opuma sị ọ pịrịbẹm tuminikiriapụ tegó anị bie fịnị sị túminị́ mịẹarịnyẹ sị n siiamịẹnyẹ mịẹ! Ọkọfịnị nyẹ ḅo nyánam, kụ́ma tọ́rụ́siarị fịnị anị ḅara sághị ḅoḅọ ma pịrị! 8Ḅọ́rọ́ ị ḅara anịgha i ḅụọ mịẹsị i siiamịẹnyẹ mịẹ, anị pẹ́lẹ́ ḅuuma. Anị ibiḅam ḅẹẹ i ḅara nyanagha anịgha i ḅụọ nyanagha anịgha i ikúlé sị duma gbámásó nyáná, tụ́ma i mmẹẹ́ a ḅara anịgha mmẹẹ́ a ḅụọ nyáná sị nnị i pa ẹ́kpẹ́duaama kọrịbibịgha fịnị ma bie gbi sua. 9Ḅọ́rọ́ i tọ́rụ́ pịghị ị mịẹsị ị siiamịẹnyẹ mịẹ anị sọghụ si, sị anị ḅuuma. Anị ibiḅam ḅẹẹ i gbẹ́rẹ́ tọ́rụ nyáná sị duma gbámásó nyáná tụ́ma mmẹẹ́ a tọ́rụ́ nyáná sị nnị i pa ẹ́kpẹ́duaama ma kọrịfịnị bie gbi sua.
Faá Ánáná Ma Kaḅụ
(Luk 15.3-7)
10<<Árị ḅẹẹ i mị dọghụdọghụ awọ ma ḅụ gbẹ́rẹ́ḅọ dighisimagha. Ḅẹẹ a dugho ọ pịrịm ḅẹẹ nna sookumuapụ sámámgba i Daa ma tórúku arịarị sobie. [11Irị Tumḅọ yii Tụwọ ma ḅom sị a faaapụ ma dụaḅọ́rọ́ma.]
12<<I tọ́rọ́pa kóróma ḅo? Ḅọ́rọ́ gbẹ́rẹ́ owitụ́wọ ánáná sọ́nọ́ a si nyánam, gbẹ́rẹ́nyẹ warị asọ ịrị faá, ori ngịẹ faá sọ́nọ́ a si ma warịsobịgha tụ́ndụ ọgọnọ sị muu asọ irifa nyẹ ma dọghụ?
13<<A karakárányẹ ma dugho ọ pịrịm ọ ḅọ́rọ́ anị dọghụ pághámaḅo ḅo, ori opuma bieḅẹlẹ nyáná anị gbẹ́rẹ́ ánáná tụ́wọ ma pịrị asọ irigha ngịẹ faá sọ́nọ́ a si ánáná, awọ ma pịrịbẹm. 14Anị gbẹ́rẹ́ ḅara ma, ọmịna Daa sobie fịnịḅọ ọ tẹ́mẹ́ sọ tẹ́mẹ́gha ḅẹẹ mịnaapụ ma ḅụ gbẹ́rẹ́ḅọ sọ faá.
Siiamịẹnyẹ Pa I Mịẹ Mịná Owitụ́wọ
15<<Ḅọ́rọ́ ị́yẹ́ mịná owitụ́wọ i miẹsimam, muu ọ mịẹ isima nyẹ ma pa o die, ọmịnị mmẹapụ ogbobie ọ ḅọ́rọ́ ị pughu pughu ị́ ị numboru owitụ́wọ nyanaḅomam. 16Kụ́ma ḅọ́rọ́ o mini ị puughugha gbẹ́rẹ́ḅọ na mmẹapụ akị ịḅụ sua, sị túminị́ ine ḅẹ́rẹ́ ma karakárá nimi ḅẹ́ ḅara mmẹapụ na tẹ́rẹ́apụ na dugho págháma bẹnyẹ ḅụ. 17Ọ ḅọ́rọ́ mini n pughugha, dugho pa sọsị ma pịrị, ọ ḅọ́rọ́ pịghị mini sị sọsị ma sọ pughugha anịsáa Tamunonimighaḅo ḅara anịgha ásẹ́mẹ́kiri ósó igbii daa ḅo ḅara pa n ḅo na mịẹ. 18A karakárányẹ ma dugho ọ pịrịm, ḅẹẹ mị tuminikiri ọ káká nyẹ gonyẹ́ gonyẹ́ sobie sọ nnị anị kakábẹm, ọ pịghị fiima nyẹ gonyẹ́ gonyẹ́ mị tuminikiri sobie sọ nnị anị fiimabẹm.
19<<Pịghị jẹ́ pa, a dugho ọ pịrịm: ḅọ́rọ́ tuminikiri ọmịnị mmẹapụ bịpị pa gbẹ́rẹ́nyẹ ḅụ sua binyẹ gonyẹ́ gonyẹ́, i Daá sobie fịnịḅọ ma anị mịẹ ọ pịrịbẹm. 20Ḅẹẹ mmẹapụ na tẹ́rẹ́apụ na kubiri sáá ị́yẹ́ ẹ́rẹ́ ḅụ, anị ngaa a nnị na imi.>>
Tọ́rụ́kụrụkụ́rụ́ Nyánágha Fịrịnwangịḅọ Kaḅụ
21Anịsáa Pita warị Jizọs damaḅo sị ọ gbíla, <<Kị́nị́nyánáḅọ, a ndẹa sáá pa siiḅụḅarasi i numboru owitụ́wọ pịrịbẹ, ori i miẹsima sáá? Akị muu sọ́nọ́ma sáá láa?>>
22Jizọs pagharám, <<A sọ́nọ́ma sáá dugho ị pịrịgha, kụma tẹ́rẹ́ si oyi findi, muu sọ́nọ́ma ngá láa.
23<<Anịgosi, so ama ásẹ́mẹ́kiri ma anị fịnị ḅara anịị gbẹ́rẹ́ ámányánáḅọ ori fịrịnwangịapụ sị kobiri ḅo sị ọ́rụ́ḅọ ọ́rụ́ḅọ ọ ḅara ḅọlọ igbii láa ḅara nimi. 24Ọ nyẹ pa ọrụtọ mịẹnyẹ ma saghị sáá, n warị ọ ḅarabie tọgha tọgha igbii akpa ọlọ ḅo pa ọ damaḅo. 25Ori ine gbẹẹgha sáá, ọ nyánáḅọ bịpị pịrịm ḅẹẹ ori na ọ taa, ori awọ na pịghị o nyánányẹ gonyẹ́ gonyẹ́ nnị anị dẹrị sị pa sáá ma gbẹ́ẹ̄.
26<<Fịrịnwangịḅọ ma ọ ḅụ́ọ́sịbị ḅụ sóórókórom ọ tórúku sị ḅẹẹ, <A ị tẹ́ghẹ̄m kẹ́lẹ́ sáá pa i pịrị a pịghị nyẹ́mámgba pa i gbẹ́bẹm.> 27Fịrịnwangịḅọ ma nyánáḅọ warị tọ́rụ́kụrụkụ́rụ́ nyáná ọ pịrị sị ori ọlọ sáá ma gịẹ si, sị ọ wáriso ọ soo.
28<<Kụ́ma anị fịrịnwangịḅọ ma nụ́ngọ pághá sáá ọ ḅo ọ jẹa fịrịnwangịḅọ arịm ọ ḅara kálá igbii nyẹ ọlọḅọ, ine pa fịrịnwangịḅọ tẹ́rẹ́ a akalụ́ igbii gbẹ́ẹ̄ bẹnyẹ. Ori o kum sị saghị ọ pụghọ pọnjị, sị ọ ḅara bi ḅẹẹ, <Ị́ i ḅara ọlọ sáá gbẹ́ẹ̄!>
29<<Ọ jẹ́ a fịrịnwangịḅọ ḅụ́ọ́sịbị pa kiri sóórókoro sị ọ tẹ́ghẹ̄m ḅẹẹ, <Kẹ́lẹ́ sáá pa i pịrị, a pịghị pa i gbẹ́bẹm.>
30<<Kụ́ma o minigha, anịmanakaragha ori ọrẹ akị pa ikóliwarịbie gbi suam akị muu ori ine sáá ma gbẹ́ẹ̄ bẹ sáá láa.>> 31Isi fịrịnwangịapụ pághányẹ ma árị sáá, anị opuma nna ḅụ akụmam, nnị warị dugho nna nyánáḅọ pịrị pághányẹ mamgba.
32<<Anịsáa, Kị́nị́nyánáḅọ ma warị fịrịnwangịḅọ ma sị wárị suu, warị ọ ḅẹẹ, <Ịrị silálá sii fịrịnwangịḅọ i ḅarabie ịrị ọlọ sáá mamgba a gịẹ si ị pịrịm ị i tẹ́ghẹ̄m gosi. 33Ị́ ine tọ́rụ́kụrụkụ́rụ́ nyána ị jẹa fịrịnwangịḅọ pịrịgha a nyáná ị pịrị ḅara?> 34Bieoḅu ḅụ ọ nyánáḅọ ma warị ọ ḅọ́rọ́ma ịkóli warị fịrịnwangịarịapụ ma pịrị ḅẹẹ nnị ọ pa tọ́rụ́siarịma akị muu ori ọlọnyẹ mamgba gbẹ́fama.
35<<Mịị ḅara ma anị ị́yẹ́ sobie Daḅọ ọmịna ḅụ gbẹ́rẹ́ḅọ gbẹ́rẹ́ḅọ mịẹbẹ ḅara ḅọ́rọ́ ọmịnị ọmịna tẹ́mẹ́bie siiḅụḅarasi amịna mị́naḅọ owitụ́wọ pịrịgha.>>
Currently Selected:
Matiu 18: IBY
Highlight
Share
Copy
Want to have your highlights saved across all your devices? Sign up or sign in
©2024 Luke Initiative for Scripture Translation